ئه‌ڤرۆ نيوز:
چاڤدێرێن سیاسی دیار دكه‌ن كو نها سووریه بوویه مه‌یدانا شه‌رێ به‌رژه‌وه‌ندیێن ئه‌مریكا و روسیا، هنده‌ك وه‌لاتێن دی یێن هه‌رێمی ژی ژ به‌ر به‌رژه‌وه‌ندیێن خوه ل سووریێ شه‌ری دكه‌ن، ژ به‌ر هندێ ژی كوشتنا خه‌لكێ سڤیل بۆ وان ئاریشه نینه و تنێ یا گرنگ به‌رژه‌وه‌ندینه، ژ به‌ر هندێ ژی هه‌تا نها ل دۆر كۆمكوژیا ل عه‌فرینێ چو وه‌لاته‌كی دژبه‌ریا خوه نیشا نه‌دایه.
هایكۆ به‌غداد نڤیسه‌رێ ناڤدارێ ئه‌رمه‌نی د داخۆیانیه‌كێ دا راگه‌هاند كو كوشتنا خه‌لكێ سڤیل ل عه‌فرینێ و بێده‌نگیا جڤاكێ نێڤده‌وله‌تی شه‌رمزاریه‌كا مه‌زنه. مخابن ژ به‌ر بێده‌نگیا ئێكه‌تیا ئورۆپا و نه‌ته‌وێن یه‌كگرتی توركیا ژی ب هه‌موو چه‌كێن گران و مودێرن عه‌فرینێ و ده‌وروبه‌رێن وێ بۆمبه‌باران دكه‌ت و رۆژانه ب ده‌هان وه‌لاتیێن سڤیل كو پرانیا وان ژن و زارۆنه جانێ خوه ژ ده‌ست دده‌ن و گۆت: (ئه‌مریكا و روسیا شه‌رێ هندێ دكه‌ن كا دێ كێ پتر بشێت به‌رژه‌وه‌ندیێن خوه ب پارێزیت و یێ دی لاواز كه‌ت، كه‌س د خه‌ما خه‌لكی دا نینه، نه تنێ ل عه‌فرینێ به‌لكو ل گه‌له‌ك ده‌ڤه‌رێن شه‌ری یێن سووریێ رۆژانه ب ده‌هان زارۆ دهێنه كوشتن لێ كه‌س ده‌نگێ خوه ناكه‌ت، هه‌موو چاڤه‌رێ هندێ نه كا دێ چاوا بشێن د سووریا داهاتی دا بگه‌هنه هنده‌ك به‌رژه‌وه‌ندیێن ئابووری و سیاسی).
ناڤبری ئه‌و یه‌ك ژی دیار كر كو روودانێن ل سووریێ ب تایبه‌تی ژی یێن ل عه‌فرینێ نیشا دده‌ن كو نه‌ته‌وێن یه‌كگرتی و سازیێن مافێ مرۆڤی ژی ل گۆر به‌رژه‌وه‌ندیێن ئه‌مریكا و ئورۆپا كار دكه‌ن و هه‌كه تشته‌ك ب دلێ وان نه‌بیت ئه‌و ژی خوه بێده‌نگ دكه‌ن، مخابن بێده‌نگیا وان ئه‌ڤ وێره‌كی ل ده‌ف توركیا دروست كریه كو ل گۆر دلێ خوه عه‌فرینێ بۆمبه‌ران بكه‌ت و كه‌سێ ژی هه‌تا نها توركیا شه‌رمزار نه‌كریه.
ل ئالیێ دی رێكخراوا چاڤدێریا مافێ مرۆڤی یا سووریێ ژی راگه‌هاند كو د ئه‌نجاما بۆمبه‌باران فرۆكێن شه‌ری یێن توركیا د ناڤا دو رۆژان دا نێزیكی ١٥ زارۆ ل عه‌فرینێ هاتینه كوشتن و گه‌له‌ك ژی بریندار بووینه و ژ به‌ر شه‌ری وه‌كو پێدڤی ده‌رمان ژی ل به‌ر ده‌ست نینه و ئه‌و یه‌ك ژی نیشا دده‌ت كو نها ره‌وشا عه‌فرینێ و ده‌وروبه‌رێن وێ گه‌له‌كێ خرابه.
چاڤدێرێن سیاسی ژی دیار دكه‌ن كو هه‌تا ئه‌مریكا و روسیا ل دۆر به‌رژه‌وه‌ندیێن خوه ل سووریێ نه‌گه‌هنه رێككه‌فتنه‌كێ دێ شه‌ر هه‌ر به‌رده‌وام بیت، هه‌كه رێككه‌فتنه‌ك د ناڤبه‌را هه‌ر دو وه‌لاتێن زلهێز دا بهێته كرن دێ شه‌رێ عه‌فرینێ ژی ب دووماهی هێت.
ئه‌و یه‌ك د ده‌مه‌كێ دایه كو چه‌ند رۆژان به‌ری نها سالح موسلم هه‌ڤسه‌رۆكێ به‌رێ یێ په‌یه‌دێ دیار كربوو كو روسیا رێ دایه توركیا هێرشی عه‌فرینێ بكه‌ت و تنێ روسیا دشێت هێرشێن توركیا یێن ل سه‌ر عه‌فرینێ بده‌ته راگرتن.
ل دۆر سووریێ وه‌زیرێ ده‌رڤه یێ روسیا سیرگێی لاڤرۆڤ راگه‌هاند كو ئه‌مریكا دخوازیت ب رێیا كوردان سووریێ پارچه بكه‌ت و ئه‌و یه‌ك ب چو ره‌نگه‌كێ ناهێته قه‌بوول كرن و ئه‌م دێ یا پێدڤی كه‌ین دا ئێكپارچه‌یا ئاخا سووریێ ب پارێزین.
ل ئالیێ دی وه‌زاره‌تا به‌رگیریا ئه‌مریكا ژی راگه‌هاند كو یه‌په‌گه ژ به‌ر شه‌رێ عه‌فرینێ نه‌چار مایه هێزێن خوه ببه‌ته وێ ده‌ڤه‌رێ و ئه‌و یه‌ك كارتێكرنه‌كا خراب ل شه‌رێ ل دژی داعشێ كریه و دڤێت توركیا و روسیا نه‌بنه ئه‌گه‌رێ ب هێزبوونا داعشێ، داعش نها ل رۆژهه‌لاتێ سووریێ جاره‌كا دی خوه ب رێكخستن دكه‌ت و هه‌كه ره‌وش وه‌كو نها ل سووریێ به‌رده‌وام بیت دێ داعش جاره‌كا دی ده‌ست ب هێرشێن خوه بكه‌ت و ئه‌و یه‌ك دێ بیته مه‌ترسیه‌كا مه‌زن ل سووریێ و هه‌موو ده‌ڤه‌را رۆژهه‌لاتا ناڤین، به‌رپرسێ وێ كاره‌ساتێ ژی روسیایه كو ناهێلیت شه‌رێ ل دژی داعشێ ب دووماهی بهێت.
نيشاندان