ئەڤرۆنیۆز، سەباح زوهێر:
محەمەد سەلاح هێرشبەرێ میسریێ یانەیا لیڤەرپول ئینگلێزی ل یاریا دووماهیێ ل چامپیۆنزلیگێ دا ب رۆژی نابیت.
راهێنەرێ لەشی ل يانا لێڤه‌رپۆل ئاشکراکریە کو محه‌مه‌د سه‌لاحى ب وى راگه‌هانديه ئه‌و ل رۆژا شەمبيێ 26/5/2018 كو دێ ياريا دووماهيێ دناڤبه‌را لێڤه‌رپۆل وريال مه‌دريده هيته ئه‌نجامدان ئه‌و ب روژی نابیت بۆ هندێ کو کاریگەریەکا نەرێنی ل سەر شیانێن وی دروست نەبیت،
دياركر ژى ، بێ کو هیچ فشارەک ل سەر هاتبیتە کرن، محەمەد سەلاح ب خوه ئەو بریار دایە.
ئه‌ڤرۆنيوز:
ژێده‌ره‌كى ژ پۆليسێن سلێمانيێ راگه‌هاند، زارۆيه‌كێ 10 سالى ل گوندێ (داربه‌روى) ب سه‌ر ناحيا خه‌له‌كان ڤه دوهى ل ده‌مێ ياريكرنێ ل ده‌رڤه‌ى مال، ژئه‌گه‌رێ بريسيێ گيانێ خوه ژده‌ست دايه.
دياركر ژى كو تيمێن پۆليسان گه‌هشتنه جهێ روودانێ وته‌رمێ وێ زارۆيى بۆ نه‌خوه‌شخانێ ڤه‌گوهاست بۆ ئه‌نجامدانا ڤه‌كۆلينێ.
ئه‌ڤرۆ نيوز، نيوار محه‌مه‌د سه‌ليم:
پشتى بۆرينا ساله‌كێ ژ دانانا هاريكاريا نه‌خۆشێن په‌نجه‌شێرا زارۆيان نوكه هاريكاريێن باش هاتينه كرن ب ره‌نگه‌كێ جهێ وان ژى هاتيه گوهۆڕين و نه‌خۆش ده‌رمان ژى ناكرن، به‌لێ هيڤيێن وان دابينكرنا وان ئاميرانه يێن ل كوردستانێ و عيراقێ نه‌يى.
د. نزار به‌كر، رێڤه‌به‌رێ نه‌خۆشخانا هيڤى يا زارۆيان ب داخۆيانيه‌كێ دا بۆ ئه‌ڤرۆ نيوز گۆت: “پشتى ل سالا بۆرى سندوقا هاريكاريا په‌نجه‌شێرا زارۆيان ل پارێزگه‌ها دهۆكێ ژ لايێ هه‌ر ئێك ژ نه‌خۆشخانا هيڤى يا زارۆيان و نوشدار و زانايێن ئاينێ ئيسلامى و هنده‌ك پارێزه‌ر و هنده‌ك ژمێرياران و ب پشته‌ڤانيا پارێزگه‌ها دهۆكێ هاتيه راگه‌هاندن”.
زێده‌تر گۆت: “سۆپاس بۆ خودێ پشتى بۆرينا ساله‌كێ كاره‌كێ گه‌له‌ك باش هاتيه كرن؛ جهێ نه‌خۆشان بۆ جهه‌كێ گه‌له‌ك خۆشتر يێ هاتيه گوهۆڕين و ده‌رمان ژى بۆ دهێنه دابينكرن و چو نه‌خۆش ناكرن، به‌لێ پێدڤيێن وان هێشتا يێن ماين و نه‌خۆش به‌رده‌وام يێ د زێده‌بوونێ دا، له‌ورا داخوازێ ژ خه‌لكێ دهۆكێ ب تايبه‌ت كه‌سانێن تايبه‌تمه‌ند دكه‌ين هاريكاريێ ل گه‌ل ڤان نه‌خۆشان ب رێيا سندوقێن هاريكاريان بكه‌ن”.
سندوق ب ره‌نگه‌كێ به‌رده‌وام ل نه‌خۆشخانا هيڤى يا زارۆيان ل دهۆكێ يا دانايه ل گه‌ل هه‌ر ئێك ژ مزگه‌فتێن مزگەفتا حەجی ئه‌حمه‌د، مزگەفتا جودی، مزگەفتا سەیدۆ، مزگەفتا نزارکێ، مزگەفتا مه‌لا عه‌مه‌ر کوچەر، مزگەفتا مەلا جيهاد ل بەرۆشکێ، مزگەفتا سه‌لاحه‌دين. ل ئاكرێ ژى ل مزگه‌فتا ئاكرێ يا مه‌زن و ل نێزيك دێ ل زاخۆ ژى هێته دانان. هه‌ر ديسا ژمارا به‌نكى ژى ل به‌نكا كوردستان هه‌يه ب ژماره “4272727” كو هوونێن هێژا دشێن ب ڤان هه‌موو رێيان هاريكاران بگه‌هينن.
رێڤه‌به‌رێ نه‌خۆشخانا هيڤى خۆيا ژى كر كو گه‌له‌ك جاران نه‌خۆشێن مه پێدڤى ب هنده‌ك ئاميران دبن كو ل ناڤخۆيا دهۆك و هه‌رێما كوردستانێ و عيراقێ ژى نينن و گۆت: “هيڤيێن مه ئه‌ون بشێين ب هاريكاريێن كه‌سانێن خودان شيان وان ئاميران ژى دابين بكه‌ن، دا كو نه‌خۆشێن مه پێدڤى ژ ده‌رڤه‌ى وه‌لاتى نه‌بن”.
ئه‌ڤ ساله ل پارێزگه‌ها دهۆكێ 235 نه‌خۆشێن په‌نجه‌شێرێ هه‌بوون و به‌رده‌وام ژمارا وان د زێده‌بوونێ دانه؛ ژ ڤێ ژمارێ نێزيكى 100 زارۆيان ژ ڤێ نه‌خۆشيێ زرگار بووينه ب ئێكجارى و هنده‌كان ژى گيانێ خوه ژ ده‌ست دايه.
ئه‌ڤرۆنيوز:
وه‌زاره‌تا سامانێن سروشتى ل هه‌رێما كوردستانێ وكۆمپانيا رووسنه‌فت يا رووسى دو گرێبه‌ستێن نوو دبوارێن په‌ترۆلێ وغازێ دا ئيمزاكرن.
ل كوربه‌ندێ ئابووريێ سان پێترسپۆرگ، ئاشتى هه‌ورامى وه‌زيرێ سامانێن سروشتى ل هه‌رێما كوردستانێ راگه‌هاند” ل گه‌ل كۆمپانيا رووسنه‌فت مه گرێبه‌ستا راكێشانا بۆريا غازا سروشتى ئيمزاكر”.
ئيگۆر سێچين، رێڤه‌به‌رێ گشتيێ رووسنه‌فت بۆ رووداو گۆت” مه ل هه‌رێما كوردستانێ ده‌ست ب جهئينانا پرۆژێ راكێشانا بۆريا غازا سروشتى كر ودێ دبه‌رده‌وام بين ل سه‌ر پێشخستنا په‌يوه‌نديێن خوه ل گه‌ل هه‌رێما كوردستانێ”.
ئه‌و گرێبه‌ستێن هاتينه ئيمزاكرن، ل دووڤ رووداو، درێژه‌پێده‌رێن گرێبه‌ستێن دده‌مێ دو سالێن بۆرى نه دناڤبه‌را حوكمه‌تا هه‌رێمێ ورووسنه‌فت وئه‌وێن ئه‌ڤرۆ هاتينه ئيمزاكرن بۆ ب هێزكرن وله‌زكرنا كارێن رووسنه‌فتن ل كوردستانێ.
دياركر ژى، دبوارێ غازێ دا، كۆمپانيا رووسنه‌فت به‌رى غازێ هنارده‌ى ده‌رڤه بكه‌ت، پێدڤيه پێدڤيێن ناڤخوه‌يى ووه‌لاتيێن كوردستانێ دابين بكه‌ت.
ئه‌ڤرۆنيوز:
رۆژنامه‌كا له‌نده‌نى به‌لاڤكر كو دانوستاندن دناڤبه‌را حزبا ده‌عوه ي ئيسلامى وليستا فه‌تح دهێنه كرن ب سه‌رپه‌رشتيا قاسم سلێمانى فه‌رماندێ فه‌يله‌قا قودس يا ئيرانى ب مه‌ره‌ما پێكئينانا مه‌زنترين كوتلا په‌رله‌مانى ل عيراقێ.
رۆژناما (الحياه) يا له‌نده‌نى دياركر” پێشتر باليۆزخانا ئه‌مريكى ل به‌غدا به‌رهه‌ڤيا خوه بۆ ناڤبريێ دياركريه بۆ موقته‌دا سه‌درى كو ژبلى رێككه‌فتنا سه‌در ل گه‌ل حه‌يده‌ر عه‌بادى ل سه‌ر هه‌ڤپه‌يمانيێ، ل گه‌ل لايه‌نێن دى ژى دانوستاندن كريه.
وێ رۆژنامێ به‌لاڤكر ژى” هادى عامرى ونورى مالكى دلنيايى يا وه‌رگرتى تاكو مه‌زنترين كوتلا په‌رله‌ماى پێكبينن ل گه‌ل لايه‌نێن دى”.
ئەڤرۆ نیۆز، سەباح زوهێر
هه‌لبه‌ستڤان و میدیاکارێ کورد خەلەف یاسین یێ بەرنیاس ب خەله‌فێ زێباری شەڤا بۆری ل واشنتۆن وەغەرکر.
ئەحمەد زێباری، پسمامێ خەلەفێ زێباری بۆ ئەڤرۆ نیۆز دیارکر کو شەڤا بۆری پێنجشەمبی 24-5-2018 خەلەفێ زێباری کو خودانێ هه‌لبه‌ستا(خۆزی من تو دیتبای نەسرین) ل واشنتۆن پایتەختێ ئەمریکا د ژیێ 70 ساڵی دا وەغەر کر.
گوت ژی کو خەلەفێ زێباری ل مالا خوه لە واشنتۆن وەغەرکریە وهه‌ر ل وى باژێرى ژی دێ هێتە ڤەشارتن.
خەله‌فێ زێباری ژبلی کو دامەزرێنەر و بێژەرەکێ دیارێ رادیۆیا پشكا کوردی دەنگێ ئەمریکا بوویە، هه‌لبه‌ستڤانه‌كێ بەرنیاس بوو، ئێک ژ دیارترین هه‌لبه‌ستين وی بناڤێ (نەسرین) کو محەممەد شێخۆ کریە ستران.
ئەحمەد زێباری زێدەتر گۆت کو خەلەفێ زێباری خەلکێ گوندێ (بانیێ) یە ل سنورێ قەزا ئاکرێ و ل سالا 1974 بێژەرێ دەنگێ کوردستان- عێراق بوویە، پشتى نسکۆيا سالا 1975 چوویە ئەمریکا و ل سالا 1992 ئێک بوویە ژ دامەزرێنەرێن پشكا کوردی رادیۆیا دەنگێ ئەمریکا و دو پەرتۆک ب ناڤێ( زێرێ رەش) و ( وارێ شێران) چاپکرینە و ل سالا 2012 خانەنشین بوويە.
ئاماژە د وێ چەندێ کو ل باژێرێ دیاربەکر و ب بریارا سەڵاحەدین دەمیرتاش جادەیەکا مەزن بناڤێ خەلەفێ زێباری هاتیە ئاڤاکرن و بێژەرێ سالێن حەفتيان یێ ئێزگەهێ شۆره‌شێ، ڕادیۆیا دەنگێ کوردستانێ بوو، ب نەخوه‌شی یا تەنگە وه‌غه‌ر کر ، د رێورەسمەکێ دا تەرمێ وى دێ ل گۆڕستانا ڤێرجینیا ل ئەمریکا دێ هێتە ڤەشارتن.
ئه‌ڤرۆ نیوز:
ڤلادیمێر پۆتین، سه‌رۆكێ رووسیا ئه‌ڤرۆ و چه‌ند رۆژێن بووری د گه‌ل چه‌ندین سه‌ركردێن وه‌لاتێن ئه‌ورۆپی كۆمبوو، تشتێ سه‌رنجراكێش د هه‌ڤدیتنان دا پێشكێشكرنا ده‌ستێن گولان بوون.
پوتین ل رۆسیا پێشوازی ل ئه‌نگێلا مێركل شیره‌تكارا ئه‌لمانیا كر ب پێشكێشكرنا ده‌سته‌كێ گولێن سپی، میدیا ئه‌لمانی ژی ره‌خنه ل پوتینی گرتن ئه‌و یه‌ك وه‌ك نیشاندانا ده‌ستهه‌لاتدارییا زه‌لامان و ئیهانه بناڤ كر.
وه‌كي دیاره پوتینی چ گرنگی پێ نه‌دا ژبه‌ركو ئه‌ڤرۆ ژی پیشوازی ل سه‌رۆكێ فره‌نسا و هه‌ڤژینا وی كر و ده‌سته‌كێ گولێن سپی و پیڤازی بۆ كرنه دیاری.
به‌ری نها پوتینی ب هه‌مان ره‌نگ پێشوازی ل كۆلیندا یا سه‌رۆكا كرواتیا كربوو، هنده‌ك ئالییان ژی ئه‌و یه‌ك ب دپلۆماسییا ده‌ستێن گولان ل قه‌له‌م دا د ده‌مه‌كی دا ئه‌مریكا و ئه‌ورۆپا پشتی ده‌ستبكاربوونا ترامپی تۆشی ناكۆكییان بووینه.
ئه‌ڤرۆ نیوز:
ئاژانسا نێڤده‌وله‌تی یا وزه‌یا ئه‌تۆمی (IAEA) راگه‌هاند، ده‌ستهه‌لاتا ئیرانێ هه‌تا نوكه پێگریێ ب مه‌رجێن رێككه‌فتنا ئه‌تۆمی دكه‌ت ئه‌وا ل سالا 2015 د ناڤبه‌را وێ و زلهێزێن جیهانێدا هاتییه ئیمزاكرن.
هه‌روه‌سا دیاركر كو ئیرانێ پێگیره ب رێگریكرنێ ژ كاركرنا سازیێن وێ یێت سه‌ره‌كی یێن ئه‌تۆمی هه‌مبه‌ری راكرنا سزایان.
ئه‌ڤه د ده‌مه‌كی دا یه ئه‌مریكا خوه ژ رێككه‌فتنێ ڤه‌كێشایه ب سووچا پێگیرینه‌كرنا ئیرانێ و پرۆگرامێ مۆشه‌كێن بالستی و چالاكیێن وێ یێن پشته‌ڤانیكرنا تیرۆرێ ل رۆژهه‌لاتا ناڤین.
هه‌ڤده‌م ئه‌ورۆپا ژی دبێژیت رێككه‌فتن یا بمفایه و ئیران پێگریێ دكه‌ت.
ئه‌ڤرۆ نیوز:
فرۆكخانه‌كا سه‌ربازی یا رژێما سووریێ ل گونده‌وارێن حۆمسێ كه‌فته به‌ر هێرشا چوار مۆشه‌كان و ژ ئه‌گه‌رێ وێ یه‌كێ ئاگر به‌ربوو فرۆكخانێ.
زیانێن گیانی نه‌هاتنه زانین و چ ئالییان به‌رپرسیارییا خوه ژ هێرشێ رانه‌گه‌هاندنییه لێ ل گۆری گۆتنا رژێمێ وێ چه‌ندین مۆشه‌ك برێیا سیسته‌مێ به‌رگریێ هه‌لوه‌شاندنه.
نيشاندان