ئه‌ڤرۆنيوز:

به‌رپرسه‌كێ كۆمسيۆنا بلند يا هه‌لبژارتن وراپرسيێ ل هه‌رێما كوردستانێ راگه‌هاند، هه‌تا نوكه‌ 15 قه‌وارێن سياسى خوه‌ بۆ هه‌لبژارتنێن په‌رله‌مانێ كوردستانێ تۆماركريه‌.

شوره‌ش حه‌سه‌ن، رێڤه‌به‌رێ په‌يوه‌ندى وراگه‌هاندنا كۆمسيۆنا بلند يا هه‌لبژارتن وراپرسيێ ل هه‌رێمێ گۆت” پتريا هێزێن سياسى يێن ديار ل هه‌رێما كوردستانێ يێن دناڤ وان قه‌وارێن سياسى دا ئه‌وێن خوه‌ تۆماركرين”.

شوره‌شى دداخۆيانيه‌كا رۆژنامه‌ڤانى دا ئاماژه‌ دا كو ل دووڤ بريارا جڤاتا كۆمسياران، ژڤانێ تۆماركرنا كيانێن سياسى تاكو رۆژا 7/6/2018 يه‌ وژڤانێ پێكئينانا هه‌ڤپه‌يمانيان ژى ل 18/6/2018 ده‌ست پێ دكه‌ت هه‌تا 20/6/2018.

گۆت ژى” ل رۆژا پێنجشه‌مبى 7/6/2018 دكۆنگره‌كێ رۆژنامه‌ڤانى دا دێ ناڤێن وان قه‌وارێن سياسى راگه‌هينين ئه‌وێن خوه‌ بۆ هه‌لبژارتنێن په‌رله‌مانێ كوردستانێ تۆماركرين”.

برياره‌ هه‌لبژارتنێن په‌رله‌مانێ كوردستانێ ل 30/9/2018 بهێنه‌ ئه‌نجامدان.

ئه‌ڤرۆنيوز:

سه‌رۆك وه‌زيرێن توركيا، بينالى يه‌لدرم،  ل باژێرێ هه‌كارى راگه‌هاند، دێ دو ده‌رگه‌هێن دى يێن سنورى ل گه‌ل هه‌رێما كوردستانێ هێنه‌ ڤه‌كرن، دياركر ژى چو جوداهى دناڤبه‌را تورك وكوردان دا ل توركيا نينه‌.

بينالى يه‌لدرم، سه‌رۆك وه‌زيرێن توركيا، ل مه‌راسيمێن بانگه‌شا پارتا داد وگه‌شه‌پێدان بۆ هه‌لبژارتنێن توركيا، گۆت” ئه‌ز ژى كوردم وهوون شانازيێ ب كوردايه‌تيا خوه‌ بكه‌ن، كه‌سێ ماف نينه‌ ژبه‌ركو هوون كوردن ئاخڤتنان بيته‌ هه‌وه‌”.

دياركر ژى” ئه‌م نه‌ڤيێن سه‌لاحه‌دين ئه‌يوبى نه‌، ئه‌م نه‌ڤيێن رزگاركه‌رێ قودسێ نه‌، ئه‌م نه‌ڤيێن ئه‌حمه‌دێ خانى نه‌”.

سه‌رۆك وه‌زيرێن توركيا ئه‌و چه‌نده‌ ژى به‌رچاڤكر دێ دو ده‌رگه‌هێن دى يێن سنورى ل گه‌ل هه‌رێما كوردستانێ هێنه‌ ڤه‌كرن، ئه‌وژى ده‌رگه‌هێ شه‌مزينان – ئوره‌مار وشه‌مزينان – ئالان.

ب ديتنا يه‌لدرمى، ل توركيا كێشا كوردى نينه‌، به‌لكو كێشا پارتيا كاركه‌رێن كوردستانێ (په‌كه‌كێ) يا هه‌ى وگۆت” مه‌ سويند يا خوارى دێ چاره‌سه‌ر كه‌ين”.

 ئه‌ڤرۆ نیوز، نه‌وزاد هلۆرى:

وه‌لاتیه‌ك رابوویه‌ ب ئه‌نجامدانا داهێنانه‌كێ ل سه‌ر موبه‌ریدێ كو ئه‌و ژى كاركرنا موبه‌ریدێ یه‌ بۆ ده‌مێ 24 ده‌مژمێران و بێ كاره‌ب ،خودانێ ئه‌وێ داهێنانى دیار دكه‌ت كو ئه‌و دێ هزرا داهێنانێ فرۆشیت.

سه‌عید چه‌مه‌یى، ئه‌و وه‌لاتیه‌ كو ئه‌و داهێنان درۆستكرى بۆ ئه‌ڤرۆ نیوز گۆت: (ده‌مه‌كێ درێژه‌ ئه‌ز كار ل سه‌ر نووترین داهێنان دكه‌م ل سه‌ر موبه‌ریدێ كو ئه‌و ژى كارپێكرنا وێ یه‌ بۆ ده‌مێ 24 ده‌مژمێران بێى كو كاره‌با هه‌بیت و شیام ب سه‌ركه‌ڤم و نها من موبه‌ریدا خوه‌ یا مال كریه‌ 24 ده‌مژمێر).

 زێده‌تر گۆت: (ئه‌ز نه‌شێم نهێنیا چاوانیا كاركرن و درۆستكرنا موبه‌ریدێ بۆ ده‌مێ 24 ده‌مژمێران و بێ كاره‌ب بۆ كه‌سێ دیار بكه‌م، به‌لێ ئه‌ز داهێنانا خوه‌ دفرۆشم و ب گره‌نتيا 100% بۆ هه‌ركه‌سێ كو بكریت و حه‌زا وێ یه‌كێ هه‌بیت چه‌ند دانه‌یه‌كا ژ ڤێ موبه‌ریدێ درۆست بكه‌ت و بفرۆشیت ب تایبه‌تى بۆ كۆمپانیێن دوارێ كاره‌بایى دا كاردكه‌ن).

 ناڤبرى كو خه‌لكێ چه‌مچه‌ماله‌ د درێژاهیا ئاخڤتنێن خوه‌دا دیاركر ژى كو دماوه‌یێ 24 ده‌مژمێران دا ب ره‌نگه‌كێ ئاسایى ئه‌و موبه‌ریده‌ كاردكه‌ت بێى كو ڤه‌مریێت و گۆت ژى: (ره‌وشا كاره‌با كوردستانێ يا باش نينه‌ و به‌رده‌وام دچیت و ئه‌گه‌ر نه‌چیت ژى یا لاوازه‌ و موبه‌ریده‌ ب دروستى كارناكه‌ت، به‌لێ ئه‌ڤ داهێنانا من درۆستكرى بێ كاره‌ب ب گه‌رنتى كاردكه‌ت).