ئه‌ڤرۆ نيوز:
ل بێهنڤه‌دانێن رۆژانێن نه‌وروزێ ژبلی كو هه‌موو پشكێن ته‌نگاڤیان 24 ده‌مژمێران دێ د خزمه‌تا خه‌لكی دابن، 48 تیمێن گه‌رۆك و هژماره‌كا تیمێن خوپاراستنا ساخله‌میێ دێ ب كارێ چاڤدێریێ و هشیاریا ساخله‌میێ رابن.
حه‌مزه ره‌زیكی، به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ بو نۆش نیوز دیاركر كو ل ئێڤاریا رۆژا 20/3 تیمێن ڤێراگه‌هشتنێن ده‌ستپێكی یێن سه‌ر ب سه‌نته‌رێ 122 دێ ده‌ست ب كارێ خوه كه‌ن و گۆت: ل رۆژێن نه‌وروزێ 48 تیمێن سه‌نته‌رێ ناڤبری ل هه‌موو جهێن گه‌شتیاری دێ د كاری دابن و خزمه‌تا گه‌شتیاران دێ هێته كرن.
دیاركر ژی كو ل هه‌موو رۆژێن بێهنڤه‌دانا نه‌وروزێ پشكێن ته‌نگاڤیان ل نه‌خۆشخانه‌یان دێ 24 ده‌مژمێران پێشوازیێ ل نه‌خوشان كه‌ن و گۆت: ل گه‌ل ڤێ چه‌ندێ بنگه‌هێن نوبه‌دار ژی دێ رۆژانه كارێ خوه ئه‌نجام ده‌ن.
به‌رپرسێ راگه‌هاندنا ساخله‌میێ ئه‌وژی دیاركر كو تیمێن زێره‌ڤانیا ساخله‌میێ سه‌ر ب رێڤه‌به‌ریا خوپاراستنێ ڤه رۆژانه دێ د كاری دا بن و سه‌ره‌دانا هه‌موو جهێن دكه‌ڤنه ل ژێر كونترولا ساخله‌میێ كه‌ن دا بشێن كونترولا بازاری بهێته كرن و گۆتژی: رۆژانه دو تیمێن ره‌وشه‌نبیری و هشیاریا ساخله‌میێ دێ ل جهێن گه‌شتیاری بن و رێنمایێن ساخله‌میێ ب رێیا به‌لاڤه‌كێن ساخله‌میێ و ئالاڤێن هشیاریێ ل دور خوپاراستنێ ژ نه‌خوشیان و پاقژیێ ب شێوه‌یه‌كێ گشتی پێشكێشی وه‌لاتیان كه‌ن.
نيشاندان
