ئه‌ڤرۆنيوز، سه‌باح زوهێر
به‌رپرسێ كۆمسيۆنا هه‌لبژارتنان ل قه‌زا ئاكرێ بۆ ئه‌ڤرۆنيوز دياركر كو ده‌نگدان ل قه‌زا ئاكرێ ب شێوه‌كێ رێكوپێك هاته ئه‌نجامدان تنێ ل ده‌ستپێك ل دو قوتابخانان كێشا ته‌كنيكى هه‌بوو لێ ب زووترين ده‌م هاته چاره‌كرن.
ناڤبری گوت” دووماهى ئه‌نجامێ رێژا پشكداريا ده‌نگده‌ران دپرۆسا هه‌لبژارتنان دا ل قه‌زا ئاكرێ گه‌هشته 73%”.
ئه‌ڤرۆنيوز:
به‌رپرسه‌كێ وه‌زاره‌تا ئه‌وقافێ وكاروبارێن ئاينى ل هه‌رێما كوردستانێ ئاشكرا دكه‌ت ژئه‌گه‌رێ وێ چه‌ندێ كو سندووقێن ده‌نگدانێ ل وه‌لاتێ سعوديێ نه‌هاتينه دانان، دده‌نگدانا گشتى دا ب هزاران عومره‌كار كو نوكه ل وى وه‌لاتى نه، ژمافێ ده‌نگدانێ بێ به‌هر دبن.
مه‌ريوان نه‌قشبه‌ندى، رێڤه‌به‌رێ په‌يوه‌نديان وپێكڤه‌ژيانى ل وه‌زاره‌تا ئه‌وقاف وكاروبارێن ئاينى راگه‌هاند” ل ده‌نگدانا گشتى دا بۆ هه‌لبژارتنێن جڤاتا نوونه‌رێن عيراقێ، ب هزاران وه‌لاتيێن عيراقێ وهه‌رێما كوردستانێ ژمافێ ده‌نگدانێ بێ به‌هر دبن”.
مه‌ريوانى دبه‌رپه‌رێ تايبه‌ت يێ خوه دا ل سه‌ر تۆرا فه‌يسبووكى رۆهنكر ژى” ژبه‌ركو كۆمسيۆنا بلند يا هه‌لبژارتنان ل عيراقێ بنگه‌هێن ده‌نگدانێ ل سعوديێ نه‌ڤه‌كرينه، ب هزاران عومره‌كارێن عيراقێ وب سه‌دان عومره‌كارێن هه‌رێما كوردستانێ كو نوكه ل وى وه‌لاتى نه، ژ مافێ ده‌نگدانێ بێ به‌هر بوون”.
ئه‌ڤرۆنيوز:
ل دۆر كێشا چه‌ند ئاميرێن ده‌نگدانێ ل هژماره‌كا بنگه‌هێن ده‌نگدانێ ل سه‌رانسه‌رى عيراقێ، كۆمسيۆنا بلند يا هه‌لبژارتنان ل عيراقێ رۆهنكرنه‌ك ده‌ركر.
موعته‌مه‌د موسه‌وی، ئه‌ندامێ جڤانا كۆمسياران ل كۆمسيۆنا بلند يا هه‌لبژارتنان دكۆنگره‌كێ رۆژنامه‌ڤانى دا گۆت” ئه‌و كێشه وئاريشێن ل ده‌مێ ده‌نگدانێ رووداين گه‌له‌ك دكێمن وب وى شێوه‌ى نينهن كو ده‌زگه‌هين راگه‌هاندنێ به‌لاڤ دكه‌ن”.
گۆت ژى” كۆمسيۆنێ تيمێن سه‌خبێركرنێ يێن هه‌ين ل هه‌موو بنگه‌هێن ده‌نگدانێ تاكو ل ده‌مێ روودانا هه‌ر حاله‌ته‌كێ ب شێوه‌كێ ب له‌ز وان كێشان چاره‌سه‌ر بكه‌ن”.
ئه‌ڤ داخۆيانيێن وى به‌رپرسێ كۆمسيۆنا بلند يا هه‌لژارتنان دده‌مه‌كى دانه كو ل چه‌ندين بنگه‌هێن ده‌نگدانێ ل هه‌رێما كوردستانێ وعيراقێ كێشه دئاميرێن ده‌نگدانێ دا دروست بوون وبوونه ئه‌گه‌رێ قه‌ره‌بالغێ ل ويستگه‌ه وبنگه‌هێن ده‌نگدانێ وپرۆسه ب ب له‌ز ب رێڤه نه‌چيت.
ئه‌ڤرۆ نيوز:
ئه‌ڤرۆ سپێدێ هه‌لبژارتنێن گشتى ل عيراقێ و هه‌رێما كوردستانێ ده‌سپێكرن و ليسته و قه‌وارێن سياسى و به‌ربژار دێ هه‌ڤركيێ ل سه‌ر 328 كورسيێن جڤاتا نوونه‌رێن عيراقێ كه‌ن.
رێژا پشكداريكرنێ ب ره‌نگه‌كێ به‌رچاڤ ل پارێزگه‌ها دهۆكێ يا كێمه و ب ره‌نگه‌كى هه‌كه وه‌سان ب رێڤه بچيت ناگه‌هيته 70%ێ.
ب گۆره‌ى پێزانينێن ب ده‌ست ئه‌ڤرۆ نيوز كه‌فتين رێژا ده‌نگدانێ هه‌تا ده‌مژمێر 4:00ى ئێڤارى ل پارێزگه‌ها دهۆكێ ب ڤى ره‌نگى بوويه:
دهۆك: 111.481 ده‌نگده‌ر ئانكو 48.60
زاخۆ: 69.906 ده‌نگده‌ر ئانكو 55.53
ئاكرێ: 44.727 ده‌نگده‌ر ئانكو 52.08
ئامێديێ: 39.494 ده‌نگده‌ر ئانكو 64.40
به‌رده‌ره‌ش: 29.478 ده‌نگده‌ر ئانكو 51.75
سێمێل: 39.812 ده‌نگده‌ر ئانكو 49.29
شێخان: 28.807 ده‌نگده‌ر ئانكو 62.7
ب ڤى ره‌نگى ديار دبيت كو سه‌رجه‌مێ گشتى يێ ده‌نگدانێ ل پارێزگه‌ها دهۆكێ هه‌تا ده‌مژمێر 4:00، 387.027 ده‌نگده‌رن ژ سه‌رجه‌مێ 716.300 كه‌سان و ب ڤێ چه‌ندێ ژى دبيته رێژا 57.35%ێ.
ئه‌ڤرۆ نيوز، رێوار مزيرى:
ئه‌ڤرۆ سپێدێ هه‌لبژارتنێن گشتى ل عيراقێ و هه‌رێما كوردستانێ ده‌سپێكرن و ليسته و قه‌وارێن سياسى و به‌ربژار دێ هه‌ڤركيێ ل سه‌ر 328 كورسيێن جڤاتا نوونه‌رێن عيراقێ كه‌ن.
ل پارێزگه‌ها دهۆكێ 716 هزار و 300 كه‌سان مافێ ده‌نگدانێ هه‌يه و ل سه‌ر 256 بنگه‌هـ و 1664 ويستگه‌هان هاتينه به‌لاڤكرن و د ده‌نگدانا تايبه‌ت ژى دا 50 هزار كه‌سان مافێ ده‌نگدانێ هه‌بوو. ده‌رباره‌ى ئاواران ژى 200 هزار كه‌سان مافێ ده‌نگدانێ هه‌يه و 61 بنگه‌هێن دانگدانێ بۆ هاتينه دابينكرن.
ئه‌ڤرۆنيوز:
كۆمسیۆنا بلند يا هه‌لبژارتنان ل عيراقێ دياركر كو ئه‌نجامێن ده‌ستپێكی يێن هه‌لبژارتنێن جڤاتا نوونه‌رێن عيراقێ دێ پشتی دو رۆژان هێنه راگه‌هاندن وئه‌نجامێن فه‌رمى ژى پشتى 15 رۆژان.
كۆمسیۆنێ خوياكر ژى “پرۆسه‌یا ده‌نگدانێ دێ تاكو سده‌مژمێر شه‌شی ئێڤاری يا به‌رده‌وام بیت و ناهێته درێژكرن”.
ل دۆر ژڤانێ راگه‌هاندنا ئه‌نجامان ژى، دياركر” دده‌مێ 48 ده‌مژمێرێن داهاتى دا، دێ ئه‌نجامێن ده‌ستپێكی هێنه راگه‌هاندن، پشتی 15 رۆژان ژی دێ ئه‌نجامێن فه‌رمی هێنه راگه‌هاندن”.
ئه‌ڤرۆنيوز:
ل تلكێفێ ووانكێ، حه‌شدا شه‌عبى رێگريێ ل خه‌لكى دكه‌ت بچنه بنگه‌هێن ده‌نگدانێ وليست وبه‌ربژارێن جهێ باوه‌ريا خوه ب هه‌لبژێرن وچه‌ند نوونه‌رێن پارتى ژى ده‌سته‌سه‌ركرن.
يه‌لدا شه‌موئێل، به‌رپرسێ لژنا ناوچا پارتى ديموكراتى كوردستان ل تلكيێفێ ئاشكراكر” ل تلكێفێ ووانكێ حه‌شدا شه‌عبى رێگريێ ل خه‌لكى دكه‌ت پشكداريێ دهه‌لبژارتنان دا بكه‌ت وهنده‌ك ئه‌ندامێن پارتى ژى ده‌سته‌سه‌ركرينه”.
يه‌لداى، ل دووڤ وشه، زێده‌تر گۆت” حه‌شدا شه‌عبى ب هه‌موو شێوه‌كى گه‌فان ل خه‌لكى دكه‌ت وره‌وشه‌ك په‌يداكريه كو خه‌لك ئازاد نه‌بن ده‌نگ ب چ لايه‌نه‌كى بده‌ن، چونكى ب چه‌ك ڤه دناڤ بنگه‌هێن ده‌نگدانێ دهێنه ديتن”.
دياركر” حه‌شدا شه‌عبى ب ئاشكرايى گه‌فان ل خه‌لكى دكه‌ن ودبێژن پێدڤيه ده‌نگ ب وان بده‌ن ونابيت ده‌نگ ب به‌ربژارێن ليستا پارتى بده‌ن وترسه‌كا مه‌زن ل ده‌ف خه‌لكى په‌يداكريه”.
ئاماژه دا ژى كو ل لايێ به‌نداڤا مووسل به‌ر ب ده‌ڤه‌را وانكێ، حه‌شدا شه‌عبى بۆمبێن چاندى يێن داناين بۆ وێ چه‌ندێ خه‌لك نه‌چيت ده‌نگێ خوه بده‌ت.
ئه‌ڤرۆنيوز:
جێگرێ سه‌رۆكێ فراكسيۆنا پارتى ل په‌رله‌مانێ عيراقێ راگه‌هاند، ره‌وشه‌كا نه جێگير ل ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ يا هه‌ى ورێگرى ل وه‌لاتيێن كورد ب گشتى وئه‌ندامێن پارتى ب تايبه‌ت دهێته كرن.
شاخه‌وان عه‌بدوللا، جێگرێ سه‌رۆكێ فراكسيۆنا پارتى ل په‌رله‌مانێ عيراقێ گۆت” دناڤبه‌را جه‌له‌ولا وكه‌لار رێگرى ل چوونا خه‌لكێ مه بۆ ده‌نگدانێ ل جه‌له‌ولا هاته كرن، به‌لێ من ته‌له‌فۆن بۆ فه‌رماندێ ئۆپه‌راسيۆنان كر ويێ ب هيڤى مه ئه‌و رێگرى نه‌مينن”.
شاخه‌وانى زێده‌تر بۆ باسنيوز گۆت” ب گشتى رێگرى ل كوردان دهێته كرن وب تايبه‌تى ئه‌ندامێن پارتى، چونكى ب ديتنا وان هه‌كه رێژا پارتى ل په‌رله‌مانێ عيراقێ گه‌له‌ك بيت ويا ب هێز بيت، دێ پێگه‌هێ كوردان ب هێز بيت، ل گه‌ل وێ چه‌ندێ بۆچوونا وان بۆ پارتى وه‌كو حزبه‌كا سياسى نينه، به‌لكو ژ روانگه‌ها نه‌ته‌وايه‌تى ژ پارتى دترسن، چونكى دزانن پارتى هه‌لگرا په‌ياما كوردايه‌تيێ يه وداگيرانێ ل سه‌ر چو تشته‌كى ل به‌غدا ناكه‌ت”.
نيشاندان