ئه‌ڤرۆنيوز:
په‌رله‌مانتاره‌كى راگه‌هاند، حوكمه‌تا عيراقێ ئه‌ڤرۆ چارشه‌مبى 14/2/2018 برياردا برينا 3.8% ژ مووچێ هه‌ر فه‌رمانبه‌ره‌كى بهێته هه‌لوه‌شاندن .
زانا روستايى ئه‌ندامێ جڤاتا نوونه‌رێن عيراقێ دداخۆيانيه‌كا رۆژنامه‌ڤانيدا گۆت” ل هه‌فتيا بۆرى، جڤاتا نوونه‌ران برينا مووچێ فه‌رمانبه‌ران ب نه‌قانوونى هژمارتبوو”.
دهێته زانين ده‌مێ دو سالانه‌كوژمێ 3.8% ژ مووچێ هه‌ر فه‌رمانبه‌ره‌كێ عيراقى دهێته برين بۆ بۆ حه‌شدا شه‌عبى وئاواران.
ئه‌ڤرۆ نیوز، نه‌وزاد هلۆرى:
ب هه‌لكه‌فتا رۆژا عاشقان كو ب ڤالنتاین دهێته نیاسین ، ئه‌ڤرۆ رێڤه‌به‌ریا ساخله‌میا قه‌زا سۆران ب هه‌ڤكارى ل گه‌ل ستافه‌كێ ساخله‌میا سۆران سه‌ره‌دانا مالا ( عه‌لى عاشق ) كر كو ژبه‌ر عه‌شقا خوه هه‌تا نها ژن نه‌ئینایه.
مینا ته‌ها، به‌رپرسا راگه‌هاندنا ساخله‌میا سۆران بۆ ئه‌ڤرۆ نیوز گوت” عه‌لى عاشق نموونه‌یا عه‌شق و ڤیانێ یه دڤى چه‌رخێ دا ل كوردستانێ و ژیه‌كێ درێژ بریه د پێخه‌مه‌ت عه‌شقا خوه دا ، ئه‌ڤرۆ رێڤه‌به‌رێ رێڤه‌به‌ریا قه‌زا سوران ل گه‌ل ستافه‌كێ ساخله‌میا سوران ژ نێزیك سه‌ره‌دانا مالا عه‌لى عاشق كر و زێده‌بارى كو دیارى و شیریناهى ل سه‌ر به‌لاڤكرن، دهه‌مان ده‌م دا چاره‌سه‌ریێن پێدڤى بۆ عه‌لى عاشق هاتنه‌كرن”.
دهێته زانین كو عه‌لى عاشق د گه‌نجاتیا خوه دا حه‌ز ژ كچه‌كا نێزیكێ خوه دكر، به‌لێ ژ به‌ر هه‌ژاریێ، مالباتا كچێ ، كچا خوه نه‌دا وى و ژ وێ روژێ هه‌تا نها عه‌لى عاشق سوز دا كو ژنێ نه‌ئینیت و بتنێ ژى بژیت و ل چه‌ند سالێن بۆرى نێچیرڤان بارزانى سه‌رۆكێ حوكمه‌تا هه‌رێما كوردستانێ خانیه‌كێ خوه‌ش ل هاڤینگه‌ها عه‌لى به‌گ بۆ درۆستكر ب هه‌موو پێدڤیێن مالێ ڤه و هه‌تا نها ل وى خانى دژیت و ئه‌ڤه 80 سال بۆرین و هێشتا ژ عه‌شقا خوه بێ ئومێد نه‌بوویه.
ئه‌ڤرۆنيوز:
سه‌رۆك بارزانى، ئه‌ڤرۆ چارشه‌مبى 14/2/2018، ل گه‌ل فراكسيۆنا پارتى ديموكراتى كوردستان ل په‌رله‌مانێ كوردستانێ كۆمبوو.
دوێ كۆمبوونێ دا، فراكسيۆنا پارتى كورتيه‌ك ل دۆر كار وچالاكيێن فراكسيۆنێ وپه‌يوه‌نديێن ل گه‌ل لايه‌نێن سياسى يێن دى وهه‌لبژارتنێن داهاتى يێن هه‌رێما كوردستانێ بۆ سه‌رۆك بارزانى به‌رچاڤكرن.
دپشكه‌كا دى يا وێ كۆمبوونێ دا، سه‌رۆك بارزانى دپه‌يڤه‌كێ دا ره‌وشا سياسى يا هه‌رێمايه‌تى ونێڤده‌وله‌تى ودووماهى پێشهاتێن سياسى يێن عيراقێ وناڤخوه‌يا كوردستانێ بۆ به‌رهه‌ڤبوويان به‌حسكر.
هه‌روه‌سا رۆناهى خسته سه‌ر ريفراندۆمێ وروودانێن 16 ئوكتۆبه‌رێ وبه‌حسێ وان هوكاران كر كو گه‌لێ كوردستانێ هانداين به‌ر ب ريفراندۆمێ ڤه پێنگاڤان ب هاڤێژيت ودووپاتكر كو پێشێلكرنا دستوورى وتێكدانا ته‌وافوقێ ونه‌هێلانا هه‌ڤپشكيێ وه‌كر كو گه‌لێ كوردستانێ بريارا ريفراندۆمێ بده‌ت.
سه‌رۆك بارزانى ئاماژه ب رۆل وقوربانيدان وخوراگريا هێزا پێشمه‌رگێ كوردستانێ دا كو رێ ل سه‌ركه‌فتنا پيلانا نه‌ياران گرت وهه‌ڤكێش ب مفايێ گه‌لێ كوردستانێ ڤه ئينا.
ديسا دووپاتى ل ئه‌رك وپێگه‌هێ راسته‌قينه‌يێ په‌رله‌مانى دژيانا گه‌لێ كوردستانێ دا كر، ل دۆر پرۆسا سياسى ل هه‌رێما كوردستانێ ژى سازكرنا هه‌لبژارتنان ب باشترين رێ چاره بۆ راستڤه‌كرنا پرۆسا سياسى ل هه‌رێما كوردستانێ هژمارت.
هه‌ر دوێ كۆمبوونێ دا، به‌رهه‌ڤبوويان ل دۆر ره‌وشا خه‌لكى وپێشمه‌رگه‌ى وپرۆسا سياسى يا هه‌رێما كوردستانێ، پێشنياز وپرسيارێن خوه ئاراسته‌ى سه‌رۆك بارزانى كر وسه‌رۆك بارزانى ژى شيره‌تێن پێتڤى بۆ فراكسيۆنا پارتى به‌رچاڤكر.
ئەڤرۆ نیۆز، رێوار مزیری:
بەرپرسێ راگەهاندنا رێڤەبەریا به‌رگريا شارستانى ل دهۆكێ بۆ ئەڤرۆ نیۆز دياركر كو ژ ئەگەرەكێ نەدیار بەری دەمەكی ئاگربەربوو موەلیدێن بێخال ل نێزیك مزگەفتا سەلاحەددین ل دهۆكێ و د ئەنجام دا كەسەكی گیانێ خوە ژ دەست دا و زیانێن مەزنێن مادی ژی ل دووڤ خوە هێلان، بەلێ تیمێن رێڤەبەریا وان شیان ڤی ئاگری ب تمامی كۆنترۆل بكەن.
رائیدێ مافپەروەر بێوار عەبدولعەزیز، بەرپرسێ پشكا راگەهاندنێ ل رێڤەبەریا بەرگريا شارستانى ل دهۆكێ دیار كر كو پشتی ئاگر بەری دەمژمێرەكێ بەربوویە موەلیدێن بێخال ل نێزیك مزگەفتا سەلاحەددین ل دهۆكێ د ئەنجام دا كەسەكی گیانێ خوە ژ دەست دا و كەسەكێ دی ژی برینداربوو و گۆت: “13 موەلیدە دگەل سێ ترۆمبێلێن تایبەت و ترۆمبێلەكا بارهەلگر و رافیعەكێ ژی هاتنە سۆتن”.
ناڤهاتی ئاماژە دا وێ چەندێ كو هەتا نوكە ئەگەرێ دروست یێ پەیدابوونا ڤێ روودانێ یێ دیار نینە، بەلێ دێ لیژنەك بۆ زانینا ئەگەرێن دروست یێن ڤێ روودانێ هێتە پێكئینان.
ئه‌ڤرۆنيوز، سالار دۆسكى
رێڤه‌به‌ريا به‌رگريا شارستانى ل دهۆكێ راگه‌هاند، ئه‌نجامێ ئاگربه‌ربوونا ئه‌ڤرۆ يا موه‌ليدێن كاره‌بێ ل تاخێ سه‌رهلدان ل نيزيك مزگه‌فتا سه‌لاحه‌دين كه‌سه‌كى گيانێ خوه ژ ده‌ستدا.
بێوار عه‌بدولعه‌زيز، به‌رپرسێ راگه‌هاندنا به‌رگريا شارستانى ل دهۆكێ بۆ ئه‌ڤرۆنيوز گۆت” 4 پۆليسێن ئاگر ڤه‌مراندنێ ژى يێن برينداربووين و 3 ترومبێل ژى يێن هاتينه سوتن”.
ئه‌ڤرۆنيوز:
وه‌زيرێ ده‌رڤه يێ ئه‌مريكا راگه‌هاند، پێدڤيه ئيران هێزێن خوه ژ سووريێ وعيراقێ ڤه‌كێشيت ودياركر كو ئه‌مريكا هيزێن خوه ژ عيراقێ ناڤه‌كێشيت تاكو پشت راست نه‌بيت كو داعش نازڤريت.
ريكس تێلرسۆن، وه‌زيرێ ده‌رڤه يێ ئه‌مريكا دكۆنگره‌كێ رۆژنامه‌ڤانيدا ل كوێتێ، گۆت” بۆچوونا ئه‌مريكا وه‌كو يا جڤاكێ نێڤده‌وله‌تى يه وپێدڤيه كاريگه‌ريا ئيرانێ ل سووريێ وعيراقێ نه‌مينيت”.
گۆتژى” بۆچوونا مه ژ ئه‌گه‌رێ وێ چه‌ندێ يه كو هه‌بوونا ئيرانێ ل وان ده‌ڤه‌ران چو ئاراميه‌ك بۆ وه‌لاتيان نه‌ئينايه”.
دووپاتكر ژى” دووباره داخوازێ ژئيرانێ دكه‌ين وان ده‌ڤه‌ران بجه بهێليت”.
ديسا گۆت” هه‌تاكو پشت راست نه‌بين كو داعش نازڤريته‌ڤه، ئه‌م هێزێن خوه ژ عيراقێ ناڤه‌كێشين”.
ئه‌ڤرۆنيوز، سالار دۆسكى
به‌رپرسێ راگه‌هاندنا رێڤه‌به‌ريا به‌رگريا باژێرڤانى ل دهۆكێ، بێوار عه‌بدولعه‌زيز، بۆ ئه‌ڤرۆنيوز دياركر كو نوكه ئاگر يێ به‌ربوويه موه‌ليدێن كاره‌بێ ل تاخێ سه‌رهلدان
بێوار گۆت ژى” موه‌ليدێن هاتينه سوتن دكه‌ڤنه نێزيك مزگه‌فتا سه‌لاحه‌دين وتيمێن ئاگر ڤه‌مراندنێ يێن رێڤه‌به‌ريا به‌رگريا شارستانى يێن بزاڤا كونترۆلكرنا ئاگرى دكه‌ن”.
ئه‌ڤرۆنيوز:
پۆليسێ ئيسرائيلێ داخواز ژ داواكارێ گشتيێ ئيسرائيلى كريه تۆمه‌تا گه‌نده‌ليێ ئاراسته‌ى سه‌رۆك وه‌زيران بنيامين ناتانياهۆى بكه‌ت.
ل دووڤ ده‌زگه‌هێن راگه‌هاندنێ ل ئيسرائيلێ، بنيامين ناتانياهۆ، سه‌رۆك وه‌زيرێن ئيسرائيلێ يێن روو ب روويێ دو كه‌يسێن گه‌نده‌ليێ بووى ، كه‌يسا ئێكێ په‌يوه‌ندى ب وه‌رگرتنا دياريێن ب بها ژ جۆرێ زێر وگه‌وهه‌ران وڤه‌خوارنێن كحولى وجگارێن ب بها ب گۆژمێ ب سه‌دان هزار دۆلاران.
كه‌يسێ دويێ كو ناتانياهۆ پێ دهێته تۆمه‌تباركرن، په‌يوه‌ندى ب گرێبه‌ستێن گومان ل سه‌ر دناڤبه‌را ناتانياهۆى وخودانێ رۆژناما (يه‌ديعۆت ئه‌حرونۆت) يا هه‌ى كو رۆژناما ناڤبرى ده‌نگوباسێن ئه‌رێنى ل دۆر سه‌رۆك وه‌زيران به‌لاڤ بكه‌ت.
پۆليسێ ئيسرائيلێ ب فه‌رمى داخواز ژ داواكارێ گشتى وشيره‌تكارێ دادوه‌ريێ حوكمه‌تا ئيسرائيلێ كريه كو تۆمه‌تا گه‌نده‌ليێ ئاراسته‌ى بنيامين ناتانياهۆى بكه‌ن.
ئه‌ڤرۆنيوز:
وه‌زيرێ ده‌رڤه يێ توركيا، مه‌ولود جاويش ئوگلۆ، ئه‌ڤرۆ چارشه‌مبى 14/2/2018 راگه‌هاند، ده‌ستپێكرنا ئۆپه‌راسيۆنه‌كا له‌شكرى دژى چه‌كدارێن په‌كه‌كێ ل هه‌رێما كوردستانێ وعيراقێ كاره‌كێ گرنگه.
ئوگلۆى دكۆنگره‌كێ رۆژنامه‌ڤانێدا د چارچۆڤێ پشكداريا وى دكۆنگرێ ئاڤه‌دانكرنا عيراقێ ل كوێتێ، گۆت” پێدڤيه عيراق ژ رێكخستيێن تيرۆرستى بهێته پاقژكرن وژوان ژى په‌كه‌كه”.
گۆت ژى” ئه‌نجامدانا ئۆپه‌راسيۆنه‌كا له‌شكرى دژى چه‌كدارێن په‌كه‌كێ ل چيايێ قنديلى يا بوويه كاره‌كێ فه‌ر”.
دياركر ژى” چه‌كدارێن په‌كه‌كێ هه‌بوون ل پارێزگه‌هێن دهۆكێ وسلێمانيێ وئه‌ربيلێ يا هه‌ى وهه‌تا يێن ل كه‌ركووكێ وشنگالێ ژى”.
ئه‌ڤرۆنيوز:
ل سەنتەرێ ژین یێ نەخوه‌شیێن خوینێ چاڤدێریەکا تایبەت بۆ نەخوه‌شێن پەنجەشێرا خوینێ و تالاسیمیايێ دھێتە کرن، ل دھۆکێ 218 زارۆیان پەنجەشێر يا هه‌ى و ھندەکان بۆ دەمێ پتری سێ سالان پێدڤی ب چارەسەریێ دبیت و دۆرێن 118 نەخوه‌شان ژی پشتی ھاتینە چارەکرن، نوکە رەوشا وان یا ساخلەمیێ یا باشە و ل بن چاڤدێریا نوشدارانە.
عەبدولرەحمان عەبدوللا موحسن، نوشدارێ تایبەتمەندێ نەخوه‌شیێن خوینێ و بەرپرسێ سەنتەرێ ژین یێ نەخوه‌شیێن خوینی بۆ نوش نيوز دیارکر کو سەنتەرێ ژین ل سالا 2011ێ ھاتیە دامەزراندن و ل دەستپێکێ ب تنێ نەخوه‌شێن تالاسیمیايێ دھاتنێ و پاشى ھاتیە گوھۆرین و نەخوه‌شیێن تالاسیمیا و مەنجەلی و نەخوه‌شێن خوینێ وەکو لوکیمیا و پەنجەشێرا گرێکێن لەمفاوی و پەنجەشێرا گولچیسکان و یا ھەستی و مێشکی ھەموو بۆ وەرگرتنا چارەسەریا کیمیاوی دھێنە ڤێرێ.
عەبدولرەحمانى دیارکر ژی کو زارۆیێن پێدڤی ب نشتەرگەریێ دبن جارا ئێکێ دھێنە نشتەرگەری کرن و پاشی قەستا وان دکەن و گۆت” بەھرا پتر یێن خوینێ پێدڤی ب نشتەرگەریان نابن و ھەکە کچ بیت بۆ دەمێ دو سال و نیڤان و ھەکە کور بیت بۆ دەمێ سێ سال و نیڤان ئەم چارەسەریا کیمیاوی ددەینێ، ل دۆر نەخوه‌شیێن له‌مفاوى ژی بۆ دەمێ شەش مەھان وەردگرن و ھندەك ژی پێدڤی ب کەویکرنێ دبن کو مە ل ڤێرێ نینە و ئەم دھنێرینە ھەولێرێ یان مووسلێ و یێن پەنجەشێرا گولچیسکان ژی ئەم پشتی نشتەرگەریێ وەردگرین و چارەسەریا وان بۆ دەمێ شەش ھەیڤان ڤەدکێشیت، ھەروەسا ئەوێن بەربوونا خوینێ وەکو ھیمۆفیلیا بین ئەم تومارێن وان دروست دکەین”.
رێڤەبەرێ سەنتەرێ ژین دیارکر ژی کو ئەو ھەموو نەخوه‌شێن پەنجەشێرا زارۆیان وەردگرن وەکو پەنجەشێرا خوینێ و گرێیێن لەمفاوی و یا گولچیسکان و پەنجەشێرا ھەستیا و مێشکی ژی دھێنە ڤێرێ و گۆت” ئەم نەشێین بێژین ب دروستی مە چەند نەخوه‌ش ھەنە، چونکى رەنگە ھندەک ژوان بچنە ھەولێرێ یان مووسلێ یان ژدەرڤەی وەلاتی بۆ چارەسەریێ، بەلێ ئەوێن ل دھۆکێ مە تۆمارکرین دگەھنە 218 نەخوه‌شان و ھندەك ژوان ئەڤە دو سالە ل گەل مە و ھندەك ژوان دەرمانێن خوە تمام کرینە ل دۆرێن 118 نەخوه‌شان چارەسەربووینە و ب تنێ بۆ دووڤچوونێ دھێنە لایێ مە و یێن دیتر ژی دبەردەوامن ل سەر چارەسەریێ”.
دیارکر ژى كو گەلەك خەلك وەسا ھزر دکەن کو دبيت هژمارا نه‌خوه‌شێن پەنجەشێرێ یا مشەبووی، بەلێ چو راستی بۆ ڤێ چەندێ نینە و ئەڤ گۆتنە ژ وێ چەندێ دھێت کو نەخوه‌شێن پەنجەشێرێ ل دھۆکێ ھەموو ل جھەکی کۆم بووینە و رەنگە بەری نوکە چوبن جھەکێ دیتر و ددیارنەبن، مە چو ڤەکۆلین ژی نینن دا ئەم بزانین کا کێم یان زێدەبوویە و مە چو داتا ژی بەری نوکە نەبوون.
دەربارەی ئەگەرێن نەخوه‌شیێ ژی دیارکر کو ھەتا نوکە ئەگەرێ ب دروستی نەھاتیە زانین، بەلێ ھندەك فاکتەرێن مەترسیێ ھەنە و دبنە ئه‌گه‌رێ پتر بەربەلاڤبوونا نەخوه‌شیێ، ژوان ژی کەسێن مەنگولی پتر تووشی نەخوه‌شیێ دبن وئەو کەسێن بەرگریا لەشێ وان تێك دچیت پتر تووشی پەنجەشێرێ دبن، ھندەك ژی دبێژن كو جۆره ڤایرۆس یێن ھەین کو پەیوەندی ب لوکیمیایێ ڤە ھەیە، ھندەك ژی دبێژن تیشکا چارەسەریێ دبیتە ئەگەرێ ڤێ نەخوه‌شیێ و دەمێ بۆ نەخوه‌شیەکا دی دھێتە ب کارئینان و ھندەك ژی دبێژن بومبێن ناڤۆکی بووینە ئەگەر و ل بەرێ ژی دگۆتن بورجێن کارەبێ دبنە ئەگەر، لێ ھەتا نوکە چو راستی بۆ دیارنەبوویە.
خوياكر ژى کو پتریا نەخوه‌شێن ل دھۆکێ ھەین ھەتا 15 سالیێ نە و دەربارەی لوکیمیايێ، دو سالیێ ھەتا شەش سالیێدانە، ل بەرێ دگۆتن پەنجەشێرێ چارەسەری نینە، بەلێ چو راستی بۆ ڤان گۆتننا نینە و نەخوه‌ش دۆرێن 70% چارەسەردبن و راستە ده‌مێ چارەسەریێ یێ درێژە، بەلێ مفا ژێ دھێتە دیتن و ب تنێ پێدڤی ب دووڤچوونێ دبن.
نيشاندان