ئه‌ڤرۆ نيوز:

سەرپەرشتێ شوونوارێن قەزا شێخان بۆ رۆژناما ئەڤرۆ دیار کر کو پەرستگەھەکا زەردەشتیان ل گوندێ باسڤرێ یێ سەر ب ناحیا ئەترووش ڤە یا ھەی و ب دووراتیا سێ کیلۆمەتران دکەڤیتە رۆژھەلاتا گوندی و دبێژیت: د نوکە دا بزاڤێن ژناڤبرنا وێ پەرستگەھێ دھێنە کرن.
محەمەد عارف تاتار، سەرپەرشتێ شوونوارێن قەزا شێخان ئاشکرا ژی کر، ئەو پەرستگەھە ژ چار قاتان پێک دھێت و دڤێ پەرستگەھێ دا رێورەسمێن ئایینێ زەردەشتی دھاتنە ئەنجام دان و ئاگردانەکێ تایبەت بۆ ھەلکرنا ئاگری دناڤ قاتێن پەرستگەھێ دا ھەبوو و گۆت: “مخابن چ پوونە ب ڤێ پەرستگەھا زەردەشتیان یا باسڤرێ نەھاتیەدان، دیسا چو پارە بۆ سەخبێریکرن و چاڤدێریکرن و پاراستنا وێ ژ ژناڤچوونێ نەھاتینە تەرخانکرن، ھەتا نوکە ژی چ تابلۆ و ھێما بۆ ناساندنا جھێ وێ نەھاتینە دروستکرن”.
محەمەد عارف خویا ژی کر، پشتی ئایینێ زەردەشتیان ل ئێرانێ بەلاڤبووی و گەھشتیە ھەرێما کوردستانێ چەندین پەرستگەھێن زەردەشتیان ھاتنە ئاڤاکرن، مینا: چارستین، باسڤرێ و ل چەندین جھێن دی ل چیایێ مەقلوب.
ژ لایەکێ دیڤە تاھر محەمەد حەسەن، موختارێ گوندێ باسڤرێ بۆ رۆژناما ئەڤرۆ دیار کر، ھەتا نوکە جھێن شوونواری چو ڤەکۆلین ل سەر پەرستگەھا زەردەشتیان یا باسڤرێ نەکرینە و گۆت: “ھەتا نھا کەس مێژوویا وێ ب دروستی نزانیت، دیسا ژ بلی ڤێ پەرستگەھێ، گەلەک جھێن دی یێن شوونواری ل گوندێ باسڤرێ ھەنە، لەو ئەم داخوازێ ژ جھێن پەیوەندیدار دکەین، بەری ئەڤ جھێن شوونواری ژناڤ بچن، بھێنە سەخبێرکرن و ڤەکۆلین ل سەر بھێنە کرن”.

ئەڤرۆ نيوز:
رێڤەبەرێ ئاڤەدانکرن و نشتەجێبوونی ل پارێزگەھا دھۆکێ، دیار کر، نێزیکی 10 ھزار کەسان فۆرم بۆ وەرگرتنا شوقەیێن کێم دەرامەتان ل دھۆکێ پڕ کرینە و ھێشتا قووناغێن ھووربینی د فۆرمان دا نەھاتیە کرن ژبەر راوەستاندنا ھەموو پرۆژێن شوقەیان.
ئەندازیار نزار تەمەر سەعید، رێڤەبەرێ ئاڤەدانکرن و نشتەجێبوونی ل پارێزگەھا دھۆکێ دیار کر، دو ھزار 440 شوقە ل حەفت قەزایێن پارێزگەھا دھۆکێ بۆ وەلاتیێن کێم دەرامەت دھاتنە ئاڤاکرن، ب تنی ل دھۆکێ و بەردەرش و سێمێلی قووناغێن ئاڤاکرنا شوقەیان گەلەک باش ب رێڤەچوون، لەورا ژی دەست بەلاڤکرنا فۆرمان ل سەر وەلاتیان ھاتە کرن و د ئەنجام دا نێزیکی دەھـ ھزار وەلاتیان فۆرم بۆ وەرگرتنا شوقەیێن کێم دەرمەتان پڕ کرینە.
رێڤەبەرێ ئاڤەدانکرن و نشتەجێبوونی ل پارێزگەھا دھۆکێ دداخویانیەکێ دا بۆ(باسنیوز) خویا کر دێ داتا ھێنە کۆمکرن و د دووڤ دا دێ چەندین فلتەرێن دی ھەبن بۆ دووڤچوونێ ل سەر کەسێن فۆرم پڕ کرین و دێ ل دادگەھێ سۆزنامە ھێنە پڕکرن و لیژنێن تایبەتمەند دێ سەرەدانا مالێن وان کەسان کەن یێن فۆرمە پڕ کرین، چونکی دبیت کەسێن نەپێدڤی و نەکێم دەرامەت فۆرم پڕ کربن ئەو ھەموو دێ ھێنە لادان.
ئەندازیار نزار تەمەر گۆت ژی “جارێ پرۆسا بەلاڤکرنا شوقەیان ھاتە راوەستاندن و کار ژی د فۆرمان دا ناھێتە کرن ھەتا قەیرانا دارایی دووماھی دھێت و دەست ب ئاڤاکرنا شوقەیان دھێتە کرن و نوکە ھیچ تشتەکێ نوو بۆ بەلاڤکرنا شوقەیێن کێم دەرامەتان نینە”.

ئەڤرۆ نیوز:
سەرۆکا لیژنا ساخلەمیێ ل پەرلەمانێ کوردستانێ دیار کر، ژ ئەگەرێ دانەمەزراندن و کێمیا مووچەی ب تنێ د دو سالێن بۆری دا 130 نۆشدارێن ھەرێما کوردستانێ چووینە ژ دەرڤەی وەلاتی و مزگینیەکێ ددەت و دبێژیت: بڕیارە ھژمارەکا دەرچوویێن کۆلیژێن نۆشداری بھێنە دامەزراندن و دووڤچوون بۆ دامەزراندنا وان یا بەردەوامە.
مریەم سەمەد، سەرۆکا لیژنا ساخلەمیێ ل پەرلەمانێ کوردستانێ بۆ رۆژناما ئەڤرۆ ئاشکرا کر، حەفتیا بۆری وان سەرەدانا وەزیرێ ساخلەمیێ کربوو، دا کو ژ نێزیک دووڤچوونا دیاردا مشەختبوونا نۆشداران بکەن و گۆت: “ل گۆرەی ئاخڤتنێن وەزیرێ ساخلەمیێ یێ حوکمەتا ھەرێما کوردستانێ، ژ سالا بۆری ھەتا نوکە ژ ئەگەرێ کێمیا مووچەی و دانەمەزراندنا دەرچوویێن کۆلیژێن نۆشداری ھژمارەکا بەرچاڤا نۆشداران، ھەرێما کوردستانێ بجە ھێلاینە و چووینە ژ دەرڤەی وەلاتی، ژ بلی ڤێ چەندێ کو ناھێنە دامەزراندن و ئەوێن دھێنە دامەزراندن ژی مووچەکێ کێم بۆ ھاتیە دیارکرن، ئەو نۆشدارێن دچنە ژ دەرڤەی وەلاتی ب مووچەکێ باش دھێنە دامەزراندن و مافێ پەنابەریێ ژی پێ دھێتە دان”.
مریەم سەمەد ئاماژە ب وێ چەندێ ژی کر، ل دووڤ ئامارێن بەردەست، ب تنێ د دو سالێن بۆری دا نێزیکی 130 نۆشدارێن ھەرێما کوردستانێ چووینە ژ دەرڤەی وەلاتی و گۆت: “320 دەرچوویێن سالا بۆری یێن کۆلیژێن نۆشداری ژ لایێ حوکمەتا ھەرێما کوردستانێ ڤە ھاتینە دامەزراندن، لێ ھەتا نوکە بڕیارا دامەزراندنێ بۆ دەرچوویێن کۆلیژێن نۆشداری یێن گشتی دەرنەکەفتیە”.
مریەم خانێ گۆتژی: “بڕیارە ھزار و 600 نۆشدارێن دی ل ھەموو پکشێن ساخلەمیێ بھێنە دامەزراندن و گەلەک بزاڤ بۆ دامەزراندنا وان دھێنە کرن”.