ئه‌ڤرۆ نيوز:
دەرھێنەرێ گەنج کاروان مێسکی، بۆ ئەڤرۆ دیارکر، ئەڤە دەمەکە ئەو مژوولی کلیپەکێ یە بۆ سترانبێژ سەمیرعەبدوللا و نوکە دقۆناغا مۆنتاژی دایە، ل بەرە ل دەمەکێ نێزک بھێتە بەلاڤکرن.، و ناڤەروکا ڤێ کلیپی ل دۆر غەریبیێ یە، کو کەسەک ژمالا خوە، و دایکا خوە، و جەگەرا خوە، و وەلاتێ خوە غەریب دبیت و دبێژیت کوردستانە وەلاتێ من.
کلیپا دایێ، ژ پەیڤ و ئاوازێن سەمیری بخوە نە، ژدەرھێنانا کاروان مێسکی و و کامیرە ھیًرش بەرواری و رێڤەبەرێ وێنە گرتنێ جڤین مەھدی یە.

ئەڤرۆ نیوز:
ھونەرمەندا ناڤدارا کورد گولستان پەروەر، دکورتە دیدارەکا تایبەتدا ل گەل رۆژناما ئەڤرۆ، ل دۆر نووترین دەنگوباسێن خوە یێن ھونەری و کارو پرۆژێن خوە یێن پاشەرۆژێ گۆت: ئەڤە حەفت سالە ئەز کوردستانێ دژیم، ل گەل ڤەبوونا کەنالێ (رووداو) بۆ دەمێ دو سالان مە بەرنامەک ھەبوو، ھەر ل وی دەمی مە ھزر د بەرنامەکێ نووتر دا کر، لێ قەیرانا دارایی ب سەر داھات و پرۆژێ مە ما راوەستیای، لێ دبیت ل پاشەرۆژێ مە بەرنامەکێ دی ھەبیت، سەبارەت ژیانا من یا کەسایەتی ژی، نوکە ئەز یا ل دھۆکێ دژیم و مەخانیێ خوە یێ ھەی، ل ھەولێرێ ژی مە شقەک ب کرێ گرتیە، کوڕێ من یێ ئێکانە سەرەخەبوون و ھەڤژینا خوە تێدا دژین، ئانکو ئەز بوویمە خەسی ژی، لێ ھێشتا نەبوویمە داپیر، دەبارەی پەیوەندیێن من ژی ل گەل ھونەرمەند شڤان پەروەر کو ھەڤژینێ منە گەلەک دباشن، ئەو ژی ل گەل مە دژیت، لێ مشە ئەو دچیتە ئورۆپا ژبەرکو گەلەک داخوازیێن ئاھەنگان بۆ دھێن.
گولستانێ گۆت: ھەرچەندە د ماوێ بۆری دا چەندین سرود و ستران ب قارەمانیا پێشمەرگەی ھاتینە گۆتن و کلیپکرن، و من ژی حەزدکرسترانەکا وەسا بێژم و ئەز گەلەک لێ گەریام ژی لێ چو سترانێن بھێز تەمەت مەزناھیا پێشمەرگەی ب دەست من نەکەفتن کو بێّژم، لێ بەری چەند رۆژان من سەرەدانا سەندیکا ھونەرمەندێن کوردستانێ لقێ دھۆک کر، و ل گەل خانم ئەڤین حسێن سەرۆکا سەندیکایێ مە بەحسکریە ل ڤان رۆژان سەرەدانا سەنگەرێن پێشمەرگەی بکەین، ھەر چەندە بەری نوکە مە سەرەدانا ھندەک میحوەرێن دی کربوو، ژوانا میحوەرێن زۆمار و مەخمۆر.
د لایەکێ دی دا گۆت: دەمێ ھونەرمەندێ مۆزیکژەن دلشاد محەمەد سەعید ھەردو سترانێن (پێشمەرگە و شنگال) چێکرین من حەزدکر پشکداری تێدا کربا، لێ ئەز نەھاتمە داخوازکرن، ژ بەرکو ئەز وی دەمی ل دھۆکێ بووم، ئەو ستران ژی ل ئورۆپا دھاتنە چێکرن، ھەروەسا بەری ھونەرمەندێ مۆزیکژەن زاھد بریفکانی وەغەربکەت من گەلەک جاران دگۆتنێ شێخێ من نوکە ئەم ھەردو یێ ل دھۆکێ دێ وەرە دا کارەکی پێکڤە بکەین، ھەردەم دگۆت: نوکە ئەز گەلەک ب نڤیسینا پرتووکان ڤە یێ مژوولم، و مخابن ژناڤ مە بارکر و ئەم نەشیاین چو کارێن ھونەری ل دھۆکێ ئەنجام بدەین.
ل دووماھیێ گۆت: نوکە ل باشۆرێ کودرستانێ دەلیڤەکا باش بۆ دەولەتبوونێ ھاتیە پێش، ھەکە ژ دەست بدەین وی دەمی ئەم کورد ب کێر تشتەکی ناھێین.