ئەڤرۆ نیۆز،زنار تۆڤی:

موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:کو ئەڤرۆ ترۆمبێلەک وەرگەریایە و چار کەس تێدا بریندار بووینە.

ناڤهاتی گوت ژی:ل ده‌مژمێر ( 5:30 ) خۆله‌كێن سپێده‌یا ئه‌ڤرۆ چارشەمبی ل (1-11-2017 ) ل گەلێی زاخۆ،ل نێزیکی گوندێ حەسەن ئاڤا ترۆمبێلەکا تایبەت مارسیدس یا رەنگێ مارۆنی ژ بن کونترۆلا شوفێری دەرکەفتیە وەرگێریایە و دیارکر ژی:د ڤێ روودانێ دا 4 كه‌س بریندار بووینە کو 3 ژ وان برینداران ژن بوون ل گەل زەلامەکێ،هەروەسا زیانێن ماددی یێن به‌رچاڤ ژی ب ترۆمبێلێ كه‌فتینە و دیسا ئه‌گەرێ ڤێ روودانێ ژی شوفێرێ ترۆمبێلێ ب له‌زاتیا زێده‌ ترۆمبیل هاژوتیە و كونترۆل ژ ده‌ست دایه و وەرگەریایە.‌

ئەڤرۆ نیۆز،زنار تۆڤی:

سەرۆک وەزیرێن عێراقێ رادگەهینیت،دێ مووچێ فەرمانبەرێن هەرێما کوردستانێ و پێشمەرگەی خەرجکەین،پەیڤدارێ حوکمەتا هەرێما کوردستانێ دبێژیت:تا نوکە ب فەرمی چو تشت نەگەهشتینە مە.

پشتی ئەنجامدانا کۆمبوونا ئەنجوومەنێ وەزیرێن عێراقێ حەیدەر عەبادی سەرۆک وەزیرێن عێراقێ د کۆنگرەیەکێ رۆژنامەڤانیدا راگەهاند،حوکمەتا عێراقێ ل ڤان نێزیکان دێ مووچێ فەرمانبەرێن هەرێما کوردستانێ و پێشمەرگەی خەرجکەت،هەروەسا گوت ژی هێزێن فیدرالی ل ناوچەیێن کێشە ل سەر یێن بەلاڤ بووین.

سەبارەت ب دابینکرنا مووچێ فەرمانبەرا و پێشمەرگەی ژ لایێ حوکمەتا عێراقێ ڤە، سەفین دزەیی،پەیڤدارێ حوکمەتا هەرێما کوردستانێ راگەهاندیە تا نوکە حوکمەتا هەرێما کوردستانێ سەبارەت ب پێدانا مووچێ پێشمەرگە و فەرمانبەران ژلایێ حوکمەتا عێراقێ ڤە ب فەرمی ئەم نە هاتینە ئاگەهدار کرن، هەر دەمێ ب فەرمی هاتە راگەهاندن،ل وی دەمی دێ مە هەلویستێ فەرمی هەبیت.

جیاوازیا لیستێن فەرمانبەران و مووچەخۆران دناڤبەرا هەرێما کوردستانێ و حوکمەتا ناڤەندی ژێدەرێ کێشێ و دابینکرنا مووچێ فەرمانبەران و کارمەندێن هەرێما کوردستانێ نە، ب رەنگەکی کو حوکمەتا ناڤەندی ب تنێ دانپێدانێ ب 680 هزار فەرمانبەران دکەت،د دەمەکێ دا هەرێما کوردستانێ رادگەهینیت کو ئێک ملیۆن و 480 هزار مووچەخۆر هەنە کو 720 هزار ژ وان فەرمانبەرن و 270 هزار ژی مووچەخۆرێن سەربازینە.

هەروەسا نەجیبا نەجیب، پەرلەمانتارا کورد ل پەرلەمانێ عێراقێ دەربارەی هژمارا مووچەخۆرێن عێراقێ گوت ل عێراقێ 10 ملیۆن مووچەخۆر هەنە،ژ ڤێ هژمارێ ژی زێدەتر ژ حەفت ملیۆنان فەرمانبەر و خانەنشینن و ئەوێن دی مووچەخۆرێن سیاسیی و شەهیدن.