ئەڤرۆ نیوز ، زنار تۆڤی :
ئەڤ شەڤە ل دەمژمێر 9:45 خولەک ب دەمێ کوردستانێ یانا ریال مەدرید یا ئیسپانی دێ بیتە مێهڤانا یانا بایرن میونشن ل یاریا چوونێ یا بەری دووماهیێ ژ جاما چامپیۆنزلیگا ئورۆپی،ئەڤ یاریە دێ ل یاریگەها ئەلیانز ئەرینا یا تایبەت ب یانا باڤاریڤە هێتە ئەنجامدان.
رۆژناما مارکا یا ئیسپانی پێکهاتیێ چاڤەرێکری یێ هەردوو یانەیان ب ڤی رەنگی دیارکریە.
پێکهاتیل یانا ریال مەدرید..
گولچی:کیلۆر ناڤاس
هێلا بەرگریێ:کارڤاخال ، سێرجیۆ رامۆس، ڤاران ، مارسیلۆ..
هێلا ناڤین:کاسیمیرۆ ، تۆنی کرۆس ، مودریچ ، ئیسکۆ.
هێرشبەر:کەریم بنزیما ، رۆنالدۆ..
پێکهاتیێ یانا بایرن میونشن.
گولچی:سفین ئولریچ
هێلا بەرگریێ:جوشوا کیمیچ ، بواتینگ ، هومیلز ، رافینیا.
هێلا ناڤین :خاڤی مارتینز ، رودریگز ، رۆبن ، ریبێری .
هێرشبەر:لیڤاندۆڤسکی ، مولەر .
ئه‌ڤرۆ نيوز:
ژن د دەمێ دوگیانیێ دا ب رێژا 15% تووشی ژ بەرچوونا زارۆیان ژ ئەگەرێن جودا جودا دبن، پتریا وانژی ئەون یێن کو پتر جارەکێ زارۆ ژبەردچن.دەمێ دوگیانی نەگەھیتە حەفتیا بیستێ چ ژ ئەگەرێن نوشداری یان گیانی بیت دێ ئاریشەیان پەیداکەت و گەلەک یا گرنگە ھەردو ھەڤژین بەری بریارا دوگیانیێ بدەن قەستا نوشدارەکێ تایبەتمەند بکەن داکو ژ ئاریشەیێن ژ بەرچوونا زارۆیان بھێنە پاراستن، کرژیێن کوئەندامێ زاوزێ ل دەڤ ژنان و ب تایبەت ھەکە ل مالبچووکی یان ستویێ مالبچووکی بن کارتێکرنێن خۆ ھەنە.
ل دەمێ ژ بەرچوون بۆ پتر ژ دو جاران یا بەردەوام بیت دبێژنێ بەرچوونا دوبارەکری و ل وی دەمی پێدڤیە پشکنینێن جودا جودا بۆ ژنێ بھێنە کرن داکو ئەگەر ب دروستی بھێنە دەستنیشانکرن وچارەکرن و گوت: ئەگەرێن ژ بەرچوونێ گەلەکن و ھندەک ژوان د زکماکینە و ھندەک ژی گرێدای بەرگری و پێکھاتا لەشی و دەروونینە و دبیت ئەگەرێن زکماکی نیڤەک حالەتێن ژبەرچوونێ بخوڤەبگرن، ئەوژی گرژیێن کروموسانە ئەوێن ژ کەس و کاران بۆ سوریلانکی دھێنە زەگوھاستن و دیسان خەلەتیێن ژێک پارچەبوونا شانەیان دناڤ پێکھاتێ سوریلانکی دا.
نەخۆشیێن بەرگریێ و خوینێ ژی ھندەک ئەگەرێن دیترن د لیستەیا بەرپرسیاریێ د ژبەرچوونا دوبارەکری دا و رەنگە ھندەک جاران کو ئەندامێ بەرگریێ کارتێکرنێ ل ھێکا ڤاکسینکری بکەت و نەھێلیت دناڤ مالبچووکی دا وەرارێ بکەت، دیسان ھەکە خوین دناڤ موودەمارێن کو خوراکیێ ددەنە پەرژانێ مالبچووکی دا کێم بوو یان بەھی دێ بیتە ئەگەرێ ژبەرچوونێ و ھەروەسان تەنگەزاریێن دەروونی و ب تایبەت فشارێن دەروونی و ئالوزی دبنە ئەگەرێ بلندکرنا مەترسیێن ژبەرچوونێ و بێھیزبوونا کورپەلەی.
دیسان ھەبوونا گرژیان د ھەر پێکھاتەکا مالبچووکی دا ل دەڤ ژنێ و ب تایبەت د ستوویێ مالبچووکی دا دێ بیتە ئەگەرێ نەتەڤاڤیا وی و سستیا وی و ئەڤەژی ب رۆلێ خۆ ژبەرچوونێ پەیدادکەن.
ھندەک ھەودان ژی ھەنە دبنە ئەگەرێ ژبەرچوونا دوگیانیێ ژوانژی نەخوشیێن سیلان و کلامیدیا کو ژ ئەنجامێ کارتێکرنا وان ل سەر پەرژانێ مالبچووکی و دیسان ژبەرکو وان رۆل ھەیە بۆ پێکئینانا کیسکان ل سەر ھێکان و دیسان ھندەک ھەودانێن دی وەکو یێن میزەرۆیێ و یێن بەکتری دبنە ئەگەرێ ڤێ چەندێ.
دەربارەی کارتێکرنا قەلەویێ ژی دیارکر کو قەلەویا زێدە دبیتە ئەگەرێ نەرێکخستنا ھورمونان و تەنگەزاریێن عادەیا ھەیڤانە و کێمکرنا شیانێن دوگیانیێ و زێدەکرنا مەترسیێن ژبەرچوونێ.
ژیێ ژنێ ژی ئەگەرەکێ دیترە و ھەکە ھێکێن ژنێ ژی ھاتە گوھۆرین و ژیێ وێ مەزن بوو دێ مەترسی ل سەر کروموسومان زێدە بن و ئەڤە دێ بیتە ئەگەر کو کو رێژەیا ژبەرچوونێ ژی زێدەببیت و دپتریا دەمان دا پشتی ژیێ 35 سالیێ یێ ژبەرچوون پەیدادبیت و ھندی ژن مەزنتر لێ بھێت رێژا ژبەرچوونێ ژی پتر لێ دھێت و دژیێ 45 سالیێ دا گەلەک مشە دبیت، ژبەرکو ھەکە ھێلدانکێن ژنێ مەزن بوون شیانێن دابەشبوونێ ھەنە و ھەکە کروموسوم دابەش بوون ب شێوەیەکێ ھەڤسەنگ ب کارێ خۆ رانابن.
بۆ چارەسەریێ ژی پێدڤیە ئێکەم جار ئاریشە بھێتە دەستنیشانکرن و پتریا چارەسەریان ئەون کو ستوویێ مالبچووکی ب نشتەرگەریێ بھێتە گرێدان و ئەڤە زوربەی جاران ل ھەیڤاسیێ ژ دوگیانیێ دھێتە کرن و دێ ھەتا دووماھیا ھەیڤا ھەشتێ یا بەردەوام بیت و دیسان ھندەک نشتەرگەری بۆ نەدروستیا پێکھاتا مالبچووکی دھێنە ئەنجامدان و دەرمان ژی بۆ ھندەک حالەتان مفایێ خۆ ھەیە ل دەمێ جەلتەیا خوینێ پێدڤیە پشکنینێن تەڤاڤ بھێنە کرن و ھەر ئاریشەیەکا بھێتە دیتن دێ دەرمان بۆ ھێنە دان داکو خوین ب دروستی گەریانێ بکەت.
بۆ خوپاراستنێ ژ بەرچوونێن دوبارەکری پێدڤیە تەئکید ل ئاریشەیێن ژن و مێران بھێتە کرن و پشکنینا کروموسومێن وان بھێتە کرن داکو حالەتێن پێدڤی بھێنە دەستنیشانکرن و ل دووڤ وێ چەندێ چارەسەریا وان بھێتە کرن.
ئه‌ڤرۆ نيوز:
دەرھێنەرا گەنج کاردینا ھێمن، د دیدارەکێ دا بۆ ئەڤرۆ گۆت: دووماھی فلمێ من تێدا کارکری ب ناڤێ (حەیات) بوو، کو چیرۆکا وی ل دۆر وانە کەسانە یێن کو ھزرێن خوە ژدەست ددەن و چو تشت نامینە د بیردانکا واندا، ئانکو ھەموو تشتا ژبیردکەن و دجڤاکی دا ئەڤ کەسە ب شێت یان کەسێن دین دھێنە نیاسین، چیرۆکا فلمی و دەرھێنان یا من ب خوەیە، ھەروەسا رۆلێ حەیاتێ کو رۆلەکێ سەرەکی یە ھەر ئەز ب خوە پێ رابوویمە و ناڤەرۆک بەحسێ نەخۆشی و ژانێن ژنەکێ دکەت کو بیردانکا خوە ژدەست دایە، یان ژنەکە ژلایێ دەروونی ڤە نەیا دروستە و خەلک دبێژنێ دینێ.
کاردینایێ گۆت: چیرۆکا فلمی ژ سەرھاتیەکا دروست ھاتیە وەرگرتن، و کاریگەریا جڤاکی ئەو ژن گەھاندیە وی رادەی کو چو تشت نەمینە د ھزرا وێ دا و دین ببیت، و پشتی دیتنا ھژمارەکا ژنێن تووشی ئاریشێن دەرونی بووین من چیرۆکا فلمی نڤیسی و مەرەم ژچێکرنا ھشیارکرنا جڤاکی یە بۆ وان جۆرە ژنان یێن تووشی ئاریشێن دەروونی دبن، و ھەتا نوکە ڤی فلمی پشکداری د ھژمارەکا فیستەڤالان دا کریە و خەلات و باوەرنامە وەرگرتینە و خۆشحال کو ئەم شیاین پەیاما فلمی بگەھینێن.
ئه‌ڤرۆ نيوز:
ل تۆڕێن جڤاکی دیمەنێن ڤیدیۆیی و سێکسی یێن بەربژارێن ژن ھاتینە بەلاڤکرن و ئەنجوومەنێ بلندێ کاروبارێن خانمان ژی ھۆشداریێ ددەت ھەرکەس و لایەنەکێ دەست ل گەل خراپکرنا کەسایەتیا بەربژارێن ژن ھەبیت دێ لێپرسین د گەل دا ھێتەکرن.
پەخشان زەنگەنە، سەرۆکا جڤاتا کاروبارێن خانمان بۆ رۆژناما ئەڤرۆ گۆت” پشتی بانگەشەیا ھەلبژارتنان دەستپێکری مە دووڤچوون کریە ل تۆڕێن جڤاکی سفکاتی ب بەریژارێن ژن دھێتەکرن و دیمەنێن سێکسی و نەھە ژی ل سەر بەریژارێن ژن دھێنە بەلافکرن، مە وەک ئەنجومەنێ بلندێ کاروبارێن خانمان ھەماھەنگی دگەل کۆمسیۆنا سەربخۆیا ھەلبژارتنان کریە و رێڤەبەرەکا گشتی ژی ل ئەنجوومەنی تنێ دگەل کۆمسیۆنێ ھەڤکارە ھەتا ئەف کریارێن ل ھەمبەر بەریژارێن ژن نەھێنەکرن، چونکە ل ھەلبژارتنێن بۆری ژی ئەف بابەتە ھەبوو مە ئەزموون ل دۆر ڤێ چەندێ ھەیە ، لەوڕا بەری دەستپێکرنا بانگەشەیێ مە داخواز ژ ھەموو کەس و لایەنان کریە دووربن ژ ناڤزراندنا ژنێن کاندید و نەبنە ئەگەرەک بۆ تێکدانا کەسایەتیا ئافرەتێ و بەریژارێن ژن.
سەرۆکا جڤاتا بلندا کاروبارێن خانمان گۆت ژی” مخابن ل جھێ وەلاتی رێزێ ل ژنێن بەربژار بگرن و بەرێ خوە بدەنە بەرنامە و پلانێن وان خەلکەک ھەیە ل تۆڕێن جڤاکی دیمەنێن سێکسی و تشتێن نەھەژی ل سەر بەلاف دکەن، مخابن ل ھەلبژارتنێن بۆری ژی چەند حالەت ھەبوون، لێ ھەموو راست نەبوون و ب فۆتۆ شوپی ھاتبوونە چێکرن، ئەڤێن دەست بۆ خراپکرنا ژنێ ھەی ئاستێ وان یێ رەوشەنبیری یێ لاوازە.
پەخشان زەنگەنە دیار کر” ل چەند رۆژێن بۆری مە ژی زانیاری ھەنە دیمەنێن ھژمارەکا ژنێن بەربژار ھاتینە بەلافکرن، بەلێ بشێوەیەکێ فەرمی ھێشتا چو کەس و بەربژارەکی سکالا بۆ جڤاتا خانمان بلند نەکریە و ھەکە ئەم بزانین ھەر کەس و لایەنەکی دەست د ڤێ پرسێ دا ھەیە بێگومان دێ دەینە دادگەھێ و لێپرسی ن دێ د گەل دا ھێتەکرن، چونکە خراپکرنا کەسایەتیا ھەر بەربژارەکا ژن ئەو ب تنێ نابیتە قوربانی، بەلکو کاریگەری ل سەر کەسوکار و مالباتا وێ ژی ھەیە و بابەتەکێ جڤاکیێ گەلەکێ مەترسیدارە ل ھەر وەلاتەکی بیت، ژبەرکو ھەموو ژنەکێ خزم و عەشیرەت و کەسوکار ھەنە و ناھێتە قەبوولکرن.
ئه‌ڤرۆ نيوز:
بەناز ئەحمەد، کچەکا قوربانیا روودانا ئاگریە دیار کر، ل دەمێ دروستکرنا خارنێ ل مال ئاگر بەربوو خارنگەھا مالێ وێ گەلەک بزاڤ کرن خوە خلاس بکەت، بەلێ دەرگەە ھاتە گرتن و ھەتا دەرگەە بۆ ڤەکری سەروچاڤێن وێ سۆتن و بۆ ئەڤرۆ گۆت:( راستە نوکە ژانێن سۆتنێ نەماینە بەلێ ژانێن من بەردەوامن ژبەرکو ژیێ من نێزیکی 30 سالیێ یە و نەشیایمە ژیانا ھەڤژینیێ پێکبینم، کەس نەھاتیە خوازبینیێن من و نەشیایمە پەیوەندیێ ل گەل چو کەسان دروست بکەم، ژبەرکو ترسم کەسێ ئەز نەڤێم).
بیلال سیروان، ئێکە ژ وان گەنجێن ب روودانەکا ھاتنوچوونێ سەروچاڤێن وی سۆتینە و بۆ ئەڤرۆ گۆت، ل دەمێ گەشتەکا خێزانی ترومبێلا ئەز تێدا تووشی رودانەکا ھاتنوچوونێ بوو خووشکەکا من گیانێ خوە ژ دەست دا و لەشێ من ژی گەلەک سۆت، ژیێ من 24 سالە من ب نەچاری خواندن بەردەوام کر و من ژی دڤێت ژیانا ھەڤژنیێ پێکبینم، بەلێ ژبەر سوتنا لەشێ خوە شەرم دکەم ژنێ.
توانا عەلی، ڤەکۆلەرێ جڤاکی بۆ ئەڤرۆ دیارکر ، ئەو کچ و کورێن پشکەکا لەشێ وان دھێتە سۆتن تووشی نەخۆشیێن دەروونی دبن ئەگەر گەنج بن، ژبەرکو ژ گەلەک بۆارێن ژیانیا مرۆڤایەتیێ دوور دکەڤن، ھەردەم دخوازن ل تاریێ بن و ب تنێ کاربکەن، ھەست ب شەرمێ و کێمیێ دکەن و ژ پەیوەندیێن جڤاکی دوور دکەڤن، ئەوێن فەرمانبەر و ل جھەکێ گشتی کاردکەن پتر تووشی گڤاشتنێن جڤاکی دبن و ھەست ب نەخۆشیێن بەردەوام دکەن باشترە جڤاک رێزێ ل وان بگریت و ب مرۆڤێن نورمال ببینیت.
ئه‌ڤرۆ نيوز:
حه‌يده‌ر عه‌بادى سه‌رۆك وه‌زيرێن عيراقێ و سه‌رۆكێ ليستا هه‌ڤپه‌يمانيا نه‌سر دێ ئه‌ڤرۆ سه‌ره‌دانا سلێمانيێ كه‌ت و پاشان ژى چيته و هه‌ولێر و پاشان ژى هێته دهۆك.
ب گۆره‌ى ئه‌و پێزانينێن ل به‌ر ده‌ستێ ئه‌ڤرۆ نيوز، ئێڤاريا ئه‌ڤرۆ حه‌يده‌ر عه‌بادى دێ گه‌هيته باژێرێ سلێمانيێ و ل گه‌ل كانديدێن خوه ل ئۆتێل گراند ملينيوم كۆم بيت.
هه‌ر ب گۆره‌ى ئه‌و پێزانينێن ل به‌ر ده‌ستێ ئه‌ڤرۆ نيوز، بڕيارا سوبه‌هى سه‌رۆكێ ليستا هه‌ڤپه‌مانيا نه‌سر سه‌ره‌دانا پارێزگه‌ها هه‌ولێر ژى بكه‌ت و پاشان ژى سه‌ره‌دانا پارێزگه‌ها دهۆك بكه‌ت.
بڕياره 12ى گۆلانا ئه‌ڤ ساله هه‌لبژارتنێن جڤاتا نوونه‌رێن عيراقێ بهێنه ئه‌نجام دان.
ئه‌ڤرۆ نيوز:
سالانە ژمارەکا مەزن یا خەلکی دھێنە نشتەرگەری کرن، گەلەک ئەگەر بۆ ئەنجامدانا نشتەرگەریان ھەنە، ھندەک نشتەرگەری بۆ کێمکرنا ێَشانێ دھێنە ئەنجامدان و ھندەک ژی بۆ کێمکرنا نیشانێن ئاریشەکا ساخلەمیێ و ھندەک ژی بۆ وەرگرتنا دەستنیشانکرنەکا دروست یا رەوشا نەخۆشی، ل سالێن بۆری گەلەک پێشکەفتن کەتیە دنشتەرگەریان دا و ل شوونا ڤەکرنا زکی یان ھەر جھەکێ دی ژ لەشی ھژمارەکا وان ب لیزەرێ دھێنە کرن.
د. سەردار حەسەن عارف، تایبەتمەندێ نشتەرگەریا گشتی دیارکر کو ھندەک نشتەرگەری یێن ناگەە و تەنگاڤ ھەنە و ھندەک ھەنە د تەنگاڤ نینن و ھەر نشتەرگەریەک د چار قوناغان دا دەرباز دبیت ژوانژی (شیرەتکاریا نوشدارێ نشتەرگەریێ و سەرەدانا بەری نشتەرگەریێ و رۆژا نشتەرگەریێ و نڤاندنا نەخۆشی ل نەخۆشخانێ) و گۆت: بەری ھەر تشتەکی پێدڤیە نەخۆش دگەل نوشدارێ تایبەتمەند کۆم ببیت و سەربارک و مفایێن نشتەرگەریێ بزانیت و ژڤانی دەستنیشان بکەت، ئارمانج ژ سەرەدانێ پشتراستبوونە ژ رەوشا نەخۆشی و چاوانیا وەرگرتنا بەنجێ و کا چ پرسیار د سەرێ نەخۆشی دانە کو بۆ بھێنە روھنکرن، ھەروەسا نەخۆش دێ مینیتە ل نەخۆشخانێ یان دێ ئێکسەر چیتە مال).
دیارکر ژی پشتی وەرگرتنا بڕیارا نشتەرگەریێ رەنگە نەخۆش رۆژەکێ ل نەخوشخانێ بمینیت و ل ژڤانێ نشتەرگەریێ بیت و ل وێرێ ژی ھەموو ھووردەکاریێن نشتەرگەریێ بۆ ھێنە شروڤەکرن و گۆت: ھەکە نەخۆش جگارکێش بیا باشترە رۆژەکێ بەری نشتەرگەریێ دەست ژ جگارەکێشانێ بەردەت و ئەڤە دێ ھاریکاریێ کەت کو زووتر ساخلەم ببیت و ھەکە نەخۆشی بڤێت ب دروستی مفای ژ نشتەرگەریێ وەرگریت باشترە دو حەفتیان بەری نشتەرگەریێ دەست ژجگارەکێشانێ بەردەت.
د. سەردار ل گەل وێ چەندێ بوو کو پتریا جاران دیتنا نوشدارێ تایبەتمەند ب رۆژەکێ بەری نشتەرگەریێ یا پێدڤیە و گۆت: دیتنا نوشداری بۆ وێ چەندێ یە کو جورێ بەنجێ بھێتە دیارکرن و نوشدارێ بەنجێ نەخوشی ببینت و ھندەک پرسیارێن گرێدای ساخلەمیا وی ئاراستە بکەت، ھەوەسا دبیت نەخوشی پێدڤی ب ئەنجامدانا ھندەک پشکنینان ھەبیت وەکو یێن خوینێ و دەستئاڤێ و نەخشەکێشانا دلی.
ھەروەسا تایبەتمەندێ نشتەرگەریێ دیارکر کو یا ل سەر نەخۆشی پێدڤیە خوە ئامادە بکەت بۆ بەرسڤدانا گەلەک پرسیاران ئەوێن کو ژلایێ نوشداری بۆ دھێنە ئاراستەکرن وەکو جورێن دەرمانێن ب کاردئینیت و چ ھەستداری ل ھەمبەر دەرمانا یان خوارنێ ھەیە یان نە و ھەکە ھەبیت ئەو چ خوارن یان دەرمانن، دیسا کا وی یان خێزانا وی چ ھەستداری ل ھەمبەر کەرستێن بەنجکرنێ ھەیە و چ ئاریشە ل گەل ھەنە؟ دیسا پێدڤیە نوشداری ئاگەھداربکەت ل دۆر ھەبوونا نەخۆشیێن دلی و گولچیسکا و سەھان و جگەرێ و نەخۆشیا شەکرێ و بلندبوونا فشارا خوینێ و گۆتژی: ھەکە نەخۆش خرخرێ ل گەل نڤستنێ بکەت باشترە بێژیتە نوشداری و ھەتا ھەبوونا ددانێن چێکری ژی دڤێت نوشداری ئاگەھداربکەت.
ھەروەسا دیارکر ژی، ل دەمێ ھاتنا ژڤانێ نشتەرگەریێ، باشترە جلکێن تایبەت بکەتە ل بەرخوە داکو فشار ل لەشێ وی نەبیت و ھەر تشتەکێ گران بەھا بیت باشترە ل گەل خوە نەئینیتە نەخوشخانێ و ل مال بھێلیت و ھەر تشتەکێ دەستکرد د گەل وی نەبیت، نوشدار دێ بەرێخودانێ ل فایلێ نەخوشی کەت و پشکنینەکا گشتی بۆ ئەنجام دەت و پێدڤیە ئەو یێ ئامادەبیت بۆ ھەر پرسیارەکا بۆ وی دھیتە ئاراستەکرن سەبارەت دەرمانا و رەنگە نوشدار ژێ بخوازیت ئیمزایەکێبکەت کو رازی ببیت ل سەر باشی و خرابیێن ژئەنجامێ نشتەرگەریێ پەیدادبن و نشتەرگەری دێ ھێتە ئەنجامدان و گۆت: پشتی نشتەرگەریێ ستافێ ساخلەمیێ دێ زێرەڤانیا بەنجێ کەن و کارتێکرنا وێ کەن، ھندەک دەرمانێن ئێشکێمکرنێ بۆ نەخوشی دێ ھێنە دان داکو ھەست ب ئێشانێ نەکەت و دپتریا جاران دا شیانین نەخۆشی پشتی نشتەرگەریێ ددەستنیشانکرینە لەورا نابیت نەخۆش پشتی نشتەرگەریێ کارۆبارێن کو پێدڤی ب ھووربینیێ ھەی بکەت یان ترۆمبیلێ ب ھاژووت و دیسا نابیت بۆ دەمێ رۆژەکێ یان دو رۆژا ڤەخوارنێن کحولی ڤەخووت و ھەر تشتەکێ نەسروشتی ببینیت باشترە پەیوەندیێ ب نوشدارێ خوە یێ تایبەتمەند بکەت.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا پێنجشه‌مبى رێكه‌فتى 26ى نيسانا 2018ێ دهێته پێشبينيكرن ئه‌سمان ساهى بيت و پاشان هنده‌ك ئه‌ورێن كێم و پاشان ژى بيته ئه‌ور.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا راگه‌هانديه كو ژ ئه گه‌رێ هاتنا فشارێن بلندێن توركيا دهێته پێشبينيكرن ئه‌سمان ساهى بيت و پاشان هنده‌ك ئه‌ورێن كێم و پاشان ژى بيته ئه‌ور.
پشكا پێشبينيان خۆيا ژى كريه كو نزمترين پلا گه‌رما پێشبينيكرى دێ 14 پله بيت و بلندترين پله ژى دێ 28 پله بيت.
هه‌ر ب گۆره‌ى ڤێ راپۆرتا رێڤه‌به‌ريا ناڤبرى له‌زاتيا باى ژى دێ د ناڤبه‌را 5 بۆ10كم بيت د ده‌مژمێره‌كێ دا و ماوێ ديتنێ ژى دێ 10كم بيت د ده‌مژمێره‌كێ دا.
نيشاندان