ئه‌ڤرۆ نیوز ، هلۆرى:
جڤاتا گوندێ چێ ل كومه‌لگه‌ها ئازادى یا سه‌ر ب ناحیا سه‌رسنكێ ل سنوورێ قه‌زا ئامێدیێ دێ ئاهه‌نگه‌كا به‌رفره‌ه بو ریفراندۆمێ ئه‌نجام ده‌تن.
وه‌كو پشته‌ڤانى بو ریفراندۆمێ جڤاتا گوندێ چیێ دێ ئاهه‌نگه‌كا به‌رفره‌ه بو هه‌ر ئێك ژ هونه‌رمه‌ندان ” دیار حەسەن، بورهان زێباری ، دژوار دوسکی ، عبدلقادر ،عمر زێوەی و یەلماز”ى گێریت.
ئاهه‌نگ دێ لرۆژا 6 ئیلونا 2017 ل گوره‌پانا ئازادى یا ته‌پاپێ ل ناحیا سه‌رسنكێ هێته ئه‌نجامدان.
ئەڤرۆ نیۆز،تۆڤی:
ئەڤرۆ دوشەمبی 4.9.2017 ل دمژمێر 1:30 خولەک پشتی نیڤرۆ چەندین فرۆکێن سۆپایێ تورکی هەرسێ دەڤەرێن سەرگەلا کەڤن و کورکو و چیا زەرک ل دەڤەرا ئامێدیێ ب بەهانەیاهەبوونا شەرڤانێن پەکەکێ ب دژواری بۆمبە بارانکرن و نوکەژی بۆمبەباران یا بەردەوامە،لێ هەتاکو نوکە زیانێن بۆمبەبارانکرنێ نەهاتینە زانین.
د هەمان دەمدا هەر ئەڤرۆ دەنگێ فرۆکێن سۆپایێ تورکی ل ئەسمانێ ناحیا کانی ماسێ ژی هاتیە بهیستن.
ئه‌ڤرۆ نیوز ، نه‌وزاد هلۆرى:
ئه‌ڤرۆ هه‌ر ئێك ژ ته‌ڤگه‌را گۆڕان و كومه‌لا ئیسلامى ل باره‌گایێ ئه‌نجومه‌نا سیاسیا كومه‌لا ئیسلامى كومبوون و ل گوره‌ى راگه‌هاندنا داویا كومبوونێ هه‌ردوو دخوازن كو ریفراندۆم بهێته پاشێخستن.
ل گوره‌ى راگه‌هاندنا داویێ یا كومبوونا گۆڕان و كومه‌لێ دوپات لسه‌ر هه‌لوه‌شاندنا بریارا پاشكه‌فتێ موچه‌یێ فه‌رمانبه‌ران و باشتر كرنا ژین و ژیارا وه‌لاتیان هاته‌كرن ، و دیسان هه‌ردوویان خواست كو په‌رله‌مان بهێته ئاسایكرن كو ل گوره‌ى قانونێ كارێن خوه بكه‌ت وه‌كو دانانا قانون و چاڤدێرى.
د پشكه‌كا دن یا راگه‌هاندنا وان دا هاتیه پێدڤى یه ریفراندۆم بهێته پاشێخستن بو ده‌مه‌كێ گونجاى و ب رێیا په‌رله‌مانى بریار و قانونه‌ك بو بهێته ده‌رئێخستن و هه‌لبژرادن ژى د ده‌مێ خوه دا بهێنه ئه‌نجامدان.
هه‌ر ئێك ژ وان هه‌ردوو حزبان به‌رهه‌ڤیا خوه ژى نیشان دا بو دانوستاندن لسه‌ر چاره‌سه‌ركرنا قه‌یرانان.
شاندنێ گۆڕانێ بو باره‌گایێ ئه‌نجومه‌نا سیاسیا كومه‌لێ پێكهاتبوون ل عومه‌رێ سه‌عید عه‌لى رێكخه‌رێ گشتیێ ته‌ڤگه‌را گۆڕانێ و جه‌لال جه‌وهه‌ر و عوسمان حاجى وه‌كو ئه‌ندامێن خانه‌یا راپه‌راندنا گۆڕانێ ، و دبه‌رامبه‌ر دا لایه‌نێ كومه‌لێ پێهاتبوون ژ عه‌لى باپیر ئه‌میرێ كومه‌لا ئیسلامى یا كوردستانێ و بێوار حه‌مه‌د و عه‌بدولستار مه‌جید و ئه‌نوه‌ر سه‌نگاوى ئه‌ندامێن ئه‌نجومه‌نا سیاسیا كومه‌لێ.
ئەڤرۆ نیۆز،تۆڤی:
دامەزراوەیا ھارت ستیت یا بریتانی بەلاڤکریە،کو د ماوێ 3 سالێن بوری دا بەرپرسێن حوکمەتا عێراقێ زێدەتر ژ 70 ھزار یەكەیێن ئاکنجیبوونێ ل لەندەنا پایتەختێ بریتانیا كرینە.
دامەزراوەیا ھارت ستیت یا بریتانی كو یا تایبەتە ب فرۆشتنا خانووبەران و ئاشكرا دکەت،کو هەر ل سالا 2014 بەرپرسێن عێراقێ زێدەتر ژ وەلاتیێن كەنداڤی خانی و مولک كرینە و ئەو كەسێن بووینە خودانێن وان مولکان ئاکنجیێن بریتانیا نینن و بەلكی ل بەغدا و د حوکمەتا عێراقێ و ئەنجوومەنێ نوونەرێن عێراقێ دا پۆست ھەنە.
ڤێ دامەزراوێ ئاماژە ب هندێ ژی کریە،کو كرینا خانووبەران ژ لایێ عێراقیان ڤە ل بریتانیا ل سالا بوری كێمکریە و ل دوماهی ئامار ژی دا زێدەتر ژ 70 ھزار یەکەیێن ئاکانجیبوونێ کرینە،دیارکریە ژی کو خودانێن وان ژ بەرپرسێن بلند و راوێژکارێن حوکمەتا عێراقێ نە و دیسا پشتی کو ئەو دەستبەرداری پۆستێن خۆ بووین دەست ب کرینا مولک و خانیان کریە ل لەندەن.
ئەڤرۆ نیۆز،زنار تۆڤی:
هەمووگاڤا ژن هەول دەدەن کو هەڤژینێن خۆ رازی بکەن و بۆ هندێ ژی چەند رەفتارێن دیارکری دکەن،هەتاکو سەرنجا وان پێ رابکێشن،بەلێ ب مخابنی ڤە زۆربەیا وان ناگەهنە وێ ئارمانجێ،چونکی ژن نزانن کا هەڤژینێن وان ب دروستاهی چ ژێ داخواز دکەن،لەورا باشترە بەری هنگێ ژن ئاگەهداری وان تشتابن،یێن کو هەڤژینێن وان حەز ژێ دکەن،ئەو ژی ئەڤە نە:
١. باوەشکرن و ماچکرن،زەلام حەز دکەن هەست ب هندێ بکەن،کو هەڤژینێن وان چەند ئەو خۆش دڤێن و گرنگیێ پێ ددەن، بەلێ کێشە د هندێ دایە،زەلام نزانن چاوا ڤێ داخوازیێ دەرببرن، بەرۆڤاژی ژنان کو درژدن ل سەر هندێ کو پێدڤیێن وی بۆ دابین بکەت،زەلام دخوازن کو هەڤژینێن وان حەز ژێکرنا خۆ بۆ وان دەرببرن و بێی کو داخوازێ ژێ بکەن و خۆ نێزیک بکەن و ماچ بکەن.
٢. ب دەستڤەئینانا وێ دیاریا پێدڤی پێ هەی،ب گشتی هەموو ژن حەز ژ دیاریێن گرانبها دکەن،د دەمەکێ دا زەلام حەز ژ دیاریەکێ دکەن کو یا رەمزی بیت،یان ژی پێدڤیەکێ پێ پر بکەت،زەلام حەز دکەن هەڤژینێن وان تشتەکێ ب دیاری بدەنێ کو وان پێدڤی پێ هەبیت.
٣. سوپرایز،زەلام ژی وەک ژنان حەز ژ سوپرایزا دکەن،لەورا باشترە ژن هەڤژینێن خۆ ب نانخوارنەکا سۆزداری و رۆمانسی سەرسام بکەن،یان ژی سوپرایزەکا گەشتکرنێ بۆ بکەن.
٤. ل دەمێ دل تەنگیێ دا ل دەف بی،دەمێ زەلام توشی کێشە و دل تەنگیەکێ دبیت،باشترە هەڤژینا وی خۆ نێزیک بکەت،هەتاکو ئەو کێشە ل سەر دەرباز دبیت.
٥. دەمێ توورە دبیت خۆ ژێ دووربکە،زەلام حەز ژ هندێ دکەن،دەمێ توورە دبن هەڤژینێن وان خۆ ژێ دوور بکەن و وان بتنێ بهێلن،بەلێ پتریا ژنان ئەڤێ ناکەن و بەرۆڤاژی رەفتارەکا بێزارکەر ئەنجام ددەن و د رژدن ل سەر هندێ بزانن کا هەڤژینی وان یێ ژ چ توورەیە و ب پرسیار و ئاخفتنێ پتر وان توورە دکەن.
٦. هەڤکاریکرنا وان د کارێن گران دا،دەمێ زەلام ب کارەکێ گران ڤە مژوول دبن،ل سەر ژنێ پێدڤیە خۆ وەسا نیشان بدەت،کو ئەو ژی دێ گرنگیێ ب وی کاری دەت و حەز دکەت بزانیت کا ب چ شێوە هەڤکاریا هەڤژینێ خۆ بکەت.
ئه‌ڤرۆ نیوز ، نه‌وزاد هلۆرى:
مله‌تێ كورد ل هه‌رێما كوردستانێ به‌ر ب ئه‌نجامدانا ریفراندۆمێ دچن ، گه‌له‌ك گرنگه هه‌ر كورده‌ك پشكداریێ د ریفراندۆمێ بكه‌ت و ب ئێكده‌نگى بریارێ لسه‌ر چاره‌نڤسیێ خوه بده‌ن ، مه‌لایه‌ك دده‌تن دیاركرن كو هه‌ركه‌سێ نه‌چیته ده‌نگدانێ دێ گونه‌هكار بیت.
مه‌لا دلشاد بێسفكى به‌رپرسێ لژنا دهۆك یا ئێكه‌تیا زانایێن ئاینێ ئیسلامێ دیاركر كو ریفراندۆم ده‌لیڤه‌ك هه‌رى گرنگه كو كورد تێدا خوه نێزیكێ مافێن خوه‌یێن راسته‌قینه بكه‌ن و بۆ ئه‌ڤرۆ نیوز گۆت: ( ریفراندۆم د ئیسلامێ دا گه‌هشتنا مافێن خوه‌یێن راسته‌قینه‌یه و كورد ژى وه‌كو هه‌موو گه‌لێن جیهانێ دڤێت ب مافێن خوه شاد بن ، ژ به‌رڤێ گرنگه هه‌ر كه‌سه‌ك پشكدارێ ده‌نگدانێ بن و بریارێ ل چاره‌نڤیسێ خوه بده‌ن و هه‌ركه‌سێ خه‌مساریێ بكه‌ت و نه‌چیت دێ گونه‌هكار بیت)
زێده‌تر گۆت: (راسته لسه‌ر كاغه‌زا ده‌نگدانێ به‌لێ و نه‌خێر هه‌نه به‌لێ من دڤێت بێژم كو ئه‌ڤ جاره جوداهیا خوه هه‌یه و نه وه‌كو جارێن بورى یه و پێدڤى یه گه‌لێ كورد ب ئێك ده‌نگ بێژیت به‌لێ ژبه‌ركو به‌لێ یا وان دێ بیته سه‌ده‌ما پاراستنا گیانێ هزاران مروڤان ل ژیانێ و شادبوونا روحا هزاران ئه‌نفالكرى و شه‌هیدان)
مه‌لا دلشادى د درێژاهیا ئاخفتنێن خودا دیاركر ژى كو ئه‌ركه لسه‌ر ماموستایێن ئاینى پشته‌ڤانیه‌كا باش ل هوشیاركرنا خه‌لكى بكه‌ن داكو به‌ر ب سندوقێن ده‌نگدانێ بچن و ب به‌لێ ده‌نگى بو بده‌ن و گۆت ژى: (وه‌زاره‌تا ئه‌وقاف و كاروبارێن ئاینى و ئێكه‌تیا ماموستایان ب رێیا مینبه‌ران روله‌ك كارتێكه‌ره و مه هه‌وه‌كا هوشیاركرنا خه‌لكى ب رێیا مینبه‌ران ده‌ستپێكریه و بو هه‌مووان دێ روون كه‌ین كو ب ده‌ستڤه‌ئینانا مافان دهێته وه‌رگرتن نه‌ك دان و پێدڤى یه مه‌ژى سنوور و ئاخف و ئالا و زمان و ده‌وله‌تا خوه وه‌كو هه‌موو جیهانێ هه‌بیت)
وه‌كو نه‌ریته‌كێ سالانه وه‌لاتیێ، ده‌ڤه‌را زێبار ل سنوورێ ناحیا دینارته یا سه‌ر ب قه‌زا ئاكرێ ل ده‌ستپێكا مه‌ها ئیلونێ قه‌ستا ئاقارى و چیایى دكه‌ن بو دابرانا دارا و كومكرنا چلى وه‌كو ئالیك بو گیانه‌وه‌ران ل وه‌رزێ زستانى.
حه‌ته‌م ئه‌حمه‌د وه‌لاتیه‌كێ گوندێ پرێسه یا سه‌ر ب ناحیا دینارته‌یه و ئه‌ڤرۆ ل گه‌ل ئاكنجیێن گوندى چویه ئاقارى ب مه‌ره‌ما دابرانا چلى بئ ئه‌ڤرۆ نیوز گۆت: (هه‌موو سالان ل ده‌ستپێكا مه‌ها ئیلونێ هه‌تاكو ده‌ستپێكا مه‌ها چریا ئێكێ ئه‌م دچینه ده‌ڤه‌رێن چیایى بو دابرانا چلى و كومكرنا وان بو وه‌رزێ زستانێ داكو بو گیانه‌وه‌ران ببیته ئالیكێ خوارنێ)
زێده‌تر گۆت: ( ب دوو شێوازان خه‌لكێ گوندى دچیته چلى ب شێوه‌یێ تاك و ب شێوه‌یێ زوباره ، به‌لێ پرانیا گوندیان ب زوباره دچن ژ به‌ركو ئه‌ڤ رێكه باشتره و هاریكاره كو زوتر چلى بهێته برین و ماندوبون ژى نینه و زورترین چلى د ده‌مه‌كێ كورت دا دهێته‌كومكرن)
بشا قادر ئه‌و ژى وه‌لاتیه‌كێ هه‌مان گوندى یه دیاركر كو هه‌ر گوندیه‌ك ل گوره‌ى پێدڤى یا خوه چلى دبریت و گۆت: ( دارا به‌ریێ و دارا مازیێ باشترین دارن بو دابرانا چلى ، ده‌ستپێكێ دێ تاكێن دارێ ب جوانى برین ئه‌ڤێن كو كێر ب چلى بهێن و كارتێكرنێ ژى ل دارێ نه‌كه‌ن ، پاشان دێ كه‌نه تاخه و كومكه‌ن جهه‌كێ و كه‌نه گیشه ، پاشان ل وه‌رزێ زستانێ دێ تاخه تاخه دانن به‌ر گیانه‌وه‌ران وه‌كو ئالیكێ زستانێ )
زێده‌تر گۆت: ( برینا چلى نوكرنه‌ڤه‌یه‌كا سالانه‌یه بو دارێن به‌ریێ و مازیێ و چوو جاران نابیته سه‌ده‌م كو كارتێكرن ل دارێ بكه‌ت به‌لكو هێشتا باشتر ژى لێ دهێت)
ئه‌ڤرۆ نیۆز،عه‌زیز ره‌سول هه‌ورامانی:
پەیڤدارێ پۆلیسێن پارێزگەها سلێمانیێ رادگه‌هینیت کو د دو روودانێن جۆدا دا دو وەلاتیان گیانێ خۆ ژ ده‌ستدایه و پۆلیسان ڤەکۆلین ژی ده‌ستپێكریه.
سه‌ركه‌وت ئه‌حمه‌د پەیڤدارێ پۆلیسێن پارێزگەها سلێمانیێ بۆ ئه‌ڤرۆ نیۆز گوت:ل دۆلە میرانی ئه‌زمه‌ر ل باژێرێ سلێمانیێ ته‌رمێ وەلاتیەکێ هاتیە دیتن،لێ ئەگەرێن مرنا وی نەهاتیە زانین،ته‌رمێ وی هاتیە ڤەگۆهازتن بۆ نۆشداریا داد ب مەرەما پشكنینێ،پەیڤدارێ پۆلیسێن سلێمانیێ گۆتیە ژی:په‌رێن ڤەکۆلینێ بۆ ڤێ روودانێ هاتینە ڤەکرن.
هه‌روه‌سا دیارکر ژی:ب ئەگەرێ كه‌فتنا خوارێ ل سه‌ر ئاڤاهیەکێ وەلاتیەک ب ناڤێ (ع.م) کو ژیێ وی
38 سالە گیانێ خۆ ژ ده‌ستدایە.
ئەو ژی گۆتیە،پشتی گەهشتنا هێزێن پۆلیسا بۆ جهێ روودانێ ته‌رمێ وی هاتیە ڤەگۆهازتن بۆ نۆشداریا داد ل سلێمانیێ و پەرێن ڤەکۆلینێ بۆ ڤێ روودانێ ژی هاتینە ڤەکرن.
ئەڤرۆ نیۆز،زنار تۆڤی:
پەیڤدارێ حەشدا شەعبی ئاشكرا دکەت،کو پشتی جەژنا قۆربانێ دێ بەرەیێن شەری بۆ ئۆپەراسیۆنا كۆنترۆلکرنا حەویجە هێنە دیارکرن،ل دووڤ زانیاریان دێ دو ئێكەیێن تۆپخانێن ئەمریكا و فرنسا ژی پشکداریێ دڤی شەریدا كەن.
ئەحمەد ئەسەدی،پەیڤدارێ حەشدا شەعبی د راگەهاندنەکێدا ئەو ژی دیارکریە،کو پلانا هێرشکرنێ بۆ سەر باژێرکێ حەویجە ژلایێ فەرماندەیا ئۆپەراسیۆنێن هەڤبەش ڤە دێ هێتە دارێژتن،بەلێ هەتاکو نوکە بەرەیێن شەری ب سەر هێزان دا نەهاتینە دابەشکرن.
هەروەسا گوتیە ژی، دابەشکرنا بەرەیان ماوەیەکێ زۆر پێناچیت و پشتی جەژنێ راستەوخۆ جهێن هێزان دێ هێنە دیارکرن،ئاماژە ب هندێ ژی دایە کو هێزێن وان ژ پاڤژکرنا مین و بۆمبێن چاندی یێن داعشێ ل باژێرکێ تەلەعفەر د بەردەوامن.
ل دووڤ ژێدەرێن سەربازی یێن عێراقی،ل شەرێ كۆنترۆلکرنا حەویجە یێ باشۆرێ كەركووكێ دا،دێ 48 ھزار سەرباز ژ ھێزێن جۆدا یێن عێراقێ پشکداریێ د ڤێ ئۆپەراسیۆنێ دا كەن و زۆربەیا وان دێ ژ پۆلیسێن فیدرالی بن،هەروەسا دێ 8 ھزار ترۆمبێلێن سەربازی و 200 تانكێن ژ جۆرێ ئەبرامز و تی 72 و تی 55 دڤی شەری دا هێنه بكار ئینان،ژ بلی فرۆکێن عێراقی و ھەڤپەیمانان،دیسا دێ دو ئێكەیێن تۆپخانەیا سوپایێ ئەمریكا و فرنسا ژی پشکداریێ دڤی شەریدا كەن.
نيشاندان