ئه‌ڤرۆنيوز:
رێڤه‌به‌ريا به‌ره‌ڤانيا باژێرهى ل دهۆكێ راگه‌هاند، ئه‌ڤرۆ ئه‌ينيێ 23/2/2018، پشتى مه‌غره‌ب، ئاگر به‌ربوو ترومبێله‌كێ ل ناڤ بازارێ باژێرێ دهۆكێ.
رائيد( بێوار عه‌بدولعه‌زيز) به‌رپرسێ راگه‌هاندنا به‌ره‌ڤانيا باژێرى بۆ ئه‌ڤرۆنيوز گۆت” ترومبێلا ئاگر به‌ربوويێ ژجۆرێ تاكسى بوو وئه‌گه‌رێ به‌ربوونا ئاگرى ژى ژئه‌نجامێ شورته‌كى بوو”.
دياركر ژى” كونترۆل ل سه‌ر روودانێ هاته كرن وچو زيانێن گيانى نه‌بوون”.
ئه‌ڤرۆنيوز:
به‌نكا كوردستان يا نێڤده‌وله‌تى دبه‌رسڤا په‌رله‌مانێ كوردستانێ دا دبێژيت، پارێزگه‌رێ كه‌ركووكێ نه‌حمه‌دين كه‌ريم چو هژمارێن تايبه‌ت ل به‌نكا مه نينن.
ل رۆژا 22/2/2018، په‌رله‌مانێ كوردستانێ ب ئيمزايا جه‌عفه‌ر ئيبراهيم ئێمينكى، جێگرێ سه‌رۆكێ په‌رله‌مانى، نڤيساره‌ك ئاراسته‌ى به‌نكا كوردستان يا نێڤده‌وله‌تى كربوو وتێدا داخواز رۆهنكرا پێدڤى كربوو سه‌باره‌ت هژماره‌كا تايبه‌ت ب ناڤێ نه‌جمه‌دين عومه‌ر كه‌ريم پارێزگه‌رێ كه‌ركووكێ ل به‌نكا ناڤبرى وته‌حويلكرنا كۆژمێ 60 مليۆن دۆلاران ژپارێ په‌ترۆدۆلارا كه‌ركووكێ بۆ سه‌ر هژمارا به‌نكى يا وى.
دهه‌مان رۆژدا، رێڤه‌به‌رێ به‌نكا كوردستان يا نێڤده‌وله‌تى ب نڤيسارا هژمار 938/438 كو بۆ په‌رله‌مانێ كوردستانێ هنارتيه وتێدا ئاماژه ب هژماروديرۆكا نڤيسارا په‌رله‌مانى كريه ودياركريه كو چو هژمارێن تايبه‌ت ب ناڤێ نه‌جمه‌دين عومه‌ر كه‌ريم پارێزگه‌رێ كه‌ركووكێ ل لقێن به‌نكا كوردستان يا نێڤده‌وله‌تى نينن.
عه‌لى حه‌مه سالح، په‌رله‌مانتارێ گۆران ل په‌رله‌مانێ كوردستانێ سه‌باره‌ت ب پاشه‌رۆژا په‌ترۆلا كه‌ركووكێ وكێلگێن په‌ترۆلى وداهاتێن وان، دكۆنفرانسه‌كێ رۆژنامه‌ڤانى دا
گۆتبوو كۆژمێ 60 مليۆن دۆلارێن په‌ترۆدۆلارێ كه‌ركووكێ يا ديار نينه كا چ لێ هاتيه ويێ چوويه سه‌ر هژمارا به‌نكى يا تايبه‌ت ب نه‌جمه‌دين كه‌ريم پارێزگه‌رێ كه‌ركووكێ ڤه كو ل به‌نكا كوردستان يا نێڤده‌وله‌تى يه.
ئه‌ڤرۆنيوز:
بۆمبه‌كا كيمياوى ل سنورێ پارێزگه‌ها هه‌له‌بجه هاته ديتن كو ديرۆكا وێ ڤه‌دگه‌ريت بۆ 16/3/1988 كو وێ رۆژێ هه‌له‌بجه ب چه‌كێ كيمياوى هاتبوو توپبارانكرن.
هوشيار بياوێله‌يى، شاره‌زايێ هه‌لگرتنا مينان، كو ئه‌و بۆمبه ئينايه ده‌ر بۆ راديۆيا نه‌وا گۆت” ئه‌و بۆمبه ڤه‌دگه‌ريت بۆ سه‌رده‌مێ كيميابارانكرنا هه‌له‌بجه ل سالا 1988 وهه‌تا نوكه نه ته‌قيه وبۆمبه‌كا كيمياوى يه ومادا كلۆرێ يا تێدا كو گه‌له‌ك يا ب مه‌ترسيه وبه‌راوردكرن ل گه‌ل بۆمبێن كيمياوى يێن رژێما به‌عس، ئه‌ڤ بۆمبه گه‌له‌ك يا بچووكتره”.
گۆت ژى” نابيت كه‌س ده‌ستێ خوه بكه‌ته ڤێ بۆمبێ، چونكى ده‌مێ من هه‌لگرتى، ده‌ستێن من برينداربوون”.
ئه‌ڤرۆنيوز:
ئيمانوێل ماكرۆن سه‌رۆكێ فره‌نسا دێ سه‌ره‌دانا عيراقێ كه‌ت ودێ بزاڤێن خوه بۆ ناڤبژيڤانيێ دناڤبه‌را به‌غدا وهه‌رێمێ خورتتر لێ كه‌ت.
ل دووڤ ژێده‌رێن دبلوماسى يێن فره‌نسى، ماكرۆن ل ڤان نێزيكان دێ سه‌ره‌دانا عيراقێ كه‌ت ونوكه به‌رهه‌ڤى بۆ وێ سه‌ره‌دانێ يێن دهێنه ئه‌نجامدان، بێ كو ژڤانێ وێ هاتبيته دياركرن.
ئه‌و ژێده‌ر ئاماژێ دده‌ن كو سه‌رۆكێ فره‌نسا دسه‌ره‌دانا خوه دا بۆ عيراقێ دێ ل گه‌ل به‌رپرسێن به‌غدا وهه‌ولێرێ كۆمبيت بۆ چاره‌سه‌ركرنا كێشێن دناڤبه‌را وان دا .
وان ژێده‌ران ئاشكراكر ژى كو سه‌رۆكێ فره‌نسێ دێ بزاڤێن خوه خورتتر لێ كه‌ت كو ده‌مه‌كه ئه‌نجامدده‌ت بۆ چاره‌سه‌ريا كێشێن هه‌ولێرێ وبه‌غدا وئارمانجا سه‌ره‌كى يا سه‌ره‌دانا به‌غدا ئه‌و بابه‌ته‌يه.
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ل گه‌ل هێربرت مام ماسته‌ر شيره‌تكارێ سه‌رۆكێ ئه‌مريكا بۆ ئاسايشا نيشتمانى ل واشنتۆن كۆمبوو.
به‌يان سامى عه‌بدولره‌حمان، نوونه‌را حوكمه‌تا هه‌رێما كوردستانێ ل واشنتۆن ل سه‌ر به‌رپه‌رێ خوه ل تويته‌رى له‌لاڤكر” دانوستاندنه‌كا باش ل دۆر نووترين پێشهاتێن سياسى وئه‌منى وگه‌شه‌پێدانا ئابوورى هاته كرن، هه‌روه‌سا دانوستاندن هاته كرن ل دۆر ب هيزكرنا په‌يوه‌نديان دناڤبه‌را هه‌رێما كوردستانێ وئه‌مريكا”.
ئەڤرۆ نیوز ، زنار تۆڤی:
وەزارەتا بەرەڤانیا ئەمریکا رەتکریە کو وان ھاریکاریێن خوە بۆ ھێزێن پێشمەرگەیێن کوردستانێ راگرت بن و دایە دیارکرن،چو گوھۆرین د سیاسەتا وان دا ل ھەمبەری پێشمەرگەیێن کوردستانێ روونەداینە.
ئیریک باھۆن، پەیڤدارێ وەزارەتا بەرەڤانیا ئەمریکا راگەھاندیە،چو گوھۆرین د سیاسەتا ئەمریکا دا ھەمبەری پێشمەرگەیێن کوردستانێ چێنەبووینە،هەتا نوکە ژی ئەو پارەی بۆ پێشمەرگەی دابین دکەن بۆ دانا مووچەی و بەرنامێ مەشقدانێ، ئەو یەک ژی ب رازیبوونا حوکمەتا بەغدا دھێتە کرن.
باھۆن راگەھاندیە ژی، ب تنێ پشکەک ژ وی پارەی بۆ ھێزێن پێشمەرگەی و ھێزێن عێراقێ ھاتیە کێمکرن،کو ژ 365 ملیۆن دۆلاران بۆ 290 ملیۆن دۆلاران ھاتینە کێمکرن.
پەیڤدارێ پنتاگۆنێ ئاشکراکر ژی، ئەو کێمکرن ژ بەر وێ ئێکێ بوویە،کو پشکەکا مەزن یا شەرێ دژی داعشێ ب دوماهی ھاتیە،لەورا وان گۆژمێ پاران کێمکریه.
ئه‌ڤرۆنیۆز ،ره‌مه‌زان هه‌رنى:
ژبه‌ر نێزیك بوونا مه‌ها ئادارێ و نه‌وروزێ خه‌لكێ ئاكرێ ل سه‌ر جاده‌یان و تورێن جڤاكى و سوشیال میدیایێ هه‌وه‌كا نه‌هێلانا یاریێن ئاگرى ده‌ست پێكریه كو ل سالێن بۆرى زیانێن مه‌زن ب زاروكێن ئاكرێ گه‌هاندینه.
چالاكڤان شهاب یاسین ل قه‌زا ئاكرێ بۆ ئه‌ڤرۆ نیۆز دیاركر , سالانه ل وه‌رزێ بۆهارى و نه‌وروزێ چه‌ندین زاروك دبنه كێم ئه‌ندام و بریندار دبن ژ سه‌ده‌مێ ب كارئینان و په‌قاندنا یاریێن ئاگرى یێن ترسناك له‌ورا بۆ دوباره نه‌بۆنا وان بریندارو كێم ئه‌ندام نه‌بۆنا چۆ زاروكه‌كێ دى مه ده‌ست ب ڤه‌لیزینا كریه بۆ بنبركرنا ڤێ دیاردى.
ناڤبرى گوتژى : پێدڤیه جهێن شوله‌ژى و ئه‌منى و ئه‌ڤساله رژد تر بن لسه‌ر قه‌ده‌غه‌كرنا ب كارئینانا یاریێن ئاگرى ل ئاكرێ تایبه‌ت كو نوكه وه‌رزێ بۆهارى و سه‌یرانایه روژا كه‌رنه‌ڤالا نه‌وروزێ نزیك بۆیه پێدڤیه ئه‌ڤ هه‌وه به‌رده‌وام بیت هه‌تا كو ئه‌ڤ ساله چۆ یاریه‌كا ئاگرى یا مه‌ترسسیدار نه‌هێته بكارئینان نه‌هێنه فروتن ل بازارى دا.
شهاب گوتژى : دڤێت ماموستا ل قوتابخانه‌یان و گۆتاربێژێن ئاینى ل مزگه‌فتا ڤێ هه‌وه بگه‌هینن خه‌لكى دا كو هشیار بن ل ب كارئینانا یاریێن ئاگرى رێگرى بهێته كرن ل وان بازرگانێن ڤان یاریا دئینن بازارى ژبه‌ركو یارى ب ئاگرى ناهێنه كرن پێدڤیه ل خالێن سنورى ئه‌ڤ یاریه نه‌هێنه ناڤ بازاران ژبه‌ركو هه‌رسال ل ئاكرێ چه‌ند زاروك بریندارو كێم ئه‌ندام دبن لبه‌ر ڤێ دیاردا مه‌ترسیدار.
ئه‌ڤرۆ نیۆز ، ره‌مه‌زان هه‌رنى:
ل هولا كونفرانسان ل ئاكرێ ب به‌رهه‌ڤبوونا هژماره‌كا مه‌زن یا بینه‌ر و حه‌ز ژێكه‌رێن شانۆیێ شانۆیا (جه‌نه‌رال) هاته نیشاندان.
كاوه زوهێر ،رێڤه‌به‌رێ رەوشەنبیرى و هونه‌رى ل ئاكرێ بۆ ئه‌ڤرۆ نیۆز دیاركر : ل هولا کونفرانسان ل ئاكرێ ب به‌رهه‌ڤبونا هژماره‌كا هونه‌رمه‌ند و حه‌ز ژێكه‌رێن پشكا شانویێ شانویا (جه‌نه‌رال) هاته نیشاندان .
ناڤبرى گوتژى : شانوگه‌ریا (جه‌نه‌رال) به‌رهه‌مێ نوده‌م ل نڤیسینا كاروان جه‌رجیس و ده‌رهێنانا شوکرى محه‌مه‌دە و بۆ جارا ئێكێ بۆ ئه‌ڤ شانوگه‌ریه ل ئاكرێ بهێتە پێشكێشكرن.
ئەڤرۆ نیوز ، زنار تۆڤی :
په‌رله‌مانتارەکێ هەڤپه‌یمانیا نیشتمانى ئاشكرا دکەت،کو رێككه‌فتن ل گه‌ل سونیان هاتیە كرن و دهێتە چاڤەرێکرن،کو پرۆژه قانوونا بودجه‌ی بێی كوردان بهێتە په‌سه‌ند کرن.
ره‌سول رازى په‌رله‌مانتارێ هەڤپه‌یمانیا نیشتمانى ل په‌رله‌مانێ عێراقێ،د کونگرەکێ رۆژنامه‌ڤانى دا راگەهاندیه،کو رێككه‌فتن ل گه‌ل سونیان هاتیە كرن،لەورا دهێته چاڤەرێ کرن،کو ده‌نگ ب په‌سه‌ندكرنا بودجه‌ی بده‌ن.
هەروەسا وی په‌رله‌مانتاری گوتیە،هەڤپه‌یمانیا قیوا یا سوننی 15 داخوازی د بودجەی دا هه‌بوون،حوکمه‌تێ ژی 8 داخوازیێن وان د بودجه‌ی دا جێبه‌جێ كرینە، ل گه‌ل هندێ وان نەرازیبوون ل سەر پرۆژه قانوونا بودجەی نه‌مایه،دەربارەی پارێزگەهێن باشورێ عێراقێ، ره‌سول رازى گوتیە،رێككه‌فتن ل سه‌ر هندێ هاتیە کرن،د زێدەبوونا داهاتی دا دێ پشکان وان ژی هێتەدان.
وی په‌رله‌مانتاری دوپات ل هندێ کریە،پشتی وێ رێككه‌فتنێ ب تنێ كورد ماینه، دبێژیت ژی ،د كۆمبوونا هەر سێ سه‌رۆكاتیان دا،کو بریارە بهێته ئه‌نجامدان،دێ دانوستاندن ل سەر داخوازیێن كوردان هێتە کرن،بۆ ڤەگەراندنا رێژا %17 یا کوردستانێ،دڤی حالەتی ژی دا،هەکە ئه‌نجامێ كۆمبوونا هەر سێ سه‌رۆكاتیان جهێ ره‌زامه‌ندیا كوردان نه‌بوو،وی په‌رله‌مانتاری گوتیە،دڤی حالەتی دا، وه‌ك سالا بوری ب ده‌نگێ زۆرینه دێ بودجه هێتە په‌سه‌ند کرن.
بریاره ل رۆژا سێشه‌مبیا بهێت،د روونشتنەکا په‌رله‌مانێ عێراقێ دا كار بۆ په‌سه‌ندكرنا بودجێ عێراقێ بهێتە کرن،کو ئەڤە دو هەیڤ ل سەر ماوێ قانوونا پەسەندکرنا وی دەرباز بووینە.
ئەڤرۆ نیوز ، زنار تۆڤی :
هونەرمەندێ كورد حەسەن شەریف د نووترین بەرهەمێ خوە یێ هونەری دا بەحسێ روودانێن عه‌فرینێ دکەت و سترانەک ب ناڤێ “ئەز زارۆیەک عەفرینی مە”، بۆ زارۆیێن عەفرینێ گوتیە و د ڤێ سترانێ دا بەحسێ دەردەسەری و ئێش و ئازارێن زارۆیێن عەفرینێ دکەت.
ناڤهاتی بۆ ئەڤرۆ نیوز دیارکریە:من ڤیایه ب رێیا ڤێ سترانێ ئێش و ئازار و دەنگێ زارۆیێن عەفرینێ ب گەهنە هەموو جیهانێ،چونکی نوکە زارۆیێن عەفرینێ ل ژێر دەنگێ بومب و فرۆکان ژیانا خوە دبورینن و گوت ژی:ئەڤ سترانە هاتیه کلیپ کرن و پەیڤێن ڤێ سترانێ یێن هەلبەستڤان شەعبان سلێمانی نە،موزیکا وێ ژ لایێ ئاری ئاکرەیی ڤە هاتیە دانان و مەحسوم شەریفی کارێ دەرهێنانا ڤێ کلیپێ کریە.
حەسەن شەریف ل سالا 1985 دەست ب كارێ هونەری كریە و هەتانوکە 10 بەرهەمێن تۆمارکری هەنە ل گەل چەندین سترانێن دی یێن سینگل،ل سالا 1969 هاتیە سەر دونیایێ.
عه‌فرین ئێکە ژ دەڤەرێن كوردستانی یێن رۆژئاڤا كوردستانێ و دکەڤیتە باكورێ رۆژئاڤایێ سووریا و سه‌ر ب پارێزگەها حه‌له‌با سووریێ ڤەیە و رووبه‌رێ وێ سێ هزار و 850 كیلۆمه‌ترێن دوجایه،ل دووڤ ئامارێن 2010 هژمارا خەلکێ وێ پترە ژ 523 هزار كه‌سان و پرانیا خەلکێ وێ كوردن.
نيشاندان