NO IORG
Twitter

زاخۆ، ھشیار دوبانکی:

راھێنەرێ تیما باسکت بولا یانا زاخۆ دیارکر  وان رازیبونا رێکخستنا کەمپەکا راھێنانێ ژ کارگێریا یانێ وەرگرتیە، لێ ھەتا پێشەکار ئامادە نەبن نەشێن ڤێ کەمپا راھێنانێ ب دانن.

زێدەتر د ڤی بیاڤی دا ئەحمەد فازل د داخویانیەکێ دا بۆ رۆژناما ئەڤرۆ گوت: پێدڤی بۆ بەری ھەیڤ و نیڤان من تیم وەرگرتبا داشیابام ئەوا من دڤیا ژ لایێ تەکنیکی و ھێزا لەشی ب جە ئینابا، ھەر چەندە ھەولێن من د بەردەوامن بو قەرەبویا ژ دەست دانا دەمێن بوری و من داخاز ژ کارگێریا یانێ کریە و رازیبونا خوە ل سەر ئەنجاما دانا کەمپەکا راھێنانێ کریە، لێ ھەتا پێشەکار نەگەھن ئەم نەشێن کەمپێ دانین و ھژمارەکا یاریکەرێن نوکە د ئامادە شیانێن خولا عیراقێ نینن.

زێدەتر راھێنەری گوت: ژ بەر ڤان ئالوزی و پێش وەخت نە دەست ب کاربونێ نەشێم رێزبەندا ئارمانجا مە د خولێ دا دیاربکەم.

دھۆک، لەزگین جۆقی:

رێڤەبەرێ راگەھاندنا وەزارەتا پێشمەرگەی بۆ ئەڤرۆ دیارکر کو ھەتا نوکە سێ ھزار و ٥٠٠ ئێزدیان ناڤێن خوە ل بنگەھێن خۆبەخشی تۆمار کرینە بۆ بەرەڤانی کرنێ ژ ئاخا پیرۆزا ھەرێما کوردستانێ.

عەمید ھەلگورد حیکمەت رێڤەبەرێ راگەھاندنا وەزارەتا پێشمەرگەی بۆ ئەڤرۆ دیارکر کو ھەتا نوکە دۆرین چار ھزار کەسان ژ ئێزدی و کاکەی و شەبەکان ناڤێن خوە تۆمار کرینە و بەردەوام گەنجێن ئیزدی ناڤێن خوە تۆمار دکەن بۆ بەرەڤانی کرنێ ژ ئاخا کوردستانێ، وەزارەتا پیشمەرگەی ژی دێ مەشق و راھینان ب وان کەت بۆ ھندێ شارەزایی د شەری دا ھەبیت.

عەمید ھەلگورد حیکمەت ئاماژە دا وێ چەندێ ژی کو ھەتا نوکە ٤٦٠ کەسێن کاکەیێ ناڤێن خوە تۆمار کرینە و بەردەوام ناڤێن خوە تۆمار دکەن و دێ چاڤپێکەفتن ل گەل ھەموویان ھێتە کرن ئەوێن ناڤێن خوە ل بنگەھێن خۆبەخش تۆمار دکەن وەزارەتا پێشمەرگەی دێ ھەموو ئاسانکاریان بۆ وان کەت بۆ ھندێ مل ب ملێ پێشمەرگێ کوردستانێ شەرێ دژی تیرۆرستان بکەن.

دھۆک، لەزگین جۆقی:

رێڤەبەرێ ناحیا زومار بۆ ئەڤرۆ دیارکر کو زێدەتر ژ ٥٠ گۆندێن دەڤەرا زومار ھاتینە کونترۆل کرن ژ لایی پێشمەرگێ کوردستانێ ڤە ب تنێ ١٥ ھەتا ٢٠ گوندان ماینە ددەستێن داعش دا ئەو ژی ل ناڤ ڤان گوندان کێم تیرۆرست ماینە و زێدەتر ژ ١١٠ خانیان ل زومار ھاتینە پەقاندن.

موزاحم سەعدون رێڤەبەرێ ناحیا زومار دیارکر کو ھەتا نوکە ھژمارا خانێن پەقاندنی گەھشتنە ١١٠خانیان و داعش بەردەوام خانیان خراب دکەت، گۆت ژی پشتی پێشمەرگێ کوردستانی ھەموو دەڤەران ئارام دکەت دێ لژنەکێ دروست کەن و زیانێن گەھشتینە وەلاتیان ژی دێ ھێنە تەخمین کرن.

رێڤەبەرێ ناحیا زومار ئەو ژی خۆیاکر کو فروکێن شەری چەندین بارەگایێن داعش ل زومار توپ باران کرینە و کوگەھێن وان و چەکێ وان ژناڤ برینە و پێشمەرگێ کوردستانێ ژی بەردەوام بەرەڤ پیشڤە دچیت، دێ ھەموو دەڤەر ھێنە کونترۆل کرن و دێ وەلاتی ڤەگەرنە سەر مال و مولکێن خوە.

ھەولێر، قائید میرۆ

ئەندامەکا پەرلەمانێ کوردستانێ یا سەر ب لیستا پارتی دیموکراتی کوردستان پێزانینێن ل دۆر ھاتنا ئاوارەیان بۆ ھەرێما کوردستانێ ئاشکرا دکەت و دبێژیت، خەلکەکێ تیرۆرست و خراپکار بناڤێ ئاوارەییێ ھاتیە ھەرێما کوردستانێ و ل دەستپێکا ھێرشێن تیرۆرستێن داعش ل سەر دەڤەرێن کوردی، ئەڤی خەلکێ ئاوارە بزاڤێن تێکدانا رەوشا ئاراما ھەرێما کوردستانێ دکرن، ھەروەسا داخوازکر، خالێن پشکنینێ رێ نەدەن ترومبێلێن تابلۆیێن وان پارێزگەھێن ناڤین و باشوورێ عیراقێ، بھێنە دناڤ ھەرێما کوردستانێ دا.

 ئاواز حەمید ئەفەندی، پەرلەمانتارا پارتی دیموکراتی کوردستان ل پەرلەمانێ کوردستانێ بۆ ئەڤرۆ دیارکر، ھاتنا ڤێ ھژمارا مەزن یا ئاوارەیان کاریگەری کریە سەر ھەرێما کوردستانێ و گۆت” ئەم ژی وەکو وەلاتیێن ھەرێما کوردستانێ گەلەک جاران ئاوارەبووینە و مە پێدڤی ب ھەڤکاریا خەلکەکی ھەبوویە ھەتا مە ب حەوینن، بەلێ ھاتنا ڤێ ھژمارا مەزن یا ئاوارەیان بۆ ھەرێما کوردستانێ و چاوانیا ھاتنا وان، جھێ دلگرانیێ یە بۆ من، ژ بەر کو ھەموو جۆرە کەسەک دناڤ خەلکێ ئاوارە دا ھەیە، ھەکە ژلایێ مرۆڤی و ویژدانی ڤە بەرێ خوە بدەینێ، ئەڤە ئەرکەکێ پیرۆزە حەواندنا ئاوارەیان، د ھەمان دەمدا رەنگە خەلکەک ھەبیت دناڤ ئاوارەیان دا سیخۆرێ لایەنەکێ تیرۆرست بیت، بەلێ من گازندە ژ خالین پشکنینا ھەرێما کوردستانێ ھەنە و بەری نوکە من لایەنێن پەیوەندیدار ل حوکمەتا ھەرێما کوردستانێ و دەزگەھێن ئەمنی ل دۆر ھاتنا ئاوارەیان ئاگەھدارکرینە، کو رێ نەھێتەدان ھەموو کەسەک بھێتە دناڤ ھەرێما کوردستانێ دا ب شێوەکێ ساناھی و ھەموو لێپرسینەک دگەل دا بھێتەکرن”.

 ئاوازێ گۆت ژی” ب دیتنا من نابیت ب چو شێوەکی ترومبێلێن تابلۆیێن پارێزگەھێن دی یێن عێراقێ بھێنە دناڤ ھەرێما کوردستانێ دا، من پێزانین یێن ھەین کو خەلکەک دناڤ ئاوارەیان دا ھەنە بەری بھێنە کوردستانێ ھاتینە رێکخستن و شانەیێن نڤستی یێن تیرۆرستانن ل ھەرێما کوردستانێ نە، بۆ پێزانینێن ھەوە من گومان نینە خەلکەکێ خراپکار و تیرۆرست بناڤێ ئاوارە ل ھەرێما کوردستانێ ھەنە و دەسپێکا ھاتنا داعش بۆ کوردستانێ، ئەڤ خەلکێ ئەز ئاماژە بۆ دکەت لڤین دکرن بۆ تێکدانا رەوشا ھەرێما کوردستانێ، ئەڤە بۆچوونا منە، بەلێ دیارە وان کەسێن ل کوردستانێ دەست ل گەل تیرۆرستان ھەی، خوە بەرھەڤ دکر ئەوژی دەست ب ئالۆزیان بکەن، ئەز نەشێم بێژم ١٠٠% ئەو کەسێن ل بەربوو ل گەل ھاتنا داعش ھەموو رێکخستیێن داعش بن، بەلکۆ سەر ب گەلەک لایەنان ڤە ھەبیت و ڤیابیت ھاتنا داعش بۆ ھەرێما کوردستانێ بۆ خوە وەکی دەلیڤە بکاربینن و کریارێن تێکدەرانە ئەنجام بدەن”.

New Picture (1)
ئاواز حەمید ئەفەندی، پەرلەمانتارا پارتی دیموکراتی کوردستان ل پەرلەمانێ کوردستانێ

ئه‌ڤرۆ، بارزان مزوورى:

بەرپرسێ لقا ٩ یا پارتی دیموکراتی کوردستان ل ئاکرێ و بەرپرسێ میحوەرێ ناوەران، سەربەست تروانشی، بۆ روژناما ئەڤرۆ دیار کر کو پێشمەرگە د پێشڤەچونەکا باش دایە ل میحوەرێ ناوەران و د وڕەیەکێ بەرزدایە ژبۆ رزگارکرنا دەڤەرێن دبن کونترۆلا چەکدارێن تیرۆرستێن داعش دا و پێشمەرگەی شیانێن ھەین ب شێوەکێ باش و رێکوپێک و یێ بەرھەڤە بۆ ھەر جھەکێ پێدڤی بن بۆ ھێرشێ بکەنە سەر دشێن و ب سەناھی سەرکەفتنێ ب دەست خوەڤە بینن.

سەربەست تروانشی دیار کر کو رۆژ ل دووڤ رۆژێ رەوشا چەکدارێن تیرۆرستێن داعش بەر ب خراب بوونێ ڤە  دچیت و نوکە د تەنگاڤیەکا مەزندانە دناڤ باژێرێ مووسل دا، ل میحوەرێ ناوەران، تیرۆرستێن داعش نە شیانێن ھێرش کرنێ و نەیێن بەرگری کرنێ ھەنە و بتنێ مژوولی ھندێ نە کو خەلکێ بێ گونەە ل ناڤ مووسل بگرن و بکوژن و رێ و خانیان (تی ئێن تی) بکەن ژ بۆ وێ چەندێ کو پێشمەرگە د دەمێ ھێرش کرنێ دا ب وان ڤە ب پەقیت ژبەر نەمانا شیانێن ھێرش کرنێ ل دەڤ تیرۆرستێن داعش. گوت ژی” پێشبینی دھێتە کرن، بەلکو  رۆژانە ژی یا بۆ مە دیار دبیت کو کریارێن وان ل دەڤەرا ناوەران و باشیکێ یێن بەر ب  نەمانێ ڤە دچن”.

تروانشی خوەیاکر ژی بەری چەند رۆژان چەکدارێن تیرۆرستێن داعش بزاڤکرن کو ھێزێن خوە نێزیکی ھێزێن پێشمەرگەی بکەن ل سەنگەرێ ناوەران، لێ پێشمەرگەی نەھێلا ئەو بگەھنە ئارمانجا خوە و ١٨ تیرۆرست ژێ کوشتن، ل شەڤا پێنج شەمبی ٢٥/٩ جارەکا دی تیرۆرستان بزاڤکرن خوە نێزیکی پێشمەرگەی بکەن ب مەرەما ھێرشکرنێ ل سەر، لێ  پێشمەرگەی ئەو گوللەبارانکرن و پێنج تیرۆرست ژێ کوشتن و ھژمارەکا مەزن ژی برینداربوو،ن د ھەمان رۆژ دا، تیرۆرستێن داعش ھێزێن خوە ل نێزیک ئاڤاھیەکێ مەزن ل ناڤ گوندێ (خورسەبات) خرڤەکرن ب مەرەما ھێرشکرنێ ، لێ پێشمەرگە د ئامادەباشیێ دا بۆ و ھێزێن وان توپبارانکرن و گەلەک ژوان کوشتن و تەرم و بریندارێن خوە ھێلان  و ڕەڤین و ترومبێلەکا وان بزاڤا رزگار کرنا تەرمێن خوە دکر و پێشمەرگەی ترومبێلا وان گوللەبارانکر و ھەموو یێن دناڤ دا کوشتن “.

سەرپەرشتێ میحوەرێ ناوەران گوت” ئەم دوێ باوەریێ داینە کو چەکدارێن تیرۆرستێن داعش ھەر ھێرشەکی بۆ سەر ھێزێن پێشمەرگەی بکەن، پێشمەرگە دێ ھێزێن وان شکێنیت و ناھێلێت ب ساخی بزڤرنە جھێن خوە”.

دیسا گوت” ئەڤرۆ ئەم دبینین کو پێشمەرگە یێ بەرسینگێ درندەترین ھێزا تیرۆرستی یا جیھانی دگریت و یێ وان دشکینیت ژی و ناھێلیت بگەھیتە ئارمانجا خوە و نوکە چو مەترسی ل سەر خەلکێ دەڤەرێن دەوروبەرێن ناوەران نەمایە و یێ ژیانا خوە یا رۆژانە ب ئاسایی رێڤە دبەن و سەنگەرێ شەڕی ژی یێ دوورە ژ وی خەلکێ بەری نوکە مال و حالێن خوە ھێلاین و نوکە زڤرینەڤە و گەلەک گوند ژی یێن ھاتینە رزگارکرن و خەلکێ وان نەزڤریە سەر مالێن خوە و ھەکە مەترسی نەما، ئەم ب خوە دێ وان داخواز کەین بزڤرنە مالێن خوە” .

ئەڤرۆ:
بەرپرسێ پەیوەندی و راگەھاندنا رێڤەبەریا پۆلیسێن پارێزگەھا دھۆکێ دیار کر کو ل ئەینی یا بۆری ل دەمژمێر ٦ ئێڤاری ٣١ قۆمارچیێن ژیێ وان د ناڤبەرا ١٨ ھەتا ٤٠ سالیێ دا ل چایخانەکا بازارێ دھۆکێ ھاتنە دەستەسەرکرن.
د ھژمارا ١٥٠٠ یا سوبەھی رێکەفتی ٢٧\٩ لاپەرێ ٥ تمامیا بابەتی بخوونن.

سه‌ربه‌ست تروانستى وێنه‌: ئه‌حمه‌د ئه‌دنى

ئەڤرۆ:

بەرپرسێ لقێ ٩ یێ پارتی ل ئاکرێ و بەرپرسێ میحوەرێ ناوەران بۆ روژناما ئەڤرۆ دیار کر کو پێشمەرگە ل میحوەرێ ناوەران د پێشڤەچوونەکا باش دایە و د وڕەیەکێ بلند دایە ژ بۆ رزگارکرنا دەڤەرێن دبن کونترۆلا تیرۆرستێن داعش ڤە و پێشمەرگەی شیانێن ھەین ب شێوەکێ باش و رێکوپێک و یێ بەرھەڤە بۆ ھەر جھەکێ پێدڤی بۆ ھێرشکرنێ و گۆت:( داعش شیانێن ھێرش و بەرگریکرنێ نەماینە).

د هژمارا 1500 يا سوبه‌هى 28\9 دا لاپه‌رێ دو ده‌قێ ديدارێ بخوينن.

530

ئەڤرۆ، شاکر ئەترووشی:

پشتی پشکداری د ھژمارەکا فلم و کلیپێن کوردی دا کری، ل رۆژێن بۆری زارڤەکەرا گەنج (سەنا ھاشم سەعدی سالح) سترانا خوە یا ئێکێ تۆمارکر و ھیڤیا وێ ئەوە ل پاشەرۆژێ ببیتە سترانبێژەکا ناڤدار و خزمەتا سترانا کوردی بکەت.

ناڤبریێ کو نازناڤێ وێ یێ ھونەری (دونیا بەرواری) یە و ل سالا ١٩٩١ ژدایکبوویە، د دیدارەکێ دا بۆ ئەڤرۆ گۆت: “دەمێ ئەزا بچووک حەزا ھونەری ل دەف من پەیدابوو و من دڤیا ئەز ژی خزمەتەکێ پێشکێشی ھونەرێ کوردی بکەم، ئەو بوو بەری دەەـ سالان وەکو زارڤەکەر ئەز د کلیپا سترانبێژێ گەنج سەمیر عەبدوللاى دا ده‌ركه‌فتم، د دووڤ دا کلیپەکا سترانبێژێ گەنج بلند ئیبراھیم، لێ پشتی من شوو کری ھەڤژینێ من (عاشور بەرواری) پتر ھاریکاریا من کر و ئەو بۆ پشتەڤانێ منێ سەرەکی، ھەروەسا مە گەلەک کار ژی د سالێن بۆری دا پێکڤە کرینە”.

ھەروەسا گۆت: “ئێکەم کارێ من وەکو زارڤەکەر پشکداری تێدا کری دراما (دیلان) بوو، د دووڤ دا فلمێ (بێ بەخت) ھەروەسا چەند شانۆگەری و کلیپێن دی، ئانکو ئەز دشێم بێژم پتر ژ ٢٥ کارێن ھونەری دا ئەز پشکدار بوویمە”.

ل دۆر سترانا خوە ژی گۆت: “ب راستی ژ بەر حەزا منا زێدە بۆ پێشمەرگێ کوردستانێ ئەڤ ھزرە بۆ من و ھەڤژینێ من پەیدا بوو، پاشان مە پەیوەندی ب ھونەرمەند سدقی بناڤی کر ب سوپاسی ڤە بەرھەڤیا خوە دیارکر و سترانا من ژ پەیڤ و ئاوازێن وی یە و ل رۆژێن بۆری ھاتە تۆمارکرن و ل دەڤەرا خازری د ناڤ ھێزێن پێشمەرگەی دا ھاتیە کلیپکرن و ل نێزیک دێ بەلاڤ بیت”.

دا زانين ژى كو ل به‌ره‌ پشتى ڤێ كليپێ ژى كليپه‌كا دى ل دۆر خەبات و قوربانیدانا بارزانیێ نەمر تۆمارکەت و گۆت: “ھەکە من دیت ھاریکاری ھەبوو دێ ھزرێ دچێکرنا ئەلبۆمەکێ ژی دا کەم”.

د لایەکی دا گۆت: “ئەو کارێن من پشکداری تێدا کری ژھەموویان پتر ئەز حەز ژ دراما (دیلان) دکەم، من کارەک ل گەل خەلۆ و جەلۆی ژی کربوو، لێ ئەزا پەشیمانم”.

10699175_788944164502673_1394637363_n [1024x768]

10620856_788944441169312_573074686_n [1024x768]

10716182_788944274502662_1968934631_n [1024x768]

179

زێدە خوارنا شەکرێ دبیتە ئەگەرێ قەلەویێ و گەلەک ئاریشەیێن ساخلەمیێ ژی ژێ پەیدادبن و نەدوورە ببیتە ئەگەرێ پەنجەشێرێ و نەخوشیا شەکرێ  و نەخوشیێن دلی و کورەبوون و زوو مرنا مرۆڤی ژی و پێدڤیە وەلاتی گەلەک ل دووڤ ریکلامێن کومپانیێن شەکرێ نەچن، ژبەرکو مەترسیا شەکرێ ژی وەکو یا جگارەیانە و باشترە ریکلامێن تشتێ شەکر دناڤدا بھێنە قەدەغەکرن.

شەکر کێمی و زێدەیێ دئێخیتە رێژا شەکرا خوینێ دا و ئەڤە دبیتە ئەگەرێ تێکچوونا مەزاجێ مرۆڤی و گێژبوون و سەرئێشان ژێ پەیدادبن و ئەڤە مرۆڤی پال ددەن بۆ زێدەتر خوارنا شەکر ئانکو ئیدمان ژێ پەیدادبیت و ل دەمێ مرۆڤ شەکرێ دخوت بۆ دەمەکێ کێم ھەست ب باشبوونێ دکەت و پشتی دەمەکی دێ برسی بیت و ژلایەکێ دیتر ڤە ئەو کەسێن کێم شەکرێ دخون پتر دلینی ل دەڤ ھەیە و ھێزەکا مەزنتر ھەیە.

158

ئەڤرۆ، ساخلەمی:

ھەکە تە ئێشا دلی ھەبیت، یان تو ژ نەخۆشیەکا دلی چارەسەربووی، باشترین تشت بۆ تە وەرزشا ب رێڤەچوونێ یە، پروگرامێن رێکخستی یێن دلی شیان ھەنە کاربکەن بۆ بھێزکرنا دلی و زێدەکرنا شیانێن وی کو پتر خوینێ پال بدەت، ئەڤ چەندە دێ بیتە ھاندەر کو تو پتر کاربکەی، بۆ پتریا تووشبۆیێن ئێشێن دلی رێڤەچوون گەلەک یا باشە و ب تایبەت ھەکە ل ژێر سەرپەرشتیا نوشدارەکێ تایبەتمەندبیت.
رەنگە رێڤەچوون یا ب سانەھی بیت، بەلێ ھەر کەسەک پێدڤی یە ھندەک تشتان ژێ بزانیت، ئەرێ لەزاتیا من چەند بیت، ئەز دشێم ل چیا ب سەرکەڤم یان نە؟ پشتی خوارنێ ب رێڤەبچم یان نە؟ ئەرێ ھەکە دونیا یا سار یان گەرم بیت چاوا برێڤە بچم؟ ئەرێ دروستە ب تنێ برێڤەبچم یان نە؟ وەکی ڤان پرسیاران گەلەک دگرنگن و پێدڤیە تشتەکی ژێ بزانی.
تشتێ ژ ھەمیا گرنگتر ئەوە تو بەرێخودانێ ل وەرزشێ بکەی وەکو پشکەک ژ چارەسەریا ئێشا دلی و چارەسەری دێ باشتر ھەکە یا تمام بیت، ھەکە تە ب رێڤەچوون ل سەر پروگرامێ خۆ زێدەکر و تە پێگیری ب خوارنەکا کێم روین و ێودیوم کر و جگارەمەکێشان و لەشێ خۆ گەلەک نەوەستاند، ل وی دەمی دێ ئەنجامێن باش ب دەست تە ڤە ھێن.
ئەرێ ما تشتەکێ ب زەحمەتە ڤان ھەموو کاران ب دەست خوڤە بینی ب پێنگاڤەکێ؟ جارێ نەکە ئاریشە، ھندەک ژ خەلکی حەز دکەن پێنگاڤ پێنگاڤ دەست ب ڤی بەرنامەی بکەن، ئانکو ھەر جارێ پێنگاڤەکێ ب ھاڤێژن، دگەل ڤێ چەندێ ھندەک وەسان ھزر دکەن کو دێ باشتر بیت ھەموو پێنگاڤان پێکڤە ب ھاڤێژن.
رەنگە یا باشتر بیت دڤان دەلیڤەیان دا مرۆڤی ئاگەە ژ خۆ ھەبیت و ھەکە شێوازێ ژیانا خۆ راست ڤە کەت دێ ددەمەکێ زوو دا ھەست ب خوشیێ کەت، ھەکە ھەست ب خوشیێ ژی کر دێ بیتە دەرگەھەک کو ئەو پتر ل دووڤ پروگرامی کاربکەت.
ژلایەکێ دیتر ڤە ئەو نەخوشێ دلی یێ ھەست ب ئێشانێ و بێھن تەنگیێ دکەت، ھەکە ھەول بدەت ئەو ب خو چارەیا خۆ بکەت ب پالپشتیێ ل سەر رێڤەچوونێ ب تنێ، ئەو دێ ھەست ب داکەتنێ و بێھیڤیبوونێ کەت و برێڤەچوون ب تنێ چ جاران نابیتە ئەگەرێ دابەزینا رێژا کولیسترولی و وەرزش ب تنێ ژی یا تمام نینە بۆ نەھێلانا قەلەویێ یان کێمکرنا دژواریا دەروونی، ئانکو مرۆڤ ب لەزاتی ھەست ب ئەنجامێن وێ ناکەت .ئەو تشتێ تو ھەڤرکیێ دگەل دکەی ئەوە کو تە دەمەکێ گونجای ھەبیت بۆ ب رێڤەچوونێ و ھەست ب ئێمنیێ بکەی، ب شێوەیەکێ گشتی یا ل سەر نەخۆشێ دلی پێدڤیە ھەر حەفتیێ پێنج رۆژان و ھەر رۆژێ بۆ دەمێ نیڤ دەمژمێرێ برێڤەبچیت، یان حەفتیانە سێ رۆژان و ھەر رۆژێ دەمژمێرەکێ برێڤەبچیت، ھەلبەت نەخوشێ دلی نەشێت ئێکسەر ڤی رادەی ب رێڤەبچیت و پێدڤیە پیچ پیچە دەستپێبکەت، بۆ نموونە رۆژانێن ئێکێ پێنج دەقیقان و ھەتا دگەھیتە ڤی رادەی ئەوژی پێدڤیە رازەمەندیێ ژ نوشدارێ خۆ وەربگریت.
ھەتا کو ئەڤ گوتنا مە نەبیتە تشتەکێ نەباوەرپێکری ژلایێ تە، مە دڤێت ئەم ل ھزرا تە بینین کو ئەو نەخوشێ وەرزشەکا دژوار ئەنجام ددەت ب ھەشت جاران پتری تووشی مرنێ دبن ژوان نەخوشێن وەرزشەکا ھێدی ئەنجام ددەن. ل ڤێرێ مافێ تەیە پرسیار بکەی ئەرێ وەرزشا سڤک چیە و رێڤەچوونا ئارام چاوایە؟
بنیاتەکێ زێرین ھەیە دبێژیت، ھەکە تو شیای ب رێڤەبچی و گەنگەشێ ژی دگەل ئێکی بکەی، ئەڤە تشتەکێ باشە، رەنگە تو بێژی ئەڤە تشتەکێ دوورە ژ زانستی، بەلێ ئەم تە دلنیا دکەین کو ئەڤە دووماھی پێشھاتێن پزیشکینە دڤی واری دا.

website security
WP Facebook Auto Publish Powered By : XYZScripts.com