ئه‌ڤرۆنيۆز:

ژبه‌ر پێشكێشكرنا به‌رنامه‌كێ ته‌له‌ڤزيۆنى ب جلكێن كوردى و ئالايێ كوردستانێ، هێزێن دژه‌ تيرۆر يێن عيراقى ل كچه‌كا رۆژنامه‌ڤان ل كه‌ركووكێ دگه‌رهن، ئه‌وژى دبێژيت هه‌كه‌ بهێمه‌ كوشتن ژى، شانازيێ دكه‌م كو ل سه‌ر ئالايێ كوردستانێ يه‌.

ژئه‌گه‌رێ پێشكێشكرنا به‌رنامێ (به‌يانى باش كه‌ركووك) ب ئالايێ كوردستانێ ڤه‌، ده‌مێ چه‌ند رۆژانه‌، هێزێن دژه‌ تيرۆر يێن عيراقى داخوازا پێزانينان ل سه‌ر نێرگز قادر پێشكێشكارا كه‌نالێ كه‌ركووك يێ ئه‌سمانى دكه‌ن.

نيرگز قادر ئه‌و كچا رۆژنامه‌ڤان يا باژێرێ كه‌ركووكێ بۆ باسنيۆز دبيژيت، ده‌زگه‌هێ دژه‌ تيرۆر يێ عيراقى ب دووڤ من دگه‌رهن و ئه‌فسه‌ره‌كێ ب سه‌ر وى ده‌گه‌هى ڤه‌ دگرۆپێ رۆژنامه‌ڤانێن باژێرێ كه‌ركووكێ دا داخوازا كۆمكرنا پێزانينان ل سه‌ر من كريه‌ وگۆتيه‌ ئه‌و قه‌هره‌مانه‌ كى يه‌ ب ئالايێ كوردستانێ به‌رنامێ ته‌له‌ڤزيۆنێ پێشكێش دكه‌ت؟ بێژنێ بلا په‌يوه‌نديێ ب مه‌ بكه‌ت، به‌لێ رۆژنامه‌ڤانان به‌رسڤا وى دايه‌ كو ئه‌و رۆژنامه‌ڤانا كچ زمانێ عه‌ره‌بى نزانيت، پاشى ئه‌فسه‌ره‌ێ دژه‌ تيرۆر گۆتيه‌، هه‌كه‌ زمانێ عه‌ره‌بى نزانيت، دێ ب زمانێ ئينگليزى ل گه‌ل ئاخڤين.

نێرگزێ زێده‌تر گۆت، وى ئه‌فسه‌رێ دژه‌ تيرۆرا عيراقێ گۆتيه‌ ژى، هه‌كه‌ ئه‌و كچا رۆژنامه‌ڤان په‌يوه‌نديێ ب مه‌ نه‌كه‌ت، ئه‌م دێ كه‌نالێ وێ دائێخين.

خوياكر ژى، هه‌موو لايه‌كى پشت راست دكه‌م كو  پشتى 16 چريا ئێكێ، ئه‌م ژكه‌ركووكێ ده‌رنه‌كه‌فتينه‌، نوكه‌ چاوان ژئه‌گه‌رێ ترسێ وچاڤسووركرنا وان، دێ ژكه‌ركووكێ ده‌ركه‌ڤين؟ هه‌روه‌سا ل چه‌ند رۆژێن داهاتى من به‌رنامێ هه‌ى، هه‌كه‌ ئه‌و هنده‌ دئازانه‌ وگه‌فان ل من دكه‌ن، شانازيێ دكه‌م ل پێناڤى ئالايێ خوه‌ بهێمه‌ كوشتن.

ئاماژه‌ دا، ژبه‌ر وێ پرسێ من په‌يوه‌ندى ب رێبوار تاها ئه‌ندامێ جڤاتا نوونه‌رێن عيراقێ ژ فراكسيۆنا ئێكه‌تيێ كر ومن ل دۆر وێ كێشێ ئه‌و ئاگه‌هداركر، ئه‌وى ژى ئه‌ز پشت راست كرمكو دێ دووڤچوونێ بۆ وێ پرسێ كه‌ت، به‌لێ پشتى وێ رێبوار تاهاى ئاگه‌هداركرى، جاره‌كادى وى ئه‌فسه‌رى داخواز كريه‌ كو سه‌ره‌دانا وان بكه‌م.

ئه‌و كچا رۆژنامه‌ڤانا باژێرێ كه‌ركووكێ گۆت ژى، هه‌كه‌ گه‌ف ومه‌ترسى ل سه‌ر ژيانا من هه‌بيت، يا گرنگ ئه‌وه‌ ئێكه‌مين كچا كوردم ل كه‌ركووكێ ئالايێ كوردستانێ دانمه‌ سه‌ر ملێ خوه‌ ل به‌رنامێ( به‌يانى باش) دا، ئه‌ڤه‌ ژى وه‌كو په‌يامه‌كى يه‌ بۆ وان كه‌سێن نه‌زڤرينه‌ كه‌ركووكێ ووه‌سا هزر دكه‌ن كو ئێدى كورد نه‌شێن ئالايێ كوردستانێ ل ڤى باژێرێ بلند كه‌ن، له‌وما من ته‌حه‌ديا هيزێن عيراقى كر.

ئه‌ڤرۆنيۆز:

رێڤه‌به‌ريا هاتنوچوونێ ل پارێزگه‌ها هه‌ولێرێ راگه‌هاند وان دده‌مێ هه‌فتيه‌كێ دا شياينه‌ شه‌ش ترافكلايتان دناڤ باژێرێ هه‌ولێرێ دا ب راوه‌ستينن وژكاربێخن ودێ بزاڤێ كه‌ن دده‌مه‌كێ نێزيك دا ئه‌و ترافكلايتێن دى ژى ل باژێرى دابخن وسيسته‌مه‌كێ نوو بكاربينن.

فازل حاجى په‌يڤدارێ رێڤه‌به‌ريا هاتنوچوونێ ل پارێزگه‌ها هه‌ولێرێ بۆ دوارۆژ گۆت، ئه‌گه‌رێ داخستنا ترافكلايتان بۆ خزمه‌تكرنا ژينگه‌هێ وپاقژيا باژێرى يه‌ وكێمكرنا قه‌ره‌بالغيا جادانه‌.

فازلى گۆت ژى، پێشكه‌فتيترين ئه‌زموونا پرۆگرامێن جيهانى مه‌ يا په‌يره‌وكرى ئه‌وژى ئه‌زموونا وه‌لاتێ كوريا باشووره‌ بۆ شۆفێران، ب هه‌ماهه‌نگى ل گه‌ل كوليژا ئه‌ندازيارى ل زانكۆيا سه‌لاحه‌دين كو مه‌ سيسته‌مێ بازنه‌يى يێ لاداى وسيسته‌مێ شێوێ لاكێشه‌يى يێ كاراكرى كو ئه‌ڤ سيسته‌مه‌ ب رێژا 100%  قه‌ره‌بالغێ وراوه‌ستيانا ترومبێلان ناهێليت، ديسا دێ رێ ل ددياردا خازخازۆكيێ ژى گريت.

په‌يڤدارێ هاتنوچوونا هه‌ولێرێ خوياكر ژى، ل ده‌مه‌كێ نێزيك دێ كاركه‌ين بۆ داخستنا هه‌موو ترافيكلايتان ب هه‌ماهه‌نگى ل گه‌ل رێڤه‌به‌ريێن باژێرڤانيێ ورێ وپرا بۆ دابينكرنا پێدڤيان.

ئاماژه‌ دا، هه‌تا نوكه‌ مه‌ ترافكلايتێن( عه‌داله‌، بنه‌سلاوه‌، ئه‌ندازه‌، 18 شوبات وئاسكى باداوه‌) داخستينه‌ بۆ زێده‌تر ئاسانكاريێ بۆ شۆفێران ونه‌هێلانا قه‌ره‌بالغێ.

رۆهنكر ژى، دێ كار ل سه‌ر وێ چه‌ندێ كه‌ين كو هه‌موو پۆليسێن هاتنوچوونێ ل ترافكلايتان نه‌هێلين وسيسته‌مه‌كێ وه‌كو وه‌لاتێ ئوردنێ دروست بكه‌ين، كو پێدڤى ب هه‌بوونا ترافكلايت وپۆليسێن هاتنوچوونێ ل سه‌ر جادان نه‌كه‌ت.