ئه‌ڤرۆ نيوز:
پارێزەرەکێ دادگەھا قەسروکێ راگەھاند کو دو ھەڤژینان ل سەر بنەمایێ حەزژێکرنێ ژیانا خوە یا ھەڤژینیێ پێک ئینا بوو، بەلێ زەلامی ل پێش چاڤێن ھەڤژینا خوە ب تەلەفونێ ل گەل کچکا دئاخفت و گۆت: زەلامی ھەڤژینا خوە نە دڤیا و توندوتیژی ل گەل بکار دئینا، رۆژەکێ ژنک گەلەک تورە بۆ چو گاز ب خوەدا کر و ئێکسەر خوە سوت.
پارێزەر نەزیر ئیسماعیل سالح ل دادگەھا قەسروکێ بۆ ئەڤرۆ دیار کر کو دو ھەڤژینان ل سەر بنەمایێ حەزژێکرنێ ژیانا خوە یا ھەڤژینیێ پێک ئینا بوو و گۆت: ل دەسپێکێ ئەڤ کورە ب دلێ بابێ کچێ نەبوو، و نە دڤیا کچا وی شوو پێ بکەت، بەلێ ھەر رازی بۆ، پشتی دەواتا خوە کری شەش ھەیڤ بورین و رۆژ بۆ رۆژێ ئاریشا دەستپێکر، چونکی ژنکێ دزانی کو زەلامێ وێ یێ خیانەتێ لێ دکەت و جاران لبەر چاڤێن وێ ل گەل کچەکا دی دئاخفت.
پارێزەری گۆتژی: ژنک جارەکێ زیز بۆ و چوو مالا بابێ خوە و چەند ھەیڤان ما و نە گۆتە بابێ خوە ژبەر زەلامێ خوە زیز بوویمە، چونکی گەلەک حەز ژ زەلامێ خوە دکر، لێ ئەوی نەدڤیا و نە د زڤراندە مال ژی.
پارێزەر د بەردەوامیا ئاخفتنێن خوە دا گۆت: ژنکێ ژی گۆت دێ خوە ژ زەلامێ خوە دەمە بەردان و داوا ل دادگەھێ تومار کر و داخاز کر زەلامێ وێ ل گەل وێ باش بیت و کەس و کار ھاتنە دناڤا بابەتێ وان دا و چارە کر ژنک زڤری مالا زەلامێ خوە ڤە، پشتی چوویە مال نێزیکی شەش ھەیڤان ما ل مالا زەلامی و زارۆیەک ژی ھەبوو.
پارێزەری ئەو چەندە ژی ئاشکرا کر کو، زەلامێ وێ ھەروەکو خوە دکر و ل گەل کچێن خەلکی دئاخفت، رۆژەکێ ھەڤژینا وی چو د ژوورا خوەڤە دیت زەلامێ وێ ب دەنگەکێ بلند یێ ل گەل کچەکێ د ئاخڤیت وێ ژی گوھلێ بۆ گۆتێ ئەڤە چیە، زەلامێ وێ ژی تورە بۆ و توندوتیژی ل گەل ھەڤژینا خوە بکارئینا و گۆت: ژنک ژی گەلەک تورە بۆ، و چو گاز ب خوەدا کر و ئێکسەر خوە سوت.
پارێزەر نەزیر ئیسماعیل دا زانین ژی کو، پشتی بۆ نەخۆشخانێ ڤەگوھاستی نوشدارا گۆت سوتنا وێ ب رێژا 70% یە و دێ گیانێ خوە ژ دەست دەت، پشتی بورینا 48 دەمژمێرا پولیسا ڤەکۆلین ل گەل کر، لێ وێ گۆت سوپە ب من ڤە پەقیە و وەل من ھات، نە گۆتە پولیسا من ژ کەربێن زەلامێ خوەدا خوە سوتیە.
پارێزەری زێدەتر گۆت: پشتی ھەیڤەکێ رەوشا وێ باش بۆ و زڤری مال، زەلامێ وێ و دەیکا وی چونە مالا بابێ کچکێ و گۆتێ کچا ھەوە ژ بەر زەلامێ خوە خوە سوتیە و چ سوپە پێڤە نە پەقینە، بابێ وێ ژی سکالا ل سەر زاڤایێ خوە تومار کر و ھاتە دەستەسەر کرن ل سەر مادێ 408 ژ قانوونا سزایێن عیراقی، ژنکا وی دیسا د گۆت من نەڤێت زەلامێ من د زیندانێ ڤە بیت ھندی دڤیا، پشتی دادگەە کرنا زەلامێ وێ ھاتیە کرن ب حوکمێ دو ھەیڤان سزا دا، دەمێ حوکمێ خوە خلاس کری ئێکسەر ھەڤژینا خوە بەردا.
نيشاندان