ئه‌ڤرۆنيوز:

پشكا چاڤدێرى وسلامه‌تيا خوراكى ل رێڤه‌به‌ريا كاروبارێن خوه‌پاراستنێ ل پارێزگه‌ها دهۆكێ، هوشداريێ دده‌ته‌ وه‌لاتيان كو وان شه‌ربه‌ت وشريناهيان يێن ناڤێ ته‌زياتيێ ومێژوويا به‌رهه‌ڤكرن وئێكسپايرا وێ ل سه‌ر نه‌بيت، نه‌كرن.

عسمه‌ت سه‌لمان وه‌يسى، رێڤه‌به‌رێ پشكا چاڤدێرى وسلامه‌تيا خوراكى ل رێڤه‌به‌ريا كاروبارێن خوه‌پارساتنا ساخله‌ميێ ل دهۆكێ بۆ رۆژناما ئه‌ڤرۆ گۆت” ب مه‌ره‌ما پتر پاراستنا ساخله‌ميا وه‌لاتيان ل هه‌يڤا ره‌مه‌زانێ، تيمێن مه‌ رۆژانه‌ ل دانێ سپێدێ ودانێ ئێڤارى ودو تيم ب شه‌ڤ به‌رده‌وام دووڤچوونا بازار دكه‌ن، گه‌له‌ك جه هاتينه‌ هوشداريكرن وهنده‌ك ژى يێن هاتينه‌ سزادان ب كۆژمه‌كێ پاره‌ى وهنده‌كێن دى ژى يێن هاتينه‌ داخستن”.

عسمه‌تى ژ خه‌لكى خواست كو شريناهى وشه‌ربه‌تێن ل هه‌يڤا ره‌مه‌زانێ ل سه‌ر عه‌ره‌بانا وسه‌ر جادان دهێنه‌ فرۆتن، پێدڤيه‌ ل ده‌ستپێكێ سه‌حكه‌نێ كا ژێده‌رێ وێ شريناهيێ يان شه‌ربه‌تێ ژكيڤه‌يه‌ وهه‌كه‌ ناڤێ ته‌زياتيێ ل سه‌ر نه‌بيت بلا نه‌كرن، چونكى پێزانين يێن هه‌ين هنده‌ك شريناهيان وشه‌ربه‌تێ ل مال دروست دكه‌ن وهه‌موو رێنمايێن ساخله‌ميێ تێدا نينن، له‌وما دووڤچوون يا ل سه‌ر دهێته‌ كرن.

گۆت ژى” هه‌كه‌ مه‌ زانى مالك شريناهيان يان شه‌ربه‌تێ دروست دكه‌ت ول بازارى دهێته‌ فرۆتن، ب فه‌رمانا دادوه‌رى دێ چينه‌ وێ مالێ ودێ پێرابوونێن قانوونى ل گه‌ل هێنه‌ وه‌رگرتن، ل سالا بۆرى ئه‌ڤ جۆرێ زێده‌گاڤيێ هه‌بوو، به‌لێ ئه‌ڤ ساله‌ هه‌تا نوكه‌ روو نه‌دايه‌”.

ئه‌ڤرۆنيوز:

نوشدارێ تايبه‌تمه‌ندێ نشته‌رگه‌ريێن گشتى، عه‌دنان ئاكره‌يى، دياركر كو ئێشانا گەدێ ب دو شێوازان مروڤی دگریت د ھەیڤا رەمەزانێ دا، یا ئێکێ ئێشانێن برسێ ل دەمێ رۆژیگرتنێ، یا دويێ پشتی فتارێ نەخاسمە دەمێ مرۆڤ خوارنەکا زێدە دخوه‌ت و ب لەز دخوه‌ت و پشتی خوارنێ ئێکسەر بنڤیت، ھەروەسا خوارنێن زەنگین ب دوھناتیێ و ترشیا بکاربینیتن و کەرەستێن کافایین تێدا و شەربەتێن دەستکرد ژ ئەگەرێن دی یە.

نوشدارێ ناڤبرى زێده‌تر بۆ نوش نيوز خوياكر، كو ب ڤان رێیا دێ شێی خوه‌ ژ ڤێ ئاریشێ پارێزی یان ژی کێم کەی:

* پووتەدانەکا پتر ب پاقژیێ ژ بەر کو ھوکارێ سەرەکیێ قەرحێ بەرکتریایە کو دھێتە ڤەگوھاستن ب رێیا پیساتیێ و خوارن و ڤەخوارنێ.

* راگرتنا جگارکێشانێ: جگارە فاکەتەرەکێ ھەرە مەترسیدارە ژ بۆ دەبوونا ترشیێن گەدەيی و تێکدانا دیوارێ وێ.

* ب کارنه‌ئینانا دەرمانێن زیانبەخش ب گەدێ ب تایبەتی حەبێن تەناکرنا ئێشێ(مسکن) وەکو پروفین و فولتارین و ئەسپرین…ھتد.

*خوه‌ پاراستن و زوو چارەکرنا فشارێن دەروونی (ترس و خەم و تۆره‌يى… ھتد).

کێمکرنا خوارن و ڤەخوارنێن زیانێ دگەھیننە گەدێ وەک خوارنێن چەور و قەلاندی و شریناھیان، ھەروەسا زێدە ڤەخوارنا کافاینێ (چایا رەش، قەھوە، نیسکافی) شەربەتێن دەستکرد و ڤەخوارنێن غازی.

*خوارنێ ھێدی ھێدی بخۆ و ب ھوشیاری (بەرامبەر تلەفزیۆنێ نەخۆ) باش بجوو و ل سەر زکێ تێر ئێکسەر نەنڤە نەخاسمە پشتی پاشیڤێ و جەمێن خوارنێ د ناڤبەرا شیڤێ و پاشیڤێ بلا پتر بن، بەلێ بڕا وێ كێمتر بیتن (کێم خورێ بەردەوام خوربە).

*بەری نھا وەسا دھاتە ھزرکرن کو تیژی و دژواری زیانێ دگەھینتە گەدێ، به‌لێ ھەتا نوکە ئەڤ گۆتنە د زانستێ نوشداری دا نەھاتیە پشت راستکرن.

* هه‌كه‌ ڤان پێنگاڤا فایدەنەکر دێ شێی رۆژیا نەگری، لێ یا گرنگە ئێکەم جار سەرەدانا نوشدارێ تایبەتمەند بکەی و ئەو بریارێ بدەت.