ئەڤرۆ نیوز ، زنار تۆڤی:

بریاره سوبەهی سێشەمبی 26.2.2018 پەرلەمانێ عێراقێ ل سەر بودجەی کۆم ببیت و دهێتە چاڤەرێکرن قەوارێن شیعی ب رێككەفتن ل گەل هێزێن سوننی بێ جێبەجێکرنا داخوازیێن فراكسیۆنێن كوردستانی، بودجێ سالا 2018 ب زۆرینەیا دەنگان پەسەند بکەن.
نەجیبا نەجیب ئەنداما لیژنا دارایی ل پەرلەمانێ عێراقێ بۆ ئەڤرۆ نیوز گوتیە،وەسا بریار بوو کوهەر سێ سەرۆكایەتی ل سەر داخوازیێن فراكسیۆنێن كوردستانی و هێزێن سوننی كۆم ببن بەلێ عەبادی ئامادە نەبوویە بۆ ئەنجامدانا وێ كۆمبوونێ.
ئەڤە دو هەیڤ ل سەر پرسا بودجێ سالا 2018 یێ عێراقێ دەربازبوون،لێ هێشتا نەهاتیە پەسەندکرن،چونکی عێراقێ پێشێلکاریێن دستوری د بودجەی دا کرینە ل هەمبەری هەرێما كوردستانێ،ئەڤە بوویە ئەگەر کو بودجە نەهێتە پەسەندکرن و فراکسیۆنێن کوردستانی ژی بایکۆتا روونشتنێن پەرلەمانی کرینە.
هەروەسا گوتیە،د بودجێ 2018 دا، ناڤێ هەرێما كوردستانێ نەهاتیە و عێراقێ وەك پارێزگەهێن دی یێن عێراقێ مامەلە لەگەلدا كریە، دیسا پشكا 17% بۆ 12.67% كێم كریە،هەکە دناڤ بودجەی ب خوە دا پشكا هەرێمێ ل سەر بنەمایێ هژمارا روونشتڤانان دانایە،لدووڤ ئامارێن هەردو وەزارەتێن بازرگانی و پلاندانانێ 13.9% یە؛ ئەڤە ژ بلی پرسا پشكا پێشمەرگەی و چەند پرسێن دیتر،کو داخوازیا فراكسیۆنێن كوردستانی بوون.<br>
هەروەسا هێزێن سوننی 15 داخوازی هەبوون،حوکمەتا عێراقێ هەشت ژ وان داخوازیان بۆ چێکرینە،لەوما دبیت د كۆمبوونا سوبەهی یا پەرلەمانی دا، پەرلەمانتارێن سوننی ئامادەی روونشتنا پەرلەمانی بن و بودجەی ب زۆرینەیا دەنگان پەسەند بکەن،لێ هەکە پەرلەمانتارێن سوننی ئامادەی روونشتنا سوبەهی نەبن، شیعە نەشێن بودجەی ب زۆرینەیا دەنگان تێ بپەرینن، لێ سوننی جهێ باوەریێ نینن و وان دڤێت بودجەی بكەنە دەستكەفتێ هەلبژارتنان بۆ كۆمكرنا دەنگان.
ئەڤرۆ دوشەمبی 26 شواتێ، فراكسیۆنێن كوردستانی ل بەغدا د كۆممبوونێ دانە بۆ گوتۆبێژکرنا دوماهی هەلوێستێ خوە،هەروەسا لدووڤ بودجێ هاتیە پێشنیاركرن، پشكا هەرێما كوردستانێ ب تنێ شەش ملیار و 500 ملیۆن دۆلارن، بەلێ فراكسیۆنێن كوردستانی داخواز دكەن،کو ئەو پشكە بۆ 10 ملیار و 500 ملیۆن دۆلاران بهێته زێدەکرن،هەتا هەرێما كوردستانێ بشێت،مووچێن فەرمانبەران پێ بدەت.
نەجیبا خویاکر ژی:فراكسیۆنێن كوردستانی ئێک دەنگن ل سەر بایكۆتكرنا روونشتنا پەرلەمانی،هەکە داخوازیێن كوردان نەهێنە جێبەجێ کرن.
دیسا گوتیە:نوکە عەبادی ب تنی ب ئاخفتنێن خوه دکەت و چو حسێبان بۆ کەسێ ناکەت و هەموو بریار ب تنێ د دەستێ وی دانه.

ئه‌ڤرۆ نیوز ، زنار تۆڤى:

شاره‌زایه‌كێ عێراقى ئاشكرا دكه‌ت،كو ئه‌مریكا فشاره‌كا زۆر ئێخستیه‌ سه‌ر حوكمه‌تا عێراقێ بۆ رێگرتنێ ل كرینا فرۆكێن سه‌ربازى و مۆشه‌كێن پێشكه‌فتى یێن رووسى ئاماژه‌ كریه‌ هندێ،كو ئه‌مریكا سۆز دایه‌ عێراقێ،هه‌كه‌ عێراق ژ كرینا فرۆكێن رووسى ژ جۆرێ”سیخۆ 35″ و سیسته‌مێ مۆشه‌كێن ژ جۆرێ “ئێس 400″ لێڤه‌ ببیت،دێ ئه‌مریكا د ماوێ چه‌ند هه‌یڤێن بهێت دا 13 فرۆكێن ئێف 16 ده‌ته‌ عێراقێ،سه‌فا ئه‌عسه‌م ئه‌و شاره‌زایێ سه‌ربازى یێ عێراقێ یه‌ دبێژیت:واشنتۆنێ فشاره‌كا مه‌زن ئێخستیه‌ سه‌ر حوكمه‌تا عێراقێ،داكو چه‌كێ رووسى نه‌كریت،ئه‌ڤ چه‌نده‌ هات پشتى كو عێراقێ خوه‌ ئێكلا كرى بۆ كرینا ڤى سیسته‌مێ مووشه‌كى یێ رووسى،كو ئێكه‌ ژ پێشكه‌فتى ترین چه‌ك د جیهانێ دا،هه‌روه‌سا گوتیه‌:ئه‌و فشارا ئه‌مریكا بۆ هندێ یه‌،كو وێ ترسا هندێ هه‌یه‌،كو عێراق ببیته‌ خودان چه‌كه‌كێ پێشكه‌فتى ب تایبه‌تى د وارێ به‌ره‌ڤانیا ئه‌سمانى دا،كو ئه‌ڤه‌ ژى دێ مه‌ترسیێ ئێخنه‌ سه‌ر فرۆكێن پێشكه‌فتى یێن ئه‌مریكا دڤێ ده‌ڤه‌رێ دا،هه‌روه‌سا دوپاتكریه‌،كو ئه‌مریكا سۆز دایه‌ عێراقێ،كو د ماوێ چه‌ند هه‌یڤێن داهاتى دا 13 فرۆكێن پێشكه‌فتى ژ جۆرێ ئێف 16 بده‌ته‌ عێراقێ،هه‌مبه‌رى چاڤ خشاندنا به‌غدا بۆ كرینا فرۆكێن پێشكه‌فتى یێن رووسى ژ جۆرێ سیخۆ 35.
هه‌روه‌سا حاكم زاملى سه‌رۆكێ لیژنا ئێمناهى و به‌ره‌ڤانیێ ل په‌رله‌مانێ عێراقێ دیاركریه‌:كو عێراق یا رژده‌ ل سه‌ر كرینا سیسته‌مێ مۆشه‌كێن رووسى ژ جۆرێ “ئێس 400″،دوپاتكریه‌ كو ئه‌مریكا نه‌ڤێت عێراق ببیته‌ خودانا چه‌كه‌كێ پێشكه‌فتى،به‌لكو ئه‌مریكا دڤێت عێراق وه‌كو مه‌یدانه‌كا ڤه‌كرى بیت،ژبۆ جێبه‌جێكرنا پلانێن خوه‌،هه‌روه‌سا گوتیه‌:مافێ عێراقێ یه‌ ببیته‌ خودانا چه‌كێ پێشكه‌فتى،داكو بشێت ئه‌رد و ئه‌سمانێ خوه‌ ب پارێزیت ژ هێرشێن ده‌رڤه‌ و دیسا عێراق بۆیه‌ مه‌یدانا هێرشێن تیرۆرستى،هه‌روسا ئه‌مریكا ژ هه‌موو وه‌لاتێن جیهانێ پێشكه‌فتى تره‌،لێ تیرۆرستان هێرش كره‌ سه‌ر سه‌نته‌رێ نێڤده‌وله‌تى یێ بازرگانى ل نیویۆرك،له‌روا عێراقێ ژى هند نه‌یا پاراسته‌ كو هێرش نه‌هێنه‌ كرن بۆ سه‌ر مه‌زارێن وێ،له‌ورا عێراق یا رژده‌ ببیته‌ خودانا سیسته‌مێ مۆشه‌كى ژ جۆرێ ئێس 400 بۆ پاراستنا ئاخ و ئه‌سمان و پیرۆزیێن وێ،له‌وما ئه‌م دێ پشته‌ڤانیێ ل كرینا ڤى چه‌كى كه‌ین.
هه‌روه‌سا زاملى دیاركریه‌:ئه‌مریكا چه‌كێ پێشكه‌فتى ناده‌تى عێراقێ،ژ پێخه‌مه‌ت عێراق بشێت ئاخ و ئه‌سمانێ خوه‌ پێ ب پارێزیت،له‌روا عێراق یا نه‌چاره‌ ڤى سیسته‌مى ب ده‌ست خوه‌ڤه‌ بینیت،چونكى رووسیا ئه‌ڤ سیسته‌مێ پێشكه‌فتى یێ دایه‌ ئیرانێ و هنده‌ك وه‌لاتێن ڤێ ده‌ڤه‌رێ و عێراقێ ژى ماف یێ هه‌ى ڤى چه‌كى ب ده‌ست خوه‌ بێخیت،هه‌روه‌سا ئه‌مریكا دڤێت عێراق وه‌كو مه‌یدانه‌كا ڤه‌كرى بمینیت،ژبۆ جێبه‌جێكرنا پلانێن خوه‌ ب ره‌نگه‌كێ ئاسایى،دیسا وێ دڤێت ژى وه‌لات بكه‌ڤیته‌ دناڤا ئالۆزیان و شه‌ره‌كێ تائیفى دروست ببیت،دوور نینه‌ ئه‌مریكا كار بۆ ته‌قاندنا مه‌زاره‌كێ پیرۆز بكه‌ت و دێ دڤێ پلانا خوه‌ ژى دا یا سه‌ركه‌فتى بیت.
په‌یڤدارا وه‌زاره‌تا ده‌رڤه‌ یا ئه‌مریكا هێزه‌ر نوێرت هۆشدارى دایه‌ عێراقێ،كو چه‌كێن رووسى نه‌كریت،چونكى هه‌كه‌ عێراقێ ئه‌و چه‌ك كرى،دێ روو ب روو قانوونا دوژمنێن ئه‌مریكا بیت،ب رێیا سزایێن “كاتسا”،هه‌روه‌سا گوتیه‌:ئه‌مریكا گوتۆبێژ ل گه‌ل چه‌ندین وه‌لاتان كرینه‌ ژ وان ژى ل گه‌ل عێراقێ بۆ روونكرنا ئه‌گه‌رێن وێ قانوونێ و لێكه‌فتنێن گرێدانا ده‌سته‌واره‌یا كرینا چه‌كێ به‌ره‌ڤانیێ ل گه‌ل رووسیا.
دیسا رۆژناما”ستار ئاند سترایب” یا ئه‌مریكى ئاشكراكریه‌،كو فرقه‌یا چیایێ ئه‌مریكى ل بنگه‌هێ ئه‌سمانى یێ”فۆرت درووم” رێوره‌سمێن ئاماده‌كاریێ بۆ “500” سه‌ربازێن ئه‌مریكى ئه‌نجامداینه‌،به‌رى كو بهێنه‌ ره‌وانه‌كرن بۆ عێراقێ.
نوكه‌ سیسته‌مێ مۆشه‌كێن پێشكه‌فتى یێن رووسى “ئێس 400″ ل سووریێ هه‌یه‌ و روسیا پێ بنگه‌هێن خوه‌ یێن سه‌ربازى دپارێزیت.

ئەڤرۆ نیوز ، زنار تۆڤی:

ئەندامەکا فراکسیۆنا ئێکەتیێ ل پەرلەمانێ عێراقێ ئاشکراکریە،کو حەیدەر عەبادی سەرۆک وەزیرێن عێراقێ، پیلانەکا مەترسیدار ل دژی هەرێما کوردستانێ هەیە و یێ ئامادە نینە خۆ دینارەکێ ژی بۆ هەرێما کوردستان بهنێریت.

رێزان شێخ دلێر ئه‌نداما پەرلەمانێ عێراقێ راگه‌هاندیه، بزاڤا هندێ ددەن،ب زووترین دەم داخوازیێن مامۆستایێن نەرازى پێشكێشی حوکمه‌تا عێراقێ بکەن،داکو كێشه‌یا مامۆستایان و فه‌رمانبه‌رێن هه‌رێما کوردستانێ چاره‌سه‌ر بکەت، چونكی‌ ”هەکە د ماوێ‌ 10 رۆژێن دیتر ‌دا ده‌رگەهێ قوتابخانان نەهێتە ڤەکرن،خواندنا قوتابیان ئەڤ سالە ل سنوورێ پارێزگەها سلێمانیێ و هه‌له‌بجه ناهێتە‌ هژمارتن“.

هەرەسا گوتیە،عه‌بادى دشێت كێشا مووچەیێ فەرمانبەرێن هه‌رێما کوردستانێ چاره‌سه‌ر بكەت، به‌لێ ”هەتاكو مه‌رجێ فرۆكخانا و ده‌روازێن‌ سنووری نه‌چیته‌ قۆناغا جێبه‌جێكرنێ‌، كێشا فه‌رمانبه‌رێن هه‌رێما کوردستانێ چاره‌سه‌ر ناكەت، هه‌روه‌سا دینارەکێ ژی بۆ وەلاتیێن هەرێما کوردستانێ ناهنێریت، به‌لکی بزاڤا هندێ ددەت کو خه‌لکێ كوردستانێ زێدەتر بێ هیڤی بكەت، بۆ هندێ داکو‌ حوکمەتا هەرێما کوردستانێ نەشرین بكەت“.

وێ پەرلەمانتارێ دیارکریە ژی،بەرنامێ عه‌بادى ئه‌وه‌ کو خه‌لک ل دژى حوکمه‌تا هه‌رێما کوردستانێ رابوەستیت و دبێژیت: ”بێگومان ئه‌ڤە‌ مەترسیەکا مەزنە‌ و پێدڤیە وەلاتی به‌رامبه‌ری ڤێ پیلانێ د هشیار بن، چونكی نابیت ب ئەگەرێ گه‌نده‌لیا چه‌ند کەسان،ئەم‌ هه‌رێما حوە روو ب روو مەترسییەکا مەزن بكه‌ین‌“.

رێزان شێخ دلێر جەخت ل هندێ کریە، هندەک حزب و لایەنێن سیاسی،دهۆلێ بۆ بەغدا لێ ددەن و بزاڤا هەلوەشاندنا هەرێما کوردستانێ ددەن، بۆ هندێ کو به‌غدا وه‌ك پارێزگەه مامه‌لێ‌ ل گه‌ل هەرێما کوردستانێ بكەت“.