ئه‌ڤرۆنيوز:
ئێڤارا دوهى سێشه‌مبى ل باژێرێ يه‌نيشه‌هير ل ويلايه‌تا دياربه‌كر ل توركيا ل ده‌مێ هاتنا بارانه‌كا ب هێز، بريسيه‌كێ ل منارا مزگه‌فته‌كێ دا وبۆ ئه‌گه‌رێ ژناڤبرنا پشكه‌كا وێ منارێ وچو زيانێن گيانى ل دووڤ خوه نه‌هێلان.
مه‌همه‌ت چه‌تين، ژ باژێرڤانيا دياربه‌كر بۆ ئاژانسا ئه‌نادۆل يا توركى گۆت” روودان به‌رى بانگێ فتارێ په‌يدابوو كو بوويه ئه‌گه‌رێ ژناڤبرنا منارا مزگه‌فتا (سومه‌ر)”.
ئەڤرۆ نیوز ، زنار تۆڤی :
ئەڤرۆ چارشەمبی 6.6.2018 وه‌زاره‌تا ناڤخوە یا حوکمەتا هه‌رێما كوردستانێ د رێوره‌سمه‌كی دا ل هه‌ولێرا پایتەخت باوه‌رنامه‌یا ئایزۆ یا ستانده‌ردێن جیهانێ وه‌رگرت.
ئه‌ڤرۆ چارشەمبی د رێوره‌سمه‌كی دا ل ئۆتێلا رۆتانا ل هه‌ولێرا پایتەخت ب ئاماده‌بوونا نێچیرڤان بارزانی سه‌رۆك وه‌زیرێن هه‌رێما كوردستانێ باوه‌رناما ئایزۆ 9001 ب وه‌زاره‌تا ناڤخوە یا حوکمەتا هه‌رێما كوردستانێ هاتە به‌خشین.
وه‌زاره‌تا ناڤخوە یا هه‌رێما كوردستانێ باوه‌رنامه‌یا ئایزۆ ژبه‌ر كوالێتییا خزمه‌تێ وه‌رگرتیه كو لدووڤ ستانده‌ردێن جیهانی نه.
ئایزۆ ئانكو رێكخستنا نێڤده‌وله‌تی یا پیڤه‌را كوالێتیێ ، کو باره‌گایێ وێ ل باژارێ جنێڤە ل وه‌لاتێ سویسرا ، ل سالا 1947 هاتیه دامه‌زراندن و ب رێكخستنه‌كا نه‌حوكومی دهێتە هژمارتن ، هەروەسا باوه‌رناما كوالێتیێ ژی دده‌تە وان كۆمپانی و سازیێن كه‌رتێ گشتی و تایبه‌ت ، ئه‌وێن کو مه‌رج و ستانداردێن وێ د كاری دا په‌یره‌و دكه‌ت.
ئه‌ڤرۆ نیوز، نه‌وزاد هلۆرى:
سه‌رۆكێ حوكمه‌تا هه‌رێما كوردستانێ، نێچيرڤان بارزانى د چارچوڤێ رێزگرتن ل فه‌رمانبه‌ر و كارمه‌ندێن وه‌زاره‌تا ناڤخو ل هه‌ولێرێ، دیاركر كو پێدڤیه حوكمه‌تا هه‌رێما كوردستانێ سیسته‌مێ ئه‌لیكترۆنیا رێڤه‌به‌ریا هاتنوچۆنا دهۆكێ ل سه‌ر هه‌ردو رێڤه‌به‌ریێن هاتنوچۆنا هه‌ولێر و سلێمانیێ ژى بجه بينيت و حوكمه‌تێ ئیراده‌یه‌كا ب هێز ژى هه‌یه بۆ چاكسازیێ ب تایبه‌تى د كارگێريێ دا.
نێچيرڤان بارزانى، سه‌رۆكێ حوكمه‌تا هه‌رێما كوردستانێ دیاركر ژى كو پێدڤیه مفا ژ سیسته‌مێ ئه‌لیكترۆنى و چاكسازى بهێته وه‌رگرتن بۆ ب ساناهیكرنا كاروبارێن وه‌لاتیان و گۆت: (حوكمه‌تا هه‌رێما كوردستانێ دخوازیت سیسته‌مێ ب رێڤه‌برنا كاروبارێن وه‌لاتیان وه‌كو هه‌موو جیهانێ مفاى ژ سیسته‌مێ ئه‌لیكترۆنى وه‌ربگریت و ب شێوه‌یێ ئونلاین خزمه‌تێ بۆ وه‌لاتیان بكه‌ت و پێدڤى ب هه‌موو ڤان فه‌رمانگه‌هان نینه و حوكمه‌تا ئه‌لیكترۆنى دێ زێده‌تر خزمه‌تا وه‌لاتیان كه‌ت ب كێمترین ده‌م و كێمترین مه‌زاختى و دوور ژ رووتنى و نها ئه‌ڤ سیسته‌مه ل سه‌ر رێڤه‌به‌ریا هاتنوچۆنا دهۆكێ و ده‌سته‌یا گه‌شتوگۆزارێ ده‌ستپێكریه و دێ به‌رده‌وام بیت ل سه‌ر ڤى جۆرێ سیسته‌مى).
زێده‌تر گۆت: (خه‌لكێ كوردستانێ و پێشمه‌رگێ قاره‌مان و حوكمه‌تا هه‌رێما كوردستانێ د قۆناغه‌كا دژوار دا بۆرين كو ئه‌و ژى شه‌رێ داعشێ و قه‌یرانا دارایى بوویه و ئه‌ڤێ نیشا مه‌دا كو حوكمه‌تا هه‌رێما كوردستانێ ئیراده‌یه‌كا ب هێز بۆ چاكسازیێ يا هه‌ى و هه‌رێما كوردستانێ خودانا سامانه‌كێ مرۆڤاتیێ ب هێزه و ژێرخانه‌كا ئابوورى يا هه‌ى و یا گرنگ ئه‌وه كو ژێرخانه‌كا كارگێریا يا ب هێز ژى هه‌بیت و گرنگه ئه‌ڤ یه‌ك ب سه‌ركه‌ڤیت ، و پێدڤیه مافێن وه‌لاتیان ل به‌غدا ژى بهێنه دابینكرن) .
نێچیرڤان بارزانى دیاركر ژى كو چاكسازى دهه‌موو فه‌رمانگه و وه‌زاره‌تێن حوكمه‌تێ ب تایبه‌تى دوارێ كارگێرى دا یا به‌رده‌وامه و دێ هه‌موو فه‌رمانگه‌هان ڤه‌گریت و گۆت ژى: (پێدڤیه شه‌فافیه‌ت ل داموده‌زگه‌هێن حوكمه‌تێ بهێته‌كرن و به‌رهنگاریا گه‌نده‌لیێ و روتنیێ بهێته‌كرن داكو سه‌ركه‌فتنێن مه‌زن ب ده‌ستخوه‌ڤه بینین و پێدڤیه كاروبارێن وه‌لاتیان بهێنه ب ساناهیكرن و حوكمه‌تێ دڤى واری دا خزمه‌ته‌كا باش كریه و گه‌له‌ك يا گرنگه كو مه گیانێ پێكڤه كاركرنێ هه‌بیت و ببیته به‌رنامه‌یێ كارى).
ئەڤرۆ نیوز ، زنار تۆڤی :
ئه‌ندامەکێ مه‌كته‌با سیاسی یا پارتی دیموكراتی كوردستان ئاشكرا دکەت ، کو حه‌یده‌ر عه‌بادی سه‌رۆك وه‌زیرێن عێراقێ و سه‌لیم جبوری سه‌رۆكێ په‌رله‌مانی كو هه‌ردوو د به‌ره‌یێ شکەستی خواریان دانن ، وان دڤێت وەلاتی به‌ره‌ف ئالۆزیا و بۆشایا د‌ستووری ڤه ببه‌ن.
هشیار زێباری ئه‌ندامێ مه‌كته‌با سیاسی یا پارتی و وه‌زیرێ پێشی یێ دارایی ل عێراقێ د فه‌یسبووكێ خوە دا نڤێسیە ، هه‌ماهه‌نگی دناڤبەرا شکەستن خوارا د هه‌لبژارتنێن 2018 د ئەڤرۆ دا بۆ سوبەهی دێ وه‌كو رۆژێ روونتر لێهێت دناڤبەرا سه‌رۆكێ جڤاتا وه‌زیران عه‌بادی و سه‌رۆكێ په‌رله‌مانێ شکەستن ئینای.
هەروەسا نڤێسیە ، سه‌رۆكێ په‌رله‌مانی و حوکمه‌تێ دڤێت دەمژمێرێ به‌ره‌ف پاشڤه ڤەگەرینن و پرۆسا هه‌لبژارتنێن دیموكراتی یێن وەلاتی شکەسەنێ پێ بینن و وەلاتی به‌ره‌ف ئالۆزیێ و بۆشایا د‌ستووری و قانوونی ببه‌ن ، ب ئەگەرێ خۆپه‌رستتنا وان و داخوازكرنا ره‌تكرنا ئه‌نجامێن هه‌لبژارتنان.
دیسا گوتیە ژی ، شکەستن خواری دێ عێراقێ به‌ره‌ف چاره‌نڤیسەکێ نەدیار ڤە‌به‌ن و دێ باوەریا ده‌نگده‌ران وێران كه‌ن بۆ هه‌ر هه‌لبژارتنەکا بهێت ، لەوما ئه‌وا روو ددەت سه‌رپێچیەکا روون یا دستوور و قانوون و بهایێن دیموكراتیە ل جیهانێ ، لەوما پێدڤیه دادگەه ب تنێ گوهێ خوە ل سكالا و تانه‌یان بگریت ، نه‌كو بریارا حوکمه‌تێ و په‌رله‌مانی.
ئەڤرۆ نیوز ، زنار تۆڤی :
پشتی روونشتنا جڤاتا كۆمسیۆنا بلند یا هه‌لبژارتنان ، بڕیار هاتەدان کو پارێ قه‌وارێن سیاسی بهێتە كێم کرن ، قه‌وارێن سیاسی ژی دێ هێنە پابه‌ند کرن ب پێدانا وی گۆژێ پارەی.
ل خولا پێشی یا په‌رله‌مانێ كوردستانێ هه‌ر قه‌واره‌کێ سیاسی د‌بوو گوژمێ 50 ملیۆن دیناران بدەتە كۆمسیۆنا بلند یا سه‌ربه‌خۆیا هه‌لبژارتنان ، هەروەسا قه‌وارێ پێكهاتێن جۆدا ژی گۆژمێ 25 ملیۆن دیناران ، به‌لێ د كۆمبوونا خوەدا جڤاتا كۆمسیاران بریار دا كۆ ئەڤ گوژمە بهێتە كێم کرن.
کێمکرن ب ڤی جۆری یە، قه‌وارێ سیاسی یێ گشتی ژ 50 ملیۆنان بۆ 30 ملیۆن دیناران هاتە کێم كرن ، قه‌وارێ پێكهاتێن جۆدا و ئه‌رمه‌ن و كلدان و ئاشوور ژ 25 ملیۆنا بۆ 10 ملیۆنان هاتنە كێم كرن.
ئه‌ڤ بریاره ل رۆژا 5\6\2018 دێ چیته وارێ جێبه‌جێكرنێ و هەموو قه‌وارێن سیاسی دشێن ل سه‌ر ئەڤان رێنمایێن نوو بچن.
لدووڤ په‌یره‌وێ كۆمسیۆنا بلند یا سه‌ربه‌خۆیا هه‌لبژارتن و راپرسیێ ل هەرێما كوردستانێ ، دڤێت هه‌ر قه‌واره‌کێ سیاسی بەری هه‌لبژارتنان گوژمه‌کێ پاره‌ی ل بانكێن كوردستانێ وه‌ك گه‌ره‌نتی دانیت.
ئەڤرۆ نیوز ، زنار تۆڤی :
ل رۆژا سێشەمبیا بهێت ل سەنگافورە دێ ئێکەمین كۆمبوونا دناڤبەرا دۆنالد ترامپی سەرۆكێ ئەمریكا و كیم جۆنگ ئون سەرۆكێ كۆریا باكور هێتە ئەنجامدان.
كۆچکا سپی بەلاڤەكریە کو رۆژا سێشەمبی 12-6 ل دەمژمێر 9 سپێدێ ل سەنگافورە دێ ئێكەمین كۆمبوون دناڤبەرا دۆناڵد ترامپی سەرۆكێ ئەمریكا و كیم جۆنگ ئون سەرۆكێ كۆریا باكور هێتە سازکرن.
سارا ساندرز پەیڤدارا سەرۆكێ ئەمریكا راگەهاند: ئامادە كاریێن تەمام هاتینە كرن بۆ كۆمبونا ڤی لوتكەی و پێشكەفتنێن مەزن د دانوستانێن دناڤبەرا واشنتۆن و بیۆنگ یانگ بدەستڤە هاتینە.
دۆنالد ترامپێ سەرۆكێ ئەمریكا راگەهاند : کو ئارمانجا وان د وێ كۆمبوونێدا رامالینا چەكێ ئەتۆمیە ل نیمچە دوورگەیا كۆریا ،لێ هەتا نوکە خشتێ تەمام یێن کارێ وێ كۆمبوونێ نەهاتیە راگەهاندن.
ئەڤرۆ نیوز ، زنار تۆڤی :
پشتی کو حەیدەر عەبادی سەرۆك وەزیرێن عێراقێ راگەهاندی كو لیژنا بلند یا حوکمەتێ هەبوونا سەختەكاریێ د هەلبژارتنان دا ئاشكرا كریە و هژمارەکا رێکاران دەركر و كۆمسیۆن ب بەرپرس ژ كێشان زانیە ، سەلیم جبووری سەرۆكێ پەرلەمانی پێشوازی ل بڕیارێن حوکمەتا عێراقێ كر و پەرلەمانتار بۆ روونشتنا نە ئاسایی یا ئەڤرۆ چارشەمبی گازیکرینە.
لدووڤ بەیاننامەکا نڤێسینگەها سەرۆكێ پەرلەمانێ عێراقێ ، دۆخێ هەڵبژارتنان و ئەو پێشێلكاری و سەختەكاریێن تێدا هاتینە كرن ، ب شێوەکێ نەرێنی كار كریە سەر دۆخێ وەلاتی و تەنگژێن نوو دروست كرینە، لەوما هەموو رێکارێن ئاشكراكرنا سەختەكاریان د بەرژەوەندیا وەلاتی دا دزانین.
پەرلەمانی د بەیانناما خۆدا داخواز ژ پەرلەمانتارێن عێراقێ كریە کو ئەڤرۆ چارشەمبی ئامادەببن د روونشتنا نە ئاسایی ب مەبەستا تەمامكرنا رۆلێ پەرلەمانی بۆ راوەستیانێ ل دژی پرۆسا سەختەكاریێ و یاریكرن ب ئەنجامان و پاراستنا سلامەتیا پرۆسا سیاسی.
تاریق حەرب شارەزایێ قانوونی راگەهاند ، کو هەکە پەرلەمان ب شێت ئەڤرۆ پرۆژە قانوونێ سییێ ژ هەمواركرنا قانوونا هەلبژارتنان تێپەڕ بكەت، دێ بیتە ئەگەرێ پاشکەفتنا پێكئینانا حوکمەتا نوو ، بەلێ تەمامبوونا نیسابی بۆ ڤێ روونشتنێ یا ب زەحمەتە و هەکە ئەڤ پرۆژە بهێتە دەربازکرن دێ ل دادگەها بلند یا فیدرالی تانە لێ هێتە دان.
ئەڤرۆ نیوز ، زنار تۆڤی :
بوفۆن گۆلپارێزێ پێشی یێ یوڤێنتۆس ب ئەگەرێ وێ ره‌فتارا د یاریا ڤەگه‌ریانێ ل قۆناغا هه‌شتێ یا چامیۆنزلیگێ به‌رامبه‌ر دادڤانی ئه‌نجام دای بۆ سێ یاریان هاتە راگرتن.
ئه‌ڤرۆ سێشه‌مبی 5 خزیرانا 2018 فیدراسیۆنا تەپا پێ یا ئورۆپا د به‌یاننامه‌‌كا فه‌رمی دا بریارا سزادانێ بۆ جیانلویجی بوفۆنی ده‌ركر ، ب ئەگەرێ وێ رەفتارا به‌رامبه‌ر دادڤانێ ئنگلیزی (مایكل ئۆلیڤه‌ر) ی ئه‌نجام دای.
ل یاریا ڤەگەریانا چامپیۆنزلیگێ دا ل ناڤا یاریگه‌ها سانتیاگۆ بێرنابیۆ ، دادڤانی ل دووماهیا یاریێ پەنالتیەک بۆ ریال مەدرید هژمارت و تێدا كریستیانۆی گۆل تۆمارکر و ب وێ گولێ یانا شاهانە خوە گه‌هانده قۆناغا بەری دووماهیێ یا چامپیۆنزلیگێ.
جیانلویجی بوفۆن د ژیێ 40 سالیێ دایە ، ل دووماهیا ڤی وه‌رزی و پشتی 17 سالان رێزێن یانا یوڤێنتۆس ب بجه هێلا و هێشتا وێستگه‌هێ داهاتی یێ وی یێ دیار نینه و پشکەک ژ میدیایێن جیهانی چاره‌نڤیسێ وی گۆلپارێزی ب یانا پاریس سانجێرمان ڤە گرێ ددەن.
ئه‌ڤرۆ نیوز:
ئێڤاره دره‌نگى یا ئه‌ڤرۆ چه‌ند وه‌لاتیه‌كێن دهۆك و سێمێل ب مه‌ره‌ما گرتنا ماسیان قه‌ستا سحێلا كر ودو ژ وان درووبارى دا ل ده‌ما گرتنا ماسیان خه‌ندقین،
ژێده‌ره‌كێ ژ هێزێن پێشمه‌رگه‌ى ل سحێلا بو ئه‌ڤرۆ نیوز گۆت: (ئێڤاره دره‌نگى یا ئه‌ڤرۆ چه‌ند وه‌لاتیه‌كێن دهۆك و سێمێلێ ب مه‌ره‌ما گرتنا ماسیان قه‌ستا رووبارێ سحێلا كر و ژبه‌ركو گرتنا ماسیان قه‌ده‌غه‌یه ئه‌وان جلوبه‌رگێن پێشمه‌رگه‌یان كربوونه به‌رخوه ، به‌لێ دو ژ وان ل ده‌ما گرتنا ماسیان خه‌ندقین)
زێده‌تر گۆت: (ئه‌و هه‌ردوو كه‌سێن كو خه‌ندقین ب ناڤێن ( سه‌فین حه‌جى 25 سال و بازید محه‌مه‌د 30 سال ) بوون كو خه‌لكێ دهۆك و سێمێلێ نه ، و ته‌رمێن وان ژلایێ نقومڤانێن زاخو و پێشمه‌رگێن به‌ره‌یێ سحێلا ل روبارى هاتینه ده‌رئینان و ره‌وانه‌یێ نوشداريا داد كرینه ل دهۆكێ)
ئه‌ڤرۆنيوز:
وه‌زيرێ ده‌رڤه‌يێ توركيا، ئه‌ڤرۆ سێشه‌مبى 5/6/2018 راگه‌هاند، هێزێن په‌كه‌كێ يێ چووينه دناڤ باژێرێ سلێمانيێ دا وژلايێچه‌ند گرۆپێن ب سه‌ر ئێكه‌تيێ وبزاڤا گۆران ڤه دهێنه پشته‌ڤانيكرن.
مه‌ولود چاويش ئوگلۆ، وه‌زيرێ ده‌رڤه‌يێ توركيا بۆ ده‌زگه‌هێن راگه‌هاندنێ يێن توركى گۆت” په‌كه‌كه دوژمنا هه‌ولێرێ ژى يه، په‌كه‌كه ژلايێ چه‌ند گرۆپێن دناڤ پارتا تالبانى دا دهێته پشته‌ڤانى كرن، ديسا ژلايێ بزاڤا گۆران ڤه ژى هاتيه پشته‌ڤانيكرن، ل بن سيبه‌را وێ پشته‌ڤانيێ، په‌كه‌كه هاتيه خوار بۆ ناڤ باژێرێ سلێمانيێ”.
ئوگلۆ ئاشكراكر كو ئه‌و ل گه‌ل وه‌زيره‌كێ ئێكه‌تيێ ل حوكمه‌تا هه‌رێما كوردستانێ كۆمبوويه ووى وه‌زيرێ ئێكه‌تيێ بۆ وى گۆتيه كو دناڤ ئێكه‌تيێ دا گرۆپه‌كا بچووك يا هه‌ى پشته‌ڤانى ل په‌كه‌كێ كريه.
خوياكر ژى” ئه‌و ئاخا عيراقێ يه وئه‌ڤ چه‌نده مه‌ترسيه‌كا جدى ل سه‌ر عيراقێ دروست دكه‌ت، ل ده‌ڤه‌را شنگالێ ده‌ركه‌فتن، به‌لێ ب تايبه‌تى ل باكوورێ رۆژهه‌لاتا وێ، ل قه‌نديل پێكهاته‌كێ به‌رچاڤ يێ په‌كه‌كێ يێ هه‌ى، دێ وێ ده‌ڤه‌رێ ژى پاقژكه‌ين”.
نيشاندان