ئەڤرۆ نیوز:
ھەر ل دەستپێکا شووکرنا من و ھێشتا ئەز د ماوەیێ دەزگریێ دا، من و ھەڤژینێ خوە پێکڤە بڕیار دا بۆ دەمێ حەفت سالان مە زارۆ نەبن، ئارمانج ژی خواندن و ب دەستڤەئینانا کوژمەیەکێ مەزنتر یێ پارەی بوو، ژ پێخەمەت دابینکرنا ژیانا زارۆیان، بەلێ حەفت سالێن مە ب دووماھی ھاتن و ئەڤە چوار سال ژی ل سەر وان حەفت سالان دەربازبوون، ئارمانجا مە یا خواندنێ بحە ھات، بەلێ پەیدابوونا زارۆیان بجە نەھات و پێدڤی بوو ئەڤە ئارمانجا مە یا دەستپێکێ بایە.
پشتی (ن, ح) خواندنا خوە ژدەرڤەی وەلاتی ب دووماھی ئینای، قەستا دھۆکێ کرەڤە و ل ھیڤیا بجھئینانا ئارمانجا خۆ یا دوێ بوو ئەوژی پەیدابوونا زارۆیان بوو، بەلێ ب بوورینا چوار سالان ژی چو زارۆ نەبوون و ئەڤە جارا دوێ یە ژی ل دەرڤەی وەلاتی دڤێت زارۆ ب رێکا دناڤ تیوبان دا ببن، بەلێ ئارمانجا وێ بجە ناھێت، (ن،ح) دبێژیت: ل دەستپێکێ من ب تشتەکێ نورمال دا زانین، بەلێ ب بوورینا دو سالان، نەچاربووم ل گەل ھەڤژینێ خۆ قەستا گەلەک نوشدار بکەین و مخابن پشکنێن مە د نورمال نینن و مە زارۆ نابن.
گەلەک ژنێن دی ب ڤی رەنگی ھەنە و ل دووماھیێ گەلەک پەشیمان دبن و ل شوونا بحھئینانا ھندەک ئارمانجان، ھندەک ئارمانجێن مەزنتر ژ دەست ددەن، کو ئێک ژوان ژی پەیدابوونا زارۆیانە.
ب دیتنا ڤەمانێ کو فەرمانبەرە، خانی و ھەڤژین و زارۆ سێ ئارمانجن، حەزێن مرۆڤی بجھدئینن و دبێژیت: ھەموو ژن حەز ژ زارۆیان دکەن و راستە ھندەک دەلیڤە ھەنە نە ب دەستێ مرۆڤی نە، وەکو، ( دەمێ ھەڤژین ژدەرڤەی وەلاتی بیت، یان ژیێ کچێ یێ بچووک بیت)، بەلێ د دەلیڤەیێ، دیتر دا پێدڤیە زارۆبوون ل دەستپێکا لیستا ھەڤژینان بیت و گۆت: ھەر چ نەبیت بلا ل دەستپێکێ زارۆیەک ھەبیت دا شیانێن خۆ بزانن و پاشی بڕیارێ بدەن ھەکە بڤێت گیرۆ بکەن و ل وی دەمی ھەتا ھەکە نەبن ژی ھەر چ نەبیت ھەبوونا زارۆیەکی دێ ھندەک ژ حەز و ئارمانجێن وان پر کەت.
د.ئەمەل عەبدولحەکیم، تایبەتمەندا نەخۆشیێن ژنان و زارۆبوونێ بۆ رۆژنامەیا ئەڤرۆ دیارکر کو بەری ژن و مێر بریارێ بدەن زارۆ نەبن، پێدڤی یە ل سەر وان ئەو تشتەکی ژ خۆ بزانن و پاشی بڕیارەکا ژ ڤی رەنگی بدەن و گۆت: چونکو نەدوورە د پرانیا دەمان دا نەبوونا زارۆیان ژ زەلامی بیت و ھندەک جاران ھەلبەت ژ ژنێ یە ژی.
د.ئەمەلێ ئەوژی دیارکر کو ھەکە عادەیێن ھەیڤانە ل نک ژنێ د رێکخستی بن، رامانا وێ ئەو نینە کو وێ ژنێ دێ زارۆ بن و گۆتژی: ل دەستپێکێ باشترە ھەڤژین ب رێکەڤن کو زارۆیەک ھەبیت، داک شیانێن خۆ یێن ھەبوونا زارۆیان بزانن و پاشان بڕیارا گیرۆکرنا زارۆیان بدەن.
تایبەتمەندا نەخوشیێن ژنان و زارۆبوونێ ئەوژی دیارکر کو ئەو ھەڤژینێن بریارێن ب ڤی رەنگی ددەن، پتریا وان ئەو ژنن یێن کو ھێشتا قوتابی ل ئامادەیێ و پێش وەخت شوو دکەن و ھندەک ژی ھەنە قوتابینە ل کولیژە و پەیمانگەھان، یان خواندنێن بلند و گۆت: ل دووڤ ڤەکولینێن زانستی دیاردبیت کو ئەو ژنێن بڕیارێن ب ڤی رەنگی ددەن پرۆتینەک د لەشێ واندا دھێتە دەرھاڤێژتن و ئەو پرۆتین کارتێکرنێ ل لەشێ ژنان دکەت و رەنگە دبیتە ئەگەر کو پشتی ڤێ بڕیارێ ژنێ زارۆ نەبن، یان بۆ چەند سالێن دی بێ زارۆ بمینیت.