ئەڤرۆ نیوز:
دۆنالد ترەمپ، سەرۆکێ ویلایەتێن ئێگرتى یێن ئەمریکا راگەهاند، چ جاران ئه‌نجامێن هەلبژارتنان قه‌بوول ناکه‌ین.
د چاڤپێکەفتنه‌كێ دا ل گەل کەنالێ فۆکس نیوز، ترەمپ گۆتیه، دێ هەموو شیانێن خوه ب كار ئینم، داكو ب سەلمینم من شکه‌ستن نەئینایە، دیسان دڤێت دادوەر بڕیارێ ل سەر وان دۆسییان بدەن و دڤێت دادگه‌ها بالند بڕیارێن مه‌زن بده‌ت ل سەر بنەمایێ هەموو تشتان.
ناڤهاتى گۆتیه ژى: هوون نه‌شێن بۆچوونێن من ب گۆهۆرن، د ماوێ شەش هه‌یڤێن بهین دا ئه‌ز بۆچوونێن خوه ناگۆهۆرم چونکى سه‌ختەکاریه‌كا گه‌له‌ك مه‌زن هاتییه كرن.
ترەمپى هێرش کریە سەر میدیایان و گۆتیه، ئەو دوژمنێن خەلكێنه.
ئەڤه د ده‌مه‌كێ دایه كو ترەمپى د چەند دۆسییان دا ده‌ربارەی هەلبژارتنان ل دادگه‌هان شكه‌ستن ئینایه.
ئەڤرۆ نیوز:
بۆ جارا دویێ شاندەکێ بلند یێ بەرپرسێن ئۆزبەکستانێ سەرەدا رۆژئاڤایێ کوردستانێ دکەن و پشتی ھەڤپەیڤینان، ھژمارەکا دیل و ھەڤژین و زارۆیێن چەکدارێن داعش یێن ب ڕەگەز ئۆزبەکی ژ ئیدارا خۆسەر . وه‌رگرتن.
ئاژانسا میهر دیار کریە، شانده‌كێ بلند یێ وەلاتێ ئۆزبەکستانێ سەرەدانا ھەردو کەمپێن ھۆل و رۆژ کریە ل رۆژئاڤایێ کوردستانێ، داکو وان ھەموو ئۆزبەکیان ب بینن یێن کو بەری نوكه چەکدارێن داعش بوون و نوكه دیلێن داعشێ یان ھەڤژینێن داعشان بوون و نوكه ل وان کەمپانه.
ئەڤە جارا دویێ یه، كو ھژمارەک ژ وەلاتیێن ئۆزبەکستانی یێن سەر ب داعشێ ڤە بوون بھێنە ڤەگەراندن بۆ وەلاتێن وان.
ئاژانسا میھر ئەو ژى گۆتیه، کو پڕانیا وان کەسان ژن و زارۆکن و د دەمێ ٣ ساڵێن بوری دا ل کەمپێن رۆژئاڤایێ کوردستانێ دا ژیاینە.
ل سالا بوری ئۆزبەکستانێ ٢٢٠ وەلاتیێن خوه ژ رۆژئاڤایێ کوردستانێ وەرگرتینە و ڤەگەڕاندینە.
ئەڤرۆ نیوز:
هەڤسەرۆکێ ئێکەتیا نشتیمانیا کوردستانێ د دیدارەکێ دا ل گەل هژمارەکا رۆژنامەڤانێن کوردستانێ دیار كر: وى باوەرى ب دو ئیدارەیێ نینە و رێكێ ناده‌ن چ به‌رنامێن وه‌سان ژى سه‌ربگرن.
باڤل تالەبانى ئاشكرا كر ژى: پشتى هەلبژارتنێن ئیراقێ دێ پارێزگارەکێ کورد بۆ وێ كه‌ركۆكێ هێتە دانان، هه‌ر چه‌نده نوكه حوکمەکێ سەربازى ل وێ پارێزگه‌هێ هەیە، دیسان ب دوور دبینم كو تورکمانەک ببیتە پارێزگارێ کەرکۆکێ.
ناڤهاتى گۆت ژى: تیما ئێكه‌تیێ پشکەکە ژ حکومەتێ و گازندەیا وان ژ هەموو حکومەتێ هه‌یە، هه‌روه‌سا نوكه چارەسه‌ریا قەیرانا دارایى ل بەغدایە و ئەو دژى وێ چه‌ندێ نە كو مووچێن هەرێمێ بچنە سەر بەغدا ڤە.
باڤل تاله‌بانى، هەڤسەرۆکێ ئێکەتیێ دیار كر ژى: دڤێت ئه‌م چاکسازیا راستەقینە بکەین و پێدڤییه کورد ب ئێک دەنگى شەرى بۆ چارەسه‌رکرنا ڤێ رەوشا نوكه بکەن.
ئەڤرۆ نیوز:
پارزینگەهەكا نەفتێ یا پارێزگەها سەلاحەدین هاتە موشەكباران كرن و داعشێ بەرپرسیاریا خوه ژ وێ هێرشێ راگه‌هاند.
تیرۆرستێن داعشێ بەرپرسیاریا خوه ژ وێ هێرشێ دیار كر، یا كو ب موشەكان ل سەر پارزینگەها سینیە ل قەزا بێجی ل پارێزگەها سەلاحەددین هاتییە كرن.
ژێدەرەكێ ئێمناهیێ ل وێ پارێزگەهێ دیار كریه: د وێ هێرشێ دا ئاگر بەربوو پشكەكا پارزینگەهێ و گەلەك زیانێن مادی هەبوون، لێ چ زیانێن گیانی نەبوون.
ئەڤرۆ نیوز:
ب ئامادەبوونا وەزیرێن پەیوەندیدار، پەرلەمانێ كوردستانێ دێ كۆچكرنا گەنجان بۆ دەرڤه‌ى وه‌لاتى گوتۆبێژ كه‌ت و دێ خواندنا ئێكێ بۆ دو پێشنیارێن قانوونى كه‌ت.
ئەڤرۆ دوشەمبی، 30/11/2020 پەرلەمانێ كوردستانێ دێ كۆم بیت، لدووڤ بەرنامێ کارى، کۆمبوونا ئەڤرۆ یا پەرلەمانی دێ خواندنا ئێكێ بۆ پێشنیازا قانوونا پەروەردێ و خواندنێ ل هەرێما کوردستانێ و پێشنیازا قانوونا راستڤه‌كرنا ئێكێ یا زانکۆیێن تایبەت هێته كرن.
هەروەسا دێ خواندنێ و گوتۆبێژێ ل سه‌ر هەردو راپۆرتێن لژنا پەیوەندیان و رەڤەندا کوردستانێ و لژنا ره‌وشه‌نبیری و جڤاكێ مەدەنی و وەرزش و لاوان، سەبارەت ب کۆچكرنا گەنجان بۆ دەرڤەی وه‌لاتى ب ئامادەبوونا وەزیرێن پەیوەندیدار ل حکومەتا هەرێما کوردستانێ كه‌ت.
ئەڤرۆ نیوز:
جۆ بایدن، سەرۆكێ هەلبژارتیێ ئەمریكا دیار كر: كو پێ وی یێ راستێ تووشی شكەستنێ بوویە و پێدڤییە پێلاڤەكا نۆشداری بكەتە پێ خوه، هەتا ساخ دبیت.
نۆشدارێن بایدنى دیار كرینه، دەمێ بایدنى یاری ل گەل سەیێ خوه دكرن پیێ وی وەرگەڕیایە و تووشی شكەستنێ بوویە، ژ بەر هندێ بۆ نەخۆشخانێ هاتییە ڤەگوهاستن.
ل ده‌ستپێكێ نۆشدارێ وی یێ تایبەت راگەهاندبوو، كو پێ وى خلیایە، لێ پشتى پشكنین بۆ هاتینه كرن دیار بوویه كو پیێ وی تووشی شكەستنێ بوویە و پێدڤییە چەند حەفتییان پێلاڤەكا نۆشداری ب كار بینیت.
دهێتە زانین، بایدن د ژیێ 78 سالیێ دایە و بریارە رۆژا 20 هەیڤا كانوونا دویێ پۆستێ سەرۆكاتیا ئەمریكا وەربگریت.
ئەڤرۆ نیوز:
هه‌ڤپەیمانیا ناتۆ پلانه‌كا تایبەت بۆ چاکسازیێ دانایە و تێدا گوهۆرین ل سه‌ر سیستەمێ ڤیتۆ دا هاتیه کرن.
ل رۆژا 25 چریا دویێ راپۆرتا تایبەت ب چاکسازیێ رادەستی 30 وه‌لاتێن ئەندامێن ناتۆ دا هاتیه کرن و تێدا چەند خاله‌ك بۆ چاکسازیێ هاتینه پێشنیار کرن، وەک زێده‌کردنا کۆمبوونا ساڵانە یا وەزیرێن دەرڤه یێن ئەندامێن ناتۆ و هەروەسا چڕکرنا کۆمبوونێن وەزیرێن نافخۆیی یێن وه‌لاتێن ئەندامێن ناتۆ بۆگوتۆبیژكرنا پرسا گرووپێن تیرۆرستى.
ئه‌و راپۆرتە ژ ئالیێ لژنا شارەزایێن دناڤا ناتۆیێ دا هاتینه ئاماده كرن كو ژ 140 ئەندامێن وەزیر و دپلوماتکارێن به‌رێ پێکهاتییە.
ل سەر پێشنیارا فرەنسا و ب پشته‌ڤانیا ئەلمانیا مافێ ڤیتۆ هاتیه دان بۆ هەموو ئەندامێن ناتۆ، ئه‌ڤ بابه‌ته خستیه ناڤ به‌رنامێ چاکسازیێ.
د پرۆژە پلانا چاکسازییا تایبەت ب ڤیتۆیێ دا هاتیه پێشنیا كرن، كو بڕیارێن سیاسی یێن هەستیار لدووڤ سیستەمێ زۆرینە بهێنه پەسه‌ند کرن و تێدا مافێ ڤیتۆ نه‌هێته ب كارئینان.
ئەڤرۆ نیوز:
وەزارەتا دارایى و ئابوورى یا حکومەتا هەرێما کوردستانێ دێ مولکەکێ حکومەتێ ل سەر جادا ٦٠ مه‌ترى یا هه‌ولێرێ بۆ مووچه‌یان فرۆشیت.
ئه‌ڤرۆ ئێكشه‌مبى، ژێده‌ره‌كێ ژ وەزارەتا دارایى و ئابوورى یا حکومەتا هەرێما کوردستانێ راگەهاند: بریارە ل رۆژا ئێكشه‌مبىیا بهێت جهێ یانا (ئاوێزه‌یا خێزانى) کو جهەکێ حکومىیە و د کەڤیتە سەر جادا ٦٠ مه‌ترى یا هه‌ولێرێ و رووبەرێ وێ ٧ هزار و ٨٠٠ مه‌ترێن دوجانه، د سەر ئێک زێدەکرنەکێ دا بهێتە فرۆشتن.
لدووڤ وى ژێدەرى ژى ئەڤ بزاڤا حکومەتێ بۆ دابینکرنا پشكه‌كا مووچەیێ فەرمانبەرێن هەرێما کوردستانی یە.
ئەڤرۆ نیوز:
د چەند رۆژێن بهێن دا بریتانیا دێ ئێكه‌م ڤاکسینێ دژى کۆرۆنایێ پەسه‌ند كه‌ت و چەند ده‌مژمێران پشتى پەسه‌ند کرنێ دێ دەست ب دابەشکرنێ كه‌ت.
ژێده‌ره‌كێ بۆ فاینانشل تایمز گۆتیه، هه‌تا 7 کانوونا ئیكێ یا ئه‌ڤ ساله کوالێتیا کۆنترۆلا دەرمانێن بریتانیا، یا ناسیار ب MHRA ، دێ ڤاکسینێن بایۆنتێک و فایزەر پەسەند كه‌ت، نوكه ل ژێر هووربینیێ دایە بۆ هندێ بهێته زانین هه‌تا چەندە یا ب سەلامەتە.
د هه‌مان ده‌مدا نەخۆشخانێن بریتانیا گۆتیه وان خوه ئامادە بکەن، چونکى د ده‌مێ 10 رۆژان دا ڤاکسین دێ گه‌هیت وان، بریتانیا 40 ملیۆن ڤاکسین ژ دو كۆمپانیان کڕینە كو ب هه‌ڤبەشی کار دکەن، ئه‌و ڤاكسینه دێ دو جاران ب هه‌ر كه‌سه‌كێ هێته دان، ئه‌و ڤاكسینه دێ تێرا 20 ملیۆن كه‌سان ل بریتانیا كه‌ت.
ڤاکسینێن فایزەر/ بایۆنتێک 95٪ کاریگەر خوه هه‌یه، بەلێ هێشتا هنده‌ک ئاستەنگێن تەکنیکی هەنه، بۆ نموونە دڤێت د پلا 70 ل ژێر سفرا سەدی دا بهێته ڤه‌گۆهاستن و دڤێت د ماوێ 5 رۆژان دا بهێته ب كارئینان.
ل بریتانیا پتر ژ ملیۆنه‌ک و نیڤان تووشبوویێن کۆرۆنایێ هەنە، نێزیکی 60 هزار تووشبوویان ژى پێ مرینه.
نيشاندان