ئەڤرۆ نیۆز،زنار تۆڤی:
پشتی کو دڤێ گەشتێ دا سەرەدانا وەلاتێن سعودیێ و ئیسرائیلێ و فەلەستینێ کری،ئەڤرۆ رۆژا چارشەمبی 24.5.2017 سەرۆکێ ئەمریکا دۆنالد ترەمپ گەهشتە ڤاتیکان و بریارە سەرۆکێ ئەمریکا ل گەل پاپایێ ڤاتیکانێ کۆمبیت و بەحسێ چەندین تەوەرێن گرنگ بکەن،هەروەسا پشتی وەلاتێ ڤاتیکانێ ترەمپی ل بەرە سەرەدانا چەندین وەلاتێن دی یێن جیهانی بکەت.
ئه‌ڤرۆ نيوز:
ڤه‌كۆلينه‌كا ئه‌مريكا ماده‌كى سرۆشتى يێ ناڤ زه‌يتونێ ئاشكه‌را كر كو د شيان دايه رێگريێ ل دروستبوونا زارۆيى بكه‌ت وه‌كو حه‌بێن رێگريكه‌ر بهێته ب كارئينان.
نوشدارێن زانكۆيا بێركلى ل ئه‌مريكا دبێژن: “ماده‌كێ سرۆشتى يێ د ناڤ زه‌يتونێ دا ڤه‌ديتى، دشيان دايه رێگريێ ل سپێرمى بكه دا كو نه‌گه‌هيته هێكێ، ئه‌و روون دكه‌ن ژى خوارنا گه‌له‌ك زه‌يتونان نه‌شێت رێگريێ ل دووگيانێ بكه‌ت، به‌لێ خوارنا پێكهاتێ كيمياوى ب ره‌نگێ حه‌بێ دێ شێت رێگريێ كه‌ت.
سه‌رۆكا تيما ڤه‌كۆله‌ران، د. پۆلينا ليشكۆ دبێژيت: “هه‌ردو ره‌گه‌ز دشێن ڤان حه‌بان ب كار ئينن بۆ رێگرتن ل زارۆبوونێ، كارتێكرنێن لاوه‌كى ژى يێن حه‌بان وه‌كو به‌رى نوكه كو دبنه ئه‌گه‌رێ تووشبوونێ ب نه‌خۆشيێن دلى و كلۆبوونا خوينێ و خه‌مۆكيێ نينن”.
د. پۆلينا خۆيا ژى دكه‌ت كو ماددێ ليوپۆل و پرايميسترينى يێ ناڤ زه‌يتونێ دشێت سپێرمان ب راوه‌ستينيت و ئه‌وێ هێزێ كێم بكه‌ت كو دشێت د وێ رێ دا بچته ناڤ هێكێ، هه‌ر ديسا دده‌ته زانين ئه‌ڤ ماددێ كيمياوى يێ د ناڤ “مانگۆ، ترى و ئه‌لۆڤێرايێ دا هه‌يى”.
سه‌رۆكا تيما ڤه‌كۆله‌ران دبێژيت: “ماددێ كيمياوى يێ بۆ خانێن سپێرم نه‌يێ ژه‌هراوى يه، سپێرم دشێت پشتى هنگى ژى ب لڤن، به‌لێ هه‌مان كارتێكرن نامينيت”، د ده‌مه‌كى دا كو ئه‌ڤ حه‌بێن دهێنه به‌رهه‌مئينان دشيان دايه پشتى پێنج ده‌مژمران ل سه‌ر بۆرينا سكسى ژى بهێنه بكاربينن و كارتێكرنا رێگريێ ل سه‌ر زارۆبوونێ دێ هه‌بيت.
ڤه‌كۆله‌رێن ئه‌مريكى ب هيڤى نه ئه‌و ده‌رمانێ نوو د ماوێ دو سالێن دى دا بكه‌ڤيته به‌ر ده‌ستێ ژن و زه‌لامان كو دشيان دايه به‌رى و پشتى سكسى ب كار بينن.
ئەڤرۆ نیۆز،زنار تۆڤى:
ئەڤرۆ رۆژا سێشه‌مبى 23/5/2017 د رێوره‌سمه‌كێ ژ هه‌ژیدا لیژنا ناوچا كانى ماسێ یا پارتى ل ژێر چاڤدێریا عه‌مه‌ر ئۆره‌یى به‌رپرسێ لقا 18 یا پارتى دیمۆكراتى كوردستان،بیره‌وه‌ریا شۆره‌شا گۆلانێ ب به‌رهه‌ڤبوونا هژماره‌كا مه‌زن یا پێشمه‌رگێن شۆره‌شا گۆلانێ ئه‌ڤ بیره‌وه‌ریه ب چه‌ندین چالاكیێن جۆدا ل كانى ماسێ ساخكر،هه‌روه‌سا چه‌ندین هه‌لبه‌ست ژلایێ چه‌ندین هه‌لبه‌ستڤانێن پێشمه‌رگه هاتنه خواندن و چه‌ندین پێشمه‌رگه‌یان به‌حسێ سه‌ربۆرا ژیانا خوه یا پێشمه‌رگایه‌تیێ ژى كر و هه‌روه‌سا ئالایه‌كێ مه‌زنێ كوردستانێ ژى ب ڤێ هه‌لكه‌فتێ ل سێریانا كانى ماسێ هاته بلندكرن.
عه‌مه‌ر ئۆره‌یى به‌رپرسێ لقا 18 یا پارتى دیمۆكراتى كوردستان ل سه‌ر ڤێ بیره‌وه‌ریێ بۆ ئه‌ڤرۆ نیۆز دیاركر:شۆره‌شا گۆلانێ تایبه‌تمه‌ندیا خوه هه‌بوو،چونكى پشتى شكه‌ستنا سالا 1975 حوكمه‌تا عێراقێ یا وى سه‌رده‌مى ب هه‌موو باوه‌ریا خوه دگۆت ئێدى شۆره‌شا كوردى ب دوماهى هات،لێ شۆره‌شا گۆلانى هه‌ر زوو ده‌ستپێكر و ئه‌ڤه په‌یامه‌ك بوو بۆ دۆژمنێن مه،كو كورد یێن ماین و دێ مینن ژى،هه‌روه‌سا گۆلان په‌یامه‌ك بوو بۆ دوستێن مه ژى كو ئه‌م یێن ماین و دێ شۆره‌شێ كه‌ین،له‌ورا شۆره‌شا گۆلانا پێشكه‌فتنخواز ب شێوێ پارتیزانى ده‌ستپێكر و شیا د ده‌مه‌كێ كورتدا سه‌ركه‌فتنێن مه‌زن تۆمار بكه‌ت،هه‌روه‌سا گۆت ژى:ژبه‌ركو گه‌له‌ك جاران بیروه‌ریا شۆره‌شا گۆلانێ ل ده‌ڤه‌را كانى ماسێ هاتیه ساخكرن،له‌ورا مه ژى به‌رده‌وامى دایه ڤێ چه‌ندێ و هه‌روه‌سا ئه‌ڤ ده‌ڤه‌ره لاندكا هه‌ردو شۆره‌شێن ئیلۆن و گۆلانێ یه و دیسان ژى ل سه‌ر ده‌مێ شۆره‌شا گۆلانێ ئێك ژ مه‌زنترین داستانێن وێ شۆره‌شێ كو داستانا كانى ماسێ بوویه ل ڤێرێ هاتیه تۆماركرن،له‌ورا وه‌كو رێزگرتن بۆ شه‌هیدێن ڤێ داستانێ هه‌ر سال ئه‌م ڤێ بیره‌وه‌ریێ ل ڤێرێ ساخ دكه‌ین،دیسا ئه‌و پێشمه‌رگێن ئه‌ڤرۆ ژى ئاماده‌بووین پرانیا وان پشكدارى د داستانا كانى ماسێ دا كریه.
عه‌مه‌ر ئۆره‌یى زێده‌تر گۆت:ده‌مێ ئه‌ڤرۆ ئه‌ڤ پێشمه‌رگه ژ چیاى هاتینه خوار و رێزبووین وه‌كو بیرهاتن بۆ ئه‌نجامدانا چالاكیه‌كا له‌شكرى،بیرهاتنێن شۆره‌شا گۆلانێ هه‌موو هاتنه پێش چاڤێن من و روندكێن گریێ ژ چاڤێن من هاتن،چونكى ئه‌ڤرۆ گه‌له‌ك هه‌ڤال و هه‌ڤچه‌په‌رێن مه یێن شۆره‌شا گۆلانێ ل گه‌ل مه نه‌بوون و شه‌هید بووینه،له‌ورا هندى ئه‌م بشێین دێ ڤان بیره‌وه‌ریان ساخكه‌ین و دێ ب ره‌نگه‌كێ به‌رفره‌هتر ژى ئه‌نجامده‌ین،چونكى ئه‌ڤه وه‌فاداریه‌كه بۆ وان پێشمه‌رگه و شه‌هیدێن ڤێ شۆره‌شێ،هه‌روه‌سا بلندكرنا مه‌زنترین ئالا ل كانى ماسێ رامانا هندێ دده‌ت،كو ب زووترین ده‌م ئه‌ڤ ئالایه دێ بیته ئالایێ ده‌وله‌تبوونێ.
ل دوماهیا بیره‌وه‌ریا شۆره‌شا گۆلانێ ل كانى ماسێ پێشمه‌رگه‌یان چه‌ندین ده‌وات و دیلانێن كورده‌وارى ل به‌ر ده‌نگێ سترانبێژ مێهڤان بێدۆهى كرن.
ئەڤرو نیوز :
رێڤەبەریا گشتی یا پولیسێن پارێزگەھا دھوکێ دەستەسەرکرنا چەند دزیکەران راگەهاندن کو کەرستەیێن ئاڤاهیان و پارە ژ مالان د دزین.
ھێمن سلێمان بەرپرسێ راگەھاندنا رێڤەبەریا گشتی یا پولیسێن پارێزگەھا دھوکێ دیارکر کو ئەوان د چەند رۆژێن بوری دا شیاینە پێنج تاوانباران دەستەسەر بکەن و گۆت: (ژلایێ پۆلیسێن نەهێلانا گونەهباریان ڤە دناڤا سەنتەرێ دهۆکێ دا دچەند وەخت و جهێن ژێکجودا دا پێنج دزیکەر هاتینە دەستەسەرکرن کو ئەو ژی دزیکەرێن کەرستەیێن ئاڤاهیان و پارەبوون ب شێوەیەک دزی ژ 1 مالان کرینە و کەرستەیێن وان لسەر خانویێن وان دزینە”
لسەر پەیجێ خوە زێدەتر دبێژیت: (پشتی کو ئەوان دزیکەران دانپێدان ب تاوانێن خوە کرین ب بریارا دادوەرێ ڤەکۆلینێ بو دادگەهێ هاتینە رەوانەکرن داکو بگەهنە سزایێ خوە)
ئەڤرۆ نیۆز، قائید میرۆ:
به‌رپرسه‌كێ وه‌زاره‌تا كار و كاروبارێن كۆمه‌لایه‌تی ئاشكراکر،پڕۆژێ به‌لاڤكرنا قه‌ڕێ بچووك ژلایێ وه‌زاره‌تا دارایی هاتیه راگرتن و دیاركر، بڕیاربوو ڤێ هه‌یڤێ بهێته ده‌ستپێكرن ،به‌لێ بۆ ده‌مه‌كێ نه‌دیار دێ گیرۆبیت،هەکە بهێته ده‌ستپێكرن دێ هاریكاریه‌كا باشبیت بۆ وه‌لاتیێن بێكار.
هه‌مزه مه‌غدید، په‌یڤدارێ وه‌زاره‌تا كاروبارێن كۆمه‌لایه‌تی بۆ ئه‌ڤرۆ نیۆز گۆت” بڕیاربوو ڤێ هه‌یڤێ ده‌ست ب به‌لاڤکرنا قه‌ڕێ بچووك بهێته‌كرن ژلایێ وه‌زاره‌تا كاروبارێن كۆمه‌لایه‌تی، به‌لێ پشتی بۆ ره‌زامه‌ندیێ پڕۆژه ل سه‌رۆكایه‌تیا جڤاتا وه‌زیران هاتیه هنارتن بۆ وه‌زاره‌تا دارایی ئاریشه په‌یدابووینه و به‌لاڤکرنا قه‌ڕێن بچووك هاتیه گیرۆكرن و چو ژڤان نینه دێ كه‌نگی ده‌ستپێكه‌ت، مه پلان هه‌بو ڤێ هه‌یڤێ ده‌ست ب به‌لاڤكرنێ بكه‌ین و گوره‌ی رێنمایان هه‌ر وه‌لاتیه‌كێ پڕۆژه‌یه‌كێ بچووك هه‌بیت گوژمه‌كێ پاره‌ی وه‌كه قه‌ڕ بده‌ینێ ئه‌و وه‌كه هاندانه‌كێ بۆ به‌رده‌وامیا وه‌لاتیان بۆ كاركرنێ و پشته‌ڤانیكردنا كه‌رتێ تایبه‌ت.
هه‌مزه مه‌غدید گۆتژی” سالێن بۆری هژماره‌كا به‌رچاڤا وه‌لاتیان مفاداربووینه ژ قه‌ڕێن بچووك و چه‌ندین گه‌نج هه‌بوون بێكار به‌لیچ پشتی مفاداربووین ژ قه‌ڕی بووینه خۆدان دووكان و پڕۆژه‌یێن خوه، ڤێ قه‌یرانێ داژی مه داخوازكر ل سه‌رۆكایه‌تیا جڤاتا وه‌زیران به‌لافكرنا قه‌ڕێ بچووك ده‌ست پێ بكه‌ت چونكه دێ هه‌ڤكاریه‌كا باشبیت بۆ وه‌لاتیێن بێكار، به‌لێ مخابن ژلایێ وه‌زاره‌تا دارایی و ئابوری ئاریشه په‌یدابووینه و نوزانین دێ كه‌نگی ده‌ستپێكه‌ت.
ئه‌ڤرۆ نيوز:
نێچیرڤان بارزانى سه‌رۆك وه‌زیرێن هه‌رێما كوردستانێ د په‌یامه‌كێ دا، ته‌قینا باژێرێ مانچێسته‌ر یێ بریتانیا شه‌رمزار كر و سه‌ره‌خوشى ل كه‌س و كارێن قوربانی و گه‌ل و حوكمه‌تا بریتانیا كر.
سه‌رۆك وه‌زیرێن هه‌رێمێ دیاركریه كو ئه‌و پشته‌ڤان و هه‌ڤخه‌مێن گه‌لێ بریتانیایه و هیڤیا سلامه‌تیا زوو بۆ برینداران خواستیه.
سه‌رۆك وه‌زیرێن هه‌رێمێ ئاماژه ب وێ یه‌كێ كریه كو دووباره‌كرنا كریارێن تیرورستى ل باژێر و باژێركێن جودا جودا یێن جیهانێ، دووپاتیا پێدڤیا كارڤه‌دانێن بهێزتر دژى تیرور و تیرورستان و كاركرنه‌كا به‌رفره‌هتر ل سه‌ر ئاستێ نێڤده‌وله‌تى بۆ نه‌هێلانا هزرا توندره‌ویێ و تیرورێ دكه‌ت.
ئەڤرو نیوز ، نەوزاد هلورى:
پشتی کو ژلایێ تیمەکا نوشداری ل نەخۆشخانا گولان ل ئاکرێ دەستێ سەنایێ توشی نەخوشیەکا دژوارکری و ل دھوکێ دەستێ ھاتیەبرین ، بریارە کو سوبەھی نەشتەرگەریەکا چاڤى بو بھێتەکرن.
حسام رەجەب بابێ سەنایێ تایبەت بۆ ئەڤرو نیوز گۆت: (ب مەرەما ئەنجامدانا نەشتەرگەریەکێ بو کچا خوە سەنایێ سوبەھی دێ سەرەدانا ئێک ژ نەخۆشخانەیان کەم ، بەلێ نە ل دھوکێ بەلکو ل ھەولێر ، و نەشتەرگەری ژی دێ بو چاڤێ کچا من ھێتەکرن )
ل ھەیاما بووری سەنا حسام رەجب ئەو زاروکا د ژیێ دوو سال و پێنج ھەیڤی ژبەر برینا دەستێ وێ خەلکەکێ زور لسەر تورێن جڤاکی ب مەرەما دەربرینا سووز و ڤیانا خوە بەحس دکر و ل بارا رەوشا سەنایێ ژی بابێ وێ گۆت: (نوکە رەوشا سەنایێ زور باشە و چوو کێشە نینن ، تنێ سپیلکا چاڤێ وێ لاوازیی تێدایە ، بەلێ پا سەنا نوکە ھەست ب دەست برینا خوە دکەت کو ئەڤ یەک ژی بو من و سەنایێ ژی زور نەخوشە)
ئەڤرو نیوز :
ل ئێک ژ نەخۆشخانەیێن بەریتانیا زەلامەکێ پشتی چەندین سالێن ئەڤینێ ل داویێ لسەر لێڤا مرنێ ھەڤژینی پێکئینا.
رۆژناما دەیلی مەیلی یا بەریتانی راگەند کو ل ئێک ژ نەخۆشخانەیێن بەریتانیا بناڤێ “سبرینگ ھێل بروچیلی “رێورسمەکێ ھەڤژینیێ بو ئێک ژ نەخۆشێن وان ھاتە درۆستکرن کو لسەر لێڤا مرنێ بو ، و ئەڤە د دەمەکێ دا ھاتەکرن کو زەلامەک بناڤێ ” رای کیشاو ” بو دەما چەندین سالان حەژ کچەکێ دکر بناڤێ ” تراسی بروکس ” بەلێ ژبەر تێکچونا رەوشا ساخلەمیا وی نەشیا ھەڤژینێ پێکبینیت.
لگورەی زانیاریێن دەیلی مەیلی ژیێ رای کیشاو ٦٣ سالە و ژیێ تراسی بروکس ژی ٤٥ سالە و ھیڤی و ئومێدێن وان ئەوبوون کو روژەکێ پێکڤە ل گزریتا تینیریفی ھەڤژینیێ پێکبینن ، بەلێ ژبەرکو رای کیشاو یێ نەخوش بوو ھەموو ھیڤێن وان تێکچوون.
د راپورتا رۆژناما ناڤبری دا زێدەتر ھاتیە: (رای کیرشاو لسەر لێڤا گوری یە و ڤیایە بەری بمریت رۆژێن خوەیێن دوماھیێ ل گەل تراسی بروکس ببورینیت ژبەرڤێ رابوو ب ئەنجامدانا رێورسمەکێ رومانسی ھەر ل نەخوشخانا ناڤبری ب بەرھەڤبوونا کومەکا کەسان ھەردووان ھەڤژینی پێکئینا )
ئەڤرۆ نیوز :
شڤێدی تەقینەک ل باژێرێ مانچستەر یێ بریتانی روودا و د ئەنجامدا ٢٢ کەس ھاتینە کوشتن و ٥٩ کەسێن دی ژی برینداربوینە ، داعشێ ژی بەرپرسیارەتیا خوە ژ ئەنجامدانا وێ راگەھاند.
دەمەک بەریا نھا لسەر پێگەھێن خوەیێن تورێن جڤاکی داعشێ بەرپرسیارەتیا خوە ژ ئەنجامدانا تەقینا شڤێدی یا ئێک ژ ھولێن باژێرێ مانچستەرا یا بەریتانی راگەھاند.
ل گورەی راگەھاندنێن وان تەقین ب رێیا بومبەکا چاندی ھاتیە ئەنجامدان ، وەکو ئاماژەیەک کو ھێشتا ئەو یێن مایی و ب دوماھی نەھاتینە. ، پولیسێن باژێرێ ناڤبری راگەھاند کو ئەوان شیایە کەسەکێ دەستەسەر بکەن ب تومەتا دەست ھەبوون د تەقینێ دا و ژیێ وی ٢٣ سالن.
تێرێزا مەی سەرۆک وەزیرێن بریتانیا دکونگرەیەکێ رۆژنامەڤانی دا راگەھاند کو پولیس و دەزگەھێن ئاسایش و ھەولگیری کو تەقین ژلایێ کەسەکێ ھاتیە ئەنجامدان و ئەو بزاڤێ دکەن بزانن کا ئەو کەس بتنێ بوویە یان کومەکا کەسان بوویە و ئەم لسەر لێکولینێن خوە د بەردەوامین.
نيشاندان