ئەڤرۆ: محەمەد عەلی
پشتی دادڤانێ نێڤدەولی یێ کورد و کورێ باژێرێ دھۆکێ ھەوار حەسن ب سەرکەڤتیانە شیایی پێنج یاریێن قارەمانیا رۆژئاڤا ئاسیا یا باسکت بۆلێ ل سەر ئاستێ ھەلبژارتیێن پێشکەڤتیان برێڤەببەت، ئەوا ھەڤرکیێن وێ ل ھەینیا بۆری ل وەلاتێ ئوردون ب دوماھیی ھاتی و ھەلبژارتیێن ئیران، لوبنان، ئوردن عیراق و سوریا دەبازبووینە یاریێن دوماھیا ئاسیا ٢٠١٧ ئەوا بریارە ھەڤرکیێن وێ ل وەلاتێ لوبنانێ بھێنە کرن.
داخویانیەکێ دا ھەوار حەسەن بۆ رۆژناما ئەڤرۆ گۆت: پێخووشحالم بۆ جارا دوێ وەکو ئێکەم دادڤانێ کوردستانێ و عیراقێ پەسنا من ب ئاستێ پلا نایاب ژلایێ ئێکەتیا ئاسیا بھێت ئەڤە ژی وێ چەندێ رادگەھینت کو ئەو رژدی و زەحمەت و دادی ب رێڤەبرنا یاریان دا بوویە جھێ باوەریا ئێکەیا ئاسیا و ژ١٠ دادڤانێن ئاسیا بھێتە ژێگرتن، پێنەڤێت لایەنەکێ دی دیارکەت کو دادڤانێن دھۆکێ ژی خودان شیانن ئەگەر باوەریێ بدەنە خوە. ھەروەسا ناڤھاتی گۆت: ھەرچەندە بەری سێ ھەیڤان ھەر ژلایێ ئێکەتیا ئاسیا پەسنا من ب نایاب ھاتبوو کرن ژبەرکو شیابووم ب سەرکەڤتیانە یاریێن دوماھیا ئاسیا ل سەر ئاستێ پێگەھشتیان ل ئیرانێ برێڤەببەم و بوو ئەگەر باوەریێ بدەنە من بۆ قارەمانیا رۆژئاڤا ئاسیا بەردەوام دادڤانیێ بکەم.
ژلایەکێ دیڤە دادڤانێ دەولەتی ھەوار حەسەن گۆت: ئەڤ پەسنە باشترین پالدەرە بوو من بەردەوامیێ بدەمە کارێ خوە و پێشئێخستن یا بەردەوامبیت. لدوماھیێ ناڤھاتی سۆپاسیێن خوە ئاراستەی ھەر کەسەکێ پشتەڤانیا وی کربیت و دیارکر ژی کو بتنێ ئێک حەز و ھیڤی مایە کو رۆژەک بھێت ببیتە ئێک ژ دادڤانێن قارەمانیا جیھانی سەرەرایی ئەڤ ئارمانجەگە گەلەک بزەحمەتە

ئەڤرۆ،ھشیار دوبانکی:
ئێکەتیا باسکت بولا عیراقێ بریار دا یانا زاخۆ دو یاریان ل دویڤ ئێک خوسارەت بکەن ژبەر نە ئامادەبوونا ئەوان د یاریێن خولێ دا کو بریار بوو ئەڤرۆ ل گەل یانا شورتە یاریا خوە بکەت و ھەردیسان بەری ڤێ یاریێ ژێ بریار بوو ل گەل یانا ختوت بکەت ل باژێرێ بەغدا لێ یانا زاخۆ بۆ ھەردو یاریان داخازا لێبورینی کر و نەشیان ئامادەبن.
راھێنەرێ یانا زاخۆ داخویانیەکێ دا بۆ روژناما ئەڤرۆ گوت : تیما مە یا بەرھەڤ بوو بەر ب باژێرێ بەغدا ڤە بچین و مە بەردەوام راھێنانێن خوە کرن لێ ئەو ماوێ چار رۆژان بوو دەرگەھێن یانێ د گرتی بوون و کەس یێ ئامادە نەبوو ل بارەگایێ یانێ و تیما مە ژێ گرێدای ڤێ یانێ یە و ھەکە کەس ئامادە نەبیت نە بتنێ بو ڤان یاریا بەلکو بۆ چو یاریێن دی نەشێن ئامادەبین.
ناڤبری ئاماژە ب وێ چەندێ ژی کر رەوشا نوکە یا یانە تێدا بوریت گەلەک یا لاوازە و ھەکە رەوش ب ڤی رەنگی بیت دێ رەوشا تیما ئەوان ژێ لاوازتر لێ ھێت ژبەرکو بۆ ئەڤان ھەردو یاریان ئەو نەشیان پشکداریێ بکەن ژبەر نەبوونا پارێ تکێتێن ھاتنو چونا ئەوان ھەردیسان دابینکرنا پارێن ھوتێلێ ھەکە و ئەوان پەیوەندی ب ئێکەتیا باسکت بولا عیراقێ ژی کر رەوشا یانێ بوو دیارکر لێ ئەوان وەسا دیاکرن ئەو ھەردو یاریان ھاتینە خوسارەتکرن ژبەرکو ل یاریێن خوە ئامادەنەبووینە .

ئەڤرۆ نیوز،ھەژار مەعروف:

رۆژنامەیێن نێزیکی یانا بەرشەلۆنا ئاشکراکرینە یانا کەتەلونی کەڤتیە د بزاڤێن ئینانا ستێرا یانا ئەرسینال و یاریزانێ ھەلبژارتیێ ئەلمانیا مەسعود ئوزێل بۆ ئیمزاکرنا ھەڤبەستا ئەوی ل مێرکاتویا ھاڤینا ئەڤ سالە بۆ ب ھێز ئێخستنا ھێلا ناڤینا تیما خوە.
رۆژناما سپورت یا کەتەلونی دیارکریە مەسعود ئوزێل ھەتا نوکە ھەڤبەستا خوە نوونەکریە ل گەل یانا ئەرسینال ژبەرکو داخوازیا کوژمەکێ مەزنتر ژ ھەڤبەستا خوە یا بەری نوکە دکەت و ئەڤ چەندە ژی بوویە باشترین دەلیڤە یانا بەرشەلۆنا دەست ب بزاڤێن ئینانا ئەڤی یاریزانی کریە و نوکە کاردکەت بۆ رازیکرنا یاریزانی .
ل دویڤ ژێدەرێن وێ رۆژنامێ یانا بەرشەلۆنا ل سالا بوری ژی ھزر ل ئینانا ئوزێل کربوون لێ سەر نەگرتبوون رێککەفتنا ھەردو لاینە و ل جھێ وی ھەڤبەست ل گەل چەند یاریزانێن دی ئیمزاکربون لێ ل دووڤ رەوشا نوکە یا ھێلا ناڤینا یانێ وەسا دخوازیت ھەڤبەست ل گەل یاریزانەکێ خودان شیان ئیمزابکەن و ژێدەرێن دەنگوباسی ژێ ل یانێ وەسا داینە دیارکرن مەسعود بوویە ئارمانجا یانێ یا نوکە بۆ ھێلا ناڤین.
وێ رۆژناما کەتەلونی ئاماژە ب وێ چەندێ ژی کریە یاریزانێ یانا ئەرسینال و ھەلبژارتیێ ئەلمانیا ژی دخوازیت جارەکا دی ڤەگەریتە خولا ئیسپانیا ئەڤ جارە ب رێیا یانا بەرشەلۆنا پشتی ل ماوێ بوری یاریزانی ژێ ئاماژە ب ڤێ چەندێ کربوو.