فوتو و زانیاری، نەوزاد ھلۆری:
دارستانا کاژان ل کومەلگەھا سیریێ کو ب غاباتێ سیریێ دھێتە نیاسین مەترسی و ھەرەشەیێن زور لسەر ژناڤچوونا وێ ھەیە و دنھادا زێدەتری 100 داران رەە و ریسالێن وێ ژ ئاخێ دەرکەفتینە و خوار بووینە و پێشتر ژی چەندین جاران دارەکێن وێ کەفتیە.
عیسا رێکانی وەلاتیەکێ کومەلگەھا سیریێ یە بو ئەڤرۆ نیوز گۆت: (دارستانا کومەلگەھا سیریێ دزڤریت بو سالێن 1980 و دنھادا وەکو رەم و ھێمایەکێ گرنگ ل کومەلگەھا سیریێ و دەڤەرا شێلادزێ دھێتە نیاسین و جوانیەکا تایبەت دایە کومەلگەھا سیریێ و نێزیکێ 15 ھزار بنەدارێن کاژ تێدا ھەنە).
زێدەتر گۆت: (دنھادا ھەرەشەیێن زور لسەر دارستانا کومەلگەھا سیریێ ھەنە ب تایبەتی ئەگەر باران و لەھی راببن و ھژمارەکا زور یا داران رەھێن وان دەرکەفتینە و خوار بوینە و پێشتر ژی چەندین جار بڤی رەنگی ھاتینە دەرێ و کەفتینە و وەلاتیان بخوە برینە ژبەرڤێ دخوازین کو جھێن شولەژێ خوە ل دارستانا سیریێ بکەن خودان و ھەر چ نەبیت بلا دیوارەکێ پالپشت بدانن بەر وان داران داکو نەکەڤن).
ژلایێ خوڤە ھەژار بێدەی سەرۆکێ باژێرڤانیا شێلادزێ بۆ ئەڤرۆ نیوز گۆت: (دارستانا کومەلگەھا سیریێ کو دکەڤیتە رۆژھەلاتا ناحیا شێلادزێ ئێکە ژ کەڤنترین دارستانێن سنوورێ قەزا ئامێدیێ و شارستانیەکا تایبەت ھەیە و سەر و سیمایەکێ جوان دایە کومەلگەھا سیریێ و دەڤەرێ و پێدڤی یە ب جدی گرنگی پێ بھێتەدان و بھێتە پاراستن ژ بەرکو جوانیەکا تایبەت دایە سیریێ و ھەوایێ دەڤەرێ دپارێزیت).
زێدەتر گۆت: (بەری کو باژێرڤانی ل دەڤەرێ بھێتە درۆستکرن ، دەروبەرێن ئەوێ دارستانێ ھەموو مولک و عەردێ خەلکی بوو و بوینە مولکێن وان ، و دنھادا پشکەکا زور یا دارێن ئەوی َدارستانێ دکەڤن و رەھێن وان دەرکەفتینە و ھەرەشە لسەر ھەیە ، بەلێ ژ بەرکو عەرد یێ وەلاتیان مە چوو دەستھەلات لسەر نینە کود یوارێن پالپشت لسەر درۆست بکەین یان ئەوان داران بپارێزین و نھا وەلاتی رێگرن ل درۆستکرنا دیوارێن پالپشت بو دارستانی َھەتاکو قەرەبویا ئەوان نەھێتەکرن نکارین چوو دیواران ژی درۆست بکەین ب تایبەتی د نھادا کو قەیرانا دارایی ھەیە و حوکمەت و جھێن شولەژێ نکارن قەرەبویا زەڤی و مولکێن خەلکی بدەن ، بەلێ ئەم دێ ھەموو بزاڤان کەین کو دارستانا سیریێ ھەریا پاراستی و جوان بیت و چوو دارێن وێ نەکەڤن).
کومەلگەھا سیریێ ل دەردورێن سالا 1976 ھاتیە درۆستکرن و خەلکێ وێ ژ دەڤەرا نێروەورێکان و خوجھێن سیریا کەڤن پێکدھێن و دنھادا نێزیکێ 15 ھزار کەس تێدا ئاکنجینە.
نيشاندان