ئه‌ڤرۆ نیۆز،زنار تۆڤى:
ده‌رهێنه‌را كوردا رۆژئاڤایێ كوردستانێ نه‌سرین عابدین كو ئه‌ڤه ماوێ چه‌ندین سالانه ل هه‌رێما كوردستانێ دژیت،د دیداره‌كێدا بۆ ئه‌ڤرۆ نیۆز دبێژیت:ئه‌ڤه سێ ساله ئه‌ز كارێ ده‌رهێنه‌ریێ دكه‌م و ل ده‌ستپێكێ من ل شامێ وه‌ك هاریكارا ده‌رهێنه‌رێ كاركریه،هه‌روه‌سا من حه‌ز دكر كو ئه‌ز ل شامێ د وارێ سینه‌مایێ دا كار بكه‌م،لێ پشتى ئالۆزى و شه‌ر ل رۆژئاڤایێ كوردستانێ و سووریێ په‌یدا بووین،من حه‌ز دكر وان نه‌خۆشى و ده‌رده‌سه‌ریێن ب سه‌رێ خه‌لكێ هاتین بكه‌مه فلمه‌كێ سینه‌مایى و نیشا خه‌للكێ جیهانێ بده‌م.
هێشتا دبێژیت:ژبه‌ر نه‌بوونا كۆمپانى و سپۆنسه‌ران بۆ چێكرنا فلمان،هه‌تاكو نوكه بتنێ من كورته فلمه‌ك چێكریه ب ناڤێ “دۆژه‌ها سار”،كو حه‌فت ئه‌كته‌رێن سه‌ره‌كى ل گه‌ل زێده‌ترى 70 كۆمبارسان كو ژ باكۆر و باشۆر و رۆژهه‌لات و رۆژئاڤا كوردستانێ پشكدارى تێدا كریه و ماوێ “20” خۆله‌كان یێ درێژه و دیسا ل سه‌ر كیستێ خوه من ئه‌ڤ كورته فلمه چێكریه و من 23 هزار دۆلار لێ مه‌زاختینه،هه‌روه‌سا ستافه‌كێ پرۆفشیۆنال یێ ئیرانى ژى ل گه‌ل مه كاركریه،هه‌روه‌سا نوكه ئه‌ز كار د چێكرنا پێنج ڤیدیۆ كلیپان ژى دكه‌م و ئێك كلیپ ژ وان ل سه‌ر پێشمه‌رگێ كوردستانێ یه و من ب دوماهى ئینایه.
نه‌سرینێ دیاركر ژى:نوكه فلمه‌كێ سینه‌مایى یێ درێژ ل به‌رده‌ستێ من هه‌یه ب ناڤێ”سیخۆر”،لێ ڤى فلمى پێدڤى ب ئێك ملیۆن دۆلاران هه‌یه،هه‌تاكو بهێته چێكرن،له‌ورا دێ گه‌له‌ك یا ب زه‌حمه‌ت بیت كو ئه‌ز ب شێم ڤى گۆژمێ پاران ب ده‌ست خوه‌ڤه بینم،هه‌روه‌سا د ڤى فلمى دا دێ دو ئه‌كته‌رێن سه‌ره‌كى ل گه‌ل چه‌ندین ئه‌كته‌رێن دى پشكداریێ تێداكه‌ن و ماوێ وى ژى دێ 94 خۆله‌ك بن،هه‌روه‌سا دێ ئه‌كته‌ر ژ هه‌موو پارچێن كوردستانێ پشكداریێ تێدا كه‌ن،هه‌روه‌سا گۆت ژى:هه‌ر چه‌نده رێڤه‌به‌ریا ره‌وشه‌نبیرى و هونه‌رى ل دهوكێ گه‌له‌ك هاریكاریا من یا مه‌عنه‌وى دكه‌ن،لێ هاریكاریا دارایى نینه،دیسا ل كورستانێ چ كۆمپانیێن به‌رهه‌مهێنه‌ر ژى نینن كو ئه‌ڤى فلمى ب ستوویێ خوه‌ڤه بگرن و به‌رهه‌م بینن،له‌ورا دخوازم كو هاریكاریا من بهێته كرن ژ پێخه‌مه‌ت ئه‌ز ب شێم ئه‌ڤى فلمێ سینه‌مایى چێكه‌م و به‌رهه‌م بینم.
نه‌سرینێ ئه‌و چه‌ند ژى خۆیاكر:هه‌ر چه‌نده نوكه ره‌وشا سینه‌مایێ ل كوردستانێ د قۆناغه‌كا باشدایه،لێ بتنێ ئاریشه نه‌بوونا سپۆنسه‌را و كۆمپانیێن به‌رهه‌مهێنه‌رن.
نيشاندان