ئەڤرۆ نیوز ، زنار تۆڤی :
کۆمپانیا واتس ئاپ دێ هندەک خزمەتێن نوو زێدە کەت و ل نێزیک ئەو خزمەتە دێ هێنە بکارئینان.
هەروەسا كۆمپانیا واتس ئاپ هنده‌ك خزمه‌تێن نوو ل پرۆگرامێ خوه زێده كرن ، كو بكارهێنه‌رێن وێ دشێن ب په‌یوه‌ندیێن كۆم هەتا چار كه‌سان ژی بكاربینن ، هه‌روه‌سا دشیان دایه نامه‌‌كێ بۆ ژماره‌یه‌كێ ڤرێكه‌ن بێی كو ئه‌و ژماره یا تۆمار كری بیت.
ئه‌و خزمه‌تا نوو نوکە ل سه‌ر ئه‌ی ئو ئێس یا ئامیرێن ئایفۆنێ دهێته تێست كرن و ل نێزیك دێ ل ئه‌ندرویدی ژی هێته زێده كرن.
ئه‌ڤرۆنيوز:
سه‌رۆك مه‌سعود بارزانى ئه‌ڤرۆ چارشه‌مبى 30/5/2018 پێشوازى ل جۆن ويلكس باليۆزێ بريتانيا ل عيراقێ كر.
دكۆمبوونه‌كێ دا سه‌رۆك بارزانى وجۆن ويلكس رۆناهى خسته سه‌ر ره‌وشا سياسى ل عيراقێ وپرۆسا هه‌لبژارتنێن جڤاتا نوونه‌ران وپێكئينانا كابينا نوو يا حوكمه‌تا عيراقێ ورۆلێ هه‌رێما كوردستانێ دپێكئينانا وێ حوكمه‌تێ دا.
سه‌رۆك بارزانى دياركر”بۆ هه‌رێما كوردستانێ يا گرنگه بنه‌مايێ هه‌ڤپشكيا راسته‌قينه ل به‌غدا وته‌وافوق ل ده‌ستهه‌لاتا قانوون دانانێ دا وهه‌ڤسه‌نگى ل كه‌رتێن ئابوورى وئه‌منى وسياسى وله‌شكرى ل عيراقێ بهێته پاراستن.
جۆن ويلكس باليۆزێ بريتانيا عيراقێ دووپاتى ل ب به‌رفره‌هكرنا په‌يوه‌نديێن هه‌ولێرێ وله‌نده‌ن كر وداخواز ك بۆ رێگرتنێ ل سه‌رلهدانا تيرۆرێ، هه‌ماهه‌نگيا هه‌رێما كوردستانێ وبريتانيا دێ به‌رده‌وام بيت.
باليۆزێ بريتانيا هه‌روه‌سا راگه‌هاند كو وه‌لاتێ وى وجڤاكێ نێڤده‌وله‌تى پشته‌ڤانيا ل بنه‌ماگرتنا دستوورى ودانوستاندنێ بۆ پرۆسا سياسى ل عيراقێ دێ كه‌ن ب جۆره‌كى سه‌قامگيريا ئه‌منى وئابوورى ژى لێ په‌يدا بيت”.
ئه‌ڤرۆ نيوز، فاتما مزوورى:
روسنه‌فت مه‌زنه كۆمپانيا په‌ترۆلا رۆسى راگه‌هاند كو چه‌ندين پرۆژێن مه‌زن يێ ل به‌ر ده‌ستێ وێ كۆمپانيێ.
رێڤه‌به‌رێ ب جهئينه‌رێ وێ كۆمپانيێ د كۆنگره‌كێ رۆژنامه‌ڤانى دا ل مۆسكۆ يا پايته‌ختێ رۆسيا راگه‌هاند كو وان كار ل سه‌ر هنده‌ك پرۆژان ل گه‌ل هه‌رێما كوردستانێ كريه كو ژ وان راكێشانا بۆريه‌كا گازا سرۆشتى يه.
ئاماژه دا وێ چه‌ندێ ژى كو ئه‌و كار ژ بۆ وێ يه‌كێ دكه‌ن كو تێكه‌ليێن خوه ل گه‌ل هه‌رێما كوردستانێ باشتر لێ بكه‌ن و پێشڤه ببه‌ن.
ئاژانسا رۆيته‌رز راگه‌هاند كو كۆمپانيا روزنه‌فت ده‌ست ب ديزاينكرنا بۆريه‌كا گازێ ل گه‌ل هه‌رێما كوردستانێ كريه وه‌كو پشكه‌ك ژ پلانێن پێشڤه‌برنا به‌رهه‌مێن گازێ ل هه‌رێما كوردستانێ.
د كۆربه‌ندا ئابوورى يا سانپترسبۆرگ ل رۆسيا دا كو 24 هه‌تا 26ێ ڤێ هه‌يڤێ كارێن وێ ب رێڤه‌چووبوون، شاندێ هه‌رێما كوردستانێ ب سه‌رۆكاتيا ئاشتى هه‌ورامى دو پرۆتۆكۆل ل دۆر په‌ترۆلێ ل گه‌ل كۆمپانيا روزنه‌فت ئيمزا كربوون.
ئه‌ڤرۆ نيوز، فاتما مزوورى:
سەرۆکێ مەکسیک راگه‌هاند كو ب چو ئاوه‌یه‌كی وه‌لاتێ وی تێچوویا چێكرنا دیوارێ د ناڤبه‌را مه‌كسیك و ئه‌مریكا دا ناده‌ت.
ئینریكی بینیا نیتۆ سه‌رۆكێ مه‌كسیك د تویته‌كێ دا راگه‌هاند بوو كو مه‌كسیك ب چو ئاوایه‌كی تێچوویا چێكرنا دیواری ناده‌ت، نه د نها دا و نه د چو ده‌مێن دى ژی دا.
دۆناڵد تره‌مپ سەرۆکێ ئەمریکا، ل ده‌مێ كاندیدبوونا وی ژبۆ پۆستێ سه‌رۆكێ ئه‌مریكا د كۆمبوونا ناشڤێل ژبۆ رۆژنامه‌ڤانان راگه‌هاند بوو كو مه‌كسیك دێ تێچوویا چێكرنا دیوارێ سنۆرێ يێ د ناڤبه‌را مه دا بدهت، كو چو هاریكاریه‌كا وان ناكه‌ت ژبۆ رێگریكرن ژ وان وه‌لاتیێن ل مه‌كسیك و هندۆراس و وه‌لاتێن دى خوه دگه‌هیننه ئه‌مریكا.
ئه‌ڤرۆنيوز:
نەخوه‌شەک ل گوندێ بامشمش ل دەڤەرا نەهلێ کو ژیێ وێ چار هەیڤن بۆ ده‌مێ چەندین جارە ريڤیکەک ژ دەڤی دەردکەڤیت ب شێوەکێ سەیر و چار جاران هاتیە برین و چەند رۆژان جارەکا دی سەرهلده‌تەڤە و هەتا نها ژڤێ نەخوه‌شیێ خلاس نەبوویە.
نوشدار (حەمو محەمەد) دیارکر کو کچەک ب ناڤێ (س، ع) کو ژیێ وێ چار هەیڤن تووشی نەخوه‌شیەکێ بوویە کو ريڤیکەک ژ دەڤی دا دەردکەڤیت و ل دەمێ سێ هەیڤ و نیڤا بۆ ماوێ چار جاران ئەو ريڤیك هاتیە برین و بۆ ماوێ ۱٥روژان جارەکا دی سەرهلدەتەڤە.
نوشدارێ ناڤبرى زێده‌تر بۆ نوش ميوز گۆت ژی کو ئەڤ نەخوه‌شە پێنج جاران ئینایە ل دەف من ل کلینکێ(عیادێ) و من ڤرێکریە نەخوه‌شخانا تەنگاڤیا ئاکرێ و بریە زەرعێ ژى، لێ چ دەرنەکەفتی یە و هەتا رەوانەی دهۆکێ ژی کربوو، لێ ل وێرێ گۆت بوو چو نەخوه‌شی نینە و ب شێوەکێ گشتی رەوشا ساخلەمیا وێ یا باشە تنێ و هەتا نها چارەسەریەکا بنبڕ بۆ نەهاتیەکرن کو ژڤێ نەخوه‌شیێ خلاس ببیت.
ئه‌ڤرۆنيوز:
رێڤه‌به‌رێ په‌يوه‌ندى وراگه‌هاندنا كۆمسيۆنا بلند يا هه‌لبژارتن وراپرسى ل هه‌رێما كوردستانێ راگه‌هاند، هه‌ر برياره‌ك ل سه‌ر هه‌لبژارتنێن جڤاتا نوونه‌رێن عيراقێ بهێته دان، كاريگه‌رى ل سه‌ر ژڤانێ ئه‌نجامدانا هه‌لبژارتنێن په‌رله‌مانێ كوردستانێ نابيت.
شوره‌ش حه‌سه‌ن، رێڤه‌به‌رێ په‌يوه‌ندى وراگه‌هاندنا كۆمسيۆنا بلند يا هه‌لبژارتن وراپرسى ل هه‌رێما كوردستانێ گۆت” به‌رهه‌ڤيێن ئه‌نجامانا هه‌لبژارتنێن په‌رله‌مانێ كوردستانێ دبه‌رده‌وامن”.
شوره‌شى ئاماژه بۆ وێ چه‌ندێ كر كو ده‌مێ نێزيكى هه‌فتيه‌كێ يێ ماى بۆ تۆماركرنا كيانێن سياسى وتا نوكه ئێك قه‌وارێ سياسى ناڤێ خوه يێ تۆماركرى، به‌لێ هێشتا ل جڤاتا كۆمسياران نه‌هاتيه په‌سه‌ندكرن.
دياركر، ره‌وشا هه‌لبژارتنێن جڤاتا نوونه‌رێن عيراقێ ب هه‌ر ئاراسته‌كى دا بچيت، كاريگه‌رى ل سه‌ر ئه‌نجامدانا ژڤانێ هه‌لبژارتنێن په‌رله‌مانێ كوردستانێ نابيت.
برياره هه‌لبژارتنێن په‌رله‌مانێ كوردستانێ ل 30/9/2018 بهێنه ئه‌نجامدان.
ئه‌ڤرۆ نيوز، فاتما مزوورى:
ده‌زگه‌هێ خێرخوازى يێ بارزانى ب هه‌لكه‌فتا هه‌يڤا ره‌مه‌زان پيرۆز هه‌وه‌كا پارڤه‌كرنا هاريكاريان راگه‌هاندن.
د ڤێ ده‌ربارێ دا، ئيبراهيم عه‌بدولعه‌زيز، رێڤه‌به‌رێ به‌لاڤكرنا هاريكارايێن ده‌زگه‌هێ خێرخوازى يێ بارزانى راگه‌هاند كو بۆ ده‌مێ حه‌فتيه‌كێ يه ب هه‌ماهه‌نگيا قونسلخانا ئيمارات ل هه‌ولێر هه‌وه‌كا پارڤه‌كرنا هاريكاريان بۆ خێزانێن هه‌ژار و كێم داهات ده‌سپێكريه.
ئاشكه‌را ژى كر كو ئه‌ڤرۆ ژى نێزيكى هزار مالباتێن هه‌ژار هاريكارى ب سه‌ر دا هاتينه پارڤه‌كرن.
ل دۆر وان پێدڤيێن كو ب سه‌ر وان خێزانان دا هاتينه به‌لاڤكرن، رێڤه‌به‌رێ ده‌زگه‌هێ خێرخوازى يێ بارزانى گۆت: “ئه‌و هاريكارى ژ خوارنێن هشك و پێدڤيێن رۆژانه پێك دهێن”.
ئه‌ڤرۆ نيوز، فاتما مزوورى:
به‌رپرسێ لقێ 15 يێ پارتى ديموكراتى كوردستان ل خانه‌قين هوشيدارى دا ژ زێده‌بوونا ليڤينێن داعش ل سنۆرێ ديالا. ل گۆره‌ى پێزانينێن وى به‌رپرسى نێزيكى 500 چه‌كدارێن داعش ل سنۆرێ وێ ده‌ڤه‌رێ هه‌نه و لڤينان دكه‌ن.
پشتى شكه‌ستنا داعش ل سنورێ ديالا ژ لايێ هێزێن پێشمه‌رگه‌ى ڤه كريارێن تيرۆرستى ب ره‌نگه‌كێ مه‌زن كێم ببوون، و هێزێن پێشمه‌رگه‌ى شيابوون كۆنترۆلا ره‌وشێ بكه‌ن، به‌لێ پشتى بوويه‌رێن 16ى ئۆكتۆبه‌رێ و نه‌مانا هێزێن پێشمه‌رگه‌ى ل وێ ده‌ڤه‌رێ، هێزێن عيراقى كۆنترۆلا ده‌ڤه‌رێ گرته ده‌ست و ب ڤێ چه‌ندێ ژى ڤالاتيه‌كا ئه‌منى دروست بوو و داعش جاره‌كا دى ده‌ست ب لڤينێن خوه كر و به‌رده‌وام كریارێن تيرۆرستی ل ده‌ڤه‌رێ دكه‌ن.
شێخ جه‌عفه‌ر شێخ مسته‌فا به‌رپرسێ لقا 15 یێ پارتی ده‌موكراتی كوردستان ل خانه‌قین راگه‌هاند، پشتی بوویه‌رێن 16ى ئۆكتۆبه‌رێ لڤينێن داعش ل وێ ده‌ڤه‌رێ زێده بوون و به‌ری نه‌ها گرۆپ ب گرۆپ ب ماتۆرسكلان دهاتن ته‌قه ل خه‌لكى دكرن و خه‌لك د ره‌ڤاندن، لێ نها هژماره‌كا مه‌زن ژ وان زێده بووينه كو هه‌ژمارا وان دگه‌هیته نێزیكی 500 چه‌كداران و هه‌ر شه‌ڤ دچن ب سه‌ر گوندان دا گرن و ته‌قێ ل خه‌لكى دكه‌ن و وان دكه‌نه ئارمانج، ب تایبه‌ت ل سنورێ گوندێ پالانی كو دبيت خه‌لكێ وێ ده‌ڤه‌رێ ژی ده‌ست ل گه‌ل وان هه‌بن.
شێخ جه‌عفه‌ر شێخ مسته‌فا گۆتژى: “نها وه‌سا لێ هاتیه داعش هه‌ر شه‌ڤ ب ئاشكه‌را هێرشێ دكهته سه‌ر گوندان و هێزێن عیراقی نه‌شێن وان گۆندان ب پارێزن ژ به‌ر وێ یه‌كێ خه‌لك ب خوه شه‌ڤانه پارێزگاریێ ل خوه دكه‌ن ژ به‌ر كو به‌رێ پێشمه‌رگه‌ى پارێزگاری ل وان دكرن و وان چو ئاريشه نه‌بوون، به‌لێ نوكه نه‌چارن ئه‌و پاراستنێ ل خوه بكه‌ن.
ئه‌ڤرۆ نيوز، فاتما مزوورى:
شه‌ر و بۆردومانا د ناڤبه‌را فه‌له‌ستین و ئیسرائیل دا به‌رده‌وامه و فرۆكه‌یێن جه‌نگی یێن ئیسرائیل بۆردومانا كه‌رتا غه‌زه كرن و هاتیه راگه‌هاندن كو ده‌نگێ چه‌ند ته‌قینێن بلند هاتن بهیستن.
ئه‌ڤ بۆردومانا ئاسمانی پشتی وێ یه‌كێ تێ كو دوهی ل كه‌رتا غه‌زه 25 هاون ئاراسته‌ی ئیسرائیل هاتن كرن و چه‌ند كۆمه‌لگه‌هێن جوهیان ل ئیسرائیل هاتن ئارمانج كرن و ب سه‌ده‌ما وێ یه‌كێ هه‌ژماره‌ك سه‌رباز و وه‌لاتیێن مه‌ده‌نی بریندار بوون.
پشتره سوپایێ ئیسرائیل گرته ڤیدیۆیه‌كی بۆردومانا تۆنێله‌ك چه‌كدارێن حه‌ماس به‌لاڤ كر، تێ گۆتن كو 35 ئێریشێن ئاسمانی بۆ سه‌ر حه‌فت ئامانج ل ته‌ڤاهیا غه‌زه هاتنه ئه‌نجامدان.
هه‌روه‌ها سوپایێ ئیسرائیل راگه‌هاند كو ب سه‌ده‌ما هاونبارانكرنا ژ غه‌زه بۆ سه‌ر ئیسرائیل سێ سه‌ربازێن ئیسرائیلی بریندار بوون.
ژ بال خوه ڤه چاڤكانیێن نووچه‌یان راگه‌هاندن كو پێنج كه‌س ژی ژ كۆمه‌لگه‌ها جوهی نشینان بریندار بوونه.
ده‌ستپێكرنا وان ناكۆكیان ناڤبه‌را ئیسرائیل و فه‌له‌ستین پشتی وێ یه‌كێ تێ كو دۆنالد تره‌مب سه‌رۆكێ ئه‌مه‌ریكا بریارا ڤه‌گوهه‌ستنا بالیۆزخانه‌یا وه‌لاتێ خوه ژ ته‌ل ئه‌بیب بۆ قۆدس یان ئۆرشه‌لیم دا و ئه‌ڤ یه‌ك ژی بۆ سه‌ده‌ما ده‌ستپێكرنا خوه‌پێشاندان و ئالۆزیان.
ئه‌ڤرۆ نيوز، فاتما مزوورى:
سه‌لیم جبوری سه‌رۆكێ جڤاتا نوونه‌رێن عیراقێ پشتی جڤینا هنده‌ك قه‌وارێن سیاسی ل به‌غدا د كۆنگره‌یه‌كێ رۆژنامه‌ڤانیێ دا راگه‌هاند، پێدڤيه كۆمیسیۆنا بلندا سه‌ربخوه یا هه‌لبژاتنان پابه‌ندی بجهئينانا بریارێن جڤاتا نوونه‌ران بيت ژ به‌ر كو وان بڕیاران ده‌ستووری نه.
جبوری گۆتژی: ” ئه‌و بڕیارێن ژ لايێ جڤاتا نوونه‌ران ڤه هاتینه ده‌رخستن یاسایی نه و د چارچوڤێ ده‌سهلاتێن جڤاتا نوونه‌ران دایه و پێدڤيه ئه‌و بڕیار بهێنه بجهئينان دا كو دادپه‌روه‌ری بێته پاراستن.
سه‌رۆكێ جڤاتا نوونه‌ران راگه‌هاند ژی، داخوازا جڤاتا نوونه‌ران ئه‌وه كو 10% ژ ئه‌نجامێن ده‌نگدانێ ب ده‌ست بێن هه‌ژمارتن و پشترا هه‌كه ده‌ركه‌فت كو جوداهی د ناڤبه‌را وان ئه‌نجامێن به‌رێ هاتينه راگه‌هاندن و ئه‌و ئه‌نجامێن كو ب ده‌ست دهێنه هه‌ژمارتن دا هه‌یه دڤێت كو هه‌موو ئه‌نجامێن ده‌نگدانێ ب ده‌ست بهێنه هه‌ژمارتن.
سه‌لیم جبوری گۆتژی: “ساخته‌كاری د هه‌لبژارتنان دا هاتینه ئه‌نجامدان و ئه‌ڤ چه‌نده ده‌ستدرێژى يه بۆ سه‌ر گه‌لێ عيراقێ”.
نيشاندان