ئەڤرۆ نیوز، نەوزاد ھلۆری:
چەند رۆژێن بوری ھژمارەکا زۆر یا وەلاتیێن ھەرێما کوردستانێ کو خەلکێ پارێزگەھا دھۆکێ ژی ل گەل دا ھەنە، دخواست وەکو پەنابەر ب رێێن قاچاخ دەبازی ئورۆپا بن، بەلێ ل کەنارێن تورکیا و یونانێ ھاتنە گرتن و پاشان ھاتنە رەوانەکرن بۆ سۆریا و ھەتا نھا چارەنڤیسێ وان نەيێ دیارە.
عەبدوللا مزووری وەلاتيەکێ دھۆکێ یە و ھژمارەکا ھەڤالێن وی د ناڤ وان کەسان دانه یێن کو چارەنڤیسێ وان ل سۆریا نەيێ دیارە بۆ ئەڤرۆ نیوز گۆت: (بەری چەندەکێ ھژمارەکا ھەڤالێن من ل گەل نێزیکێ 200 کەسان ژ ھەرێما کوردستانێ وەکو پەنابەر ب ریێن قاچاخ خواست بگەھنه ئورۆپا، بەلێ ب مخابنی ڤە ژ لایێ زێرەڤانێن سنۆرى يێن تورکیا و یونانێ ھاتنە گرتن و پاشان ھاتنە رەوانەکرن بۆ سۆریا).
زێدەتر گۆت: (قاچاخچی گۆتبوو پەنابەرێن ھەرێما کوردستانێ ھەکە ھوون ھاتنە گرتن بێژنە وان ئەم خەلکێ سۆریێ نه، دێ ھەوە ئازاد کەن و ھێلن کو ھوون دەربازی ئورۆپا بن، بەلێ پشتی کو ئەوان خوە ب سۆری دایە نیاسین ئێکسەر بۆ سۆریا ھاتنە رەوانەکرن و ھەتا نھا چارەنڤیسێ وان نەيێ دیارە و مە ئاگەھداریا لایەنێن شولەژێ ژی کریە، بەلێ چو دیار نینە).
ب گورەی زانیاریێن فیدراسیوونا پەنابەران ل کوردستانێ زانیاری گەھشتینە وان کو ھژمارەکا زۆر یا خێزان و پەنابەرێن ھەرێما کوردستانێ ژ لایێ تورکیا ڤه ھاتينە گرتن و پاشان رەوانەکرن بۆ سۆریا، بەلێ ھەتا نھا ھژمارا وان ناھێتە زانین.
د ماوێ 10 سالێن بوری دا نێزیکێ 250 ھزار وەلاتیێن ھەرێما کوردستانێ وەکو پەنابەر قەستا دەرڤەیێ کوردستانێ کریە و ھژمارەک ژ وان د رێدا تووشی کوشتن و رەڤاندنێ بووینە و ھندەک ژی د دەریا ئیجە دا خەندقینە.
نيشاندان