ئه‌ڤرۆ نيوز:
رێڤه‌به‌ريا به‌ره‌ڤانيا باژێرى ل دهۆكێ راگه‌هاند كو ئه‌و دێ رابيت ب لێدانا زه‌نگێن ئاگه‌هداركرنێ ل رۆژا پێنجشه‌مبى رێكه‌فتى 16ى ئادارا 2017ێ و ل ده‌مژمێر 11:00ى سپێدێ.
دايه زانين ژى كو زه‌نگا ئێكێ بۆ ئاگه‌هداركرن و راوه‌ستيانا هاتنوچوونێ يه و زه‌نگا دويێ پشتى پێنج ده‌قيقا دێ بۆ ئاسايبوونا هاتنوچوونێ هێته لێدان.
رێڤه‌به‌ريا ناڤبرى هيڤى ژى ژ وه‌لاتيان خواستيه كو وه‌كو رێزگرتنه‌ك بۆ تووشبوو و زيانڤێكه‌فتيێن ڤێ روودانا دلته‌زين پێگرى پێ بهێته كرن.
بارزان ، نەوزاد زادە ھلۆری:
ب ھەلکەفتا دایکبوونا بارزانیێ نەمر دوھی ١٥ ئادارا ٢٠١٧ ھەر ئێک ژ ھێزێن پێشمەرگێن زێرەڤانی و لەشکەرێ رۆژ ل رۆژئاڤایێ کوردستانێ سەرا مەزارێ نەمران ل بارزان کر و ژلایێ خەلات بارزانی نونەرێ سەروکێ ھەرێما کوردستانێ ھاتنە پێشوازیکرن.
خەلات بارزانی نونەرێ سەروکێ ھەرێما کوردستانێ بۆ ئەڤرۆ نیوز گۆت : ( ب مەرەما دوپاتکرنا سووز و پەیمانان بو رێبازا بارزانیێ نەمر ١٥ێ ئادارێ ھەر ئێک ژ ھێزێن پێشمەرگێن زێرەڤانی کو پێکھاتبوون ژ سوپایێ ئێک و سوپایێ دوو و سوپایێ سێ ، و ل گەل ھێزێن لەشکەرێ رۆژ یێن رۆژئاڤایێ کوردستانێ سەرا مەزارێ نەمران ل بارزان دا و چەند تاجە گولینە پێشکێشی گورێ بارزانیێ نەمر و ئیدریسێ ھەردەم ساخکرن و دوڤدا چەند وتارەک ھاتنە خوارندن و تێدا دوباتبوونا خوە بو رێبازا بارزانیێ نەمر نیشاندا کو لسەر رێبازاوی یا کوردپەروەرانە و نەتەوەیی بەردەوام بن )
زێدەتر گۆت : ( ھێزێن پێشمەرگێن کوردستانێ کو ئەڤە نێزیکێ سێ سالایە بەرامبەر تیرورستێن داعش خەبات و قوربانیدانەکا زۆر دکەن پێخەمەت پاراستنا سەر و مالێ ولاتیان ، و بو ڤێ مەرەمێ ژی دەھان شەھید و بریندار داینە و شیان ل دوماھیێ شکەستنێ ب داعش بینن کو ئەڤ یەک ژی جھێ فەخر و شانازیا گەلێ کوردە ، و بێگومان پێشمەرگێن قارەمان لسەر دەستێ بارزانیێ نەمر ھاتینە پەروەردەکرن ژبەرڤێ بو پاراستنا سەر و مالێ وەلاتیان بەرھەڤن خونا خوە ب رێژن )
ژلایەکێ دنڤە ھەر ب ھەلکەفتا دایکبوونا بارزانیێ نەمر دیبەیتەکا تایبەت لسەر خەبات و قوربانیدانا بارزانیێ نەمر بو ھزرا نەتەوەیی و ژینگەپارێزیێ ل بارزان ھاتە ئەنجامدان .
دڤی واریدا محەمەد مێرگەسووری رێکخەرێ ئەوێ دیبەتا بارزاینێ نەمر بۆ ئەڤرۆ نیوز گۆت : ( بارزانیێ نەمر خەبات و قوربانیدانەکا زور بو گەلێ کوردستانێ ب گشتی کریە و بارزانیێ نەمر بێی ل بەر چاڤ وەرگرتنا ھزرا تاکەکەسی و حزبی و بێی جوداھی خەبات و قوربانیدان و شورش و راپەرین بو ھەموو گەلێ کوردستانێ ل ھەر چوار پارچێن کوردستانێ کریە ، ژبەر گرنگی یا ھزر و بیرێن بارزانی و فەلسەفە و ئایدولوژیێن وی ل بارا نەتەوەیی و ژینگەپارێزی مە دیبەیتەکا شەش رۆژی بو کەسایەتی و تایبەتمەندێن ھەرچوار پارچێن کوردستانێ برھەڤکریە و رۆژانە لسەر مەزارێ نەمران دھێتە ڤەکولین کرن )
زێدەتر گۆت : ( ئەنجامێن دیبەیتێ دێ د پرتوکەکا تایبەت دا ھێنە کومکرن و بو جھێن پەیوەندیداێن دوارێ ھزرا نەتەەیی و ژینگەپارێزی دا کاردکەن ھێتە ھنارتن داکو مفا ژێ بھێتەوەرگرتن ، دوڤدا دێ ھێتە چاپکرن و بو رایا گشتی ھێتە بەلاڤکرن )
ئه‌ڤرۆ نیوز،زنار تۆڤى:
وه‌زاره‌تا نه‌فتا عێراقێ ب نڤێسینه‌كا فه‌رمى راگه‌هاندیه كو ب ئه‌گه‌رێ هاتنا بیره‌وه‌ریێن نه‌ورۆزێ و سه‌ر سالا كوردى ئه‌و دێ پشكا هه‌رێما كوردستانێ و باژێرێ كه‌ركوكێ ژ به‌نزینێ و غازێ زێده‌تر لێ كه‌ن.
كۆمپانیا سه‌ره‌كى یا دابه‌شكرنا به‌رهه‌مێن نه‌فتا عێراقێ ب فه‌رمانا وه‌زیرێ نه‌فتێ نڤێسینه‌ك به‌لاڤكریه و تێدا دیاركریه،كو ل رۆژا 14/3/2017 خشتێ دابه‌شكرنا به‌رهه‌مێن نه‌فتێ دێ گوهۆرین ب سه‌ردا هێت و پشكا به‌نزینێ و غازێ بۆ پارێزگه‌هێن هه‌رێما كوردستانێ و كه‌ركوكێ دێ هێنه زێده‌كرن.
هه‌روه‌سا دیاركریه كو ئه‌گه‌رێ ڤێ زێده‌كرنێ ژ به‌ر هاتنا بیره‌وه‌ریێن نه‌ورۆزێ و سه‌ر سالا كوردییه،ئه‌ڤ بریاره دێ بۆ ماوێ 8 رۆژان یا به‌رده‌وامبیت.
دیسا كۆمپانیا ناڤهاتى بره‌یا پانزین و غازێ بۆ هه‌رێما كوردستانێ دیار كریه و ل دووڤ وى خشتێ نوو ل ماوێ وان 8 رۆژان به‌نزین و غاز دێ بۆ پارێزگه‌هێن هه‌رێما كوردستانێ هێته دابینكرن.
ئەڤرۆ نيوز:
رۆژنامەڤانێ ئیسپانی یێ بەرنیاس ئەدواردو ئەندا ئاشکراکر گولچیێ یانا مانچستەر یوناید یا ئینگلیزی و گولچیێ ھەلبژارتیێ ئیسپانیا دی خیا نێزیکی ئیمزاکرنا ھەڤبەستا ریال مەدرید بوویە بۆ وەرزێ بھێت.
ئەندا ھەلویستێ چوونا دی خیا بۆ ناڤ رێزێن یانا ریال مەدرید د بەرنامەیەکێ تلفزونی دا ئاشکراکر کو دی خیا دێ ل مێرکاتویا ئەڤ سالە ھەڤبەستا یانا ریال مەدرید ئیمزاکەت و ناڤبری ئەو چەندە ژی دیارکر ئەوی پرسیار ژ گولچیێ یانا مانچستەر یوناید کر ئەرێ تو ل سالا بھێت دێ یاریێ ل ریال مەدرید کەی ئەوی ب پەیڤەکێ بەرسڤ دا دیارکر بەلێ .
دی خیا بەری نوکە ژی گەلەک جاران ئاشکراکربوو ھیڤی و ئومێدا وی ئەوە یاریێ ل یانا مەلەکی یاری بکەت و ژێدەرێن دەنگوباسی وەسا دیارکرینە یانا ریال مەدرید یا بەرھەڤە 70 ملیون یورۆیا پێشکێشی یانا مانچستەر یوناید بکەت بۆ دەستڤە ئینانا دی خیا کو ماوێ زێدەتر دو سالانە ل دیڤ ئێک یانا مەلەکی بزاڤێن دەستڤە ئینانا دی خیا کەت.
ئه‌ڤرۆ نيوز، نيوار محه‌مه‌د سه‌ليم:
فراكسيۆنا پارتى ديموكراتى كوردستان ل په‌رله‌مانێ كوردستانێ وه‌زاره‌تا خواندنا بلند و ڤه‌كولينێن زانستى ئاگه‌هدار كريه كو پێدڤيه سه‌ره‌ده‌ريا وانه‌كا فه‌رمى ل گه‌ل زمانێ كوردى بهێته كرن و نه‌هێته پشت گوهـ هاڤێشتن، پشتى وه‌زاره‌تا ناڤبرى بڕيار دايى قوتابى دێ يێ سه‌رپشك بيت بۆ هه‌ژمارتنا نمره‌يێن وانه‌يا كوردى و عه‌ره‌بيێ بۆ ئه‌ڤێن دڤێت بچنه ئه‌نده‌زيارى و نوشدارى و پشكێن زانستى.
وه‌زاره‌تا خواندنا بلند و ڤه‌كۆلينێن زانستى ل سه‌ر مالپه‌رێ خوه نووچه‌يه‌ك به‌لاڤكريه و تێدا ئاماژه ب وێ چه‌ندێ كريه كو ل رۆژا چارشه‌مبى 8ى ئادارا 2017ێ ل كۆمبوونا جڤاتا وه‌زاره‌تێ دا، كو ل سه‌نته‌رێ ره‌وشه‌نبيرى وجڤاكى يێ زانكۆيا دهۆك هاتيه ئه‌نجام دان، ژماره‌كا بڕياران هاتينه ده‌ركرن، ئێك ژ وان بڕيارا گرێدايى هه‌ژمارتنا ئاره‌زوومه‌ندانه‌يا نمره‌يێن زمانێ كوردى و عه‌ره‌بيێ بوو بۆ قوتابيێن ده‌رچوويێن پۆلێن 12ێ ل ده‌مێ پێشكێكرنێ بۆ كوليژێن نوشدارى و ئه‌نده‌زيارى و پشكێن زانستى.
ئانكو قوتابى يێ سه‌رپشكه نمره‌يێن زمانێ كوردى و عه‌ره‌بى بۆ بهێنه هه‌ژمارتن يان ژى نه، د ده‌مه‌كى دا كو پێدڤيه وان هه‌ردو ئه‌زموونان بكه‌ت و تێدا ب سه‌ركه‌ڤيت.
محه‌مه‌د عه‌لى ياسين ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ د روونكرنه‌كێ دا كو دانه‌ك بۆ ئه‌ڤرۆ نيوز ره‌وانه كريه نه‌رازيبوونا فراكسيۆنا خوه ل هه‌مبه‌ر ڤێ بڕيارێ نيشان دايه و دايه زانين كو د ده‌مه‌كى دا وان چاڤه‌رێ دكر وه‌زاره‌تا ناڤبرى كار بۆ فه‌رميكرن و نێڤده‌وله‌تيكرنا زمانێ كوردى بكه‌ت، يێ كار ژ بوو بێ بهاكرن و پشت گوهـ هاڤێتنا زمانێ كوردى يێ دايك دكه‌ن.
هه‌ڤده‌م محه‌مه‌د عه‌لى ياسين د داخۆيانيه‌كێ دا بۆ ئه‌ڤرۆ نيوز ژى گۆت: “مه ب رێيا ڤێ روونكرنێ داخواز ژ وه‌زاره‌تا خواندنا بلند كريه كو روونكرنه‌كێ ل سه‌ر بابه‌تى به‌لاڤ بكه‌ن، ژ به‌ر كو كاره‌كێ هه‌ستيار و مه‌ترسيداره”.
ئەڤرۆ نیوز:
پشتی ل ماوێ بوری سەروکێ یانا زاخۆ یێ بەری نوکە عەبدولوەھاب محەمەد عیسا دەست ژ پوستێ خوە بەردەی و جھێ وی چێگرێ سەرۆکێ یانێ حسێن سالح وەکو سەروکێ یانێ یێ بەروەخت ھاتیە دەست نیشانکرن و ل دیڤ ئەو پێزانین بەر دەستێ رۆژناما ئەڤرۆ کەڤتین دبیت ل ماوەکێ نێزیک سەروکێ نوکە یێ یانا زاخۆ حسێن سالح بھێتە گوھورین و ل جھێ وی کەسەکێ دی بیھتە دەست نیشانکرن .
دبیت ل گەل گوھورینا سەروکێ یانێ یێ نوکە چەند ئەندامێن کارگێری ژی بھێنە گوھورین و گوھورینەک ل چەند پوستێن دی یێن کارگێریا یانا زاخۆ دا ھەبن و نوکە ھژمارەکا ناڤان ل بەر دەستێ بەرپرسێن وەرزشی نە و ژ ئەوان ناڤان دێ ل نێزیک ئێک ھێتە گوھورین دبیت ب رێژەکا مەزن سەروکێ یانێ بھێتەگوھورین.
ئەو ناڤێن بەربژار ئێک ژ ئەوان ناڤان سەروکێ یانا زاخۆ یێ بەری نوکە نعمان محەمەد کو بەری نوکە ژی وەکو سەروکێ یانا زاخۆ ھەردیسان وەکو ئەندام و چێگرێ سەروکێ یانێ کارکری یە ل گارگێریا یانێ دا و ئەڤ کەسە بربژارەکێ ب ھێزە .
ئه‌ڤرۆ نيوز:
ده‌زگه‌هێن راگه‌هاندنا عيراقى راگه‌هاند كو هێزێن ئه‌منى يێن عيراقى پرا كه‌ڤن يا مووسل كونترۆلكر و ب ڤێ چه‌ندێ ژى ژ سه‌رجه‌مێ پێنج پران كو هه‌ردو لايێن راست و چه‌پێ مووسل پێكڤه گرێ دده‌ن سێ هاتنه كونترۆلكرن.
دوهى رۆژا سێشه‌مبى ژى 14ى ئادارا 2017ێ بابلتۆپ هاته كونترۆلكرن و ئه‌ڤرۆ ژى هێزێن ئه‌منى يێن عيراقێ به‌ر ب كولانێن پشت بابلتۆپ پێشڤه‌چوونێ دكه‌ن.
نوكه ل مووسل شه‌ره‌كێ دژوار يێ ل سه‌ر ئه‌ردى دهێته كرن و ل ئه‌سمانى ژى هه‌ليكوپته‌ر و فرۆكێن شه‌رى يێن له‌شكرێ عيراقێ و هێزێن هه‌ڤپه‌يمانان يێ ل ئه‌سمانێ مووسل دزڤرن و چه‌ندارێن داعش بۆردۆمان دكه‌ن و داعش ژى يا بزاڤێ دكه‌ت ب رێيا دوشكا به‌رسڤا وان بده‌ت.
ئه‌ڤرۆ نيوز:
حه‌يده‌ر شه‌شۆ ئه‌ندامێ جڤاتا ناڤه‌ندى يا ئێكه‌تيێ راگه‌هاند كو ئه‌و نوكه مژوولى دامه‌زراندنا حزبه‌كا نوو نه ب ناڤێ “پارتا ئێزدى ديموكرات” مۆله‌تا كاركرنێ ژ حوكمه‌تا عيراقێ وه‌رگرتيه و ل هه‌رێما كوردستانێ ژى يێ بزاڤا وه‌رگرتنا مۆله‌تێ دكه‌ن.
حه‌يده‌ر شه‌شۆ كو هه‌ڤده‌م به‌رپرسێ هێزا پاراستنا ئێزديخانێ يه راگه‌هاند كو حوكمه‌تا عيراقێ مۆله‌تا كاركرنێ دايه حزبا وى يا نوو و نوكه مژوولى وێ چه‌ندێ ل هه‌رێما كوردستانێ ژى مۆله‌تێ وه‌ربگرن. ده‌رباره‌ى چاره‌نڤيسێ هێزا پاراستنا ئێزديخانێ كو ئه‌و ب خوه به‌رپرسه گۆت: “هێزا پاراستنا ئێزديخانێ نابيته پشكه‌ك ژ وێ حزبێ، چونكو پتريا خه‌لكێ د ناڤ وێ هێزێ دا ب حزبێن دى ڤه د گرێدايى نه”.
حه‌يده‌ر شه‌شۆ ئاشكه‌را ژى دكه‌ت كو 3ى ته‌باخا 2014ێ وه‌كو ئه‌ندامێ جڤاتا ناڤه‌ندى يا ئێكه‌تيێ چو كاره‌ك نه‌كريه و ب ته‌مامى ژ كارێ وێ حزبێ دوور كه‌فتيه و گۆت: “ده‌ما حزبا نوو كونگره‌ى گرێ دده‌ت، دێ ب فه‌رمى ده‌ست ژ ئێكه‌تيێ به‌رده‌م، چونكو نابيت كه‌سه‌ك د ناڤ د حزبان دا ئه‌ندام بيت”.
ئەڤرۆ نيوز:
ئه‌ڤۆگادۆ دھێتە ھژمارتن ژ فێقیێن گەلەک زەنگین ب دوھنێن ب مفا وەک ئومیگا3 و ڤیتامین k وb5 و ئەڤ فێقیە د چەندین خوارنان دا دھێتە بکار ئینان وەک زەلاتە و سوب و پیتزا و ساندەوچان دا
ئه‌ڤۆگادۆو وەکو ماسیان و چەرەزان ھاریکاریا بلند بونا رێژا کولسترولێ ب مفا ددەن د لەشی دا و ئەڤ یەکە دبیتە ئەگەر کو ھندەک نەخوشیێن دلی ژێ پەیدا ببن ئەڤ ڤەکولینە ل زانکویا کامبرج ھاتیە ئەنجام دان و دوپات کریە کو رەنگە ئه‌ڤۆگادۆ گەلەک یێ زیان بەخش بیت چونکی ھندەک مروڤ نفشەکی کێم ژ جینا SCARB1یێن ھەین و بلند بونا رێژا کولسترولێ ب مفا د لەشێ واندا مەترسیەکا مەزن ھەیە کو توشی نەخوشیێن دلی ببن و نوشدارێن تایبەتمەند ل ڤێ زاکویێ دوپات کریە کو ئەڤ کولسترولە ھەرچەندە مروڤی ژ گەلەک نەخوشیان د پارێزیت لێ ئەڤ نفشە ل نک ھندەک مروڤان وەدکەت کو توشی نەخوشیێن دلی یێن مەترسیدار بن .
نيشاندان