ئەڤرۆ نیوز ، زنار تۆڤی :
ب بەهانەیا هەبوونا چەکدارێن پەکەکێ ل سنورێ ناحیا کانی ماسێ ئەڤرۆ تۆبخانا سۆپایێ تورکی چەندین گۆلە تۆپ ل ڤێ دەڤەرێ داینە.
حسێن سەلمان وەلاتیەکێ دەڤەرا بەرواری بالایە بۆ ئەڤرۆ نیوز دبێژیت:ئەڤرۆ سێشەمبی 29 گولانا 2018 ل دەمژمێر 11:30 سپێدێ و هەروەسا پشتی ئێڤارێ ژی تۆپخانا سۆپایێ تورکی ئەو چیایێ ل هنداڤی گوندێ بێدۆهێ و هندەک جهێن دیتر ل دەڤەرا بەرواری بالا تۆپ بارانکرینە و ئەڤە ماوێ چەند رۆژانە هەیام هەیام تۆپخانا سۆپایێ تورکی ڤێ دەڤەرێ تۆپ باران دکەت.
ئه‌ڤرۆنيوز:
ئه‌ڤرو سێشه‌مبى 29-5-2018 فه‌رهاد ئه‌مین پارێزگه‌رێ دهۆكێ پێشوازیا شانده‌كێ هوله‌ندی یێ پێكهاتى ژسازی ورێكخراوێن مرۆڤایه‌تی كر.
دهه‌ڤدیتنه‌كێ دا به‌حسێ ره‌وشا ئاواره وپه‌نابه‌ران ل پارێزگه‌ها دهۆكێ وكار وخزمه‌تا ژلایێ كارگێریا پارێزگه‌هێ ورێكخراوێن مرۆڤایه‌تی ڤه بۆ دهێته پێشكێشكرن هاته كرن.
شاندێ هوله‌ندی حێبه‌تيا خوه دیاركر هه‌مبه‌ر وێ سه‌ره‌ده‌ریا پارێزگه‌ها دهۆكێ وخه‌لكێ وێ كری ژبۆ حه‌واندن وهاریكاریا وێ هژمارا مه‌زن یا ئاواره وپه‌نابه‌ران وده‌ست خوه‌شی ل پارێزگه‌رێ دهۆكێ وخه‌لكێ پارێزگه‌هێ كر هه‌مبه‌ر ڤی كارێ مه‌زن یێ مرۆڤایه‌تی.
هه‌روه‌سا گوت :ئه‌م هاتینه دا ژنێزیك ره‌وشا ئاواره‌یان ل ناڤ وده‌رڤه‌ی كه‌مپان بزانین وراپۆرته‌كێ ل سه‌ر پێدڤیێن وان به‌رهه‌ڤكه‌ین كو ل پاشه‌رۆژێ هاریكاریا وان بكه‌ین.
پارێزگه‌رێ دهۆكێ خوشحالیا خوه ب سه‌ره‌دانێ دیاركر و ژ شاندێ هوله‌ندی خواست كو هاریكاریا ئاواره وپه‌نابه‌ران ل سنورێ پارێزگه‌هێ بكه‌ن ل ناڤ وده‌رڤه‌ی كه‌مپان، هه‌روه‌سا هاریكاریا وان ئاواران ژی بكه‌ن ئه‌وێن حه‌زدكه‌ن ڤه‌گه‌رنه سه‌ر جه ووارێن خوه وده‌ڤه‌رێن وان ئاڤه‌دان كه‌ن وپێدڤیێن خزمه‌تكاری بۆ دابینكه‌ن .
ئه‌ڤرۆنيوز:
سه‌رۆكێ فه‌رمانگه‌ها هه‌لبژارتنان ل كۆمسيۆنا بلند يا هه‌لبژارتنێن عيراقێ راگه‌هاند،قانوون رێ ب هه‌لوه‌شاندنا ئه‌نجامێن هه‌لبژارتتان ل ده‌رڤه‌ى وه‌لاتى ناده‌ت وهوشداريێ ژى دده‌ت كو دبيت كوده‌تا ل سه‌ر ئه‌نجامێن هه‌لبژارتنان ببيته ئه‌گه‌رێ شه‌رێ ناڤخوه‌يى ل عيراقێ.
رياز به‌دران، سه‌رۆكێ فه‌رمانگه‌ها هه‌لبژارتنان ل كۆمسيۆنا بلند يا هه‌لبژارتنان دديداره‌كێ دا ل گه‌ل كه‌نالێ العراقيه گۆت” دبيت كوده‌تا ل سه‌ر ئه‌نجامێن هه‌لبژارتنان شه‌رێ ناڤخوه‌يى لێ دروست ببيت، به‌لێ قانوون رێ ب په‌رله‌مانى ناده‌ت هه‌لبژارتنان ب هه‌لوه‌شينيت”.
ل دووڤ ئاماران، هه‌تا نوكه زێده‌تر ژ سێ هزار سكالا دژى پرۆسا ده‌نگدانێ وئه‌نجامێن هه‌لبژارتنان يێن هاتينه پێشكێشكرن وگه‌له‌ك لايه‌ن ئه‌نجامێن هه‌لبژارتنان ره‌ت دكه‌ن.
ئه‌ڤه دده‌مه‌كى دايه دوهى، په‌رله‌مانێ عيراقێ دكۆمبوونه‌كا نه‌ئاسايى دا بريار دا هژمارتنا ده‌ستى بۆ 10% ژ ده‌نگێن هه‌لبژارتنان بهێته ئه‌نجامدان، ل گه‌ل هه‌لوه‌شاندنا ئه‌نجامێن ده‌رڤه‌ى عيراقێ وده‌نگدانا تايبه‌ت يا ئاوارن.
ئەڤرۆ نیوز ، زنار تۆڤی :
یانا زێرەڤانی بۆ قارەمانا خولا نایابا کوردستانێ یا تەپاپێ پشتی د یاریا ئەڤرۆ دا شیای سەرکەفتنەکا مەزن تۆمار بکەت ل سەر یانا پێشمەرگەی هەولێر ب چار گولان هەمبەری گولەکێ و ب ڤی ئەنجامی ناسناڤێ خولا نایابا کوردستانێ ب دەستڤە ئینا.
یانا زێرەڤانی شیا بۆ جارا چارێ ڤی ناسناڤی ب دەست خوەڤە بینیت.
ئه‌ڤرۆ نیوز:
بڕیاره ئه‌ڤ شه‌ڤه ل ده‌مژمێر 9 ، ل فاملى فان ل دهۆكێ هونه‌رمه‌ند ده‌لیل دیلانار كۆنسێرته‌كا هونه‌رى ساز بكه‌ت، كو چه‌ندین میوزیكژه‌نێن توركى و ئۆرۆپى یێن به‌رنیاس د پشكدارن.
هونەرمەند دەلیل دیلانار، خودان ستایله‌كێ تایبه‌ته ب خوه‌ڤه، ئه‌و هونه‌رمه‌نده پتر كار ل سه‌ر سترانێن فولكلورى كریه و ب ستایله‌كێ نوو دبێژیت.
ده‌یلیل دیلانار ل باژێرێ مووشێ، باكوورێ كوردستانێ ژ دایك بوویه و نوكه ئاكنجیێ باژێرێ كولن یێ ئه‌لمانیه، چه‌ندین به‌رهه‌مێن هونه‌رى یێن هه‌ین، ژ وانا “ژ بۆ بیرئانینا دەنگبێژ حوسێنۆ، نێچیرڤانۆ و سەریایا”.
كۆمپانیا دارین گروپ و كوره‌ك تلیكوم و تله‌فزیونا رووداو و چه‌ندین لایه‌نێن دى سپونسه‌ریا ڤێ كونسێرتێ كرینه.
ئەڤرۆ نیوز ، زنار تۆڤی :
ل نیڤرۆیا ئەڤرۆ سێشەمبی 29 گولانا 2018 کچەکا د ژیێ 17 سالیێ دا ل دەمێ ڤەگەریانێ ژ کارێ خوە ل ناحیا کەلەکچی دکەڤیتە د گۆمەکا ئاڤێدا و د خەندقیت.
ژێدەرەکێ ب ناڤێ سەباح ئیبراھیم بۆ ئەڤرۆ نیوز گوتیە ،کو ناڤێ وێ کچێ (زەینەب)بوویە و د ژیێ 17 سالیێ دابوو و خۆجها تاخێ محەمەد رەشا بوویە ل ناحیا کەلەکچی یا سەر ب قەزا شێخان ڤە و ل گەل چەند هەڤالەکێن خوە رۆژانە پێکڤە کار ل چاندنێ ل ناڤا زەڤیێن پتاتا ل قەزا شێخان دکر.
هەروەسا گوتیە ،ئەڤرۆ دەمژمێر 12ی نیڤرۆ کارێ وان تەمام بوویە و دچنە سەر گۆمەکا ئاڤێ ل خازری، ئەو کچ ل گەل چار کچێن دیتر یێن هەڤالێن خوە ، پێکڤە خوە د ئێخنە وێ گۆما ئاڤێ ، هەڤالێن وێ ژ ئاڤێ دەردکەڤن و لێ ئەو ژێرئاڤ دبیت.
ناڤهەتی دیارکر ژی وێ کچێ هەرۆژ ل گەل دایک و ھەڤالێن خوە پێکڤە کارێ پتاتان دکر، ل وی دەمێ ئەو کچە د ئاڤێدا خەندقی دایکا وێ ژی ل وێرێ بوو ، پشتی هنگێ تەرمێ وێ کچێ ژ وێ گوما ئاڤێ ئینایە دەر و هاتیە رەوانەکرن بۆ نۆشداریا داد.
ئه‌ڤرۆ، نيوار:
كۆمه‌لگه‌ها ده‌رگه‌هێ سنورێ يێ ئيراهيم خه‌ليل راگه‌هاند كو وه‌زاره‌تا چاندنێ بڕيارا قه‌ده‌غه‌كرنێ ل سه‌ر سێڤان هه‌لگرت و نوكه بازرگان دشێن سێڤێن ده‌رڤه‌ى وه‌لاتى بيننه ناڤ هه‌رێما كوردستانێ.
د به‌ياننامه‌كێ دا، راگه‌هاندنا كۆمه‌لگه‌ها ده‌رگه‌هێ سنورى يێ ئيراهيم خه‌ليل راگه‌هاند كو ل دووڤ رێڤه‌به‌ريا گشتى يا گۆمركى يا ژماره “6766” ل 6ى گۆلانا 2018ێ و ب پشت به‌ستن ل سه‌ر نڤيسارا وه‌زاره‌تا چاندن و ژێده‌رێن ئاڤێ يا ژماره “1830” ل 23ى نيسانا 2018ێ بابه‌تێ قه‌ده‌غه‌كرنێ ل سه‌ر سێڤان هاته هه‌لگرتن و نوكه بازرگان د ده‌ستوور داينه بيننه ناڤ هه‌رێما كوردستانێ.
سالانه حوكمه‌تا هه‌رێما كوردستانێ ب رێيا ده‌رگه‌هێن خوه يێن سنورى ئينانا وان به‌رهه‌مێن ژ لايێ جوتياران ڤه دهێنه به‌رهه‌م ئينان، قه‌ده‌غه دكه‌ت وه‌كو پشته‌ڤانيه‌ك بۆ به‌رهه‌مێن جوتياران و هه‌رده‌ما وه‌رزێ وان به‌رهه‌مان ل كوردستانێ ب دووماهى هات جاره‌كا دى رێ ب به‌رهه‌مێن بيانى دهێته دان بيننه ناڤ هه‌رێما كوردستانێ
ئه‌ڤرۆ نيوز، فاتما مزوورى:
جڤاتا یەکێتیا ئەورۆپا د داخویانیەکی دا رگەھاند، کو ب سەدەما بەردەوامبوونا بنپێکرنێن ل دژی خەلکێ سڤیل ل سوریا یەکێتیا ئەورۆپا بریارا دا سزایێن سەر رژێما سوریا و ئالیگەرێن وێ بھێلە.
بنپێکرن و بکار ئانینا چەکێن کیمیاوی ل بەرانبەر خەلکێ سڤیل ئەڤ ژی وەک بەشەک ژ جیبجیکرنا ستراتیژی یا یەکێتیا ئەورۆپا بەرامبەر سوریا.
ب ڤێ یەکێ ژی سزایێن ل سەر سوریا ھەتا یەکێ مەھا شەش سالا 2019 تێن درێژکرن ب سەر 259 کاربدەستێن سوریا کو ب بنپێکرن و توندو تیژی بەرامبەر خەلکێ سڤیل ل سوریا تاوانبارن.
ل گۆری سزایان ئەڤ کاربدەست ئەگەر سەروەت و سامانێن وان ل ئەورۆپا ھەبن دێ بمینن بلۆکری ھەروەھا قەدەغەیە بچن ناڤ خاکا وەلاتێن یەکێتیا ئەورۆپا، ھەروەھا شێست و ھەفت سازیێن سوریا سەروەت و سامانێن وان ل یەکێیتا ئەورۆپا ھاتنە بلۆک کرن ژ وان ژی بانکا ناڤەندی یا سوریا.
سۆران، فاتما مزوورى:
به‌ره‌ڤانيا باژێرێ ل سوران راگه‌هاند كو دوهى كۆمارا ئيسلامى يا ئيرانێ ته‌قه ل كۆلبه‌ران كريه و برينداره‌ك گه‌هانديه نه‌خۆشخانا هاوارهاتنێ ل سۆران.
عه‌دنان رێكانى ژ به‌ره‌ڤانيا باژێرى ل سۆران بۆ ئه‌ڤرۆ نيوز گۆت: “ل سنورێ کێلەشین يێ د ناڤبەرا ھەرێما کوردستانێ و کۆمارا ئیسلامی یا ئیرانێ دا، چەکدارێن سەر ب سۆپایێ پاسدارێن ئیرانێ ڤه تەقە ل ھەژمارەکا کۆلبەران کرن و ب سەدما وێ یەکێ کۆلبەرەک ب ناڤێ خەلیل ئەحمەد يێ 32ێ سالی کو خەلکێ باژارێ شنۆ یێ رۆژهه‌لاتێ کوردستانێ یە بریندار بوو.
به‌ره‌ڤانيا باژێرى ل سۆران بۆ ئاشكه‌را ژى كر كو ئەو وەلاتیێ کۆلبەر دو گوله ب دەست و لنگێ وی کەفتینە و پشتی چارەسەرکرنا دەستپێکی ژبۆ نەخوشخانەیا ھاوارهاتنا سۆران ھاتیە ڤەگوھەستن.
حەفتیا بوری ژى ل ھەمان سنوری ب سەدەما تەقەکرنا چەکدارێن سەر ب سۆپایێ پاسدارێن ئیرانێ، کۆلبەرک جانێ خوە ژ دەستدا و دوو دن ژی بریندار بوون.
ئه‌ڤرۆ نيوز، فاتما مزوورى:
هێزێن به‌ره‌ڤانيا یه‌مه‌ن ب پشته‌ڤانی و پشكداریا هێزێن عه‌ره‌بى، د چارچۆڤێ هه‌ڤپه‌یمانه‌تیا عه‌ره‌بی باژێرێ “دوره‌یهیمیان” ل به‌رئاڤێن رۆژئاڤایا یه‌مه‌ن ژ ده‌ستێن میلیشیایێن حوسیان دا ئازاد كرن و ژ باله‌فرگه‌ها “حوده‌یده” نێزیك بوونه و ب تنێ 18 كیلۆمه‌تر ماينه ب گه‌هنه ناڤا باژارێ “حوده‌یده”.
ئه‌ڤه‌ژی د ده‌مه‌كی دایه كو نووچان ئاماژه ب وێ چه‌ندێ كريه كو ل گه‌ل نێزیك بوونا وێ هێزێ میلیشیایێن حوسی ژ وی باژێری دره‌ڤن. پرانیا سازیێن فه‌رمی ب تالان برینه و ژبۆ باژێرێ “سه‌نعا” ڤه‌گوهاستينه.
هه‌ڤده‌م هێزێن به‌ره‌ڤانيێ پشتی كۆنترۆل كرنێ ئه‌و ده‌ڤه‌ر پشكنینه و ده‌ست ب سه‌ر هنده‌ك چه‌ك و ته‌قه‌مه‌نی و مینێن ئیرانی دا گرتينه كو میلیشیایان ل په‌ی خوه ب جھ هێلابوون.
پشتی وێ شكه‌ستا تووشى حوسیان بوويى، عه‌بدوله‌لك حوسی داخواز ژ عه‌شیرێن خوه كرن پشتا هێزێن خوه بگرن و ل دژی هێزێن حوكمه‌تا شه‌رعی شه‌رى بكه‌ن.
نيشاندان