ئەڤرۆ، زنار تۆڤی:

موئەیەد تەیب چاڤدیرێ سیاسی و پەرلەمانتارێ بەرێ یێ پەرلەمانێ عێراقێ د دیدارەکێدا بۆ رۆژناما ئەڤرۆ دیار کر، حوکمەتا عێراقێ نە پێشتر و نەنوکە ژی نەڤیایە و یا رژد ژی نەبوویە،کو ئەو کیشێن د ناڤبەرا ھەولێر و بەغدا دا ھەین چارەسەر بکەت، ھەروەسا ھەر دانوستاندنەکا بھێتە ئەنجامدان و ھەکە لایەنێ سییێ یێ ئامادە بیت، دیسا ھەکە لایەنێ سییێ ئەمریکا یان ئێکەتیا ئورۆپا یان ژی نەتەوێن ئێکگرتی بیت، دێ یا دیار و ئاشکرا بیت، کو ھەرێما کوردستانێ یا ل سەر ھەقیێ دچیت و بەغدایە پێشێلکاریێن دستووری دکەت، لەورا حوکمەتا عێراقێ دڤێت ئەڤێ راستیێ ل خەلکێ عێراقێ و ھەروەسا ل ھەموو جیھانێ ژی ڤەشێریت، دیسا وەکو دیار بەری ریفراندۆمێ ژی بەغدا یا جددی نەبوویە کو دانوستاندنەکا نیەت پاقژ ل گەل ھەرێما کوردستانێ بکەت، ھەروەسا نوکە ژی عێراق نەیا بەرھەڤە دانوستاندنان بکەت، لەورا نوکە ھەرێما کوردستانێ یا ل ھەمبەر گرفتاریەکا مەزن دا، چونکی عێراق بوویە لایەنەک نە رازی دبیت ئەم ژێ جۆدا ببین،کو ھەرێما کوردستانێ سەربەخۆیا خوە راگەھینیت، نە رازی دبیت،کو کێشە ژی بھێنە چارەسەر کرن، لەوما د رەوشەکا ھوسا دا جارەکادی بێھنا شەرەکێ دھێتە مرۆڤی، چونکی ئەڤ نە پێگیریا وان ب دستووری و نە ھەولدان بۆ چارەسەریا کێشەیان وێ دگەھینیت،کو وان نیەتا ھندێ ھەیە کو شەرەکێ دی ل سەر ھەرێما کوردستانێ راگەھینیت،ناڤھاتی گوت ژی:بۆ ڤێ قۆناغێ ب تنێ ئێک رێک ل ھەمبەری کوردان ھەیە،لێ مخابن کوردان ئەو چەندە نە کریە و نە دکەن ژی، ئەو ژی ئێک ھەلویستی و ئێکرێزیا ھەموو پارتێن کوردستانی یە، ھەروەسا پێدڤیە ھەموو لایەنێن کوردستانی پشتگیریا حوکمەتا ھەرێما کوردستانێ بکەن، داکو ھەلویستێ ڤێ حوکمەتێ بھێز بکەڤیت.

موئەیەد تەیب زێدەتر دبێژیت: ژبەرکو مە حوکمەتا ھەرێمێ یا ھەی کو حوکمەتەکا شەرعیە، ئەو حوکمەت نوونەراتیا خەلکێ ھەرێما کوردستانێ ل بەغدا و ل دەرڤە ژی دکەت، لەورا چوونا شاندێ ھەرێمێ بۆ بەغدا پێدڤی ناکەت،ھەموو پارت و لایەنێن کوردی دناڤدا بن، لێ یا پێدڤیە سەرۆکێ حوکمەتێ ل گەل ھەموو ھێز و لایەنێن کوردستانی روونتە خوار و دڤێت وەرەقەیەکا کاری ل گەل خوە ببەتە بەغدا، لەورا پێدڤی ناکەت حزبێن کوردستانی ھەموو پێکڤە ل گەل شاندەکێ ب چنە بەغدا، لێ ھەکە پارتێن کوردستانی ئەڤە کرە مەرج، ل وی دەمی باشترە شاندەک کو نوونەراتیا ھەموو پێکھاتێن کوردستانێ بکەت بچیتە بەغدا، داکو بۆ بەغدا دیار بکەن،کو مە ئێک ھەلویست ھەیە.

ناڤھاتی ئەو چەند ژی خویاکر، ھەکە لایەنێ سییێ بەرھەڤی دانوستاندنێن د ناڤبەرا ھەولێر و بەغدا دا نەبیت، پێدڤی ناکەت شاندێ کوردی بچیتە بەغدا، ھەر چەندە نوکە ئەم د وەلاتەکی دا دژین ناڤێ وی عێراقە، لێ ئەو کێشێن د ناڤبەرا ھەولێر و بەغدا دا چێبووین، پێدڤی ب دیدەڤانەکێ و ناڤبەینکارەکێ ھەنە، ھەر چەندە نەتەوێن ئێکگرتی و ئێکەتیا ئورۆپی و فرنسا و بریتانیا ئامادەیا خوە دیارکریە کو ناڤبەینکاریێ د ناڤبەرا ھەرێمێ و عێراقێ دا بکەن،لێ حوکمەتا عێراقێ ئەڤ چەندە ژی رەتکریە، ھەروەسا وان چەند خالەک کرینە مەرجێن دانوستاندنێ،لەورا ھەکە مە ئەو خالێن وان بجە ئینان، ئێدی ئەم نزانین دێ چینە بەغدا چو دی ژ وان خوازین، ھەروەسا ھەکە مە ھەموو سنۆرێن کوردستانێ رادەستی وان کرن و ھەکە ھەر تشتێ وان ڤیا مە بۆ وان کر، دێ ھندەک تشتێن دی ل سەر مە سەپینن، دیار حوکمەتا عێراقێ داخوازا ھندێ دکەت، ئەم خوە رادەستی ئیرادا وان بکەین، ئەو چو ب رەوا دبینن ئەو مافێ مەیە،چو تشتێن دیتر لێ زێدە نەکەن،لەورا حوکمەتا عێراقێ ئێدی دانپێدانێ ب حوکمەتا ھەرێما کوردستانێ ژی ناکەت،دیسا د سەقایەکێ ھوسادا دانوستاندن ژی دێ ل گەل وان دبێ مفا بن، لەورا یا فەرە ئەم وەک کوردستانی ئەم د دو بەرەیان دا کار بکەین.

ئه‌ڤرۆنيۆز:

دچارچۆڤێ زنجيره‌ كۆمبوونێن خوه‌دا، سه‌رۆك بارزانى دێ دگه‌ل تيما پارتى ديموكراتى كوردستان د حوكمه‌تا هه‌رێما كوردستانێ دا وفراكسيۆنا پارتى ل په‌رله‌مانێ كوردستانێ كۆمبيت.

ئاواز حه‌ميد ئه‌فه‌ندى ئه‌نداما په‌رله‌مانێ كوردستانێ ژليستا پارتى راگه‌هاند، پشتى ده‌مه‌كێ كێم، سه‌رۆك بارزانى دێ ل گه‌ل تيما پارتى د حوكمه‌تێ دا وفراكسيۆنا پارتى ل په‌رله‌مانێ كوردستانێ كۆمبيت.

ئاوازێ زێده‌تر بۆ باسنيۆز دياركر، برياره‌ دكۆمبوونێ دا به‌حس ل قۆناغا نوكه‌ يا كوردستانێ وعيراقێ وده‌ڤه‌رێ بهێته‌ كرن.

ئه‌ڤرۆنيۆز:

رێڤه‌به‌رێ پۆليسێن داقووق راگه‌هاند، شڤێدى مالا رێڤه‌به‌رێ ره‌وشه‌نبيرى يێ وى باژێرى هاته‌ په‌قاندن.

عه‌ميد كاوه‌ عه‌بدولره‌حمان، رێڤه‌به‌رێ پۆليسێن داقووق ديار ل ده‌مژمێر 11 شه‌ڤێ ل مالا جاسم محه‌مه‌د رۆبيتان رێڤه‌به‌رێ ره‌وشه‌نبيرى ل داقووق بۆمبه‌كا ده‌ستكرد هاته‌ دانان ومالا وى هاته‌ په‌قاندن.

زێده‌تربۆ باسنۆز گۆت، زيانێن مادى يێن مه‌زن ب مالا وى رێڤه‌به‌رى كه‌فتينه‌، به‌لێ چو زيانێن گيانى نه‌بوون.

پشتى خيانه‌تا 16 ئوكتوبه‌رێ، ب سه‌دان خانيێن كوردان ل سنورێ كه‌ركووكێ وخورماتوو وداقووق ژلايێ ميليشيێن حه‌شدا شه‌عبى يێن شيعى هاتينه‌ په‌قاندن.

ئه‌ڤرۆنيۆز:

دكۆمبوونه‌كێ دا ل گه‌ل هژماره‌كا به‌رپرسێن سياسى وئيدارى وحزبى ل سنورێ سلێمانيێ وهه‌له‌بجه‌ وراپه‌رين، سه‌رۆك بارزانى راگه‌هاند، گه‌لێ كوردستانێ نه‌شكه‌ستيه‌، به‌لكو خيانه‌ت يا لێ هاتيه‌ كرنوئه‌و ره‌وشا ژ ئه‌گه‌رێ وێ خوه‌سه‌پاندنێ په‌يدابووى، يا ده‌مكى يه‌ وئيرادا گه‌لێ مه‌ هه‌ر دێ سه‌ركه‌ڤيت.

ئه‌ڤرۆ دوشه‌مبى 27/11/2017 سه‌رۆك بارزانى ل گه‌ل جڤاتا سه‌ركردايه‌تيێ وبه‌رپرس وكارگێرێن لق وناوچه‌ وبه‌رپرسێن ئيدارى وئه‌ندامێن په‌رله‌مانى وئه‌ندامێن جڤاتێن پارێزگه‌هان يێن ب سه‌ر پارتى ديموكراتى كوردستان ڤه‌ ل سنورێ سلێمانيێ- هه‌له‌بجه‌ وراپه‌رين كۆمبوو.

دوێ كۆمبوونێ دا، سه‌رۆك بارزانى گۆتاره‌ك پێشكێشى به‌رهه‌ڤبوويان كر وب هوورى به‌حسێ روودانێن پشتى ئه‌نجامدانا ريفراندۆمێ ووان كاودانێن نه‌خوه‌ش كر كو ب سه‌ر كه‌ركووكێ وده‌ڤه‌رێن كوردستانى يێن ده‌رڤه‌ى ئيدارا هه‌رێمێ هاتين وراگه‌هاند كو گه‌لێ كوردستانێ نه‌شكه‌ستيه‌، به‌لكو خيانه‌ت يا لێ هاتيه‌ كرن وئه‌و ره‌وشا ژبه‌ر وێ خوه‌سه‌پاندنێ په‌يدابووى، يا ده‌مكى يه‌ وئيرادا گه‌لێ مه‌ هه‌ر دێ ب سه‌ركه‌ڤيت.

سه‌رۆك بارزانى ئه‌وژى دووپتكر كو مه‌ به‌رى ئه‌نجامدانا ريفراندۆمێ ژى راگه‌هاندبوو كو به‌غدا دڤێت ده‌ستكه‌فتێن روا يێن گه‌لێ كوردستانێ نه‌مينن ومه‌ بزڤرينن هێلا كه‌سك كو هێلا ته‌ماسێ دناڤبه‌را پێشمه‌رگه‌ى وله‌شكرێ به‌عس بوو، له‌وما هه‌كه‌ ريفراندۆم ژى نه‌هاتبا كرن، ئه‌وان ئه‌و به‌رنامه‌يه‌ هه‌بوو وپيلان ژى دژى كه‌ركووكێ هه‌ر هه‌بوو، به‌لێ هه‌كه‌ ئه‌و كارێ ل 16 ئوكته‌به‌رێ نه‌هاتبا كرن، ئه‌و پيلانا دژى كه‌ركووكێ وكوردستانێ سه‌رنه‌دگرت.

سه‌رۆك بارزانى ئه‌و چه‌نده‌ ژى بۆ به‌رهه‌ڤبوويان شرۆڤه‌كر كو ره‌وشا خيانه‌ت وداگيركاريێ وسه‌پاندنا ئه‌مرێ واقع ب زۆرى وچه‌كى، ناسناما كه‌ركووكێ وده‌ڤه‌رێن كوردستانى يێن ده‌رڤه‌ى ئيدارا هه‌رێمێ ناگوهۆريت وئه‌و پرسا نوكه‌ يا ده‌مكى يه‌ وسه‌ركه‌فتن بۆ گه‌لێ كوردستانێ يه‌، مه‌ به‌رده‌وام، نوكه‌ وپێشتر ژى يا گۆتى كو مه‌دڤێت كه‌ركووك وده‌ڤه‌رێن دى ببنه‌ نموونێن پێكڤه‌ژيانا ئاشتيانه‌ يا نه‌ته‌وه‌ وپێكهاتان وسه‌پاندنا ئه‌مرێواقع ب چو شێوه‌كێ ناهێته‌ قه‌بوولكرن.

سه‌رۆك بارزانى راگه‌هاند ژى، ئه‌م پشته‌ڤانيا دانوستاندێن حوكمه‌تا هه‌رێما كوردستانێ وحوكمه‌تا به‌غدا دكه‌ين وهه‌كه‌ مه‌ره‌ما به‌غدا ب راستى چاره‌كرنا كێشان بيت، حوكمه‌تا هه‌رێما كوردستانێ گه‌له‌ك چوويه‌ پێش كو به‌غدا ئێدى مه‌رجێن ئه‌سته‌م نه‌ئێخيته‌ سه‌ر رێيا دانوستاندنێ.

ئه‌ڤرۆنيۆز:

پشتى دو هه‌فتيان ژده‌سته‌سه‌ركرنا وان، ب تۆمه‌تا گه‌نده‌ليێ، دو رێڤه‌به‌رێن حكومى ل باژێرێ هه‌ولێرێ، پشتى دادگه‌هكرنا وان، هاتنه‌ ئازادكرن.

محه‌مه‌د عه‌باس رێڤه‌به‌رێ چاڤدێريا بازرگانى ل پارێزگه‌ها هه‌ولێرێ بۆ رووداو گۆت، پشتى به‌رهه‌ڤبوونا مه‌ ل به‌رده‌م دادگه‌هێ، دادوه‌رى ئه‌ز وعه‌بدولحه‌ميد ريڤه‌به‌رێ سايلۆيا هه‌ولێرێ بێ تاوان هژمارتين.

زێده‌تر گۆت، كێشه‌ ب تمامى هاته‌ داخستن وئه‌م هاتينه‌ ئازادكرن، كو ئه‌و كێشه‌ ژلايێ ده‌سته‌يا ده‌ستپاكيێ ئاراسته‌ى دادگه‌هێ هاتبوو كرن، له‌وما پێدڤيه‌ ئه‌و رۆهنكرنه‌كا پێدڤى ل دۆر ڤێ چه‌ندێ بده‌ن.

حاكم ئه‌حمه‌د ئه‌نوه‌ر، سه‌رۆكێ ده‌سته‌يا ده‌ستپاكيێ ل هه‌رێما كوردستانى دياركر، وه‌كو فه‌رمانگه‌ها قانوونى يا ده‌سته‌يا ده‌ستپاكيێ ودادوه‌رى، مه‌ ڤه‌كۆلين يا هه‌ى ودێ وردبينيێ دكێشێ دا كه‌ين، هه‌كه‌ مه‌ نه‌رازيبوونه‌ك هه‌بوو، دێ تانێ ل بريارا دادگه‌هێ ده‌ين.

سه‌رۆكێ ده‌سته‌يا ده‌ستپاكيێ به‌رى نوكه‌ راگه‌هاندبوو، ل سه‌ر باده‌كه‌كا گه‌نده‌ليێ كو يا برى سال ونيڤايه‌، رۆژا 12/11/2017 هه‌ردو رێڤه‌به‌رێن چاڤدێريا بازرگانى وسايلۆيا هه‌ولێرێ ب فه‌رمانا دادوه‌رى يێن هاتينه‌ ده‌سته‌سه‌ركرن، ل سه‌ر وێ باده‌كا گه‌نده‌ليێ يا په‌يوه‌ندى ب نه‌قانوونيا وه‌رگرتنا گه‌نمى ڤه‌ هه‌ى، پێنج هه‌تا شه‌ش كه‌سان يێن هاتينه‌ ده‌سته‌سه‌ركرن.