ئەڤرۆ نیوز ، نەوزاد ھلۆری:
ئەڤرۆ ب ھەلکەفتا ٧١ سالیا دامەزراندنا پارتی دیموکراتی کوردستان نێچیرڤان بارزانی جێگرێ سەرۆکێ پارتی دیمکراتی کوردستان زێدەباری پیروزباھیکرن ژ لایەنگیرێن پارتی و گەلی کورد دیارکر کو جھێ شانازیێ یە کو پارتی ژ دەستپێکا دامەزراندنا خوە ھەتا نھا پێشەنگە د خزمەتکرنا گەلێ کورد دا.
نێچیرڤان بارزانی گۆت ژی: ( ب ھەلکەفتا ١٦ی َتەباخێ ٧١ سالروژا دامەزراندنا پارتی گەرمترین پیروزباھیان ل ھەموو کادر و ئەندام و لایەنگیر و دوستێن پارتی دکەین و پیروزباھیەکا تایبەت ژی ل خێزان و کەس و کارێن شەھیدێن سەربلند و پێشمەرگێن قارەمان دکەین ، پیروزباھیێ ل ھەموو چین و تەخێن جڤاکی ل کوردستانێ دکەین )
زێدەتر گۆت: ( د ھەلکەفتا دامەزراندنا پارتی دا ل گەل چەماندنا سەرێ رێزێ بو گیانێ شەھیدان ، سوزا بەردەوامیێ و رژدیێ بو سەر رێبازا پیروزا وان بدەین بو ب دەستڤەئینانا ھیڤیێن وان و خەونێن کەڤنێن گەلێ مە د کوردستانەکا سەربخوە و ئاشتیخواز و گەشەسەندی دا د سایا پێکڤە ژیان و خوشگوزەرانی و پێشکەفتنێن بەردەوام بو ھەموو پێکھاتەیێن ژێکجودایێن کوردستانێ)
نێچیرڤان بارزانی د درێژاھیا پەیاما خودا دیارکر ژی کو جھێ شانازیێ یە بو پارتی دڤی َقوناغا مێژویی دا وەکو ھەردەم رولێ پێشنگ د پروسەیا سەربخو و سەروەریا نەتەوەیی دا دبینیت و گۆت ژی: (پشکداریا کارتێکەرا کادر و ئەندامێن پارتی د پروسەیا سەربخوە و نەتەوەیی دا بەلگەیەکا حاشا ھەلنەگرە بو دلسووزیا وان بو رێبازا پیروزا پارتی و بارزانی )

ئەڤرۆ نیوز ، نەوزاد ھلۆری:
چەند دەزگەھەکێن راگەھاندنێ بەلاڤکر کو ھەڤکاریێن ئەمریکا بو ھێزێن پێشمەرگەی ھاتینە راگرتن ، بەلێ وەزارەتا پێشمەرگەی ئەڤ یەک رەتکر و دیارکر ژی کو ھەڤکاریێن ئەمریکا ب بریارەک ستراتیجی ھاتینەکرن و ھوسا ب ساناھی ناھێتە ھەلوەشاندن.
ھەلگورد حیکمەت رێڤەبەرێ راگەھاندنا وەزارەتا پێشمەرگەی دیارکر کو ئەو نوچەیێ ھاتیە بەلاڤکرن تنێ چەواشەکاریەکە و وەکو وەزارەت دێ پێرابونێن قانونی گرینە بەر و بۆ ئەڤرۆ نیوز گۆت: ( ھەڤکاریێن سەربازی و دارایی ژلایی َئەمریکا و حکومەتا وان بو ھێزێن پێشمەرگەی د بەردەوامن و ھەتا پێشمەرگە ھەیە دێ بەردەوام ژی بن و چوو بریار ژی بو راگرتنا وان نینن و دڤی دەمی دا نابن ژی)
زێدەتر گۆت: ( بریارا ھەڤکاریا ئەمریکا بو ھێزێن پێشمەرگەی بریارەک سادە نینە کو ھوسا ب ساناھی بھێتەدان ژ بەرکو کونگرێستا ئەمریکا و پنتاگون و کوشکا سپی لسەر راوەستایە و ئەوان پەسەندکریە کو ھاریکاریێن دارایی و سەربازی بو پێشمەرگەی بھێنەکرن ژبەکو ھێزێن پێشمەرگەی ھێزەک رێکخستیە و بەرامبەر تیرورستان کارڤەدانێن جیھانی ھەبوویە و تاکە ھێزبوویە لسەر عەردی شیایی بەرگریێ بکەت و داعشێ بشکێنیت)
ل بارا ئەوان پارێن ھاریکاریێن دارایی کو ٤١٥ ملیون دولاربوون ژلایێ ئەمریکا بو ھێزێن پێشمەرگەی ھاتینە تەرخانکرن ھەلگوردی گوت: ( ئەڤ ھاریکاریە د بەردەوامن و نە ھاتینە راگرتن ، و ئەم نھا کار لسەر ستراتیجیەک و ھەڤکاریێن زێدەتر بو پێشمەرگەی دکەین نھا کار لسەر پروتوکولەکا نو و جوداتر ل گەل پناتون ھەیە کو نک تنێ نھا بەلکو بو دەھان سالێن دن ژی بەردەوام بیت ژ روویێ چەک و تەقەمەنی و مەشق و راھێنان و دارایی )