ئه‌ڤرۆ نيوز:
سەرۆکاتیا هەرێمێ راگەهاند “ب دژوارى ئیدانا وێ کریارا “تیرۆریستی”، دكه‌ين يا کو ل بەرامبەری باره‌گايێ حزبا دیموکراتیا کوردستانێ ل كوية هاتیە ئەنجامدان.
سه‌رۆكايه‌تيا هه‌رێمێ راگەهاندیە کو پێدڤیە دامودەزگەهێن پەیوەندیدار و ئاسایش ب زیترین دەم ئەنجامدەرێن وێ کریارێ دەستەسەر بكه‌ن و رادەستێ یاسايێ بکەن و هەمی بەرهەڤیێن پێویست بكار بينن ژبۆ کو روودانێن ب ڤی جوری دووبارە نەبن”.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 21ى كانوونا ئێكێ 2016ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1312 |
| 1 يۆرۆيێ ئه‌ورۆپى | 1360 |
| 1 ليرێ توركى | 370 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
ئه‌ڤرۆ نيوز:
كۆمپانيا ئه‌كامى راپۆرته‌كا نوو ل دۆر وه‌لاتێن خودان ب له‌زترين ئه‌نترنێت د ماوێ چارێكا دووماهيێ يا ئه‌ڤ ساله دا به‌لاڤ كر و تێدا دياركر كو كوريا باشوور ل رێزا ئێكێ يه ب له‌زاتيا 23.3 مێگابايت د چركه‌كێ دا.
كۆمپانيا ئاكامى يا ئه‌مريكى ليستا 10 وه‌لاتێن جيهانێ يێن خودان ب له‌زترين ئه‌نترنێت ل جيهانێ، ب هه‌لكه‌فتا ب دوووماهى هاتنا سالا 2016ێ.
كوريا باشوور ل رێزا ئێكێ ب ناڤه‌ندا له‌زاتيا 26.3 مێگابايت د چركه‌كێ دا، پاشان هونگ كۆنگ ل رێزا دويێ ب ناڤه‌ندا له‌زاتيا 20.1 مێگابايت دهێت.
هه‌ر ئێك ژ نه‌رويج، سويد، سويسرا و سه‌نگافۆرا ل رێزێن سێ هه‌تا شه‌شێ دهێن ب له‌زاتيا 20، و19.7، و18.4، و18.2 مێگابايت د چركه‌كێ دا.
يابان و فنله‌ندا و هۆله‌ندا و لاتڤيا ژى ل رێزا حه‌فت هه‌تا ده‌هێ دهێت ب له‌زاتيا 18، و17.6، و17.3، و16.9 مێگابايت دهێن.
ئه‌ڤرۆ نيوز:
كۆمبوونا جڤاتا وه‌زيران و حوكمه‌تا هه‌رێما كوردستان و فراكسيۆنێن كوردستانى ل به‌غدا د كۆمبوونێ دا پرسا بودجا عيراقێ ئێخنه به‌ر به‌حس.
ئه‌ڤرۆ رۆژا چارشه‌مبى 22ى كانوونا ئێكێ 2016 كۆمووبنا جڤاتا وه‌زيرێن حوكمه‌تا هه‌رێما كوردستانێ ل گه‌ل فراكسيۆنێن كوردستانى يێن ناڤا جڤاتا نوونه‌رێن عيراقێ ده‌سپێكر.
ب گۆره‌ى پێزانينێن ل به‌ر ده‌ست مه‌ره‌م ژ ڤێ كۆمبوونێ دانوستاندنه ل سه‌ر بۆدجێ عيراقێ و بڕياره حوكمه‌تا هه‌رێمێ ئه‌گه‌رێن ره‌تكرنا قانوونا بۆدجا عيراقێ بۆ ئاماده‌بوويان بێخيته به‌ر چاڤ.
پشتى كۆمبوونا پارتى ديموكراتى كوردستان و بزاڤا گۆڕان، ئه‌وان ژى ژ لايێ خوه ڤه بڕيار دايه كو پشكدارى كۆمبوونێ ببن.
ئه‌ڤرۆ نيوز:
سه‌رۆكێ ده‌سته‌يا بلندا بنگه‌هێ روشه‌نبيرى و جڤاكى يێ لالش راگه‌هاند كو سه‌رۆكێ حوكمه‌تا هه‌رێما كوردستانێ ره‌زامه‌ندى ده‌ربريه كێشه‌يا قوتابيێن “ئێزدى، مه‌سيحى و كوردێن رۆژئاڤا” ل زانكۆيێن هه‌رێما كوردستانێ چاره بكه‌ت و درێژيێ ب خواندنا خوه بده‌ن”.
شێخ شامۆ، سه‌رۆكێ ده‌سته‌يا بلندا بنگه‌هێ ره‌وشه‌نبيرى و جڤاكى يێ لالش و نوونه‌رێ كوردێن ئێزدى ل په‌رله‌مانێ كوردستانێ بۆ مالپه‌رێ فه‌رميێ پارتى ديموكراتى كوردستان راگه‌هاند: پشتى گه‌هاندنا كێشا قوتابيێن مه كو ل سالا 2006ێ روو ب روويێ مه بوويه و ب خۆشحالى ڤه ژ لايێ سه‌رۆكێ حوكمه‌تێ و ده‌زگه‌هێن په‌يوه‌نديدار ڤه دهێته چاره‌كرن، ئه‌ڤ ساله ژى سه‌رۆكێ حوكمه‌تا هه‌رێما كوردستانێ رێزدار نێچيرڤان بارزانى كێشا قوتابيێن ئێزدى، مه‌سحى و كوردێن رۆژئاڤا ب نڤيساره‌كێ بڕيارا چاره‌كرنا وان دا.
د نڤيسارا سه‌رۆكێ حوكمه‌تا هه‌رێما كوردستانێ دا هاتيه:
1- قوتابيێن قووناغا دويێ دشێن ب ره‌نگێ ڤه‌گوهاستن ل زانكۆيێن هه‌رێما كوردستانێ درێژيێ ب خواندنا خوه بده‌ن.
2- گوهۆڕينا حاله‌تێ مێڤاندارى يێ قوتابيێن رۆژئاڤايێ كوردستانێ بۆ ڤه‌گوهاستن، ژ به‌ر كو حاله‌تێ مێڤانداريێ دێ د پاشه‌رۆژێ دا كێشه‌يان بۆ وان دروست كه‌ت.
3- قوتابيێن خواندنا كوردى يێن ل هه‌موو ده‌ڤه‌رێن بن ده‌سته‌لاتا داعش بۆ خواندنێ روو كريه هه‌رێما كوردستانێ دشێن ل زانكۆيێن وێ بێ به‌رامبه‌ر درێژيێ ب خواندنا خوه بده‌ن.
ئه‌ڤرۆ نيوز:
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا پێنجشه‌مبى رێكه‌فتى 22ى كانوونا ئێكێ 2016 ئه‌سمانێ دهۆكێ دێ ئه‌ور و سار بيت و ل ده‌مێ سپێدێ دێ ل هنده‌ك جهان مژ دروست بيت. هوشدارى ژى دايه شوفێران ژ ئه‌گه‌رێ دروستبوونا شه‌ختان ل رێيێن ژ ده‌رڤه.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ كووربوونا كارتێكرنا فشارێن نزمێن وه‌لاتێ توركيا كو بارسته هه‌وايه‌كێ سار ل گه‌ل دايه بۆ سه‌ر هه‌رێما كوردستانێ دهێته پێشبينيكرن ئه‌ور و سار بيت.
كه‌شناسيا هه‌رێمێ ئاماژه ب وێ چه‌ندێ ژى كريه و ل دانێ سپێدێ ل ده‌ڤه‌رێن چيايى دێ مژ هه‌بيت.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژهه‌لات بيت ب ره‌نگه‌كى د ناڤبه‌را 5 هه‌تا 10كم دا و ماوێ ديتنێ ژى دێ د ناڤبه‌را 8 بۆ 9كم دا بيت، پلێن گه‌رمێ ژى دێ د ناڤبه‌را 1 بۆ 9 پلان دا بن.
ئەڤرۆ نيوز:
د راپۆرتەکا خوەدا پشت بەستن ب چەندین ژێدەران دناڤ عیراقێ دا و ژدەرڤەی عیراقێ، رۆژناما ( لوس ئەنجلۆس تایمز) یا ئەمریکی مەشقکرنا ھندەک میلیشیێن حەشدا شەعبی یێن ب سەر ئیرانێ ڤە، ژلایێ ھێزێن ئەمریکی ڤە ئاشکرا دکەت.
رۆژناما ئەمریکی دبێژیت” ھێزێن ئەمریکی میلیشیێن عیراقی یێن گرێدای ب ئیرانێ ڤە مەشق دکەت” رۆژناما ناڤبری ڤێ پێنگاڤێ ب گوھۆرینەکا گرنگ دسیاسەتا ئەمریکی دا دھەژمێریت و زێدەتر د راپۆرتا خوەدا دبێژیت” میلیشیێن ناڤبری یێن ھاتینە مەشقدان ژبۆ پشکداریێ دپرۆسا ئازادکرنا مووسلێ دا، ددەمەکی دا چو ژ پاشەرۆژا مووسلێ ناھێتە زانین، ئەو ھەڤکاری دێ ھێزێن شیعی ژلایێ لەشکری و سیاسی ڤە ب ھێزتر لێکەت.
جۆن دوریان پەیڤدارێ لەشکرێ ئەمریکی، د بەرسڤا پرسیارەکا رۆژناما لوس ئەنجلۆس تایمز دا دبێژیت” ھەلویستێ ئەمریکا نەھاتیە گوھۆڕین و ئەم وان ھێزان مەشق ددەین یێن کو ئەم ژێ پشت راست بووین کو وان چو پەیوەندی ب گرۆپێن تیرۆرستی ڤە نینن یان ژی نە گرێدای حوکمەتا ئیرانێ نە و پێدڤیە ئەو گرۆپێن ئەم مەشق ددەین مافێن مرۆڤی و حوکمڕانیا قانوونێ پەیرەو بکەن”.
ناڤبری دان پێدان ب وێ چەندێ کر کو دبیت ھندەک میلیشیا وەکو تیرۆرست دھێنە ھژمارتن ژلایێ ئەمریکا ڤە، بەلێ گۆت ژی” دەستێن چەکدارێن وان گرۆپێن ئەم مەشق ددەین، دخوینێ وەرنەبووینە”. لێ رۆژناما ئەمریکی خویاکر” ھندەک بەرپرسێن ئەمریکی دان پێدان ب زەحمەتیا دووپاتکرن ژ چەکدارێن میلیشیاتان، ب تایبەتی سەرکردێن دیار یێن ھێزێن شیعی تیرۆرستن”.
ئاماژە دا ژی کو پشتی میلیشیێن عیراقی یێن چەکدار شەڕ ل گەل داعشێ کری ل چەندین دەڤەرێن عیراقێ، رازیبوون ژ حوکمەتا عیراقێ وەرگرت بۆ پشکداریێ دشەڕێ مووسلێ دا و شارەزایێن لەشکری دبێژن کو 40 میلیشیێن چەکداری یێن شیعی یێن ھەین کو ھژمارا وان دگەھیتە 100 ھزار چەکداران.
ل دووڤ وێ رۆژنامێ، ھێزێن ھەڤپەیمانیا نێڤدەولەتی ھووربینیێ د سەرکردێن میلیشیێن شیعی دا دکەت ب مەرەما رێ نەدانێ ب کەسێن پەیوەندێ ل گەل گرۆپێن گرێدای ئیرانێ کو مفای ژ بەرنامێ مەشقدانێ، بەلێ ھندەک سەرکردێن وان میلیشیان سەرنەکەفتن د ئەزموونێن ئەمریکی دا کو بھێنە ھژمارتن وەکو ھەڤپەیمان وەکو ھادی عامری سەرکردێ رێکخراوا بەدر کو میلیشیایەکە دیارە دناڤ حەشد شەعبی دا کو بەرگریێ ژ پەیوەندیا خوە ل گەل ئیرانێ دکەت.
لوس ئەنجلۆس تایمز، بۆچوونەکا ئەفسەرێ ئەمریکی یێ بەرێ و ڤەکۆلەر ل پەیمانگەھا (ھیدسۆن) ل دۆر مەشقدانا میلیشیێن شیعی ڤەدگوھێزیت دەمێ دبێژیت” ھەڤکاریکرن ل گەل میلیشیێن شیعی شاشی یە، ژبەر کو ئەو ب شێوەکێ ئێکسەر د تۆمەتبارن ب کوشتنا ئەمریکیان، زێدەباری کو میلیشیێن تائیفی نە”.
ھەیسەم میحی، شیرەتکارێ سیاسیێ ھادی عامری ل دۆر مەشقدانا میلیشیێن حەشد شەعبی ژلایێ ھێزێن ئەمریکی ڤە بۆ وێ رۆژناما ئەمریکی دبێژیت” سەرکردێن حەشد شەعبی رازیبوون 900 چەکدارێن وان بھێنە مەشقدان ب مەرەما بەرفرەھکرنا رێزێن خوە و پاراستنا ئێمناھیێ ل باژێرێن ژداعشێ ھاتینە ئازادکرن”. بەلێ رۆژنامە خویا دکەت ژی” ئەڤە ھەموو دھێتە کرن سەرەرای وێ چەندێ میلیشیێن شیعی ژلایێ رێکخراوێن مافێن مرۆڤی ڤە یێن ھاتینە تۆمەتبارکرن ب ئەنجامدانا سەرپێچیان و دەربەدەرکرنا سونەیان”.
رۆژناما ئەمریکی د راپۆرتا خوە دا دیار دکەت کو ئەمریکا رازی نەبوو ب ھێرشێن ئەسمانی ھاریکاریا میلیشیێن شیعی بکەت د پرۆسا ئازادکرنا تکریتێ دا، دەمێ وێنێ جەنەرال قاسم سلێمانی سەرکردێ لەشکرێ قودس یێ ئیرانی ھاتیە بلندکرن و دیاربوونا وی جھێ دلتەنگیا ئەمریکا بوو کو وەکو سەرکردێ نھێنی یێ میلیشیێن شیعی و وەکو تیرۆرست ژی دھەژمێریت، ژبە رکو ئەمریکا جەنەرال سلێمانی تۆمەتبار دکەت ب دانانا پلانێن چەندین ھێرشان دژی ھێزێن ئەمریکی ل عیراقێ بەری 10 سالان، دیسا میلیشیێن حەشد شەعبی ژلایێ رێکخراوا ھیۆمان رایتس ووچ ب ژناڤبرن و تالانکرنا خانیێن سونەیان ل تکریتێ ھاتینە تۆمەتبارکرن.
ئه‌ڤرۆ نیوز:
مه‌سعود حه‌یده‌ر په‌رله‌مانتارێ عیراقى ل سه‌ر فراكسیۆنا گۆران راگه‌هاند كو فراكسیونا وان ب فه‌رمى راگه‌هاند كو سوبه پشكداریێ د كومبوونا جڤاتا وه‌زیرێن هه‌رێمێ دا بكه‌ت كو مه‌ره‌م ژ كۆمبوونێ ئه‌وه دانوستاندن ل دۆر قانوونا بودجا گشتى یا عیراقێ بهێته كرن و دیسا به‌حس ل چاره‌كرنا كێشا مووچێ فه‌رمانبه‌رێن هه‌رێمێ بهێته كرن، هه‌روه‌سا بڕیاره فراكسیونێن یه‌كێتى و كۆمه‌ل و یه‌كگرتوو ژى پشكدار ببن.
نيشاندان
