ئەڤرۆ نیوز ، نەوزاد ھلۆری:
نڤیسکار رێزان سالح کو ب رێزان بارزانی دھێتە نیاسین ئێکە ژ وان خانمێن نڤیسکارێن دەڤەرا بارزان کو دەستەکێ باش دنڤیسانێ دا ھەیە و ھەتا نھا سێ پرتوکێن چاپکری ھەنە و چەند پرتووکەکێن دن ژی ل بەر نڤیسانێ نە و پشکداری د چەند پرتووکەکان دا کریە ، و ئێک ژ پرتووکێن وێ ب پێنج زمانان ھاتیە نڤیسان ، لسەر ھندەک ھزر و بیر و ئاستەنگێن ئافرەتان دوارێ نڤیسانێ دا چەند پرسیارەکان بەرسڤ ددەت.
رێزان بارزانی دیارکر کو ھەر ژ زاروکینی ئەوێ حەزا نڤیسانێ ھەبوویە و بۆ ئەڤرۆ نیوز گۆت: ( ب شێوەیەکێ گشتی ل سالا ٢٠١٠ من دەست ب نڤیسانا پرتووکێ کریە تایبەتی دوارێ پەروەردەیی و جڤاکی دا ھەتا نھا من سێ پرتووک ب ناڤ و نیشانێن ” بارزانی نەمر ” کو ب پێنج زمانا ھاتیە نڤیسان ب زمانێ کوردی ھاتیە نڤیسان و ب چوار زمانان ژی ھاتیە وەرگێران و ھەموو ژی د چارچوڤێ ئێک پرتوک دا ھاتیە کومکرن ، دیسان ” ژیان و بەختەوەری لە دیدی بیرمەندان دا ، بیر بکەرەوە” ، و دیسان دوو پرتوکێن دن کو ژ ھەموو قوناغێن نڤیسانێ دوماھی ھاتینە بتنێ مایە کو بھێنە چاپکرن نڤیساینە )
زێدەتر گۆت: (ل ھەرێما کوردستانێ نڤیسارێن ژن و زەلام ھەردوو دکێمن کو ئەو ژی دزڤریت بو چەند ئەگەرەکان ژ وان ژی گرنگی نەدان د بوارێ نڤیسانێ دا ب تایبەتی ژلایێ دەزگەھێن چاپ و وەشانێ و لایەنێن شولەژێ ، ھەر دیسان کێمبوونا خواندەڤانان و گرنگی نەدانا خواندنێ ل کوردستانێ و نەبوونا پشتەڤانیا دارایی بو نڤیسەر و دەزگەھێن چاپ و وەشانێ ، ب ھزرا من ھەر کەسەکێ تشتەکێ د دلێ خودا بگریت و بکەت ئارمانج و کار لسەر بکەت دێ گەھیتە ئەوی تشتی ئەڤە سەرەرای کو ئەگەر ئاستەنگ ژی ھەبن ھەر بوو نموونە نەبوونا دەمی و زور بوونا کاروبارێن مالێ و کاری و بازنەیی یا ھزری ھندەک کەس و لایەنان کو رێگرن ل بەرامبەر نڤیسان و ئەنجامدانا ڤەکولینان )
رێزان ل سالا ١٩٨٧ د کەمپێن ئاوارەیێن ئیرانێ ژ دایکبوویە و خێزاندارە و وەکو فەرمانبەر ل رێڤەبەریا شەھید و ئەنفالکریێن بارزان دەوامێ دکەت و ل گوندێ بازێ یا سەر ب دەڤەرا بارزان ئاکنجیە و د درێژاھیا ئاخفتنێن خودا گۆت ژی: (ب ھزرا من باشترین بوار ئافرەت تێدا کار بکەت وەکو نڤیسان بوارێ پەروەردەیی و جڤاکی یە ژبەرکو ھەردەم ئافرەت دجڤاکێ مەدا وەکو بونەوەرەکێ پەروەردەیی و جڤاکی ھاتیە دیتن ، بەلێ ل گەل ڤێ یەکێ ژی گرنگە د ھەموو بواران دا کار بکەت و بنڤیسیت نھا مە ئافرەت ھەیە سیاسەتمەدارە و ھەیە شارەزا و چالاکڤانە د وارێن بازرگانی دا )
ل بارا ئاستێ نڤیسانێ ل دەڤەرا بارزان رێزانێ گۆت: (دەڤەرا بارزان ژی وەکو ھەموو دەڤەرێن کوردستانێ د ئاستەک لاواز دا دبوریت دوارێ نڤیسانێ دا)
د درێژاھیا ئاخفتنێن خودا دیارکر ژی کو پێدڤی یە نڤیسەرێن کورد ب تایبەتی ئافرەت د ھەردوو ئاستێن نڤیسان و وەرگێرانێ بزاڤێن خورت بکەن و گۆت ژی: (ئافرەت چوو ل گوندان بیت یان باژێرا دکاریت روولێ خوە ببینیت دھەر وارەکی َدا بیت بەلێ ئافرەتا گوندان ژ روویێ ھێز و شیانان ل گوندان ب ھێزترە وەکو ل باژێران بەلێ ل گەل ڤێ یەکێ ئافرەتێن باژێران چەنسێ زێدەتر ژ یێن گوندان ھەنە کو ئەو ژی دزڤریت بو ھەبوونا خولێن زێدەتر ب تایبەتی دوارێ رەوەشنبیری و پەروەردەیی دا ، ئافرەت مروڤەکا زور مەزن و خودان شیانە و مەزناھی و دلسوزیا وێ بوویە سەدەم کو زەلام زور ب زەحمەت د ھەست و نەستێن وێ بگەھیت)
رێزان کو نھا بەرپرسیارەتیا پشکا کاروبارێن شەھیدان ل رێڤەبەریا کاروبارێن شەھید و ئەنفالکریێن بارزان و ئەنداما پێشوازیێ یا مونومێنتا بارزانیان کاردکەت رولەکێ بەرچاڤ ھەیە د رێنیشاندان و دانا زانیاریان بو رۆژنامەڤان و ڤەکولەر و کەسانێن بیانی و نافخوی دەما کو دھێنە سەر گورستانا جینوسایدکریان و موزەخانە و مونومێنتا جینوسایدکریان ل بارزان.
نڤیسەرا ئافرەتا دەڤەرا بارزان دیارکر ژی کو نھا ریفراندوم وەکو دەستکەفتەکێ نەتەوەیی و نیشتمانی ل پێشامەیە و پێدڤی یە نڤیسەر دڤی واریدا زورترین نڤیسانێن پشتەڤانیێ بنڤیسن و ل دوماھیێ گۆت ژی : (نھا ئەز و ھەڤژینێ خوە پێکڤە پروژەیەکێ ھەڤپشک درۆست دکەین لسەر “شیفا گەردی ” کو لسەر ژیان و خەبات و کارو بزاڤێن وێ ب تایبەتی دوارێ میدیایی دا و د دەمەکێ کورت دا دێ کەڤیتە دخزمەتا خواندەڤانان دا )
نيشاندان