ئه‌ڤرۆنيوز:

فه‌رمانده‌كێ هێزێن پێشمه‌رگه‌ى راگه‌هاند، به‌رى چه‌ند شه‌ڤان چه‌كدارێن داعشێ هێرشى سه‌نگه‌رێن له‌شكرێ عيراقێ كر وهژماره‌كا سه‌ربازان كوشتن، ئاشكراكر ژى كو هه‌موو گوندێن ب سه‌ر سه‌نته‌رێ قه‌زا به‌عقوبه‌ (سه‌نته‌رێ پارێزگه‌هێ) يێن دده‌ستێ داعشێ دا ژبلى سه‌نته‌رێ قه‌زايێ.

ليوا روكن (مه‌ريوان عه‌لى) فه‌رماندێ هێزێن پشته‌ڤانى 2 سه‌ر ب يه‌كه‌يا 70 يا پێشمه‌رگه‌ى كو ب سه‌ر ئێكه‌تيا نيشتمانى كوردستان ڤه‌يه‌ بۆ باسنيوز گۆت”  به‌رى چه‌ند شه‌ڤان چه‌كدارێن داعشێ  گونده‌كێ نێزيك خانه‌قين هێرشى سه‌نگه‌رێن له‌شكرێ عيراقێ بوون وچه‌ند سه‌ربازه‌ك كوشتن، به‌لێ پێشمه‌رگه‌ يێ دحاله‌تا ئاماده‌باشيێ دا وهه‌موو وان ده‌ڤه‌رێن هاتينه‌ ئازادكرن دێ پارێزيت”.

وى فه‌رماندێ پێشمه‌رگه‌ى گۆت ژى” پشتى ئاشكرابوونا چه‌كدارێن داعشێ ل پارێزگه‌ها ديالا كو ل دووڤ گۆتنا وه‌لاتيێن ده‌ڤه‌رێ، چه‌كدارێن داعشێ ب شێوه‌كێ ئاشكرا هاتنوچونێ دكه‌ن، فه‌رمانده‌يا هێزا پێشمه‌رگێ كوردستانێ، ئه‌مريكا وحوكمه‌تا عيراقێ ئاگه‌هداركرينه‌، به‌لێ دياره‌ ل ڤێ ره‌وشا نوكه‌ هنده‌ك تشت يێن هه‌ين ناهينه‌ كرن”.

دبێژيت ژى” هه‌موو ئه‌و تشت بۆ ده‌مه‌كێ نه‌ديار هاتينه‌ پاشخستن، بێگومان پشتى هه‌لبژارتنێن په‌رله‌مانێ عيراقێ، گوهۆرينێن مه‌زن دبه‌رژه‌وه‌نديا پێشمه‌رگه‌ى وگه‌لێ كوردستانێ دێ روو ده‌ن”.

دياركر ژى” له‌شكرێ عيراقى بێ هێزا پێشمه‌رگه‌ى چو تشته‌ك پێ ناهێته‌ كرن، چونكى به‌رده‌وام چه‌كدارێن داعشێ هێرشى سه‌نگه‌رێن له‌شكرێ عيراقێ دكه‌ن، بێگومان پێشمه‌رگه‌ يێ دحاله‌تا ئاماده‌باشيێ دا بۆ وێ چه‌ندێ تاكو بشێين هه‌موو ده‌ڤه‌رێن خوه‌ بپارێزين ئه‌وێن نوكه‌ دده‌ستێ پێشمه‌رگه‌ى دا”.

ئه‌ڤرۆنيوز:

ئه‌ندامه‌كێ جڤاتا پارێزگه‌ها نه‌ينه‌وا ژليستا برايه‌تى وپێكڤه‌ژيان راگه‌هاند، حه‌شدا شه‌عبى ل ده‌ڤه‌رێن كوردستانى ل سنوورێ پارێزگه‌ها نه‌ينه‌وا يا ده‌تسهه‌لاتداره‌ ونيازا وێ چه‌ندێ يا هه‌ى كو سه‌خته‌كاريان بكه‌ت، له‌وما پێدڤيه‌ هه‌ر ژنوكه‌ كۆمسيۆنا بلند يا هه‌لبژارتنان ل عيراقێ پێرابوونێن توند بۆ رێگريێ ل سه‌خته‌كاريێ ئه‌نجام بده‌ت.

حه‌شدا شه‌عبى ل ده‌ڤه‌رێن كوردستانى يێن ده‌رڤه‌ ئيدارا هه‌رێما كوردستانێ، به‌رده‌وام گه‌فان ل خه‌لكى دكه‌ت كو ده‌نگ ب ليستێن وان بده‌ن ومه‌ترسيا وێ چه‌ندێ ژى يا هه‌ى كو ل رۆژا هه‌لبژارتنان سه‌خته‌كاريێ ئه‌نجام بده‌ت.

سه‌يدۆ جه‌تۆ، ئه‌ندامێ جڤاتا پارێزگه‌ها نه‌ينه‌وا ژ ليستا برايه‌تى وپێكڤه‌ژيان، بۆ مالپه‌رێ فه‌رميێ پارتى ديموكراتى كوردستان گۆت” حه‌شدا شه‌عبى ده‌ستهه‌لات ل سنوورێ نه‌ينه‌وا ل ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ دده‌ست دايه‌ وهه‌ر كاره‌كێ بڤێت دكه‌ن ونوكه‌ ژى بۆ هه‌لبژارتنێن په‌رله‌مانێ عيراقێ، ل هه‌موو ده‌ڤه‌ران به‌ربژارێن خوه‌ يێن هه‌ين ومه‌ترسيا وێ چه‌ندێ يا هه‌ى كو سه‌خته‌كاريێ ئه‌نجام بده‌ن وپێدڤيه‌ رێگرى لێ بهێته‌ كرن”.

جه‌تۆى گۆت ژى”ل سنورێ شنگالێ وره‌بيعه‌ وزوومار، خه‌لكه‌كێ زۆر كو هژمارها وان دبيت زێده‌تر ژ 50 هزار كه‌سان بن، يێن چووينه‌ ده‌رڤه‌ى وه‌لاتى كو ژيێ گه‌له‌ك ژوان دسه‌ر 18 ساليێ دايه‌، له‌وما مه‌ترسى يا هه‌ى حه‌شدا شه‌عبى بۆ به‌رژه‌وه‌نديێن خوه‌ سه‌خته‌كاريێ ئه‌نجام بده‌ت ول رۆژا ده‌نگدانێ كارتێن وان يێن ده‌نگدانێ بكاربينن، ژبه‌ر ڤێ چه‌ندێ پێدڤيه‌ هه‌ر ژنوكه‌ كۆمسيۆنا هه‌لبژارتنان پێرابوونێن توند بكاربينيت، هه‌كه‌ نه‌ حه‌شدا شه‌عبى دێ سه‌خته‌كاريێ كه‌ت”.

ئه‌ڤرۆنيوز:

ئاژانسا رويته‌رز يا جيهانى راپۆرته‌ك ل سه‌ر حه‌يده‌ر عه‌بادى سه‌رۆك وه‌زيرێن عيراقێ به‌لاڤ دكه‌ت ودبێژيت عه‌بادى ده‌مه‌كێ زۆر به‌رپرسێ چێكرنا مه‌سعه‌دا ئاژانسا بى بى سى بوو.

ئاژانسا رويته‌رز ئه‌ڤرۆ سێشه‌مبى 8/5/2018  دراپۆرته‌كێ دا به‌حسێ هنده‌ك نهێنيێن ژيانا حه‌يده‌ر عه‌بادى سه‌رۆك وه‌زيرێن عيراقێ دكه‌ت وئاماژێ ب وێ چه‌ندێ دكه‌ت كو گه‌له‌ك ژ عيراقيان نزانن كو حه‌يده‌ر عه‌بادى كو ده‌مێ ل بريتانيا وه‌كو په‌نابه‌ر دژيا، وه‌كو ئه‌ندازيارێ كاره‌بێ ل ئاژانسا BBC  يا راگه‌هاندنێ هاتبوو دامه‌زراندن وئه‌ركێ سه‌ره‌كى يێ وى به‌رپرسياره‌تيا چێكرنا مه‌سعه‌دا وێ ئاژانسێ بوو.

رويته‌رزێ به‌لاڤكر” هژماره‌كا كێم يا عيراقيان دزانن كو حه‌يده‌ر عه‌بادى به‌رى سالا 2014 كه‌سه‌كێ ناڤدار نه‌بوو، به‌لێ ل وه‌لاته‌كى كو دئاژاوه‌گيريێ دايه‌ زوو بۆ سه‌ركردێ وه‌لاتى، ئه‌وژى ب دوورخستنا نورى مالكى”.

وي ئاژانسێ به‌لاڤكر ژى” ل دووماهيا هه‌يڤا بۆرى، حه‌يده‌ر عه‌بادى سه‌ره‌دانا باژێرێن هه‌رێما كوردستانێ كر، به‌لێ هێشتا كوردان ئه‌و هێرشا عه‌بادى دژى ريفراندۆما هه‌رێما كوردستانێ كرى ژبير نه‌كريه‌”.