ئه‌ڤرۆنيوز:
ژئه‌گه‌رێ روودانه‌كا هاتنوچوونێ وه‌لاتيه‌كى گيانێ خوه ژ ده‌ستدا وسێ كه‌س ژى برينداربوون.
رێڤه‌به‌ريا هاتنوچوونا پارێزگه‌ها دهۆكێ دبه‌رپه‌رێ خوه دا ل سه‌ر تۆرا فه‌يسبووكێ به‌لاڤكر” ئه‌ڤرۆ ئێكشه‌مبى 18/2/2018، لە سەر جادا دناڤبەرا ناحیا داره‌توو و گوندی بنینان ل نێزیك گوندی ( بیووک ) ل قه‌زا به‌رده‌ره‌شێ، رودانەك ژ جۆری وەرگه‌ريان په‌يدابوو”.
دياركر ژى” ژ ئه‌نجامێ وێ روودانێ كه‌سه‌كى گيانێ خوه ژده‌ستدا وسێ كه‌سێن دى ب دژوارى برينداربوون”.
ئه‌ڤرۆ، نه‌وزاد هلۆرى:
نێزیكێ هه‌یڤه‌كێ یه جۆره ماسیه‌كێ ئیرانى ل بازارێن ئاكرێ و ئامێدیێ و ده‌ڤه‌را بارزان دهێته فرۆتن ، وه‌كو ماسیگر دده‌ن دیاركرن كو ئه‌و جۆره ماسیه بناڤێ ماسیێن رووبارێن پارێزگه‌ها دهۆكێ دهێنه فرۆتن و بازارێ ماسیان ل ده‌ڤه‌رێ هه‌راجكریه ، ئه‌ڤه سه‌ره‌راى كو ژلایێ تام و خوه‌شی و ساخله‌میێ ڤه جودایه ژ ماسیێن كوردستانێ.
سه‌میع سه‌دیق ئێكه ژ ماسیگرێن ده‌ڤه‌را بارزان بۆ ئه‌ڤرۆ نیوز گۆت” جۆره ماسیه‌كێ ئیرانى كو ب ره‌نگ و شێوه وه‌كو ماسیێ رووبارێن ده‌ڤه‌رێ یه، بناڤێ ماسیێن رووبارێن كوردستانێ و سنوورێ پارێزگه‌ها دهۆكێ دهێته فرۆتن و كارتێكرنه‌كا مه‌زن ل سه‌ر بهایێ ماسیان كریه”.
زه‌كى زێبارى ئێكه ژ ماسی فرۆشێن ده‌ڤه‌رێ و ماسیان ل سنوورێ قه‌زا ئامێدیێ و ئاكرێ دكریت و د فرۆشیت بۆ ئه‌ڤرۆ نیوز گۆت” نێزیكێ هه‌یڤه‌كێ یه ماسیه‌كێ ئیرانى كو درۆست ب شێوێ خوه‌ڤه وه‌كو ماسیێن رووبارێن پارێزگه‌ها دهوكێ یه ، بناڤێ ماسیێن رووبارێن ده‌ڤه‌رێ دهێته فرۆتن ، بهایێ وێ نیڤا بهایێ ماسیێن رووبارێن ده‌ڤه‌رێ یه و گه‌له‌ك كارتێكرن ل فرۆتنا ماسیێن ده‌ڤه‌رێ كریه و زیانێن زور گه‌هاندینه ماسیگران و ماسى فرۆشان ژى”.
زێده‌تر گۆت” پێدڤیه لایه‌نێن شوله‌ژێ دووڤچوونێ ل سه‌ر بكه‌ن ، ژبه‌ركو ژ روویى تام و خوه‌شیێ ڤه گه‌له‌ك جودایه ژ ماسیێن رووبارێن پارێزگه‌ها دهۆكێ و كيلۆيا ماسیا ده‌ڤه‌رێ دناڤبه‌را 10 بۆ 15 هزار دیناران دهێته فرۆتن، چونكى تاما وێ يا خوه‌شه و ساخله‌مه، به‌لێ ماسيا ئیرانى كیلۆ دناڤبه‌را دو هزار بۆ پێنج هزار دیناران دهێته فرۆتن”.
محه‌مه‌د شاجى ئێكه ژ فرۆشیارێن ماسیان ل شێلادزێ و هنده‌ك ماسیێن ئیرانى ل گه‌ل بوون، بۆ ئه‌ڤرۆ نیوز گۆت” ئه‌م هه‌موو جۆرێن ماسیان دفرۆشین، ماسیێن رووبارێن ده‌ڤه‌رێ و ماسیێن پرۆژان و ماسیێن ئیرانى ژى ، ماسیێن ئیرانى ب رێیا به‌فرگریێن مه‌زن ل ده‌رگه‌هێن سنووری يێن حاجى ئومه‌ران و په‌روێزخان دگه‌هیته هه‌رێما كوردستانێ ، به‌لى هه‌تا دهێته فرۆتن ره‌نگه چه‌ند رۆژه‌ك ب سه‌رڤه بچن، ئه‌ڤ جۆره ماسیه ب ره‌نگ و شێوێ خوه هه‌ر وه‌كو ماسیا رووبارێن ده‌ڤه‌رێ یه ، به‌لێ ب ئاشكرا دبێژین كو ب تام و خوه‌شیا خوه‌ڤه جودایه و ناگه‌هیته ماسیا رووبارێن ده‌ڤه‌رێ”.
زێده‌تر گۆت” خه‌لكێ ده‌ڤه‌رى نزانن كو ماسیا ئیرانێ یه هه‌تاكو نه‌كرن و نه‌به‌ن مال و بخون ، به‌لێ دڤێت ئه‌م بێژینه وان كو یا ئیرانى یه ژ به‌ركو ژ وان ڤه یا رووبارێن ده‌ڤه‌رێ یه ، به‌لێ پتريا وان كه‌سێن ماسیا ئیرانى دفرۆشن بناڤى ماسیا رووبارێن ده‌ڤه‌رێ دفرۆشن و نابێژن خه‌لكى كو یا ئیرانێ یه”.
ناڤبرى دیاركر ژى كو كیلۆیا ماسیا ئیرانى دناڤبه‌را دو هزار بۆ پێنج هزار دیناران دهێته فرۆتن و گۆت ژى” خوه‌شترین و ب تامترین و باشترین جۆرێ ماسى ، ماسیا رووبارێن كوردستانێ و پارێزگه‌ها دهۆكێ یه و گه‌له‌ك يا ساخله‌مه و ب تامه ژبه‌ركو ئه‌و بخوه دژیت و يا دووره ژ ماددێن كێمیای و هه‌ر ب ساخى دگه‌هیته بازارى و دهێته فرۆتن”.
موقه‌ده‌م (ئیبراهیم ئاكره‌يى) ژ ژینگه‌ها ئاكرێ بۆ ئه‌ڤرۆ نیوز گۆت” هه‌تا نها چو پێزانين نینن ل دۆر گه‌هشتنا ماسیا ئیرانێ بۆ بازاران و فرۆتنا وێ بناڤێ ماسیا رووبارێن كوردستانێ و دهۆكێ ، به‌لێ ئه‌م ب هه‌ڤكاریا چاڤدێریا بازارى دێ دووڤچوونێ ل سه‌ر ڤێ یه‌كێ كه‌ین ، هه‌كه ده‌ركه‌فت كو ماسى یا ساخله‌مه، دێ موله‌ت ب فرۆتنا وێ هێته‌دان، به‌لێ دڤێت هه‌ر ب ناڤێ ماسيا ئیرانێ بهێته فرۆتن دا كارتێكرنێ ل ماسیا ده‌ڤه‌رێ نه‌كه‌ت ژبه‌ركو چو ماسى جهێ ماسیا كوردستانێ ناگرن بۆ تام و خوه‌شى و ساخله‌میا خوه ، هه‌كه ده‌ركه‌فت نه‌یا قانونى یه ، ب هاریكاریا لژنا په‌یوه‌ندیدار دێ هه‌لویستێ خوه ل وى ده‌مى راگه‌هینین”.
ل سنوورێ پارێزگه‌ها دهۆكێ هه‌ر ئێك ژ رووبارێن خابوور ، زێ مه‌زن ، زێ بچووك و خازر ل گه‌ل چه‌ند لقێن رووبارێن دى يێن هه‌ين كو رێژه‌یه‌كا مه‌زن يا ماسیان تێدا يا هه‌ى و ب گۆره‌ى پێزانينێن نه فه‌رمى رۆژانه 300 ماسیگر ل وان رووباران ماسیان دگرن و هه‌ر ئێك ژ وان ماسیگران دناڤبه‌را 3ێ بۆ 10 كیلۆيێن ماسیان دگرن.
ئه‌ڤرۆنيوز:
وه‌لاتيه‌كێ 50 سالى ئه‌ڤرۆ ئێكشه‌مبى 18/2/2018، ب رێيا خوه خه‌ندقاندنێ دووماهى ب ژيانا خوه ئينا.
رێڤه‌به‌ريا پۆليسێن پارێزگه‌ها سلێمانيێ د به‌رپه‌رێ خوه يێ فه‌رمى دا ل سه‌ر تۆرا جڤاكى يا فه‌يسبووكى به‌لاڤكر” ئه‌ڤرۆ سپێدێ ل تاخێ سێتوان ل سلێمانيێ وه‌لاتيه‌كێ 50 سالى ب رێيا خوه خه‌ندقاندنێ ب وه‌ريسه‌كى دووماهى ب ژيانا خوه ئينا”.
دياركر ژى”پشتى گه‌هشتنێ هێزێن پۆليسان، ته‌رمى وى وه‌لاتى هاته هنارتن بۆ نوشداريا داد، ل دووڤ ڤه‌كۆلينێن ده‌ستپێكى وى وه‌لاتى نه‌خوه‌شيه‌كا ده‌روونى هه‌بوو”.
ئه‌ڤرۆنيوز:
پشتى وێ پێلا بارانێ ئه‌وا ل رۆژا ئه‌ينيا بۆرى باژێرێن هه‌رێما كوردستانێ ڤه‌گرتى، پێشبينى دهێته كرن ل دووماهيا ڤێ حه‌فتيێ جاره‌كادى پێله‌كا باران بارينا ب هێز بۆ ده‌مێ 9 رۆژان باژێرێن هه‌رێما كوردستانێ ڤه‌گريت.
ل دووڤ پێشبينيێن كه‌شناسى يێن سايتێ(accuweather) يێ جيهانى، پێلا بارانێ دێ ل رۆژا ئه‌ينيا داهاتى 23/2/2018، ده‌ستپێكه‌ت وهه‌تا رۆژا شه‌مبيێ 3/3/2018 دێ يا به‌رده‌وامبيت.
ل دووڤ هه‌مان سايتى، ره‌وشا سه‌قايێ ئه‌ڤرۆ وچه‌ند رۆژێن بهێت ل پارێزگه‌ها دهۆكێ دێ ب ڤى شێوه‌ى بيت:
ئه‌ڤرۆنیوز، نه‌وزاد هلۆرى:
ده‌مێ 12 رۆژایه گه‌نجه‌كێ سه‌نته‌رێ ناحیا شێلادزێ یا سه‌ر ب قه‌زا ئامێدیێ ڤه يێ به‌رزه‌یه ، كه‌سوكاره‌كێ وى دیاركر كو گومان دهێته‌كرن چوبیته ده‌رڤه یان عه‌فرینێ.
مێهڤان بێزه‌لى، ئێك ژ كه‌سوكارێن وى گه‌نجى بۆ ئه‌ڤرۆ نیوز گۆت” ل رۆژا 7/2/2018، مرۆڤه‌كێ مه یێ گوندێ بێزه‌لێ ل سه‌نته‌رێ ناحیا شێلادزێ به‌رزه‌بوویه و هه‌تا نها ئه‌م چو ژ چاره‌نڤیسێ وى نزانین، به‌لێ گومان دهێته‌كرن كو چوبیته ده‌رڤه‌ى هه‌رێما كوردستانێ، یان ژى چوبیته عه‌فرینێ “.
زێده‌تر گۆت” ئه‌و گه‌نج ب ناڤێ (ئیسماعیل عه‌بدوللا) یه و ژیێ وى 18 سالن وقوتابى يه و چو كێشه ل گه‌ل كه‌سێ نینن و چو كێشه‌یێن ده‌روونى ژى نینن و ئه‌م گومانێ ژ كه‌سێ نابه‌ین كو ره‌ڤاند بیت یان كوشت بیت و مه پولیس و جهێن شوله‌ژێ يێن ئاگه‌هداركرین”.
ئه‌ڤرۆ نیوز، نه‌وزاد هلۆرى:
ئێڤاره دره‌نگى یا ئه‌ڤرۆ شه‌مبيێ 17/2/2018، ژ ئه‌گه‌رێ شورته‌كێ كاره‌بێ، ئاگر به‌ربوو بوردێن به‌لاڤكرنا كاره‌با شوقێن لێلاڤ ستى ل سه‌نته‌رێ باژێرێ دهوكێ و زیانێن مه‌زن گه‌هشتنه بوردێن كاره‌بێ
به‌یار ره‌شید، ل جهێ روودانێ ل نێزیك شوقێن لێلاڤ ستى يێ به‌رهه‌ڤ بوو، بۆ ئه‌ڤرۆ نیوز گۆت” ئه‌ڤرۆ ئێڤارى ب دره‌نگى ڤه ئاگر به‌ربوو بوردێن كاره‌با گشتى يا شوقێن لێلاڤ ستى و زیانێن مه‌زن گه‌هشتنێ “.
زێده‌تر گۆت” ئاگر ژ ئه‌نجامێ شورته‌كا كاره‌بێ درۆست بوویه”.
ئه‌ڤرۆنيوز:
ژ ئه‌گه‌رێ هاتنا بارانێن زۆر وگرتنا جادان ب ئاڤێ وچوونا ئاڤێ بۆ ناڤ مالێن چه‌ندين تاخێن باژێرێ رومادى وچه‌ندين باژێرێن پارێزگه‌ها ئه‌نبار، بريار هاته دان سوباهى بێهنڤه‌دانا فه‌رمى بيت.
جڤاتا پارێزگه‌ها ئه‌نبار د به‌ياننامه‌كێ دا كو ئه‌ڤرۆ شه‌مبيێ 17/2/2018 ده‌ركرى، بريار دا سوباهێ ئێكشه‌مبى بێهنڤه‌دانا فه‌رمى بيت ل پارێزگه‌ها ئه‌نبار ژبلى هنده‌ك فه‌رمانگه‌هێن خزمه‌تگوزارى.
ئه‌ڤه ده‌مێ دو رۆژانه، بارانێن ب هێز ل چه‌ندين پارێزگه‌هێن عيراقێ دبارن وبوويه ئه‌گه‌رێ رابوونا له‌هيێن بارانان ل هژماره‌كا پارێزگه‌هان.
رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ ژى ئه‌ڤرۆ شه‌مبيێ راگه‌هاندبوو كو ژبه‌ر بارانێن ب هێز ئه‌گه‌ر هه‌يه له‌هى ل ده‌ڤه‌رێن گه‌رميان وراپه‌رێن په‌يدا بن.
ئه‌ڤرۆنيوز:
دچارچۆڤێ ياريێن گه‌را 15 ژ خۆلا عيراقى بۆ يانێن پلا ياناب، ئه‌ڤرۆ شه‌مبيێ 17/2/2018 ل ياريگه‌ها شه‌عب يا نێڤده‌وله‌تى ل به‌غدا، يانا زاخۆ تووشى دووراندنه‌كا مه‌زن بوو ل سه‌ر ده‌ستێ يانا جه‌ويه ب ئه‌نجامێ گۆله‌كێ به‌رامبه‌ر پێنج گۆلان.
گۆلێن يانا جه‌ويه ل خۆله‌كێن ( 16،20،23،61،86) ژئاليێ ياريكه‌رێن وێ (ئه‌مجه‌د رازى “دو گۆل”، حه‌مادى ئه‌حمه‌د، يێ كرواتى مومنفيتش، هومام تارق)، گۆلا ئێكانه يا يانا زاخۆ ژلايێ ياريكه‌رێ وێ ستار ياسين ل خۆله‌كا 25 هاته تۆماركرن.
ب ڤى ئه‌نجامێ، يانا جه‌ويه گه‌هشته خالا 28 ول رێزا سيێ دهێت د رێزبه‌ندا خۆلێ دا وخالێن يانا زاخۆ ژى هه‌ر مانه 11 خال ول رێزا 17 دهێت.
ئه‌ڤرۆ نیوز:
سروه عه‌بدولواحد په‌رله‌مانتارا گۆڕان ل په‌رله‌مانێ عیراقێ د دیداره‌كێ دا ل گه‌ل سكاى پرێس راگه‌هاند، ئه‌و بۆ خۆلا بهێت یا په‌رله‌مانێ عیراقێ خوه ل سه‌ر لیستا بزاڤا گۆران به‌ربژێر ناكه‌ت، به‌لكو دێ خوه ل سه‌ر لیستا سه‌ركه‌فتن یا حه‌یده‌ر عه‌بادى به‌ربژێر كه‌ت.
سروه‌یێ پابه‌ندبوونا خوه ب عیراقه‌كا ئێكگرتى دووپات كر و راگه‌هاندیه” ئه‌وا ل ده‌ف من گرنگ خزمه‌تكرنه ب عیراقه‌كا خودان ناسنامه‌كا نیشتیمانى یا ئێكگرتى”.
ئەڤرۆنیۆز، سالار دۆسكی:
بەرپرسێ پەیوەندی و راگەهاندنێ ل رێڤەبەریا بوردێ كارۆبارێن مرۆڤایەتی ل پارێزگەها دهۆكێ ئاشكراكر كو هژمارا رێكخراوێن هاریكاری پێشكێشی ئاوارە و پەنابەران كرین بەر ب كێمبوونێ دچن.
سالم سەعید بەرپرسێ پەیوەندی و راگەهاندنێ ل رێڤەبەریا بوردێ كارۆبارێن مرۆڤایەتی ل پارێزگەها دهۆكێ بۆ ئەڤرۆ نیۆز گۆت” رێكخراوێن هاریكاریا ئاوارا و پەنابەران دكەن كێم بووینە و هندەك ژی دبەردەوامن و پلان بۆ 2018 ژی هەنە”.
سالمی ئەو ژی دیاركرك كو پلان يێن هه‌ين بۆ پشتەڤانیا ئاواران وەكو نەخوه‌شخانە و قوتابخانە و رێ و پران و پاقژیێ و پرۆژێن خزمەتگوزاری.
گۆت ژی” دەمێ داعش ب دووماهی هاتی، پلان هەبوو كو ئاوارە ڤه‌گەرن جهێن خوە و چەندەك ژی ل ناحیا زومار و رەبیعە ڤەگەریان ،لێ پشتی هاتنا حەشدا شەعبی كاودان تێكچوون و هەتا نوكە ماینە و هه‌كه ل دووڤ ڤی دەستوداری بیت، دێ ئاوارە هەبن هەتا 2020ژی”.
سالمی رەخنە كۆنگرێ ئاڤەدانكرنا عیراقێ ل كوێتێ گرتن و ئاماژە كرە وێ چەندێ كو هەر بەحسێ ئاواران نەهاتیەكرن و بتنێ ل سەر ئاڤەدانیێ بوویە.
نيشاندان