ئه‌ڤرۆ نیوز ، نه‌وزاد هلۆری:
پشتی كو سیسته‌مێ درۆستكرنا خانویێن ئه‌وروپی گه‌هشتیه‌ كوردستانێ ، دنهادا داخوازییێن زۆر لسه‌ر درۆستكرنا وان هه‌یه‌ ب تایبه‌تی ل گوندان ، وه‌لاتی زێده‌باری جوانیا وان خانوان دهه‌مان ده‌م دا ب تشته‌كێ باشتر و ئه‌رزانتر ژی دبینن ، به‌لێ قه‌یرانا دارایی كارتێكرن لسه‌ر پرۆسه‌یا ئاڤه‌دانكرنا وان ژی كریه‌.

ئه‌حمه‌د عه‌لی وه‌لاتیه‌كێ گوندێ بالندا یا سه‌ر ب ده‌ڤه‌را بارزانه‌ دیاركر كو ئه‌وی خانویه‌كێ ئه‌وروپی درۆستكریه‌ و بۆ ئه‌ڤرۆ نیوز گۆت: ( خانوێن ئه‌روپی زێده‌باری كو دجوانن و تێچویا وان كێمتره‌ د هه‌مان ده‌م دا سیسته‌مێ گه‌رما و ساریێ هه‌یه‌ و هاریكاره‌ بو وه‌رزێ زستان و هاڤینێ كو مرۆڤ گه‌له‌ك مه‌زاحتنێ نه‌كه‌ت ب دابینكرنا گه‌رمایێ بو زستانێ و هینكاتیێ بو هاڤینێ ، ب شێوه‌یه‌كێ گشتی خانویێن ئه‌وروپی باشترن بو ده‌ڤه‌رێن چیایی ژ خانویێن دن)

سیپان عه‌بدولخالق ئه‌و ژی وه‌لاتیه‌كێ گونده‌كێ سه‌ر ب ناحیا شێلادزێ یه‌ بۆ ئه‌ڤرۆ نیوز گۆت: (خانوێن ئه‌وروپی ب كێر كوردستان و كه‌ش و هه‌وایێ وێ دهێن و پێشتر هاتینه‌ تێسكرن و به‌رگریا سه‌رما و گه‌رما و بارینا باران و به‌فره‌كا زور دگریت ، به‌لێ تشتێ نه‌خوش ئه‌وه‌ كو خانویێن ئه‌وروپی تێچویێن وان پترن ژ یێن بلوك و كونكرێتی ب تایبه‌تی د نهادا كو قه‌یرانا دارایی هه‌یه‌ و پاره‌ گه‌له‌ك كێمه‌)

ژلایێ خوڤه‌ عومه‌ر سه‌دیق خودانێ كومپانیه‌كا درۆستكرنا خانویێن ئه‌وروپی ل هه‌ولێر و كوردستانێ دیاركر كو درۆستكرنا خانوێن ئه‌وروپی و پاراستنا وان سیسته‌مه‌كێ تایبه‌ت پێدڤی یه‌ بو ئه‌ڤرۆ نیوز گۆت: (خانویێن ئه‌وروپی كو دناڤ خه‌لكی دا ب خانویێن قه‌رمیتی دهێنه‌ نیاسین سیسته‌مه‌كێ موكم و بهێز و رێك و پێك هه‌یه‌ و پێكدهێت ژ ئاسن و كونكرێت و دار و چه‌ند كه‌رسته‌یه‌كێن تایبه‌ت كو ب سیسته‌مێ سه‌رما و گه‌رمێ هاتیه‌ گرێدان ، و ئه‌ڤه‌ زێده‌باری كو سیسته‌مێ ئاڤ و سولین و ئاڤرێژیان و كاره‌بایه‌كا باش بو دهێته‌دانان)

زێده‌تر گۆت: (دنهادا درۆستكرنا خانویێن ئه‌وروپی زێده‌تر ل گوندان دهێنه‌ درۆستكرن و زێده‌تر ژی بو گوندان گونجایه‌ ژبه‌ركو نابیت ئه‌ڤ خانویه‌ ل ته‌نشتا خانویێن دن بهێنه‌ درۆستكرن ، و ئه‌گه‌ر ل باژێران بهێنه‌ چێكرن دڤێت چوو خانویێن دن ل ره‌خ و رویان نه‌هێنه‌ چێكرن به‌لكو دڤێت دناڤ بیستان و باخچیه‌یێن باژێران بهێنه‌ چێكرن به‌لێ ل گوندان هه‌موو جهان درۆسته‌ و جوانیه‌كا زور ژی دده‌ت گوندان)

خودانێ كومپانیا درۆستكرنا خانویێن ئه‌وروپی دیاركر ژی كو ئه‌و گه‌رنتیا پێنج سال بو 25 سالان دده‌ن هه‌ر كه‌سه‌كێ كو خانویه‌كێ ئه‌وروپی درۆست بكه‌ت و گۆت ژی: (درۆستكرنا هه‌ر خانویه‌كێ ئه‌وروپی پێدڤی ب 45 بو 60 روژایه‌ و مه‌ترا هه‌ر خانویه‌كێ ئه‌وروپی ژی دناڤبه‌را 325 بو 350 دولارایه‌ ، و پرانیا ئه‌و كه‌سانێن كو نها ئه‌ڤان خانویان درۆست دكه‌ن خه‌لكێ گوندانن ، و به‌لێ قه‌یرانا دارایی كارتێكرن لسه‌ر كرینا وان كریه‌ ، و مه‌ژی ب به‌ر چاڤ وه‌رگرتنا قه‌یرانا دارایی داشكاندن د بهایێن مه‌ترا خانوی دا كریه‌ ب گوره‌ی كوالێتی و جورێ خانوی)