ئەڤرۆ نیوز،ھەژار مەعروف:
ھەلگرا ناسناڤێ وەرزێ بوری یێ قارەمانیا کاسا ئێکەتیا ئاسیا یا تەپا پێ یانا جەویە د مەترسیا دەرکەفتنێ یە ژ قارەمانیێ کو چارەنڤێسێ وێ ھەتا نوکە نە دیارە بۆ دەربازبوونێ بۆ قوناغا ١٦ ژ قارەمانیێ دەمێ ئەڤرۆ یاریا خوە یا چارەنڤێسی ھەمبەری سەرکێشا کوما دوێ یانا حەد یا بەحرێنێ کەت ل یاریگەھا مەنامە ل بەحرێنێ.
یانا جەویە نوکە ل رێزا دوێ دھێت ب نەەـ خالان ھەمان خال یانا حەد یا بەحرێنی ل رێزا ئێکێ دھێت دڤێ یاریێ دا یانا جەویە ھەکە ب خوازیت دەربازبوونا خوە مسوگەر بکەت بتنێ دێ یاریێ بوو سەرکەفتنێ کەت ژبەرکو ھەڤرکا وێ یا سوری یانا وەحدە دێ یاریەکا ب سانەھی ھەمبەری یانا سەفا بیروت یا لوبنانی کەت کو سەرکەفتنا وەحدە یا سوری و وەکھەڤیا جەویە دێ تیما جەویە قارەمانیێ ب جە ھێلیت و ھەر تیمەکا د یاریا جەویە و حەد یا بەحرێنیی دا خوسارەت بیت ب رێژەیەکا مەزن دێ قارەمانیێ ب جە ھێلیت.
ژلایەکێ دویڤە نوونەرا دوێ یا عیراقێ یانا زەورا دەربازبوونا خوە بۆ قوناغا ١٦ مسوگەر کریە بتنێ ئەڤرۆ دێ یاریێ کەت بۆ مسوگەرکرنا سەرکێشیا کوما ئێکێ دەمێ یاریا خوە ل گەل یانا ئەھلی یا ئوردونی کەت دھەمان کوم دا جەیش یا سوری دێ بەرامبەر سوێق یا عومانی کەت کو تیما جەیش ژی پلێتا دەربازبوونێ مسوگەر کریە بەری نوکە و ژ کوما سیێ ژ ڤێ قارەمانیێ یانا وەحدادت یا ئوردونی ب سەرکێشیا راھێنەرێ عیراقی عەدنان حەمەد و محەرەق یا بەحرێنی دەربازبوونا خوە مسوگەر کریە .

زاخۆ,ھشیار دوبانکی:

وێنە :ئازاد زوم
ژڤانا ئەڤرۆ دەستەکا نوو یا کارگێریا یانا زاخۆ دەست ب کارێ خوە یێ یانێ بکەن کو سەروکێ یانێ پێکھاتیێ یە حکمەت محەمەد گەودا وەکو سەروکێ یانێ وعەبدولجەبار سیڤدین چێگرێ سەروکێ یانێ و بارزان مستەفا ، حەمید سەلمان ، بریندار حەمید شەریف ، حکمەت نوری ، ردوان نازی ، ئەمین یونس و روژین محەمەد سەعید وەکو ئەندامێن یانێ کو د ماوێ چار ھەیڤێن بوری دا یانا زاخۆ دێ سێ سەروک یانە و ١٧ ئەندامێن دەستەیا کارگێریا یانێ کوھورینە و ل دویڤ گوھورینا دەستەیا کارگێریا یانآ یا بەردەوام و ھاتنە کارگێریەکا نوو شارەزا و چاڤدێرێن وەرزشی ل زاخۆ بوجونێن جودا جودا و نابینن خزمەتا یانێ بشێن بکەن

ژێدەرەکێ نێزیک ژ دەستەیا ھاتیە دەست نیشانکرن ل کارگێریا نوو بۆ رۆژناما ئەڤرۆ دیارکر ژڤانە ئەڤرۆ نووێنەرێ گشتی ل وەرزشا کوردستانێ ل زاخۆ ئامادە بیت بۆ لێک گوھورینا کارگێریا یانێ .
ھەردیسان ناڤبری دیارکر ژی پشتی ئەڤ دەنگوباسە بەلاڤەبووی ل مالپەرێن کومەلاتی و رۆژناما گەلەک بوجونێن جودا جودا ھاتینە دیارکرن لێ ئەوان کارەکێ باش و پلانێن باش بۆ خزمەتا وەرزشا زاخۆ ھەنە ھەردیسان بریارە قوتابخانێن وەرزشی بۆ یاریێن تەپا پێ باسکت بولێ و خولێکدانێ ڤەکەین بۆ پێشخستا وەرزشا زاخۆ .

ئەڤرۆ،ھەژار مەعروف :
بریارە ئەڤ شەڤە ل دەمژمێر ٩:٤٥ یاریا دوێ ژ قوناغا پێش دووماھیا قارەمانیا یانێن ئورۆپا قارەمانێن خولا دناڤبەرا موناکۆ یا فەرەنسی و یوڤانتوس یا ئیتالی بھێـتەکرن ژ چارچوڤێن یاریێن ھاتنێ ژ ڤێ قوناغێ ھەردو یانە دێ ب ئارامی چنە دناڤ کەشو ھەوایێ یاریێ دا تایبەت یانا موناکۆ پشتی ھەڤرکا وێ پاریس سانجێرمان دووماھی یاریا خوە ژ خولێ خوسارەت بووی و مسوگەرکرنا ناسناڤێ خولا فەرەنسی ٩٠% بۆ یانا موناکو مای کو خوسارەتیا پاریس دخولا فەرەنسی دا مفایەکێ دەرونی مەزن گەھاندی یە یاریزانێن موناکو بۆ ڤێ یاریێ بەرامبەر تیما یوڤی ژێ نوکە ل سەر کێشیا خولا ئیتالی دھێت و نێزیکی برنا ناسناڤێ خولێ بوویە بۆ شەشێ ل دویڤ ئێک .
موناکو دێ شێت پشتی بورینا ٤٥٠ دقیقا گولا ئێکێ ل سەر دیوارێ ئیتالیا تومارکەت

رۆژنامەیێن ئورۆپی گرنگی دایە ڤێ یاریێ ب ھەر لایەنەکی ڤە وەسا ھاتینە دیارکرن کرنا یاری بۆ یانا موناکو بەرامبەر یوڤانتوس یا ب سانەھی نابیت ژبەرکو دێ ھەمبەری ئێک ب ھێزترین تیما کەت ژلایێ ھێلا بەرەڤانی و ھێزا گولچیێ وێ کو ل دەە یاریێن بوری ژ قارەمانیا چامپونیز لیگا ئورۆپا بتنێ دو گول سەر ھاتینە تومارکرن کو پێنج یاری یە ل دویڤ ئێک و ماوێ ٤٥٠ دقیقایە چو یانە نەبووینە بشێن تورا گولا گولچیێ وێ یێ بەرنیاس بوڤون ھەژینن ل گەل وێ چەندێ ژی ھێزا ھێرشبەریا وێ ژێ ل ئاستێ پێدڤی یە ل دەە یاریان دا شیانە ١٧ گولان توماربکەن و یوڤی نوکە د رەوشەکا باش دا بوریت دخولا ئیتالیا دا ژی سەرکێشیا خولێ د کەت ب ٨٤ خالان بتنێ ژ چار یاریێن مای پێدڤی سێ خالانە دا ناسناڤێ خولێ مسوگەر بکەت بۆ جارا شەشێ ل دویڤ ئێک و ٣٣ د مێژویا خوە دا و گەھشتی یە یاریا دووماھیا کاسا ئیتالیا ژی .
ژلایێ خوڤە یانا موناکو ئەوا ل وەرزێ ئەڤ سالە د باشترین رەوشا خوە دا بوریت ل ھەڤدە سالێن بوری دا کو نوکە سەرکێشیا خولا فەرەنسا کەت و نێزیکی ناسناڤێ خوە یێ ھەشتێ بوویە د دیروکا خوە دا بتنێ پێدڤی شەش خالایە ژ چار یاریێن مای دێ ناسناڤی مسوگەر کەت لێ رێیا وێ یا ب سانەھی نابیت بۆ دووماھیا چامپونیز لیگا ئورۆپا ژبەرکو ئەو باش د زانن دێ ھەمبەری ئێک ب ھێزترین یانێن ئورۆپی و ئیتالی کەت لێ چاڤدێر و شروڤەکەرێن وەرزشی ل ئورۆپا وەسا داینە دیارکرن موناکو ئەوا ب رێیەکا ب زحمەت گەھشتی یە ڤێ قوناغێ پاریەکێ ب سانەھی نابیت و نوکە د باشترین رەوشا خوە دایە.
بوفون ل دەمێ من پشکداری د موندیالا فەرەنسا دا کری مپاپی ل وی وەلاتی دایکبوویە

رۆژناما مارکا د راپورتەکا خوە دا گرنگی دا یە ستێرا یانا موناکو یێ گەنج کلیان مپایی و گولچیێ خودان شیان و شارەزا یێ یانا یوڤانتوس بوڤون کو د راپورتا خوە دا دیارکریە دێ ھەڤرکیەکا ب ھێز دناڤبەرا ھەردو ستێران دا ھێتەکرن بوڤون ئەوێ شیای ١٨٠ دقیقا تورا گولا خوە ھەمبەری بەرشەلۆنا و سێ ب ھێزترین ھێرشبەرێن جیھانێ پارێزیت ئەوژی مێسی و نیمار و سوارێز دێ شێت د ڤێ یاریێ دا ھەمبەری مپاپی یێ ١٩ سالی پارێزیت گولا خوە کو ئەڤ یاریزانە نوکە بوویە گرنگیا ھەمی یانێن مەزن ل ئورۆپا و چاڤەرێ دھێتەکرن پاشەرۆژەکا گەش ئەڤی یاریزانی ھەبیت دناڤبەرا ھەردو یاریزانان دا ٢٠ سال ھەنە کو بوڤون ٣٩ سالە و مپایی ١٩ سالە، د داخویانیەکێ دا بوڤون سەبارەت ھێرشبەرێ موناکو مپایی دیارکر بوو ل دەمێ مپاپی ژ دایکبووی ئەوی ل وی دەمی یاری کر و پشکداری ل گەل ھەلبژارتیێ خوە د موندیالا جیھانی دا ل وەلاتێ فەرەنسا دا کر و ب خوشی دبینت ئەو یاری بەرامبەر ئەوان یاریزانان بکەت یێن ب ڤی رەنگی .
ھەردیسان بوڤون ئاشکرا کر ژی ئەوی یاری بەرامبەر سێ نەوە کریە کو سالێن پێنجیا و شێستان و نوکە ٢٠٠٠ ژی کەت ئەو ب شانازی دبینت کو ئەو شیای یە یاری ل گەل ئەڤان ھەمی یاریزانان بکەت ل دووماھیێ بوڤون دیارکر ژی مپایی ژ یاریزانێن خودان شیان و پاشەرۆژەکا گەش ھەیە و ئەو دەمێ یاریێ ھەمبەری ستێرێن وەکو مێسی و رونالدو کەت بو وی خوشترە ژبەرکو ئەو دێ وەکو بیرھاتن بۆ مینن .
ژلایێ خوڤە ستێرا موناکو یا گەنج مپایی دیارکر ئەو دخوازیت یاریێ بەرامبەر بوڤون بکەت ژبەرکو دێ ھەمبەری ئێک ژ باشترین گولچیا د مێژویا تەپا پێ دا کەت و ھەمی بزاڤا کەت گولەکێ ل سەر توماربکەت .
دیبالا ٢٠١٧ دێ بیتە سالا یوڤانتوس یا زێری

ستێرا یانا یوڤانتوس یا ئیتالی پاولو دیبالا بۆ مالپەرێ ئێکەتیا تەپا پێ یا ئورۆپی دیارکر ئەڤ سالە دێ بیتە سالا خوشی بۆ یانا یوڤانتوس بۆ برنا ھەمی ناسناڤێن نافخوی و ئورۆپی ژبەرکو یانا ئەوان نوکە ئاستەکێ بلند د قارەمانیێن نافخوی و ئورۆپی دا پێشکێش کەن ھەر چەندە ئەرکێ ئەوان بۆ قارەمانیا چامپیونیز لیگ یا ب سانەھی نابیت لێ د شیان دا ھەیە ئەو بشێن ھەڤرکا یانێن دی بکەن و ڤێ قارەمانیا گرنگ بۆ حەژێکەر و جەماوەرێ ڤێ یانێ ب دەستخوڤە بینن
لیپی یوڤانتوس دێ رێزێ ل موناکو گریت
راھێنەرێ بەرنیاس یێ ئیتالی مارچیلو لیپی دیارکر د شیان دایە یوڤانتوس ل وەرزێ ئەڤ سالە سێ ناسناڤان ب دەستخوڤە بینت ئەوژی چامپیونیز لیگ و خول و کاسا ئیتالیا و دبیت ئەرکێ وێ بۆ قارەمانیا ئورۆپا ب زحمەت بیت لێ د تەپا پێ دا ھەر دەمێ تیم یا باش بیت و بزاڤێن ب ھێز بکەت یا ب زحمەت نابیت ئەرکێ وێ.
زێدەتر راھێنەرێ ھەلبژارتیێ چینێ یێ نوکە لیپی دیارکر ئەو تیما بشێت دو یاریان پاراستنا گولا خوە بکەت بەرامبەر یانا بەرشەلۆنا ھێزا ھێرشبەریا وێ بێ گومان ئەو دێ شێت ھەڤرکیا ڤێ قارەمانیێ ژی کەت لەورا ئەو دبینت یوڤی دێ شێت خوە ژ رێیا موناکو دەرباز کەت و گەھیتە یاریا دووماھیێ و ناسناڤێ ڤێ قارەمانیێ دەستخوڤە بینت.
ئیسپانیەک دێ دادڤانێ یاریێ بیت
ئێکەتیا تەپا پێ یا یویڤا ب فەرمی دوھی ناڤێ ستاڤێ دادڤانیا ڤێ یاریێ ئاشکراکر و بریارە دادڤانێ ناڤین یێ ڤێ یاریێ یێ ئیسپانی خودان شیان و شارەزایەکا مەزن ڤێ یاریێ ب رێڤەبیت ئەوژی ماتیو لاھوزی کو ناڤبری یێ ٤٠ سالی بەری نوکە چەندین یاریێن ب ھێز و گرنگ ژ ڤێ قارەمانیێ ب رێڤەبرینە

ئەڤرۆ نیوز، ھەژار مەعروف:
راپورتێن رۆژنامەڤانی یێن برێتانیا ئاشکراکرینە یاریزانێ نێڤدەولی یێ ئەرژەتینی و یانا مانچستەر سیتی سێرجیو ئوگویرۆ توشی ھنگافتنەکا گران بوویە و دبیت ژ یاریگەھان دورکەڤیت پشتی توشی ھنگافتنێ بووی ل یاریا یانا مانچستەر سیتی بەرامبەر یانا میدلسبرا ئەوا ھەردو یانە ب دو گولان وەکھەڤبووین.
رۆژناما زە سەن یا برێتانی دیارکریە سێرجیو ئوگویرۆ توشی ھنگافتنەکێ بوویە د یاریا یانا مان ستی یا دووماھیێ دا و ئەو ھنگافتنا وی یا گرانە و دبیت ھەتا دووماھیا ڤی وەرزی یاریزان ژ پێکھاتیێ تیما مانچستەر سیتی دورکەڤیت .
وێ رۆژنامێ دیارکریە ژی راھێنەرێ یانا مان ستی داخوازی ژ ستاڤێ نوژداری یێ یانێ کریە ب زیترین دەم چارەسەریا وی بکەت و ھەردیسن داخواز ژێ کریە راپورتەکێ پێشکێشی ئەوی بکەن سەبارەت ھنگافتنا ھێرشبەرێ ئەرژەنتینی.