ئه‌ڤرۆ نیوز:
ماوێ هه‌یڤه‌كێ یه، به‌غدا ده‌ست ب هووربینیێ د لیستا مووچێن فه‌رمانبه‌رێن ساخله‌میێ و په‌روه‌ردێ كریه، حه‌فتیا بورى ژى لژنه هاتینه زێده‌كرن و بۆ ڤێ یه‌كێ ژى فورمه‌كا پێزانینان ل سه‌ر فه‌رمانبه‌رێن هه‌رێما كوردستانێ به‌لاڤ كرینه ب مه‌ره‌ما داگرتنا وێ.
ل دووڤ پێزانینێن ئه‌ڤرۆ نیوز، پشتى داگرتنا ڤێ فورمێ دێ جاره‌كادى پێشكێشى لژنا هویربینیێ یا به‌غدا هێنه كرن و پروسا داگرتنا ڤێ فورمێ ل پرانیا وه‌زاره‌تان ده‌ست پێ كریه.
ئەڤرۆ نیوز ، زنار :
دوهی ئه‌مریكا ئاشكرا كر،کو دێ فرۆكێن f 35 ل جیهانێ بەلاڤە کەت،کو شیانێن هه‌لگرتن و ب كارخستنا چه‌كێ ئه‌تۆمى هه‌یه.
دوهی به‌لگه‌یه‌كێ ئه‌مریكا دەربارهى باوه‌ریا ئه‌مریكا ب چه‌كێ ئه‌تۆمی ل رۆژناما واشنتۆن پۆست هاتیە بەلاڤکرن،د وی به‌لگه‌یدا هاتیه،د دەمەکێ دا کو ئه‌مریكا چه‌كێ خوە یێ ئه‌تۆمی كێم دکەت،بەلێ رووسیا و چین ب ئاراسته‌یێ پێچه‌وانه دچن و جەبلخانەیێن خوە یێن ئه‌تۆمى زێدە د‌كه‌ن و جۆرێن نوو دروست د‌كه‌ن،کو شیانێن وان یێن ئه‌تۆمى یێن ستراتیجی و پلاندادانێ زێدەتر دکەت.
هه‌روەسا دیارکریە،کو ئه‌مریكا دێ جۆره فرۆكه‌کێ ل جیهانێ بەلاڤ کەت،کو دشێت چه‌كێ ئاسایى و چه‌كێ ئه‌تۆمى هەردویان ب كار بینیت، ئه‌و جۆرێ فرۆكان یێ ئه‌مریكا بەحس ژێ دکەت، ب فڕۆكێن f 35 دهێنە ب ناڤکرن كو شیانێن ب كارئینانا رۆكێتێن ئه‌تۆمى هه‌یه و د هه‌مان دەمدا چه‌كێ ئاسایى ژی ب كار دئینیت.
وه‌زاره‌تا بەرەڤانیا ئه‌مریكا سه‌رنجا خوە دەربارهى وی به‌لگه‌یی دایه و گوتیە، ئه‌ڤ به‌لگه‌نامه‌یه ب چه‌ندین شێوان هاتیە دارێژتن و دڤێت سه‌رۆك دۆنالد تره‌مپ و جیمس ماتیس وه‌زیرێ به‌رەڤانیا ئه‌مریكا ره‌زامه‌ندیێ ل سه‌ر دوماهی شێوێ وێ به‌لگه‌نامێ بكه‌ن.
ئه‌ڤرۆنيوز:
جێگرێ سه‌رۆكێ كۆمسيۆنا بلند يا هه‌لبژارتنان ل عيراقێ هوشدارى دا لايه‌نێن سياسى ل دۆر پێشكێشكرنا ناڤێن به‌ربژاران ودووماهى ژڤان ژى ئاشكرا دكه‌ت.
رزگار حاجى حه‌مه، جێگرێ سه‌رۆكێ كۆمسيۆنا بلند يا هه‌لبژارتنان ل عيراقێ دداخۆيانيه‌كا رۆژنامه‌ڤانيدا، راگه‌هاند” هه‌تا نوكه چو لايه‌نێن سياسى ليستا به‌ربژارێن خوه بۆ هه‌لبژارتنێن داهاتى يێن جڤاتا نوونه‌رێن عيراقێ پێشكێش نه‌كريه”.
ل دۆر دووماهى ژڤان، گۆت” رۆژا 10/2/2018 دووماهى ژڤانه بۆ پێشكێشكرنا ليستێن ناڤێن به‌ربژاران”.
برياره ل رۆژا 12/5/2018 هه‌لبژارتنێن جڤاتا نوونه‌رێن عيراقێ بهێنه ئه‌نجامدان.
ئه‌ڤرۆنيوز:
په‌يڤدارێ هێزێن پاسدارێن ئيرانێ، عه‌ميد ره‌مه‌زان شه‌ريف، راگه‌هاند كو ئيرانێ پێزانين يێن هه‌ين ل دۆر هاندانا مالباتا سه‌رۆكێ عيراقێ يێ به‌رێ سه‌دام حسێن بۆ خوه‌پيشاندان وكارێن توندوتيژيێ ئه‌وێن ل ڤێ دووماهيێ ل ئيرانێ په‌يدابووين.
په‌يڤدارێ پاسدارێن ئيرانێ دداخۆيانيه‌كێ دا بۆ ئاژانسا (فارس) يا فه‌رمى يا ئيرانى بۆ ده‌نگوباسان، گۆت” رێكخراوا موجاهدين خه‌لق وئال سعود وپشته‌ڤانێن سيسته‌مێ شاهاتيێ وحزبا به‌عس يا عيراقى ده‌ست د خوه‌پيشاندانێن ڤێ دووماهيێ ل ئيرانێ دا هه‌بوو”.
گۆت ژى” بێگوما حزبا به‌عس وپاشمايێن مالباتا سه‌دامى هه‌ر چ ژده‌ستێ وان هاتى دژى گه‌لێ ئيرانێ، يا كرى وپێزانێن يێن هه‌ين كو مالباتا سه‌دامێ ده‌ست دخوه‌پيشاندانێن ئيرانێ دا هه‌بوو وئه‌ڤ پێزانينه به‌لگه‌نه كو مالباتا سه‌دامێ بزاڤكريه زيانێ بگه‌هينيه كۆمارا ئيسلامى يا ئيرانێ برێيا پشته‌ڤانيا گرۆپێن دژى كۆمارا ئيسلامى”.
ئه‌ڤرۆنيوز:
سه‌رۆك وه‌زيرێن عيراقێ، حه‌يده‌ر عه‌بادى، راگه‌هاند، ئه‌م يێن ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ وقوباد تالبانى جێگرێ وى ل سه‌ر نه‌خشه رێيه‌كێ يێن رێككه‌فتين.
حه‌يده‌ر عه‌بادى دديداره‌كێ دا ل گه‌ل رۆژناما (اليوم السابع) يا مسرى گۆت” پشكه‌كا كێشا كوردى يا ديرۆكى يه وئه‌م رێزێ ل بۆچونێن كوردان دگرين، كێشا كوردى شه‌رێ هه‌موو حوكمه‌تێن ئێك ل دووڤ ئێكێ يێن عيراقێ بوو، هه‌روه‌سا كێشه‌كا نه‌ته‌وى ژى يا هه‌ى”.
عه‌بادى گۆت ژى” سه‌ره‌راى قه‌يرانا په‌ترۆلێ ومووچێ فه‌رمانبه‌رێن هه‌رێمێ، نوكه ئه‌م يێ كار ل سه‌ر چاره‌كرنا هه‌موو كێشان دكه‌ين”.
دياركر” ئه‌م ره‌خنێ ل نه‌بوونا شه‌فافيه‌تێ ولێپرسينێ ل هه‌رێما كوردستانێ دكه‌ين وب رێڤه‌به‌رنا كاروبارێن ل وێرێ ره‌ت دكه‌ين، چونكى ب شێوێ حزبى دهێنه ب رێڤه‌برن”.
ل دۆر ناڤه‌رۆكا كۆمبوونا وى ل گه‌ل شاندێ هه‌رێما كوردستانێ ب سه‌رۆكاتيا نێچيرڤان بارزانى ل دافۆس، عه‌بادى گۆت” ئه‌م ل سه‌ر نه‌خشه رێيه‌كێ رێككه‌فتين ودخوازم ب شێوه‌كێ رێكوپێك بهێته بجهئينان”.
ئاماژه دا” ئه‌ز يێ رژدم ل سه‌ر چاره‌كرنا هه‌موو كێشان وسه‌پاندنا ده‌ستهه‌لاتا فيدرالى ل سه‌ر هه‌رێمێ دچارچۆڤێ پێگيريا مه ب دستوورى وقانوونێ”.
ئه‌ڤرۆنيوز:
وه‌زيرێ خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، ل به‌ر رۆناهيا راسپارده وبريارا جڤاتا وه‌زيرێن هه‌رێمێ، دده‌مێ بۆرى دا ژلايێ لژنه‌كا تايبه‌ت، رێنمايێن تايبه‌ت ب دانا ناسناڤێ زانستى ب امۆستايێن په‌روه‌ردێ هاته به‌رهه‌ڤكرن ول رێكه‌فتى 2/1/2018 رێنما هاتينه په‌سه‌ندكرن وئاراسته‌ى جڤاتا شۆرا هاتيه كرن بۆ وێ چه‌ندێ دگۆڤارا وه‌قائيع كوردستان دا بهێته به‌لاڤكرن.
يوسف گۆران وه‌زيرێ خواندنا بلند دپێشوازيا شانده‌كێ ئێكه‌تيا مامۆستايێن كوردستانێ، گۆت ژى” هه‌ر ده‌مێ دگوڤارا وه‌قائيع كوردستان دا هاته به‌لاڤكرن، وى ده‌مى مامۆستايێن هه‌لگرێن ماسته‌ر ودكتۆرايێ ل وه‌زاره‌تا په‌روه‌ردێ دشێن ل دووڤ پيڤه‌رێن وه‌زاره‌تا خواندنا بلند، مامه‌لێن خوه پێشكێشى زانكۆيان بكه‌ن بۆ وه‌رگرتنا ناسناڤێ زانستى”.
ئه‌ڤرۆنيوز:
رۆژنامه‌كا بريتانى به‌لاڤكر كو راهێنه‌رێ به‌رێ يێ يانا به‌رشه‌لونا يا ئينگليزى يێ به‌ربژاره بۆ وه‌رگرتنا ئه‌ركێ راهێنه‌ريا يانه‌كا ئينگليزى يا ناڤدار و بهيز.
رۆژناما (ميرۆر) يا بريتانى به‌لاڤكر”راهێنه‌رێ ئيسپانى لويس ئه‌نريكى يێ به‌ربژاره بۆ وه‌رگرتنا ئه‌ركێ راهێنه‌ريا يانا شيلسى يا ئينگليزى ل شوونا راهێنه‌رێ ئيتالى ئه‌نتونيۆ كۆنتى”.
دياركر” دبيت ئه‌نريكى ببيته راهێنه‌رێ شيلسى به‌رى ياريا قۆناغا 16 ژ خۆلا قاره‌مانێن ئورۆپا كو دێ شيلسى دوێ قۆناغێ دا ل گه‌ل به‌رشله‌ونا ياريێ كه‌ت، كو ب ڤێ چه‌ندێ دبيت ياريا ئێكێ يا ئه‌نريكى دژى يانا خوه يێ به‌رێ به‌رشه‌لونا بيت”.
ئه‌ڤرۆنيوز:
پشتى هه‌ر سێ وه‌زاره‌تێن ساخله‌ميێ وپه‌روه‌ردێ وخواندنا بلند، برياره لژنا هووربينيێ يا به‌غدا ده‌ست ب كارێ هووربينيێ د مووچێن وه‌زاره‌ته‌كا دى يا هه‌رێما كوردستانێ دا بكه‌ت.
خالس ئه‌حمه‌د، ريڤه‌به‌رێ گشتيێ ديوانا وه‌زاره‌تا چاندنێ وژێده‌رێن ئاڤێ راگه‌هاند” برياره سوباهى ئێكشه‌مبى 4/2/2018، لژنه‌كا هووربينيێ يا حوكمه‌تا به‌غدا سه‌ره‌دانا وه‌زاره‌تا مه بكه‌ت بۆ هووربينيكرنێ د ليستا مووچه‌خۆرێن وه‌زاره‌تێ دا”.
خالسى دداخۆيانيه‌كا رۆژنامه‌ڤانيدا زێده‌تر گۆت” لژنا به‌غدا دووپاتى ل سه‌ر به‌رهه‌ڤكرنا فۆرما تايبه‌ت ب ميلاكات وناڤێن فه‌رمانبه‌رێن هه‌ر فه‌رمانگه‌هه‌كا وه‌زاره‌تێ دكه‌ت، هه‌روه‌سا فۆرمه‌كا تايبه‌تا بودجه ومووچه وشايستێن دارايى يێن فه‌رمانبه‌ران دێ هێته داگرتن”.
ئه‌ڤرۆنيوز:
وه‌زاره‌تا ساخله‌ميێ راگه‌هاند، په‌نجه‌شێر ئه‌و نه‌خوه‌شى يه كو ب بگوژا سه‌ره‌كى يا مرۆڤى دهێته نياسين،دياركر ژى كوسالانه زێده‌تر ژ 8 مليۆن كه‌سان دكوژيت وزێده‌تر ژ 14 مليۆن كه‌سان ژى ل جيهانێ ڤه‌دگريت.
وه‌زاره‌تا ساخله‌ميێ دبه‌ياننامه‌كێ دا كو ئه‌ڤرۆ شه‌مبيێ 3/2/2018 ده‌ركرى ب هه‌لكه‌فتا رۆژا جيهانى يا په‌نجه‌شێرێ كو سادكه‌ڤيته سوباهى 4/2/2018 راگه‌هاند” ل هه‌رێما كوردستانێ رێژا نه‌خوه‌شيا په‌نجه‌شێرێ هه‌تا نوكه دبن ستانده‌رێ پێشبينيێ كريێ سالانه‌يه بۆ نه‌خوه‌شيێ ب جۆره‌كى ل وان وه‌لاتێن رێژا په‌نجه‌شێرێ يا بلند، سالانه زێده‌تر ژ 300 كه‌س ژ هه‌ر 100 هزار كه‌سان تووشى په‌نجه‌شێرێ دبن، دده‌مه‌كى دا ل وان وه‌لاتێن رێژا په‌نجه‌شێرێ يا نزمه، سالانه كێمتر ژ 100 كه‌سان تووشى په‌نجه‌شێرێ دبن”.
دياركر ژى” ل سالا 2017 ل هه‌رێما كوردستانێ، 92 كه‌س ژ هه‌ر 100 هزار كه‌سان تووشى په‌نجه‌شێرێ بووينه كو سه‌رجه‌مێ وان نه‌خوه‌شێن هه‌لگرێ وێ نه‌خوه‌شيێ ل هه‌رێمێ دوێ سالێ دا چار هزار و808 كه‌س بوون”.
وه‌زاره‌تا ساخله‌ميێ ل هه‌رێمێ ئاماژه دا كو ئه‌گه‌رێ زێده‌بوونا په‌نجه‌شێرێ ل جيهانێ يا گرێدايه ب خوارنێن كحولى وقه‌له‌ويێ وكێم لڤينێ ووه‌رزش نه‌كرنێ، ديسا خوارنێن داگرتى وبله‌ز، زێده‌بارى كێم خورانا كه‌سكاتيێ وفێقى.
ئه‌ڤرۆنيوز:
جۆنوى سوليڤان جێگرێ وه‌زيرێ ده‌رڤه‌يێ ئه‌مريكا، دسه‌ره‌دانه‌كێ دا بۆ به‌غدا وهه‌ولێرێ وكۆمبوونا وى ل گه‌ل به‌رپرسێن بلند يێن هه‌ردو حوكمه‌تێن هه‌رێما كوردستانێ وعيراقێ، داخواز ژ هه‌ردولا كريه ل سه‌ر چاره‌كرنا كێشێن دناڤبه‌را خوه‌دا رێك بكه‌ڤن.
سوليڤان، دكۆنگره‌كێ رۆژنامه‌ڤانيدا راگه‌هاند” مه كۆمبوونه‌كا به‌رهه‌مدار ل گه‌ل حه‌يده‌ر عه‌بادى سه‌رۆك وه‌زيرێن عيراقێ ئه‌نجامدا وتێدا مه په‌يوه‌نديێن هه‌ردو وه‌لاتان ژروويێ بازرگانى وپێشڤه‌برنا ئابوورێ عيراقێ به‌حسكر، هه‌روه‌سا ل كۆمبوونا ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ مه به‌حسێ په‌يوه‌نديێن هه‌ردو حوكمه‌تێن هه‌رێمێ وناڤه‌ندى كر”.
ل دۆر چاوانيا هنارتنا په‌ترۆلا كه‌ركووكێ وپرسێن دى يێن دناڤبه‌را حوكمه‌تا هه‌رێمێ بوعيراقێ، جێگرێ وه‌زيرێ ده‌رڤه‌يێ ئه‌مريكا گۆت” دچارچۆڤێ دانوستاندنێن مه‌دا ل گه‌ل عه‌بادى ونێچيرڤان بارزانى، مه دوپاتى ل سه‌ر چاره‌كرنا كێشێن دناڤبه‌را وان دا كر به‌رى ئه‌نجامدا هه‌لبژارتنێن عيراقێ ل 12 گۆلانا 2018 وڤه‌كرنا فرۆكخانێن هه‌رێما كوردستانێ وهنارتنا مووچێ مووچه‌خۆرێن هه‌رێما كوردستانێ”.
سه‌باره‌ت پرسا په‌ترۆلێ، گۆت” ل دۆر وێ چه‌ندێ بزاڤ يا هه‌ى بۆ دروستكرنا باوه‌ريێ دناڤبه‌را هه‌ولێرێ وبه‌غدا، نێچيرڤان بارزانى سه‌رۆك وه‌زيرێن هه‌رێما كوردستانێ، سه‌ره‌دانا به‌غدا يا كرى وپێشبينيێ دكه‌ين دانوستاندنێن دناڤبه‌را هه‌ولێرێ وبه‌غدا دبه‌رده‌وام بن”.
ل دۆر هه‌بوونا ميليشيێن شيعى ل عيراقێ، جێگرێ وه‌زيرێ ده‌رڤه‌يێ ئه‌مريكى گۆت”پێشتر عه‌بادى راگه‌هاندبوو كو داعش ل عيراقێ نه‌مايه، به‌لێ ئه‌ڤه وێ ناگه‌هينيت كو داعش كێشان دروست ناكه‌ت، پشمايێن داعشێ كيشه‌كا به‌رده‌وامن وئه‌م وان شاشيان دووباره ناكه‌ينه‌ڤه ده‌مێ مه هێزێن ئه‌مريكى ژ عيراقێ ڤه‌كيشاين، پاشى مه ديت كو داعش دده‌مه‌كێ گه‌له‌ك كێم دا دروست بوو كو پاشمايێن رێكخراوا قاعيده يا تيرۆرستى بوون”.
دياركر ژى”مه بابه‌تێ حه‌شدا شه‌عبى ل گه‌ل حوكمه‌تا عيراقێ به‌حسكر، پشكه‌ك ژ بزاڤێن سه‌رۆك وه‌زيرێن عيراقێ بۆ رێكخستنا هێزێن ئه‌منى يه وكار بۆ وێ چه‌ندێ ژى دێ هێته كرن كو هێزێن حه‌شدا شه‌عبى بۆ بن كونترۆلا حوكمه‌تا عيراقێ بزڤرينيت”.
سه‌باره‌ت ده‌ستهه‌لاتا ئيرانێ ل عيراقێ، سوليڤانى راگه‌هاند” مه‌ترسى ل دۆر كاريگه‌ريێن ئيرانێ ل عيراقێ ول ده‌ڤه‌رێ ب شێوه‌كێ گشتى يێن هه‌ين وئه‌م ددلته‌نگين ژ بزاڤێن ئيرانێ بۆ ده‌ستێوه‌ردانێ دسه‌روه‌ريا عيراقێ دا”.
نيشاندان