ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 21ى كانوونا دويێ 2018ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1255 |
| 1 يۆرۆيێ ئه‌ورۆپى | 1535 |
| 1 ليرێ توركى | 330 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئەڤرۆ نيوز:
شارەزایەکێ جیۆلۆجی دیار کر کو ل گۆرەی دووماھی ڤەکۆلین، عیراقێ بۆ چار زوونان ھاتیە دابەشکرن و ھەرێما کوردستانێ ژی ل بن مەترسیا بیڤەلەرزان دایە، ب تایبەت ژی ھەر دو پارێزگەھێن دھۆک و سلێمانیێ.
رەمەزان حەمزە، شارەزایەکێ جیۆلۆجی بۆ رۆژناما ئەڤرۆ ئاشکرا کر کو ژ ئەگەرێ وێ چەندێ دیزاین و ئاڤاھی ب شێوەیێن خەلەت ھاتینە دانان کو خوە ل بەر بیڤەلەرزان بگرن، لەوڕا پێدڤیە ئەندازەیێن نوو بۆ ئاڤاکرنا خانیان بھێنە دانان کو خوە ل بەر بیڤەلەرزان بگرن و حازریێن مەزن ژی بۆ ڤێ چەندێ بھێنە کرن و گۆت: “ئەڤ ھژمارا مەزن یا بیڤەلەرزان ل ھەیڤا بۆری ل ئیران و کوردستان و عیراقێ داین، ھەتا ل گۆرەی ڤەکۆلینێن جیھانی ژی، دێ گوھۆرینەکێ د پلانا ئەندازیاران دا پەیدا کەت کو ئێدی دەمێ ئاڤاھیەکی یان خانیەک ئاڤادکەن ھزرا بیڤەلەرزان بکەن”.
ناڤھاتی ئاماژە دا وێ چەندێ کو پێدڤیە یان کۆدێ عیراقێ یێ بیڤەلەرزان بھێتە ئەکتیڤکرن یان ژی بۆ کوردستانێ کودەکێ بیڤەلەرزان بھێتە دانان، بۆ ھندێ کوردستان ھەردەم د بەرھەڤیا بیڤەلەرزان دابیت و زیانێن وێ کێمتر لێ بھێن.
ئەڤرۆ نيوز:
زێرنگرەکێ پارێزگەھا دھۆکێ دیار کر کو ژ بەر تێکچوونا قەیرانا دارایی و ب تایبەت د دەمێ دو ھەیڤێن بۆری دا، کرینا زێری ژ ئالیێ وەلاتیێن دھۆکێ ڤە ب تنێ 5% یە و نوکە 95% بازارێ زێرنگران کەفتیە سەر کرینا زێری ژ وەلاتیان.
شێخ عەبدولسەلام دۆسکی، سەرۆکێ سەندیکا زێرنگران ل پارێزگەھا دھۆکێ بۆ رۆژناما ئەڤرۆ دیار کر کو فرۆتنا زێری ژ ئالیێ وەلاتیان ڤە ب رێژەیەکا مەزن بەر ب زێدەبوونێ چوویە و ھندەک زێرنگر ھەنە رۆژانە نیڤ ھەتا کیلۆیەکا زێری ژ خەلکی دکرن و ل بەرامبەر دا فرۆتنا زێری ب رێژەیەکا مەزن ل کێمیێ دایە و ژ 5% نابۆریت.
ناڤھاتی ئەو یەک ژی خویا کر کو نوکە نێزیکی 15 کارگەھێن زێری ل دھۆکێ ھەنە و دەمێ زێرنگر زێری دکرن ھەکە یێ کەڤن بیت، ئەو کارگەھە بەردەوام وی زێری دحەلینن و جارەکا دی چێ دکەنەڤە و گۆت: “نوکە مە چو ئاریشە نینن و مە پێدڤی ب زێری نینە ھێشتا ژ دەرڤە بۆ مە بھێت”.
ل دووماھیێ شێخ عەبدولسەلامی ئاشکرا کر کو نوکە ل بازارێ دھۆکێ نێزیکی 200 دوکانێن کرین و فرۆتنا زێری ھەنە و ھندەک ژ وان ژ ئەگەرێن جودا جودا و ھندەک ژی ژ بەر نەمانا کاری ھاتینە داخستن و ئێدی نەشێن کار بکەن، ھەروەسا گەلەک دوکاندار ژی ژ بەر لاوازیا کاری ب تنێ ل دانێ ئێڤاری دوکانا خوە ڤەدکەن.
ئەڤرۆ نيوز:
چو حالەتێن ئەنفلۆنزا بالندان ل ھەرێما کوردستانێ نەھاتینە تۆمارکرن و ئاخفتنکەرێ ب ناڤێ وەزارەتا ساخلەمیێ ژی دبێژیت: “ئامادەکاریێن پێدڤی ھاتینە کرن بۆ روو ب رووبوونا ئەنفلۆنزا بالندان.
خالس قادر، ئاخفتنکەرێ وەزارەتا ساخلەمیێ ل حوکمەتا ھەرێما کوردستانێ راگەھاند کو ھەتا نوکە چو حالەتێن ئەنفلۆنزا بالندان ل ھەرێمێ نەھاتینە تۆمارکرن.
گۆتژی: “ل ھەرێما کوردستانێ ئامادەکاریێن تەمام بۆ روو ب رووبوونا ڤێ نەخۆشیێ ھاتینە کرن”.
ئاخفتنکەرێ ب ناڤێ وەزارەتا ساخلەمیێ ئاشکەرا ژی کر کو ئەو حالەتێن ل باشووری و ناڤەراستێن عیراقێ روودایی د ناڤ بالندان دابوویە و ل ھەرێما کوردستانێ رێڤەبەریا ڤیتەرنەری ئامادەکاریێن تەمام بۆ ڤێ مەرەمێ کرینە و “ھەتا نوکە چو حالەتەک پەیدا نەبوویە”.
ئه‌ڤرۆ نيوز:
پەرلەمانتارا کوردێن ئێزدی ل جڤاتا نوونەرێن عیراقی دیارکر کو ب فەرمی داخواز ژ سەرۆکێ جڤاتا نوونەرێن عیراقی ھاتە کرن بۆ زێدەکرنا کورسیێن ئێزدیان ل جڤاتا نوونەرێن عیراقێ ل دووڤ رێژا ئاکنجیێن ئێزدیان کورسی بۆ بھێنە تەرخانکرن.
ڤیان دەخیل، نوونەرا کوردێن ئێزدی ل جڤاتا نوونەرێن عیراقێ دیارکر کو د روونشتنا جڤاتا نوونەرێن عیراقێ دا دخوازی ھاتە کرن کو ھژمارا کورسیێن کۆتا یێن ئێزدیان ل دووڤ رێژا ئێزدیان بھێنە زێدەکرن کو ھەتا نوکە 70 پەرلەمانتاران ژی ئیمزا بۆ زێدەکرنا کورسیێن کۆتا یێن ئێزدیان ل جڤاتا نوونەرێن عیراقێ کۆمکرینە. بەری نوکە دادگەھا فیدرالی ل عیراقێ بڕیار دایە ھژمارا کورسیێن ئێزدیان بھێنە زێدەکرن”.
ڤیان دەخیل ئەو ژی دیارکر کو ئەو ژی ل جڤاتا نوونەرێن عیراقێ ل گەل لیژنا قانوونی یێ بزاڤێ دکەن جڤاتا نوونەران بڕیارێ ل سەر زێدەکرنا کورسیێن پێکھاتێ ئێزدیان بدەت.
داخواز ژی ژ ھەموو فراکسیۆنان کر دەنگی ل سەر داخوازیا ئیزدیان بدەن بۆ پێدانا مافێ پێکھاتێ ئێزدی ل جڤاتا نوونەرێن عیراقێ.
ئه‌ڤرۆ نيوز:
بەرپرسەکێ وەزارەتا چاندنێ ل حوکمەتا ھەرێما کوردستانێ ئەشکرا کر، ھێشتا ل گەلەک دەڤەران پلا چاندنا گەنمی نەکەفتیە و کێم بارانیێ رێژا ئاڤا بن ئەردی ب رەنگەکێ بەرچاڤ کێمکریە. دیار کرژی کو دێ پشتی ڤێ بارانێ حوکمەت بڕیارێ ل دۆر ھشکەسالیێ دەت.
حسێن حەمە کەریم، رێڤەبەرێ گشتیێ باخداری و دارستانا ل وەزارەتا چاندنێ بۆ رۆژناما ئەڤرۆ گۆت: “ھێشتا وەزارەتا چاندنێ ھشکەسالی بۆ ئەڤسالە دیارنەکریە، چونکو خویایە باران و بەفرێن زۆر کێم ھاتینە و وەرزێ چاندنێ گیرۆ کریە، لەوڕا پشتی ب دووماھی ھاتنا بارانا ڤێ دووماھیێ دێ حوکمەتا ھەرێما کوردستانێ بڕیارێ ل دۆر ڤێ پرسێ دەت کو ئایا ئەڤ سالە دێ ھشکەسالی بیت یانژی نە، ب تایبەتی نوکە نێزیکە داروبار ب پشکڤیت و گەشێ بکەت، ھێشتا بارانێن زۆر نەھاتینە وەکو پێدڤی، ئەڤە سەرەرایی کاریگەریێن خراپ ل سەر دان و دکاکی و بەرھەمێن دی کو زۆر پاشکەفتینە د وەرزێ خوە یێ سرۆشتی دا”.
حسێن حەمە کەریم گۆتژی: “مە وەکو وەزارەتا چاندنێ ھێشتا پلان نەدانایە بۆ بەرھنگاربوونا ھشکەسالیێ، ھەردەمێ ھشکەسالی ھاتە راگەھاندن دڤێت بودجە بۆ ڤێ مەرەمێ بھێتە مەزاختن، مخابن ھێشتا ھەتا نوکە ل زۆر دەڤەرا پلا چاندنا گەنمی نەکەفتیە و رێژا ئاڤا بن ئەردی ب رەنگەکێ مەترسیدار کێمکریە ئەڤێ چەندێ ژی دێ کاریگەریێن خراپ ل سەر رەوشا چاندنێ ھەبن”.
ئەڤرۆ نیۆز ، زنار تۆڤی:
سەرۆک وەزیرێن هەرێما کوردستانێ ئێڤاریا شەمبیێ 20-1-2018 گەهشتیە تەهرانێ و بریارە ئەڤرۆ ل گەل سەرۆک کۆمارێ ئیرانێ ،سەرۆکێ پەرلەمانی و سکرتێرێ جڤاتا بلند یا ئاسایشا نیشتمانی یا ئیرانێ دێ کۆم بیت.
نێچیرڤان بارزانی سەرۆک وەزیرێن هەرێما کوردستانێ د درێژاهیا هەولێن دپلۆماسی د ماوێ بوریدا،ب سەرۆکاتیا شاندەکێ گەهشتینە تەهرانا پایتەختێ ئیرانێ و بڕیارە چەند کۆمبوونان ل گەل بەرپرسێن بلند یێن وی وەلاتی ئەنجام بدەت.
ئێکەم دیدارا سەرۆک وەزیرێن هەرێما کوردستانێ ل تەهرانێ دێ ل گەل حەسەن رووحانی ،سەرۆک کۆمارێ وی وەلاتی بیت ، عەبدوللا ئاکرەیی، بەرپرسێ پەیوەندیێن حوکمەتا هەرێما کوردستانێ ل ئیرانێ راگەهاند:کو سەرۆک وەزیرێن هەرێما کوردستانێ دێ ل گەل حەسەن رووحانی، سەرۆک کۆمارێ ئیرانێ و عەلی لاریجانی، سەرۆکێ پەرلەمانێ ئیرانێ و هندەک مەزنە بەرپرسێن ئیرانێ کۆم بیت،دیسا پەیوەندیێن هەردولا دێ تەوەرێ سەرەکی یێ کۆمبوونان بن.
هەروەسا نێچیرڤان بارزانی دێ ل گەل عەلی شەمخانی ، سکرتێرێ جڤاتا بلند یا ئاسایشا نیشتمانی یا ئیرانێ کۆم بیت.
هەر ئێک ژ قوباد تالەبانی، جێگرێ سەرۆک وەزیران، د.فوئاد حوسێن، سەرۆکێ دیوانا سەرۆکاتیا هەرێما کوردستانێ و سەفین دزەیی،پەیڤدارێ حوکمەتێ ل گەل نێچیرڤان بارزانی سەرەدانا تەهرانا پایتەختێ ئیرانێ کرینە.
ئه‌ڤرۆ نيوز:
سیاسەتمەدارەکێ کورد ئاماژە بوێ چەندێ دکەت، تنێ ئیرانێ کارتێکرن لسەر پڕۆسا سیاسیا عێراقێ و ھەیە و ھەر ئیران ژی دشێت ئاریشێن د ناڤبەرا ھەرێما کوردستانێ و حوکمەتا عێراقێ دا چارە بکەت، ھەروەسا دبێژیت، ھەکە بەری ھەلبژارتنێن عێراقێ بەغدا ل گەل ھەرێما کوردستانێ نەگەھیتە رێککەفتنێ باشترە کورد پشکداری ئەڤان ھەلبژارتنان نەبن.
دکتۆر مەحموود عوسمان، سیاسەتمەدارێ کورد بۆ رۆژناما ئەڤرۆ گۆت” ھێشتا یا رۆھن نینە دێ رێککەفتن د ناڤبەرا ھەرێما کوردستانێ و بەغدا د ا ھێتەکرن یان ژی ناھێتەکرن، چونکە لەوانەیە ھندەک بزاڤ ھەبن بۆ رێککەفتنێ، بتایبەتی نوکە کۆمارا ئیسلامیا ئیرانێ نووترین داخویانیا ئیرانێ دبێژیت ئەم یێ بزاڤا دکەین بۆ گەھشتن ب رێککەفتنێ د ناڤبەرا ھەولێر و بەغدا دا، ئەز بخوە باوەرم دێ شێت ھەردوولا گەھینیت بگەھین ئێک، دیارە بزاڤێن دیژی ھەنە ژلایێ ولاتێن جیھانێ کو دانوستان بھێنەکرن و رێکەفتن بھێتەکرن، بەلێ ئەز وەسا دبینم تنێ ئیران دشێت گڤاشتنا بکەتە سەر بەغدا ژبۆی دگەل ھەرێما کوردستانێ رێکەڤیت، بزاڤێن دەولەتێن دی زۆر کاریگەری لسەر عێراقێ نینە، جارێ ئەمریکا درەوا دکەت بۆمە خویابوویە وەلاتەکێ سەختەچیە فەڕەنسا و ئەلمیا داخویانیا ددەن لێ تنێ داخویانی جھێ خوە ناگرن بۆچارەسەرکرنێ، ئاخفتنا ئیرانێ کاریگەریا خوە ھەیە لسەر پڕۆسا سیاسی ل عێراقێ، بەلێ ھێشتا عەبادی بەرسیڤا پێشنیارا ئیرانێ ژی نەدایە.
لدۆر رێڤەچوونا ھەلبژارتنێن عێراقێ ژی دکتۆر مەحموود عوسمانی گۆت” باشتربو کورد ب ئێک لیستە پشکداری ئەڤان ھەلبژارتنانێن بھارێ ببن، مادەم ب ئێک لیست پشکدارنەبووینە فەرە ھەڤپەیمانیا کوردستانی بھێتە چێکرن، چونکە بۆڤێ قۆناغێ یا گرنگە کورد ب ئێک دەنگ و ئێکگرتی ڤەگەڕن بەغدا، ھەرلایەنەک بتنێ بچیت دێ لاۆازیا ھەرێما کوردستانێ دەرکەڤیت ئەڤێ چەندێ ژی دێ زیان ھەبن بۆ پاشەڕۆژا کوردان، ھەکە ھەتا پێدڤی بکەت کو پشکداریێ نەکەن ھەموو پێکڤە پشکداریێ نەکەن، ب دیتنامن دێ گڤاشتن پەیدابن ھەردەمێ کورد بایکۆتا ھەلبژارتنان و پڕۆسا سیاسی ل عێراقێ بکەن، ئەز وەسا دبینم ھەردەمێ بەری ھەلبژارتنان بەغدا یا بەرھەڤنەبو دگەل ھەرێما کوردستانێ رێکەڤیت باشترین چارەسەر ئەڤە ئەم بایکۆتا ھەلبژارتنان بکەین و نەچینە بەغدا.
ئەڤرۆ نیوز ، زنار تۆڤی:
هێرشا سوپایێ ئازاد یێ ئۆپۆزسیۆنا سووریێ ب پالپشتیا سوپایێ تورکیا بۆ سەر شارێ عەفرینا رۆژئاڤایێ کوردستانێ دەست پێکر.
لدووڤ نووچەیێن راگەهاندنا تورکی،ئەڤرۆ ئێکشەمبی 21/1/2018 سوپایێ سووریا ئازاد هێرشا زەمینی بۆ سەر عەفرینێ دەست پێکر،پشتی تۆپبارانەکا دژوار یا تۆپخانێن تورکی بۆ سەر وی شاری.
سوپایێ ئازادێ سووریێ گرووپەکێ ئۆپۆزسیۆنا سووریێ یە و ژ 15 هزار چەکدارێ توندرەو پێک دهێت. تورکیا پالپشتیا دارایی و سەربازی لێ دکەت.
ل رۆژا شەمبی 20/1/2018، سوپایێ تورکیا ب کارئینانا هێزا ئەسمانی،زەمینی و تۆپخانان، هێرش کریە سەر شارێ عەفرینێ ل رۆژئاڤایێ کوردستانێ و تا نوکە شەش وەلاتی و سێ شەرڤانێن یەپەگێ بالێ سەربازی یێ(پەکەکێ) ل رۆژئاڤایێ کوردستانێ، شەهید بووینە.
رەجەب تەییب ئەردۆگانی، سەرۆک کۆمارێ تورکیا هێرشا ژناڤبرنا هەموو شەرڤانێن یەپەگێ ل عەفرین کرینە و سەرکردایەتیا پەکەکێ ژی پێشتر هۆشداری دابوو،هەکە تورکیا هێرشێ بکەتە سەر عەفرینێ،دێ پەکەکە شەرەکێ مەزن کەت،ب شێوەیەکێ کو ”کەس پێشبینیا ئەنجامێن وی شەری ناکەت.
نيشاندان
