بژار ئیسماعیل: یانا دھۆک د کاودانەکێ ھەستیار دایە دڤێت یاریزان دبێھنفرەھبن

ئاریشا یانا دھۆک یا بەر ب چارەسەریێ دچیت
ئەڤرۆ، محەمەد عەلی:
دیدارەکێ دا سەرۆکێ یانا دھۆک بۆ رۆژناما ئەڤرۆ دیارکر کو د ماوێ ھەڤرکیێن خولا پلا ئێکا کوردستانێ دا ھەکە پشتەڤانیا پارێزگەرێ دھۆکێ نەبا مە ئەو شیان نەبوون بەردەوامیێ بدەینە پشکداریێ و دەستخوەشیا یاریزانا دکەین کو تیم گەھاندیە چار گۆشا زێرین.
زێدەتر بژار ئیسماعیل گۆت: جھێ سەرنجراکێشێ یە د جادا وەرزشی دا ھندەک پارێزگەرێ دھۆکێ گونەھبار دکەن ب پشتگۆھاڤێتنا یانا دھۆک بیێ پسیارا کارگێریێ بکەن، بۆ زانینا ھەموو جەماوەرێ یانێ کو ھەکە ئەو پشتەڤانیا پارێزگەری د ماوێ خولێ دا نەبا ئەم نەشیاین پشکداریێ بکەین و گۆت: پشتەڤانیا پارێزگەری بۆ دابینکرنا داھاتەکی بۆ یانێ ھەر ژ دابینکرنا پانزینخانەکێ، وەرگرتنا کرێیا چەند نڤێسینگەھێن کەرەستێن ئاڤاھیا، دانا دەستویریا کۆمەلگەھا بزیشکی دناڤ سەنتەرێ یانێ و مەزاختیێن شاندێ تیمێ بۆ باژێرێن دی یێن ھەرێمێ ب ستۆیێ خوەڤە گرێدابوو و دیسان خەلاتکرنا تیما لاوان پشتی بووینە قارەمان و ژبیرنەکەین لدووڤ شیانێن خوە مووچە بۆ تیمێ دابیندکرینە، لێ لڤێ دوو‌ماھیێ کاودانەکێ ھەستیار و نەچاڤەرێکری پەیدابوو بۆ ئەگەر مووچێن یاریزانا گیرووبن و بلا پشتراستبن ئێک دینارا وان ناھێتە کێمکرن و ھەموو مافێ خوە دێ وەرگرن.

ھەر‌وەسا ناڤھاتی دەستخووشیا ھەموو یاریزانا و ستاڤێ راھێنانێ کر کو ب ئێک گیان شیاینە تیمێ بگەھینە چارگۆشا زێرین و دگەل مە ھاریکاربوون، بھیڤی نە بەردەوام بھێنفرەھبن و وەفاداریا یانێ بکەن.
ژلایەکێ دووڤە سەروکێ یانێ گۆت: ئەڤ ئاریشە یا بەرب چارەسەریێ دچیت و کارگێریا یانێ ژی پێ نەخووش نینە مووچە گیرووبن و ب شەڤ و رۆژ کار دکەین بۆ دابینکرنا ھەر تشتەکێ پێدڤی بۆ تیمێ چونکو ئەرکە لسەر مللێن مە و نە رەوایە کارگێری ل چارەسەریا نە گەریێت و دیارکر کو ئەو داھاتیێ بۆ دھێت سالێ جارەکێ یە و بلا یا دیاربیت سەرەرایی قەیرانا دارایی پارێزگەر نە ‌بتنێ پشتەڤانیا یانا دھۆکێ دکەت بەلکو فەرمانگەھێن میری و ھەر کێماتیەکا ل پارێزگەھا دھۆکێ لدووڤ شیانا چارەسەردکەت و ھەردەم ل رێکێن چارەسەریێ بۆ یانێ دگەریێ بۆ ھندێ یانە پشتبەستن لسەر خوە بکەت وەکو داھاتیەکێ خویەتی و بەری نوکە ژی پشتەڤانیا ھەموو یانێن پارێزگەھێ ژی یا کری.

ژلایەکێ دووڤە بژاری ئەو چەندە ژی نەڤەشارت کو مافێ ھەر یاریزانەکی یە داخازا مووچێ خوە بکەت ژبەرکو داھاتیێ وییە، لێ ھەمبەری وێ ھزرا وەفاداریێ بۆ یانێ ژی ھەبیت ژبەرکو یانە د کاودانەکێ نەخووش دایە، مە باورەی ب ھەموو یاریزانا ھەیە تیمێ بگەھینە پلا نایاب و گۆت ژی: لدووڤ شیانێن خوە کارگێریێ ھەر یاریزانەکێ راھێنەری دڤیایی یێ ئینایی.

لدور گۆتگۆتکێن ل سەر پەیچا و راگەھاندنێ ژی گۆت: سەیرە ھەر کەسەکێ ئاخڤتنەکێ گۆە لێدبیت بێی دووڤچوون بخوە بکەتە بابەتەک، راگەھاندن دڤێت یا بێ لایەن بیت نە بتنێ گازندا یاریزانەکی بەلا‌ڤبکەت بیێ بەرسفا لایەنێ دویێ وەربگریت، یان تومەتا یانێ بکەت بۆ ھەر بابەتەکی و بێی بەلگە، ھەروەسا بژاری دیارکر کو ئەگەر راستە ھندەک دبێژن دلێ مە ب یانێ ڤەیە بلا بھێن ھاریکاریا یانێ بکەن و پشتەڤان بن نەک بەردەوام رەخنێ بکەن.
ل دووماھیێ سەرۆکێ یانێ گۆت: مە داخازی ژ لایەنێن بلند ژی کریە کو خوە ل یانێ بکەنە خودان دڤی دەمێ ھەستیار دا ژبەرکو یانێ بناڤێ پارێزگەھێ یە و خودان ناڤو دەنگیا خوە ل سەر ئاستێ عیراقێ و ئاسیا ب پرانیا یاریێن وەرزشی ھەیە، بھیڤیا وێ چەندێ ئەڤ قەیرانە و کاودانە دەمەکێ نێزیک دا ب دوماھی بھێت و سۆپاسیا پارێزگەرێ دھۆکێ دکەین ئەوێ دھۆک پشتگۆھـ نە ھاڤێتی سەرەرایی گڤاشتنێن دارایی، ئاوارەیا، ھەردیسان سوپاسیا شاکر ئەحمەد سمو رێڤەبەرێ گشتی یێ وەرزشی ھەردەم رێکخووشکەرە بۆ ئاسانکرنا کاروبارێن یانێ و پەیوەندی دگەل پارێزگەری ھەبووینە بۆ ھندێ یانە ژ قەیرانێ دەربازبیت و من ئۆمێدا ھەیی یانا دھۆک بزڤریتە ھێزا جاران.

ھەڤرکیێن زێرەڤانی دی ھەمبەری ئێک کەن و دبیت یا مفاداربیت ژ ئەنجامان
ئەڤرۆ،ھەژار مەعروف:
چاڤەرێ دھێتەکرن سوباھی چار یاری ژ گەرا ١٣ ژ خولا پلا نایاب یا کوردستانێ بھێنەکرن کو دڤێ حەفتیێ دا تیما زێرەڤانی وەکو نوونەرا پارێزگەھا دھۆکێ دێ یا چاڤەرێکری بیت و نوونەرا دوێ تیما زاخۆ دێ بەر ب باژێرێ سلێمانیێ چیت بوو ئەنجامدانا یاریەکا گرنگ .

تیما تەپا پێ یا زاخۆ ئەوا ل وەرزێ ئەڤ سالە د رەوشەکا لاواز دابوریت ل ھەردو خولێن کوردستانێ و عیراقێ د مەترسیا داکەفتنێ دا یە بریارە سوباھی یاریا خوە بەرامبەر یانا نەوروز ل یاریگەھا زانکو ل باژێرێ سلێمانیێ ئەنجام داەت کو دڤێ یاریێ دا ھەردو تیم دێ ھەڤرکیێ ل سەر خالێن یاریێ کەن تایبەت تیما نەوروز دێ شەرەکێ مەزن بوو دەستڤە ئینانا سێ خالێن ڤێ یاریێ کەت ژبەرکو ھەر ئەنجامەکێ نە چاڤەرێکری دێ رەوشا نەوروز بەر ب لاوازبوونێ ڤە چیت و دبیت مەترسیا داکەفتنێ ل سەر وێ زێدەتر لێ بھێت لەورا بوو ڤێ یاریێ تیما خودانا ئەرد و جەماوەری دێ ھەمی شیانێن خوە تەرخان کەت بوو سەرکەفتنا ئێکێ پشتی ل یازدە یاریێن بوری نەشیای سەرکەفتنێ توماربکەت، بەرامبەر تیما زاخۆ ژی دێ ھەمی شیانێن خوە تەرخان کەت ب ئەنجامەکێ سەرکەفتی و ھیڤێن خوە گەشتر لێ بکەن بوو مانا خوە دخولا ھەرێما کوردستانێ دا بو وەرزەکێ دی ژی ، بەرامبەر خوسارەتیا زاخۆ د ڤێ یاریێ دا دێ رەوشا وێ بەر ب لاوازبوونێ ڤە چیت بوو مەترسیا داکەفتنێ .

ژلایەکێ دویڤە د گوپیتکا یاریێن ڤێ حەفتیێ دا ھەردو یانێن برایەتی و ھەولێر دێ ھەمبەری ئێک بن ل یاریگەھا ھەولێر کو ھەردو تیم نوکە ھەڤرکیێ ل سەر برنا ناسناڤێ خولێ دکەن تیما ھەولێر ژ یازدە یاریان ١٧ خال کومکرینە و ل رێزا پێنجێ دھێت بەرامبەر یانا برایەتی ژ ١٢ یاریان ١٩ خال کومکرینە و ل رێزا چارێ دھێت ، د یاریەکا دی یا گرنگ و پری ھەڤرکی دا ھەردو یانێن ھندرین و پێشمەرگا ھەولێر دێ ھەھبەری ئێک بەن ل یاریگەھا ھندرین ل باژێرێ ھەولێر تیما ھندرین بوو سێ خالێن یاریێ و بەردەوامی بوو سەرکێشیا خولێ بەرامبەر یانا پێشمەرگا ھەولێر ھەلگرا ناسناڤێ وەرزێ بوری بوو قورتالکرنا خوە ژ مەترسیا داکەفتنێ و ھەردیسان بەرامبەر دەلیڤەیا دووماھیێ بوو دەستڤە ئینانا رێزەکا باشتر و ھەڤرکیێ ل سەر رێزێن پێشیێ.

ژلایەکێ دویڤە ل یاریگەھا کەلار تیما ئارارات خودانا رێزا دوێ دێ یاریەکا ب زەحمەت بەرامبەر یانا شێروانە کەت کو تیما ئارارات ب سەرپەرشتیا پیشەکارێن خوە یێن رەش ئەوێن مەترسیەک بوو ھەمی تیمێن پشکدار دروستکری ھێزا خوە ھەر زیکا دیارکری بەر ب کەلار چوویە بوو سێ خالێن یاریێ و بەردەوامی بدەتە ھەڤرکیا ناسناڤێ خولێ بەرامبەر خودانێن ئەرد و جەماوەری ژبلی سەرکەفتنێ چو د دەستی دا نەمایە ژبەرکو دەستدانا خالان ل یاریگەھا خوە دێ مەترسیا وێ مەزنتر لێ ھێت بوو داکەفتنێ .