ئه‌ڤرۆنيوز:
كورێ سه‌ركرده‌يه‌كێ ناڤدارێ ئيسلاميێن كوردستانێ نهێنيه‌كا مه‌ترسيدارومه‌زن ل دۆر بزاڤێن سه‌رۆكێ حزبه‌كا هه‌ريما كوردستانێ ئاشكرا دكه‌ت ودبێژيت عه‌لى باپير زه‌لامێ ئيرانێ يه وكارى بۆ تێكدانا رێزێن كوردستانێ دكه‌ت وهه‌ر ئه‌و هوكار بوو تا په‌يوه‌ندى دناڤبه‌را پارتى وگۆران تێك بچيت، ئاماژه ب وێ چه‌ندێ ژى دكه‌ت كو ل پاشه‌رۆژێ ژى ئه‌و دێ به‌رده‌وامبيت دخزمه‌تكرنا ئيرانێ دا ودوور نينه ژى خوه حه‌شدا شه‌عبى ژى ل كوردستانێ دروست بكه‌ت، بۆ رێگريێ ل گه‌هشتنا كوردستانێ ب قه‌وارێ سه‌ربخوه يێ خوه.
ئيحسان مه‌لا عه‌لى عه‌بدولعه‌زيز، كو برازايێ عوسمان عه‌بدولعه‌زيز دامه‌زرێنه‌ر ورابه‌رێ بزاڤا ئيسلامى يه وئه‌و ب خوه ژى وه‌كو كه‌سايه‌تيه‌كێ ناڤدارێ ئيسلامى چالاكيان ئه‌نجام دده‌ت، دلايڤه‌كا تۆرا جڤاكى يا فه‌يسبووكى دا ، به‌حسێ عه‌لى باپير ئه‌ميرێ كۆمه‌لا ئيسلامى ل كوردستانێ كر وگۆت” ل هه‌شتيان ئێكه‌تى هێزه‌كا كاريگه‌ر بوو ونه‌دچوو بن ده‌ستێ ئيرانێ، به‌لێ ئيرانێ ب رێيا عه‌لى باپيرى ده‌ست ب تێگدانا په‌يوه‌نديان دناڤبه‌را بزاڤا ئيسلامى وئێكه‌تيێ كر، هه‌موويان ژى دێ ب به‌لگه سه‌لمينم كو ئه‌و تابوورێ پێنجێ يه ل كوردستانێ، ل ده‌ستپێكێ ب نامێن بۆ جه‌لال تاله‌بانى وپاشى كاره‌ك كر بۆ خزمه‌تا ئيرانێ ووه‌كر ئێكه‌تى ب نه‌چارى نێزيكى ئيرانێ ببيت وبچيته بن بارێ ئيرانێ ورێككه‌فتنه‌كا ستراتيژى دناڤبه‌را ئيرانێ وجڤاتا بلند يا شوره‌شێ وئێكه‌تيێ بهێته گرێدان”.
ئيحسانى زێده‌تر گۆت” پشتى ڤان كاران هه‌ر دناڤ بزاڤا ئيسلامى ما ول مه‌كته‌با رێكخستنێ ژى بوو، به‌لگه يێ ل ده‌ف من چاوان راپۆرت ل سه‌ر كاملێ حاجى عه‌لى ومه‌لا ئه‌حمه‌دێ كاك مه‌حموود نڤيسى نه كا چ دكه‌ن وچ ناكه‌ن، هه‌موو تشت ژى ب خه‌تێ ده‌ستنڤيسێ وى ب خوه يا هه‌ى دئه‌رشيفێ من دا، پشتى سالا 200 ئيرانێ زانى كو ئه‌مريكا ورۆژئاڤا درژدن ل سه‌ر ژناڤبرنا رژێما به‌عس، هاتن ب رێيا وى كابراى بزاڤا ئيسلامى كو سێوانه‌ك بوو بۆ سونه‌يێن عيراقێ ب گشتى، له‌وما بزاڤا ئيسلامى هه‌لوه‌شاند ب رێيا عه‌لى باپيرى، پاشى سونه ب په‌رت وبه‌لاڤبوون مان، ئه‌و هێزا دشيا ببيته سێوان ورۆل دپاشه‌رۆژا عيراقێ دا هه‌بيت، به‌لێ ئيرانێ ب رێيا عه‌لى باپيرى جودابوون درێزێن وێ بزاڤێ دا په‌يداكر”.
گۆت ژى” ژبلى وێ چه‌ندێ، ئێكه‌تيێ وبزاڤا ئيسلامى ب ئيمزايا مامۆستا مه‌لا عه‌لى ومام جه‌لالى رێككه‌فتن دناڤبه‌را وان دا هه‌بوو، به‌لێ ب بريارا وى وه‌لاتێ جيران، فشار ل سه‌ر ئێكه‌تيێ كر ئه‌و رێككه‌فتن ل گه‌ل عه‌لى باپيرى بهێته كرن، پاشى گۆران دروست بوو وئيران ترسيا كو ئه‌و حزبه گه‌نجن ودبين نه‌چنه دبن هه‌ژموونا ئيرانێ ڤه، ژبه‌ر وێ چه‌ندێ مه‌لايێ ئاخر زه‌مان (مه‌ره‌ما وى عه‌لى باپيره) په‌يوه‌نديێن باش ل گه‌ل پارتى هه‌بوون، پارتى خانى ومال بۆ كر، به‌لێ ژبه‌ر كو كارێن وى ب ده‌ستێ وى نينن، له‌وما پشتى نێزيكبوونه‌ك دناڤبه‌را نه‌وشيروان مسته‌فا ومه‌سعود بارزانى دا دروست بووى، ژبه‌ركو گۆران هاته دناڤ حوكمه‌تێ دا وب راستگۆيانه چوونه دناڤ حوكمه‌تێ دا ودخواستن كوردستان به‌ر ب ئاشتيێ بچيت، به‌لێ ئه‌ڤه بۆ ئيرانێ يا باش نه‌بوو، مام جه‌لال نه‌خوه‌ش بوو، له‌وما هاتن ته‌نگه‌ژه‌ك دروستكر، نه پارتى ونه گوران هه‌تا نوكه نزانن بۆچى وئه‌گه‌رێ راسته‌قينه چ بوو وبۆچى دناڤبه‌را وان دا تێكچوو، دئێك حوكموت دا دپشكداربوون، ئه‌ڤ كابرايه (مه‌ره‌ما وى عه‌لى باپيره) ب فه‌رمانا وه‌لاته‌كێ دى ژ پارتى دووركه‌فت ونێزيكى گۆران بوو، له‌وما محه‌مه‌د حه‌كێمێ كۆمه‌لێ ل شوونا گۆران دگۆت هه‌كه كاك نه‌وشيروان پێ خوه ل ئه‌ردى بده‌ت، 20 هزار چه‌كدار دێ هێنه سه‌ر جادێ، له‌وما خه‌لك هنارته دناڤ خوه‌نيشانده‌ران دا وهه‌موو ژى ب به‌لگه هه‌نه”.
دپشكه‌كا دى يا ئاخڤتنێن خوه‌دا، ئيحسان دبێژيت” ئه‌و كۆمبوونا په‌رله‌مانێ كوردستانێ كو محه‌مه‌د يوسفى ئه‌نجامداى، هه‌موو وه‌لاتان وسه‌ركردايه‌تيا گۆرانێ ژى پێ باش بوو دو رۆژان بهێته پاشخستن، به‌لێ پاشى هه‌ر هاته ئه‌نجامدان ونه‌هاته پاشخستن، ئه‌ڤه هه‌موو ئه‌و مه‌لايێ ئاخر زه‌مان (مه‌ره‌ما وى عه‌لى باپيره) ل پشت بوو، ئه‌گه‌رێ تێكدانا دناڤبه‌را حزبێن كوردستانى بوو، نوكه خوه كريه به‌ره‌يێ خه‌لكى، دده‌مه‌كى دا دحوكمه‌تێ دا دپشكداربوون، به‌لێ به‌رى ده‌مه‌كێ كێم خوه ژ حوكمه‌تێ ڤه‌كێشا وبوونه به‌ره‌يێ گه‌ل”.
ل دۆر ئێكگرتوو وبزاڤا ئيسلامى كو دبێژن پاشگويێن پارتينه، ئيحسان مه‌لا عه‌لى گۆت” باره‌گايێن ئێكگرتوو هاتنه سوتن وسه‌ركرده‌يه‌كێ وێ شه‌هيد بوو، به‌لێ پارتى مال وخانى بۆ كرين، بۆچى تو پاشگويێ پارتى نه‌بووى، بۆچى ئێكگرتوو پاشگويێ پارتى يه، مامۆستا سه‌لاحه‌دين پشتى وه‌غه‌ركرنا نه‌وشيروان مسته‌فاى ب نهێنى ودوور ژ چاڤێن كاميرا خواست ناڤبه‌ريێ دناڤبه‌را لايه‌نان بكه‌ت ونێچيرڤان بارزانى بره ده‌ف عه‌مه‌رێ سه‌يد عه‌لى، به‌لێ عه‌لى باپيرى وه‌كر ده‌ستپێشخه‌ريا مامۆستا سه‌لاحه‌دينى ژى سه‌رنه‌گريت”.
ل دووماهيا ئاخڤتنێن ئيحسان مه‌لا عه‌لى، دبێژيت” هندى تابوورێ پێنجێ ل كوردستانێ هه‌بيت، ئارامى ل وه‌لاتێ مه به‌رقه‌رار نابيت، ئه‌ز ب دوور نازنم ئه‌و كابرايه (ئانكو عه‌لى باپير) يێ به‌رده‌وام بيت ل سه‌ر تێكدانا ناڤمالا كوردى، تاكو ب تمامى رێزێن گه‌لێ كورد تێكبده‌ت وحه‌شدا شه‌عبى ل كوردستانێ دروست بكه‌ت دژى گه‌هشتنا كوردان ب مافێن خوه وئه‌ز يێ پشت راستم ژڤان ئاخڤتنان ويێ به‌رهه‌ڤم ومن قه‌بووله مه‌لا كرێكار ومامۆستا ئيسماعيل سووسه‌يى دادڤانێن من بن وبسه‌لمينن كى يێ راسته وكى يێ شاشه”.
نيشاندان