ئه‌ڤرۆنيوز:

كێشا ئه‌نجامێن هه‌لبژارتنان ل عيراقێ پشتى سوتنا عومبارێن سندووقێن ده‌نگدانێ به‌ر ب قۆناغێن گرانتر دچيت كو پتريا ده‌نگێن ليستا سائيرون ب سه‌رۆكاتيا موقته‌دا سه‌در دوێ عومبارێ دابوون، پێشبينى ژى دهێته‌ كرن بريارا ئه‌نجامدانا هه‌لبژارتنان ژلايێ گه‌له‌ك لايه‌نان بهێته‌ دان، به‌لێ كارڤه‌دانا سائيرون وفه‌تح ديار نينه‌ كا دێ چ بيت وچاوان بيت، بۆ رێگريێ ل په‌يدابوونا گرژيێن زێده‌تر وپێكدادانێ دناڤبه‌را لايه‌نێن شيعى، قاسم سلێمانێ فه‌رماندێ له‌شكرێ قودس يێ ئيرانى گه‌هشته‌ به‌غدا ب مه‌ره‌ما چاره‌كرنا وان گرژيان.

ژێده‌ره‌كێ عيراقى يێ بلند ئه‌ڤرۆ سێشه‌مبى 12/6/2018 بۆ مالپه‌رێ (العربي الجديد) گۆت”پتريا ئه‌و ده‌نگێن ئاگر به‌ربوويێ ل عومبارێن كۆمسيۆنا هه‌لبژارتنان يێن ليستا موقته‌دا سه‌در بوو، له‌وما ئه‌ڤ چه‌نده‌ ژلايێ سه‌درى ڤه‌ ب چو شێوه‌كى يا قه‌بوول كرى نابيت، موقته‌دا سه‌در رێبه‌رێ ره‌وتێ سه‌درى ژى دياركريه‌ كو عيراق يا به‌ر ب شه‌رێ ناڤخوه‌يى ڤه‌ دچيت، ژبه‌ر وێ چه‌ندێ ژى قاسم سلێمانى گه‌هشته‌ به‌غدا تاكو رێ ل پێكدادانێ دناڤبه‌را لايه‌نێن شيعى يێن عيراقى بگريت”.

ل دووڤ پێزانينان، نوكه‌ لايه‌نێن عيراقى ل سه‌ر دو به‌ره‌يان يێن به‌لاڤ بووين، جبوورى وعه‌لاوى وشه‌ش حزبێن كوردى وچه‌ند حزبێن دى يێن عه‌ره‌بى وتوركمانى ل به‌غدا داخوازا ئه‌نجامدانا هه‌لبژارتنان وره‌تكرنا ئه‌نجامێن هه‌لبژارتنێن 12/5/2018 دكه‌ن، ديسا هه‌ر ئێك ژ هه‌ڤپه‌يمانيا سائيرون وفه‌تح ژى ب تمامى ڤێ چه‌ندێ ره‌ت دكه‌ن وده‌وله‌تا قانوونێ ژى ل گه‌ل ڤه‌كۆلينێ يه‌ ل دۆر سه‌خته‌كاريێن هه‌لبژارتنان، به‌لێ هه‌تا نوكه‌ داخوازا دوباره‌ ئه‌نجامدانا هه‌لبژارتنان نه‌كريه‌.

لايه‌ژێده‌ره‌كێ دى يێ عيراقى يێ بلند بۆ وى مالپه‌رى دياركريه‌” دادوه‌ر فائيق زێدان سه‌رۆكێ جڤاتا دادگه‌ها بلند ل عيراق، رێنمايى ئاراسته‌ى هه‌موو دادوه‌ر وشيره‌تكارێن قانوونى وجڤاتا دادوه‌رى ودادگه‌هان وده‌سته‌يا نوونه‌راتيا گشتى كريه‌، كو ب چو شێوه‌كى دكێشا هه‌لبژارتنان دا لايه‌نگيريێ نه‌كه‌ن وبۆ ده‌زگه‌هێن راگه‌هاندنێ نه‌ ئاخڤن ول تۆرێن جڤاكى ژى دا هه‌لويستان ده‌رنه‌برن”.

وى مالپه‌رى دياركر، ئه‌گه‌رێ دوباره‌ ئه‌نجامدانا هه‌لبژارتنان ل عيراقێ به‌ر ب زێده‌بوونێ ڤه‌يه، هه‌تا نوكه‌ ژى يا رۆهن نينه‌ ل ئه‌گه‌رێ سه‌ركه‌فتنا به‌ره‌يێ په‌رله‌مانتارێن شكه‌ستن خوارى دهه‌لبژارتنان دا وليستێن دى، كارڤه‌دانا سه‌در وحه‌شدا شه‌عبى دێ چ بيت، چونكى سه‌در دشێت ب ساناهى جاده‌يا عيراقى ب لڤينيت، هه‌ڤپه‌يمانيا فه‌تح ژى ميليشيێن حه‌شدا شه‌عبى دده‌ست دانه‌ ودشێت بۆ هه‌ر مه‌ره‌مه‌كێ وان ميليشيان بكاربينيت.

ئه‌ڤرۆنيوز:

سه‌ركرده‌كێ شيعى دياركر كو داعش بزاڤان دكه‌ت دده‌مه‌كێ نێزيك دا هێرشێ بكه‌ته‌ سه‌ر به‌غدا وبۆ ڤێ چه‌ندێ ژى چه‌كدارێن خوه‌ ژ سووريێ بۆ عيراقێ ڤه‌دگوهێزيت.

باقر جه‌بر زوبێدى، سه‌ركردێ ديار يێ شيعى كو پشتى 2003 چه‌ندين پۆست وه‌رگرتينه‌ وه‌كو وه‌زيرێ ڤه‌گوهاستنێ ووه‌زيرێ دارايى ووه‌زيرێ ناڤخوه‌يى وپه‌رله‌مانتار، ل به‌رپه‌رێ خوه‌ ل سه‌ر تۆرا جڤاكى يا فه‌يسبووكى به‌لاڤكر” نوكه‌ داعش يا دهێت، هنده‌ك يێ پشته‌ڤانيا وێ يا دارايى دكه‌ن  وه‌كو وه‌به‌رهينانه‌ك ل سه‌ر ره‌وشا سياسى وهه‌لبژارتنێن عيراقێ “.

گۆت ژى” به‌رى نوكه‌ ژى ل سالا 2013 من هوشدارى ژ كه‌فتنا مووسلێ وئه‌نبارێ دابوو، نوكه‌ رۆژانه‌ ل ده‌وروبه‌رێن سامه‌را وكه‌ركووكێ داعشێ لڤين وچالاكى يێن هه‌ين وهێرشان دكه‌نه‌ سه‌ر پۆليسێن فيدرالى وحه‌شدا شه‌عبى، به‌لێ ئه‌و ب توندى به‌رهنگاريا داعشێ دبن”.

دياركر ” داعش يا ب شه‌ڤ ورۆژ كاردكه‌ت بۆ هنارتنا كادر وچه‌كدارێ خوه‌ ژ رۆژهه‌لاتا فه‌راتێ ل سووريێ بۆ ده‌ڤه‌رێن نێزيكى كه‌ركووكێ وده‌وروبه‌رێن سامه‌را بۆ وێ چه‌ندێ ل ده‌مه‌كێ نێزيك دا به‌غدا بكه‌نه‌ ئارمانج”.