ئه‌ڤرۆنيوز:

سه‌رۆك وه‌زيرێن عيراقێ، حه‌يده‌ر عه‌بادى، داخواز ژ ئوردنێ كر، كوژمێ 28 مليار دۆلاران بۆ عيراقێ ڤه‌گه‌رينيت كو ب ناڤێ كۆرێن سه‌دامى دبه‌نكێن ئوردنى دانه‌.

رۆژناما “الديار” يا لوبنانى، به‌لاڤكر” حه‌يده‌ر عه‌بادى داخواز ژ حوكمه‌تا ئوردنى كريه‌ 28 مليار دۆلارێن ب ناڤێ عوده‌ى وقوسه‌ى كۆرێن سه‌دامى د سێ به‌نكێن ئوردنى دا بۆ عيراقێ بهێنه‌ ڤه‌گه‌راندن ژبه‌ركو پارێن عيراقێ نه‌”.

وێ رۆژنامێ دياركر كو حوكمه‌تا ئوردنێ ئه‌و داخوازه‌ ره‌تكريه‌ ژبه‌ركو ئه‌و پاره‌ يێن دهژماره‌كا به‌نكى يا كه‌سايه‌تى دا يێن هه‌رو كۆرێن سه‌دامى ودهژماره‌كا به‌نكى يا حوكمه‌تا عيراقێ دا نينن وتنێ خووشكا وان ( ره‌غه‌د سه‌دام حسێن) مافێ بده‌ستڤه‌ئينانا وان پاران هه‌يه‌ چونكى تنێ ئه‌و ميراتگرا وانه‌”.

ئه‌ڤرۆنيوز:

رۆژنامه‌كا عه‌ره‌بى ئاشكراكر كو حوكمه‌تا عيراقێ ل به‌ره‌ كاركرن ب سيسته‌مێ عه‌دادێ تاكسيان بۆ عيراقێ بزڤرينيت.

 رۆژناما (العرب) يا له‌نده‌نى به‌لاڤكر” لێگه‌ريانا حوكمه‌تا به‌غدا ل داهاتيێن نوو ژبۆ سڤككرنا قه‌يرانا وێ يا دارايى وه‌سا به‌رفره‌هبوويه‌ تاكو گه‌هشتيه‌ بزاڤا سه‌پاندنا بجهئينانا سيسته‌مێ عه‌دادێن تاكسيان ب مه‌ره‌ما بده‌ستڤه‌ئينانا داهاتيێن باجا”.

رۆژناما ناڤبرى ژ زارده‌ڤێ ژێده‌ره‌كى ژ وه‌زاره‌تا ڤه‌گۆهاستنا عيراقێ به‌لاڤكر” پرۆژێ عه‌دادان دترمبێلێن تاكسى دا به‌رى نوكه‌ ل عيراقێ هاتيه‌ بجهئينان وكۆمپانيا گشتى يا ڤه‌گۆهاستنا تايبه‌ت نوكه‌ كار ل سه‌ر زڤراندنا وى سيسته‌مى دكه‌ت”.

وى ژێده‌رى پتر گۆت” هه‌تا نوكه‌ چو چڤان بۆ بجهئينانا وى پرۆژه‌ى نه‌هاتينه‌ دياركرن تاكو خشته‌ وپلانين گرێداى شێوێ هژمارتنا كريێن رێيان ل گه‌ل به‌رچاڤ وه‌رگرتنا ده‌مێ چوونا ترومبێلێ ژبه‌ر قه‌ره‌بالغا ترومبێلان ل هنده‌ك جهان وئه‌ڤ سيسته‌مه‌ دمفاى وه‌لاتيان وده‌وله‌تێ دايه‌ ژبه‌ركو ئاستێ كريان كونترۆل دكه‌ت وداهاتيێن دراڤى ژى بۆ ده‌وله‌تێن بده‌ستڤه‌ دهێن ب رێيا كاركرنا ترومبێلێن تۆماركرى ب تنێ”.

ئه‌ڤرۆنيوز:

ژێده‌ره‌كێ سياسى يێ ئاگه‌هدار ئاشكرا دكه‌ت كو ل ده‌مێ وه‌زيرێ ده‌رڤه‌يێ توركيا مه‌ولود ئوگلو بۆ به‌غدا، داخواز ژ سه‌رۆك وه‌زيرێن عيراقێ كريه‌ ده‌ست ب ئۆپه‌راسيۆنه‌كا له‌شكرى يا هه‌ڤپشك بهێته‌ كرن بۆ ده‌ركرنا په‌كه‌كێ ژ قه‌زا شنگالێ ل باكوورێ رۆژئاڤايێ مووسلێ وعه‌بادى ژى ب مه‌رج رازيبوويه‌ ل سه‌ر وێ داخوازيێ.

وى ژێده‌رى بۆ ئاژانسا (عين العراق نيوز) دياركر” وه‌زيرێ ده‌رڤه‌يێ توركيا مه‌ولود ئوگلۆ داخواز ژ حه‌يده‌ر عه‌بادى سه‌رۆك وه‌زيرێن عيراقێ كر ل ده‌مێ سه‌ره‌دانا به‌غدا كرى ل 21 ڤێ هه‌يڤێ، ده‌ست ب ئۆپه‌راسپۆنه‌كا له‌شكرى يا هه‌ڤپشك بهێته‌ كرن بۆ ده‌ركرنا په‌كه‌كێ ژ قه‌زا شنگالێ وده‌ڤه‌رێن ده‌وروبه‌ر”.

وى ژێده‌رى دياركر”عه‌بادى چه‌ندين مه‌رج پێشكێشى توركيا كرن بۆ پشكداريێ دوێ ئۆپه‌راسيۆنا له‌شكرى دا، وه‌كو ڤه‌كێشانا هێزێن توركى ژ به‌عشيقه‌ ورێكخستنا رێككه‌فتنه‌كا ستراتيژى ل دۆر ڤه‌كێشانا هه‌موو هێزێن توركى ژ ئاخا عيراقێ”.

وه‌زيرێ ده‌رڤه‌يێ توركيا، پشتى ژسه‌ره‌دانا خوه‌ بۆ به‌غدا زڤرى، دداخۆيانيه‌كا رۆژنامه‌ڤانيدا گۆتبوو” توركيا وعيراق يێ دانوستاندنان دكه‌ن ژبۆ ئه‌نجامدانا ئۆپه‌راسيۆنه‌كا هه‌ڤپشك دژى هه‌بوونا په‌كه‌كێ ل شنگالێ”.

دياركربوو ژى” به‌رپرسێن عيراقى بۆمه‌ دووپاتكر كو دێ كونترۆلێ ل سه‌ر سنورێ سووريێ ب درێژيا ده‌ڤه‌را شنگالێ ب هيزتر لێكه‌ن ودێ ب تمامى هاتنا چه‌كدارێن په‌كه‌كێ وپه‌يه‌دێ راوه‌ستينن”.