ئه‌ڤرۆ نیوز:
ئه‌ڤرۆ حه‌یده‌ر عه‌بادى سه‌رۆك وه‌زیرێن عيراقێ ، راگه‌هاند مووچێ فه‌رمانبه‌رێن هه‌رێمێ دێ مه‌زێخین، مه لژنه یێن راسپاردى بۆ ڤه‌كولینێ و هویربینیێ ل مووچێ فه‌رمانبه‌رێن هه‌رێمێ و گۆت” ل ناڤ هه‌رێما كوردستانێ ره‌خنه یێن هه‌ین و گوتنه مه ب ڤى شێوه‌ى مووچان به‌لاڤ نه‌كه‌ن ژبه‌ر كو پاره بۆ لایه‌نگرێن هنده‌ك لایه‌نان دچیت و وه‌لاتیێ ئاسایى پاره ناگه‌هتێ ، له‌وا پێدڤى ب هویربینیێ هه‌یه”.
ئه‌ڤرۆنيۆز:
سه‌رۆك وه‌زيرێن عيراقێ دچارچۆڤێ كۆنگرێ رۆژنامه‌ڤانى يا حه‌فتيانه دا، دژايه‌تيا خوه وحوكمه‌تا عيراقێ بۆ برياره‌كا سه‌رۆكێ ئه‌مريكى دياركر.
حه‌يده‌ر عه‌بادى، سه‌رۆك وه‌زيرێن عيراقێ دكۆنگرێ رۆژنامه‌ڤانى يا حه‌فتيانه دا، ئه‌ڤرۆ ل به‌غدا، گۆت، ئه‌م دژى وێ بريارێ نه كو سه‌رۆكێ ئه‌مريكى دونالد ترامپى ل به‌ره ده‌ربكه‌ت بۆ ڤه‌گۆهاستنا باليۆزخانا ئه‌مريكى ژ ته‌ل ئه‌بيب بۆ قودسێ.
عه‌بادى هوشدارى ژ ده‌ركرنا برياره‌كا ب وى شێوه‌ى دا، هه‌كه هات وبهێته بجهئينان.
به‌رپرسێن ئه‌مريكا به‌رى نوكه به‌لاڤكربوو كو ل ڤان نيزيكان دێ ترامب وێ سۆزا خوه بجهئينيت ئه‌وا ل ده‌مێ هه‌وا هه‌لبژارتنێن سه‌رۆكاتيا ئه‌مريكا دابوو ئه‌وژى باليۆزخانا ئه‌مريكا ل ئيسرائيلێ ژ ته‌ل ئه‌بيب بۆ قودسێ ب ڤه‌گۆهيزيت.
ئه‌ڤرۆ نیوز:
پشتى كومبوونا جڤاتا وه‌زیران ب دووماهى هاتى، ئه‌ڤرۆ ل ده‌مێ گرێدانا كۆنگرێ رۆژنامه‌ڤانى یێ نێچیرڤان بارزانى سه‌رۆك وه‌زیرێن هه‌رێمێ، كاره‌با گشتى دهێته برین و گوت: باشبوو كاره‌ب چووى، دا وه‌لاتى بزانین كاره‌ب ل هه‌مى جهان دهێنه برین.
پشتى هاتنا وه‌رزێ زڤستانێ، ده‌مژمێرێن دابینكرنا كاره‌با گشتى گه‌له‌ك كێم بووینه و ژبه‌ر قه‌یرانا دارایى ، حوكمه‌تا هه‌رێمێ نه‌شێت وه‌كو پێدڤى سوته‌مه‌نیێ بۆ ویستگه‌هێن كاره‌بێ دابین بكه‌ت بۆ زێده‌كرنا به‌رهه‌مێ كاره‌بێ.
ئه‌ڤرۆ نيۆز:
سەرۆک بارزانی، ل سەلاحەدین، ل گەڵ شانده‌کێ مەکتەبی سیاسی يا حزبا شیوعی يا کوردستانى ب سه‌رۆكاتيا كاوه مه‌حمود سكرتێرێ حزبێ کۆمبوو.
ئه‌ڤرۆ رۆژا سێشەمبى 5/12/2017، سەرۆک مەسعود بارزانی، ل سەلاحەددین ل گەل شانده‌کێ مەکتەبا سیاسیی يا حزبا شیوعی يا کوردستانى کۆمبوو، د کۆمبوونێ دا، سەرۆک بارزانی، سوپاسیا ھەڵوێستێ حزبا شیوعی و لایەنگرێن وێ کر د پشته‌ڤانيا ریفراندۆمێ و رۆلێ حزبا شیوعی دوێ پڕۆسا نیشتمانی يا گرنگەدا بلند نرخاند.
سه‌رۆك بارزانى ب تێر و تەسەلی قۆناغا پشتى ریفراندۆمێ و روودانێن 16 ئۆکتۆبەرێ و ھەلويستی بەغدا و جڤاكێ نێڤدەولەتی شرۆڤه‌كر.
ھەر دوێ كۆمبوونێ دا، شاندی مەکتەبا سیاسی يا حزبا شیوعی، دوپاتى لە سه‌ر ھەلويستێ حزبا خوه سه‌باره‌ت ریفراندۆمێ و پرسێن نیشتمانی کر و بۆچوونا خوه ل سه‌ر کێشە و تەحەدیێن ل بەردەم گەلی کوردستانێ به‌رچاڤكر.
دپشكه‌كا دى يا وێ كۆمبوونێ دا، ره‌وشا خه‌لكى ورێيێن ده‌ربازبوونا ڤێ قۆناغێ ورێگريێن ل به‌ر وپێدڤيا ده‌سته‌به‌ركرنا ئێك هه‌لويستيا سياسى يا لايه‌نێن كوردستانى به‌حس لێ هاته كرن، زێده‌بارى خستنا رۆناهيێ ل سه‌ر پرۆسا سياسى ل هه‌رێما كوردستانێ، هه‌ردولا ل سه‌ر وێ چه‌ندێ دهه‌ڤرا بوون كو هه‌لبژارتن باشترين رێ يه بۆ چاره‌سه‌ركرنا كێشێن سياسى ول پێناڤى باشكرنا ژيانا خه‌لكى ژى، پێدڤيه لايه‌نێن سياسى ل گه‌ل حوكمه‌تا هه‌رێمێ دهاريكاربن.
ئه‌ڤرۆ نيۆز:
وه‌زاره‌تا چاندنێ وژێده‌رێن ئاڤێ ل هه‌رێما كوردستانێ، ئينانا هه‌موو جۆرێن به‌رهه‌مێن بالندا ژ 34 وه‌لاتێن جيهانێ بۆ هه‌رێما كوردستانێ قه‌ده‌غه دكه‌ت.
ل دووڤ نڤيسارا رێڤه‌به‌ريا گشتى يا سامانێن ئاژه‌لى وڤيتێرنه‌رى يا سه‌ر ب وه‌زاره‌تا چاندنێ وژيده‌رين ئاڤێ، يا هژمار 3693 ل 26/11/2017 ليستا ناڤێن وان وه‌لاتان به‌لاڤ دكه‌ت كو هاورده‌كرنا به‌رهه‌مێن بالنده‌يى يێن وان وه‌لاتان قه‌ده‌غه‌نه.
ئه‌گه‌رێ قه‌ده‌غه‌كرنێ ژبه‌ر تۆماكرنا نه‌خوه‌شيا ئه‌نفلوه‌نزا بالنده‌يان ب شێوه‌كێ مه‌زن تيدا هاتيه تۆماركرن.
ئه‌ڤرۆنيۆز:
رۆژه‌كا ڤێ هه‌يڤى ل هه‌موو داموده‌زگه‌هێن حوكمه‌تا هه‌رێما كوردستانێ دێ بيته بێهنڤه‌دانا فه‌رمى.
خالد ئه‌لبرت، رێڤه‌به‌رێ كاروبارێن مه‌سيحيان ل وه‌زاره‌تا ئه‌وقاف وكاروبارێن ئايينى ل هه‌رێمێ راگه‌هاند، ب هه‌لكه‌فتا ژدايكبوونا حه‌زره‌تا عيسايێ مه‌سيح، رۆژا دو شه‌مبى 25/12/2017 ل هه‌موو فه‌رمانگه‌هێن هه‌رێما كوردستانێ دێ بيته بێهنڤه‌دان.
ئه‌لبرت زێده‌تر بۆ باسنيۆز گۆت، ئه‌و بێهنڤه‌دانه تنێ بۆ فه‌رمانبه‌رێن مه‌سيحى نابيت، به‌لكو دێ بۆ هه‌موو فه‌رمانبه‌رين كوردستانێ بيت.
گۆت ژى، ب بريارا په‌رله‌مان وحوكمه‌تا هه‌رێمێ ئه‌و رۆژه يا بوويه بێهنڤه‌دانا فه‌رمى.
ئه‌ڤرۆنيۆز:
ئه‌ڤرۆ سێشه‌مبى مه‌سرور بارزانى شيره‌تكارێ جڤاتا ئاسايشا هه‌رێما كوردستانێ، پێشوازى ل پايڤى لاينى باليۆزا فينلاندا ل عيراقێ كر.
ل دووڤ به‌ياننامه‌كێ، دڤێ ديدارێ دا دووماهى پێشهاتێن ده‌ڤه‌رێ وپێشخستنا په‌يوه‌نديێن هه‌ردولا هاتن به‌حسكرن، ل دۆر ره‌وشا دناڤبه‌را هه‌ولێرێ وبه‌غدا، باليۆزا فينلاندا گۆت، په‌ياما ئورۆپا بۆ هه‌ردولا ئه‌وه كو په‌نا بۆ بكارئينانا هێزا له‌شكرى نه‌هيته برن وده‌ست ب دانوستاندنێن راسته‌وخوه دناڤبه‌را هه‌ولێر و به‌غدا ده‌ست پێ بكه‌ن ول دووڤ دستوورى كێشه بهێنه چاره‌سه‌ركرن.
ل دۆر وێ چه‌ندێ، شيره‌تكارێ جڤاتا ئاسايشا هه‌رێمێ دياركر كو هه‌رێما كوردستانێ يا به‌رهه‌ڤه بۆ ده‌ستپێكرنا دانوستاندنه‌كا ڤه‌كرى وراسته‌وخوه، تاكو هه‌موو ناكۆكى بهێنه چاره‌سه‌ركرن وپێنگاڤێن ب كريار بۆ بجهئينانا دستوورى ده‌ست پێ بكه‌ن.
مه‌سرور بارزانى رۆناهى خسته سه‌ر وێ يه‌كێ كو هه‌رێما كوردستانێ به‌رده‌وام رێيێن له‌شكرى وتوندوتيژيێ ره‌ت دكه‌ت وپه‌نايێ بۆ رێيێن ديموكراتى بريه، كو ريفراندۆم ژى ئێك بوو ژوان، به‌لێ مخابن ل ڤێ ده‌ڤه‌رێ هێشتا ده‌ليڤا قه‌بوولكرنا ڤان ئامرازان ل بار نينه.
مه‌سرور بارزانى خواست كو جڤاكێ نێڤده‌وله‌تى يێ هاريكار بيت بۆ وێ چه‌ندێ كێشێن ده‌ڤه‌رێ ب شێوه‌كێ ريشه‌يى بهێنه چاره‌سه‌ركرن بۆ ژناڤبرنا ده‌ليڤێن په‌يدابوونا توندوتيژيێ.
ل دۆر ئه‌گه‌رێن هه‌لبژارتنێن پێشوه‌خت ونێزيكبوونا هه‌لبژارتنێن عيراقێ، شيره‌تكارێ جڤاتا ئاسايشا هه‌رێمێ، گۆت، هه‌رێما كوردستانێ ب ئێكگرتى و ب ئێكرێزى هێزا وێ يا زێده‌تره كو روو ب روويا پێشهاتان بيت وبه‌رگريێ ژ مافێن دستوورى يێن وه‌لاتيێن هه‌رێمێ وده‌ڤه‌رێن كوردستانى يێن ده‌رڤه‌ى ئيدارا هه‌ريمێ بكه‌ت.
ئه‌ڤرۆنيۆز:
سه‌رۆك وه‌زيرێن عيراقێ حه‌يده‌ر عه‌بادى داخۆيانيه‌كا خوه ب دره‌و ده‌ردئێخيت و72 ده‌مژمێران مۆله‌تێ دده‌ته فه‌رماندێن خوه يێن له‌شكرى.
ل دووڤ وان پێزانينێن دده‌زگه‌هين راگه‌هاندنا عيراقێ دا به‌لاڤ دبن، حه‌يده‌ر عه‌بادى، سه‌رۆك وه‌زيرێن عيراقێ 72 ده‌مژمێران مۆله‌تێ دده‌ته فه‌رماندێن له‌شكرى يێن عيراقى بۆ ئازادكرنا سنورێن رۆژئاڤايێ عيراقێ ژ داعشێ.
ئه‌و فه‌مانا عه‌بادى دده‌مه‌كى دايه، كو چه‌ندين جاران ودگه‌له‌ك هه‌لكه‌فتان دا، عه‌بادى ب دووماهى هاتنا داعشێ وسه‌ركه‌فتنا مه‌زن يا هيزێن عيراقى وئازادكرنا هه‌موو ئاخا عيراقێ رادگه‌هاند.
ئه‌ڤرۆنيۆز:
ئاژانسه‌كا رۆسى يا ده‌نگوباسان راگه‌هاند، و ژئه‌گه‌رێ توپبارانكرنا فرۆكێن ئيسرائيلى، چه‌ندين په‌قينێن ب هيز ل نێزيك ديمه‌شقا پايته‌خت روودان.
ل دووڤ راپۆرته‌كا تۆرا ده‌نگوباسێن رۆسيا توده‌ى يا رۆسى، فرۆكێن ئيسرائيلى ل شه‌ڤا بۆرى بنگه‌هه‌كێ پيشه‌سازى وته‌قه‌مه‌نيان يێ سوورى ل گوندێ جمرايا ل ده‌ڤه‌را قودسيا ل نێزيك ديمه‌شقێ كريه ئارمانج.
دياركر ژى، فرۆكێن ئيسرائيلى سێ بنگه‌هێن له‌شكرى ل ده‌ڤه‌رێن يه‌غفوور، جمرايا وديراج توپبارانكرن ودئه‌نجامدا كه‌ره‌سته‌يه‌كێ هاڤيتنا مۆشه‌كێن S-200 يێن له‌شكرێ سوورى ژناڤبر.
دده‌مێ 30 رۆژێن بۆرى دا، ئه‌ڤه جارا سيێ يه فرۆكێن ئيسرائيلى ناڤه‌ند وبنگه‌هێن له‌شكرى يێن سوورى توپباران دكه‌ن.
هه‌ڤده‌م، بنيامين ناتانياهۆ سه‌رۆك وه‌زيرێن ئيسرائيلێ ل رۆژێن بۆرى راگه‌هاندبوو، ئه‌م ب چو شێوه‌كى رێ ناده‌ين ئيران بنگه‌هه‌كێ له‌شكرى يێ به‌رده‌وام ل سووريێ ب دانيت.
ئه‌ڤرۆنيۆز:
ئه‌ڤ شه‌ڤه هه‌شت يارى دگه‌را شه‌شێ ودووماهيێ ژ قۆناغا كۆمان دخۆلا قاره‌مانێن ئورۆپا دا دێ هينه ئه‌نجامدان.
گرنگترين يارى دێ دناڤبه‌را بايرن ميونخ وپاريس سان جيرمان دا ل سه‌ر ياريگه‌ها يانا بايرن هيته ئه‌نجامدان، وشيلسى يا ئينگليزى ل سه‌ر ئه‌ردێ خوه دي ل گه‌ل ئه‌تله‌تيكۆ مه‌دريد يا ئيپانى كه‌ت ويانا به‌رشه‌لونا دێ يانا سپۆرتێنگ له‌شبونه يا پورتۆگالى مێهڤان كه‌ت.
ياريێن دى ب ڤى شێوه‌ى نه
به‌نفيكا پورتۆگالى – بازل يا سويسرى
مانشسته‌ر يو‌نايتد يا ئينگليزى – سيسكا موسكۆ يا رۆسى
رۆما يا ئيتالى – كارياكا ئه‌غدام يا ئه‌زره‌بايجانى
سيلتك يا سكوتله‌ندى – ئه‌نده‌رله‌خت يا به‌لجيكى
ئولومپياكۆس يا يۆنانى – يوفه‌نتۆس يا ئيتالى
هه‌موو يارى دێ ئه‌ڤ شه‌ڤه ل ده‌مژمێر 10:45 هينه ئه‌نجامدان.
نيشاندان