ئه‌ڤرۆ نيوز:
ل ڤان نێزیکا سێ کەنالێن نوو زاخۆ سپۆرت و داسنیا و زارۆ دێ ل زاخۆ ھێنە ڤەکرن، رێڤەبەریا راگەھاندنێ ژی دبێژن کەنالەکێ ب تنێ داخوازا رەزامەندیێ کریە، ھندەک کەنال ژی مەرجیێن خەرجیێن راگەھاندنێ ب مەزاختنێن زێدە دزانن.
مەھدی سالح وەکو رێڤەبەرێ کەنالێ دی تیڤی سەر ب دەزگەھێ داسنیا ڤەیە تەکەز کر کو کەنالێ وی دێ یێ ھەمەرەنگ بیت، دگەل ناڤێ دەلال تیڤی وگۆت: “ئەم گرێدایی دەزگەھێ داسنیاینە چو پەیوەندیا مە ب دەلال تیڤی ڤە نینە، میکانیزم ئەوە ھەر دەزگەھەکێ مافێ چوار کەنالان ھەیە”.
رۆژنامەڤان سەلام عەلی، بەرھەڤیا کەنالەکێ نوو ب ناڤێ زارۆ تیڤی دکەن دیارکر کو بھایێ رەزامەندیێ مەزاختیەک زێدە پێ دڤێت بۆ نموونە پشتی بۆرجی دانانین ھەیڤانە دۆ ملیون دیناران بدەین، سالانە ژی نێزیکی 20 ملیون دیناران بدەین ئەڤە ئەرکەکێ گرانە گۆتژی: “کەنالێ مە دێ سەربخوە بیت، پشکەک ژێ وەکو داھا دێ ب رێیا sms بیت”.
ئیدریس غازی، رێڤەبەرێ راگەھاندنا پارێزگەھا دھۆکێ بۆ ئەڤرۆ دیارکر کو ھەتا نوکە ب تنێ مە رەزامەندیا کەنالێ زاخۆ سپۆرت وەرگرتیە بۆ ماوەیێ ھەیڤەکێ دەست ب پەخشێ خوە بکەن دووڤدا بگرن، ل سەر ڤی بنیاتی چو باج بۆ ڤێ ھەیڤێ مە ژ وان وەرنەگرتینە، ھەتا نوکە چۆ کەنالێن دیتر رەزامەندی ژمە وەرنەگرتینە.
دلخواز مووسا رێڤەبەرێ رەوشەنبیری و ھونەری ل زاخۆ دیارکر ژ تۆرێن کومەلایەتی ئاگەھدارن کەنالێن نوو ڤەبن، لێ چو ئاگەھی وان ل دۆر ڤەبوونا وان نینن.
کۆڤان حسێن زێدەبوونا مینبەرێن راگەھاندنێ ب نیشانەکا ساخلەمە د وارێ رادەربرینێ دا ڤەگەراند، دەرفەتا باشتربوونێ کریە دەستێ بینەری دا و گۆت: “ھەر کەنالەک دێ رادەستی قەدەرا خوە بیت، ئەگەر لگۆرەیی ئەجیندایێن پرۆفیشنالی کار نەکەن، ژلایەکێ دیڤە فێری ھندێ کرین سەرمایەدار ھزر د وەبەرھێنانا کارێ مێدیایی دا بکەن.
ئه‌ڤرۆ نيوز:
ل دووڤ پێزانینێن ب دەست ئەڤرۆ کەفتین لێگەریان ل وێ زارۆیا بەری نھا بەرزەبووی بەردەوامن و لێکۆلین ل ڤێ بوویەرێ دھێتەکرن.
ژێدەرەکی بۆ رۆژناما ئەڤرۆ دیار کر کو پشتی نیشانێن مینایێ ل ئاقارێ گوندێ بەرئاشێ ھاتینە دیتن رۆژا ئەینیێ پۆلیسان لێگەریان لێ کر و دوھی سپێدێ خەلکێ دھوکێ دگەل کەس و کارێن وێ چوونە گوندێ بەرئاشێ داکو لێ بگەریێن بەلێ چ تشتێن دی دیار نەبوون.
ھەمان ژێدەری ئاشکرا ژی کر کو ئەو نیشانێن وێ یێن ھاتینە دیتن بۆ دادوەریا پزیشکی ھاتینە فرێکرن داکو بھێنە پشکنین و گۆت “ژ بەر لێکۆلینێ نابیت نوکە ھەمی تشت بھێنە ئاشکراکرن”.
ئەڤرۆ نیوز:
بەری دو رۆژا ل فروکخانا ئەنقەرە پتر ژ 100 وەلاتیێن ھەرێما کوردستانێ و چەند وەلاتیێن عەرەبێن عیراقێ دناڤ ھولەکا فروکخانێ دا ھاتنە دەستەسەرکرن و رێ نەدایێ بچنە دناڤ تورکیادا.
کەسەکێ رێ نەدایێ بچیتە تورکیا بۆ کوردستان 24 گۆت: “بەری دو شەڤا دەمژمێر 10:00 بۆ ب رێیا فروکخانا نێڤدەولەتی یا ھەولێرێ چوومە گەشتەکێ ل ئەنقەرە پایتەختێ تورکیا، ل فروکخانێ رێ نە من و گۆتن ناڤێ تە د سیستەمێ نینە و ئەم ھێلاینە دناڤا ھۆلا فروکخانێ دا”.
وەلاتیەکێ دیتر ژی گۆت: “بەرپرسێن فروکخانێ گۆتە مە ناڤێن ھەوە لنک مە نینن و ڤیزە و تکتێن ھەوە جھێ گومانێنە”.
گۆتژی: ” ڤیزێن مە چو کێشە ل سەر نینە و ھەموو ژی ب رێیا کونسولخانا کومپانیا مە وەرکرتینە و تکتێن مە ژی ب رێیا ھێلا ئاسمانی یا زاگرۆس جێت ھاتینە”.
وەلاتیێ کەشتکری دیار کر ژی کو پشکەک ژ وان کەسێن دەستەسەرکری ژن و زارۆنە و پشکەک ژی ب رۆژینە، پێدڤیێن وان د کێمن و ناھێلن بچنە ژ دەرڤەی ھۆلا فروکخانێ، دو زێرەڤان لبەر ھۆلێ داناینە.
گۆتژی: “مە ل گەل کومپانیێن فرۆکەڤانی ئاخفتیە گۆتە مە دڤێت ھوون 150 سەد و پێنجی دولاران بدەن دا زوو ھەوە ب زڤرینە ھەولێرێ، یان ژی دڤێت ھوون چاڤەرێ بن، داخوازا ھاریکاریێ ژ ھەر لایەنەکی دکەین داکو زوو ژ ڤێ رەوشا خراب دەرکەڤین”.
ئەڤرۆ نیوز:
وەزارەتا پەروەردێ یا حوکمەتا ھەرێما کوردستانێ ڕاگەھان، سالا بھێت یا خواندنێ پرتووکا زمانێ عەربی یا پۆلا 12 ئامادەیی دێ ھێتە گوھۆرین.
ل دووڤ نڤیسارەکا وەزارەتا پەروەردێ یا حوکمەتا ھەرێما کوردستانێ کو تێدا ئاماژە ب وێ چەندێ ھاتیە کرن، خواندنا پرتووکا نوو یا زمانێ عەرەبی سالا بھێت یا خواندنێ 2016 – 2017 دێ ھێتە کەڤیتە د وارێ ب جھئینانێ دا و کار دێ پێ ھێتەکرن.
ل گۆرەی وێ نڤیسارێ مامۆستایێن پۆلا 11 ئامادەیی کو بەری نوکە مەشق و راھێنان ل سەر پرۆگرامێ نوو یێ زمانێ عەرەبی پێ ھاتینە کرن، ل گەل قوتابیان دێ بەردەوام بن بۆ پۆلا 12 بۆ گۆتنا بابەتی زمانێ عەرەبی.
خویا ژی کریە، د دەمێ بەرھەڤبوونا مامۆستایێن خودان ئەزموون دشیان دایە ئەو مامۆستا وێ وانێ بێژن.
وەزارەتا پەروەردێ د وێ نڤیسارێ دا رێڤەبەریێن پەروەردان ئاگەھدار دکەت کو خۆلێن مەشق و ڕاھێنانان بۆ مامۆستایان ڤەکەن دا کو بۆ مامۆستایان یا غەریب نەبیت و بشێن بۆ قوتابیان بێژن.
ئەڤرۆ نیوز:
پەیڤدارێ ھوزێن عەرەب ل پارێزگەھا نەینەوا ب رێکا رۆژناما ئەڤرۆ پشتەڤانی ل گۆتنێن شیرتکارێ جڤاتا ئاسایشا ھەرێما کوردستانێ کرن کو چارێن دی نین و دڤێت عیراق بھێتە پارچەکرن.
شێخ موزاحم ئەحمەد ئەلحوێت سەرۆکێ ھوزا جحێش و پەیڤدارێ ھوزێن عەرەبە ل پارێزگەھا نەینەوا، بۆ رۆژناما ئەڤرۆ گۆت: وەک ھوزێن عەرەب ل پارێزگەھا نەینەوا ئەم پشتەڤانیێ ل گۆتنێن بەرێز (مەسرور بارزانی ) شیرتکارێ جڤاتا ئاسایشا ھەرێما کوردستانێ دکەین، دەمێ راگەھاندی کو دڤێت عیراق بۆ سێ دەولەتان بھێتە پارچەکرن، ئەو ژی چێبوونا دەولەتەکا شیعی، سنی، کوردی، دبینم ئەڤە باشترین چارەیە بھێتەکرن.
پەیڤدارێ ھوزێن عەرەب ل پارێزگەھا نەینەوا ئەو چەندە ژی نەڤەشارت و گۆت: زڤڕینا دەڤەرێ بۆ پێشتر بەری داعش و راوستاندنا خوینێ ل ھەرسێ گوشێن شیعی و سونی پێدڤی ب پارچەکرنا عیراقێ یە بۆ سێ دەولەتان، چونکە عیراقا بەرێ نازِڤریت و ھەتا بزڤڕیت ژی ژیان ل ڤێ عیراقێ یا بەردەوام خوین لێ دھێتە رێتن بەردەوام کوشتن ھەیە بەردەوام دزی و تالانکرن ھەیە و سەرێ چەندین سالانە ئەڤی خەلکی خوەشیی ب خوە نەدیتی یە و نەشیاینە وەک برا ل گەل ئێک بژین، ئەڤجا ئەم ھزر بکەین پشتی داعش دێ عیراق چێ بیت، نەخێر ئێدی ژیان ل گەل ئێک و پێکڤەژیان ل ڤان دەڤەرا نەمایە، نوکە حەشدا شیعی حەشدا شەعبی یا تاوانێن مەزن دکەت ل ھەمبەر سونێن عەرەب و ب تایبەتی ل باژێرێ فەلوجە و جھێن عەرەبێن سونە و چو دلوڤانیێ ب کەسێ نابەن، ل بەرامبەر کورد یێ عەرەبێ سونە و شیعە دحوینن و دلوڤانیێ پێ دبەن و بەردەوام ھاریکاریێ بۆ دکەن، ل ھەرێما کوردستانێ د ئارام و تەنا دژین و ئەڤە ژی نامەکا دی یە بۆ عەرەبان کو کورد خودان ھەلویستەکێ جامێرن.
سەکرۆکێ ھەمان ھوزا عەرەب گۆت: پەیڤێن شیرتکارێ جڤاتا ئاسایشا ھەرێما کوردستانێ دروستن و بتنێ ئەڤ رێکە ھەیە کو عیراق ببیتە سێ پارچە و ئەم ھوزێن عەرەبی ل پارێزگەھا نەینەوا ل گەل پارچەکرنا عیراقێ ینە، و بیتە سێ دەولەت و چونکە خەلکێ عیراقێ نوکە ھەموو بووینە دوژمنێن ئێک دو و ئێدی ژیانا ل گەل ئێک نابەنە سەری، دیسا ھەر ژ چێبوونا عیراقێ ھەتا نوکە خوینا دھێتە درێتن و چو خوەشی پێکھاتێن عیراقێ ب خوە ڤە نەدیتی یە، ئەڤ پارچەکرنە دێ بیتە رێگر ل ھەمبەری گەلەک کارا، بۆ نموونە مایتێکرنا ئیرانێ د کاروبارێن عیراقێ دا ئێدی نامینت، و ھەر پێکھاتەک دێ بخوە ل جھێ خوە ژیت و ئەو ب خوە دێ دەستھەلاتێ ل خوە کەت .
ھەروەسا گۆت: دبەرھەڤین وەک ھوزێن عەرەب ل پارێزگەھا نەینەوا کۆنفرانسەکی بگێرین و تێدا ب شێوەکێ فەرمی پشتەڤانیێ ل دابەشکرنا عیراقێ بکەین، دیسا دێ ب فەرمی ژی ئەڤێ چەندێ بۆ رایا گشتی دووپات کەین کو مە دڤێت عیراق بھێتە پارچەکرن و ئێدی نابیت ئەڤە ل گەل ئێک بژین و نابیت بەردەوام خوین و کوشتن ھەبیت و خەلک ب خوە ب رەڤیت و بچیتە دەرڤە.
سەرۆکێ ھۆزا جحێشی یا دیارکر، کو جارا ئێکێ یە ھۆزێن عەرەب ل نەینەوا بڤی رەنگی پپشتەڤانیێ ل پارچەکرنا عیراقێ دکەن، وب ڤی رەنگی خورت بوونا خوە ل سەر چێبوونا سێ دەولەتێن شیعی و سونی و کوردی دووپات دکەن، گەھشتینە وێ باروەرێ کو بتنێ ئەڤ رێکە ھەیە و بشێن خوینا خەلکێ بێ گونەە راوستینن.
ل دووماھیێ پەیڤدارێ ھۆزێن عەرەبێن نەینەوا سوپاسیێن خوە ئاراستەی بەرێز مەسرور بارزانی شیرتکارێ جڤاتا ئاسایشا ھەرێما کوردستانێ کرن، راگەھاندیە کو پێدڤی یە عیراق بھێتە پارچەکرن و ئەڤە دبەرژوەندا ھەموو خەلکی دایە.
ئه‌ڤرۆ نیوز:
زانایێن نه‌ته‌وێن یه‌كگرتى راگه‌هاندن ژ ئه‌گه‌رێ وێ توزا به‌رده‌وام یا ده‌ڤه‌رێن رۆژهه‌لاتا ناڤه‌راست ڤه‌گرتى، زیانه‌كا مه‌زن ب ساخله‌میا مروڤان دگه‌هینیت .
د راپۆرته‌كێ دا كو بى بى سى به‌لاڤكریه، ئاماژه ب وێ یه‌كێ كریه كو سالانه حه‌فت ملیون كه‌س ژبه‌ر كارتێكرنا توزێ دمرن و ئیران و كوێت ل پێشیا وان ده‌وله‌تانه كو كارتێكرنا وێ زێده‌تره ئه‌وژى ژبه‌ر وێ توزا كو ل سووریا و عیراقێ ده‌ستپێدكه‌ت و به‌ره‌ڤ وه‌لاتێ وان دچیت.
ل دووڤ راپۆرتێ خراب ب كارئینانا ئه‌ردى و ژێده‌رێن ئاڤێ و ناكوكیێن به‌رده‌وام یێن ده‌ڤه‌رێ، ئه‌گه‌رێن سه‌ره‌كى یێن پیسبوونا كه‌ش و هه‌واینه.
ئه‌ڤرۆ نيوز:
• یا ل سەر نەخوشێن شەکرێ ئەوێن حەبێن ئەنسولین ب کاردئینن پێدڤیە سەرەدانا نوشدارێ خۆ یێ تایبەتمەند بکەن و ب شێوەیەکَ بەردەوام زێرەڤانیا ئاستێ شەکرێ دناڤ خوینێ دا بکەن.
• کونترولکرنا رێژا شەکرێ دناڤ خوینێ دا نەبتنێ دێ ب رێکا رێکخستنا خوارنێ و دەرمانان بیت، بەلکو پالپشتیێ ل سەر چالاکیا رۆژانە یا مرۆڤی دکەت، لەورا باشترە نەخوشێ شەکرێ دھەیڤا رەمەزانێ دا یێ بەردەوام بیت ل سەر چالاکیا خۆ و پشتی نیڤرۆیان دشێت بێھنا خۆ ڤەدەت.
• یا پێدڤی یە ل سەر نەخوشێن شەکرێ دھەیڤا رەمەزانێ دا ھەر ل دووڤ ریجێما خۆ یا تایبەت کاربکەن و بلا ھندەک شەکر دگەل وان بیت داکو ل دەمێ ھەست ب کێمبوونا ئاستێ شەکرێ دکەن وەکو وەستیان، گێژبوون، سەرئێشان و خوھدان یان ھەستکرن ب ساربوونێ دکەن و دیتنا وان شێلی دبیت ل وی دەمی وێ شەکرێ ب کاربینن.
• دەربارەی نەخوشێن ئێشا دلی و شەکرێ و گولچیسکان باشترە ( سوسێ) نەڤەخوون ژبەرکو رێژەیەکا بلند یا خوێ و شەکرێ دناڤدا ھەیە.
• ئەو دەرمانێن دھێنە ب کارئینان داکو دەستئاڤا مرۆڤی بھێت، باشترە پشتی فتارێ بخوون و نابیت پشتی پاشیڤێ بھێنە خوارن داکو رۆژیگر ھەست ب تێھنی بوون و ھشکبوونێ نەکەت.
• ئەو نەخوشێن بەرکێن گولچیسکان ھەین، یا باشتر ئەوە دناڤبەرا فتارێ و پاشیڤێ دا گەلەک ئاڤێ ڤەخوون.
ئەڤرۆ، فاتما مزووری:
برینێن ناڤ دەڤی، ئێکە ژ وان نەخۆشیێن تووشی مەزن و بچیکان دبیت، رەنگە د ھندەک دەمان دا، پێدڤی ب سەرەدانا نوشداری ھەبیت، بەلێ ھندەک دەمان ل مال ژی دشیان دایە چارە بکەی، د رێیا پێکھاتێن سرۆشتی دا.
مالپەرێ “رۆتانا” بەحس ل چەند پێکھاتان دکەت کو دشێی ل مال بکاربینیت، بۆ چارەسەریا برینا ناڤ دەڤی، کو ژ ئەگەرێ ھەودانان یان ترسێ یان ژی تێکچوونا کاودانێن دەروونی دروست دبیت.
ھەکە بێشیت دشیان دایە پرتەکا جەمەکێ بدانیە سەر دا کو وێ ئێشانێ کێم بکەت.
ھنگڤین پێکھاتەکێ ب مفایە و دشیان دایە بێخیە سەر برینێ، ھەکە ھەست ب کێمبوونا ئازارێ کر و برین بەر ب باشتر چوو، دووبارە ب کاربینە ھەتا ب ئێکجاری چارە دبیت.
رۆژێ دو جاران ئاڤا خوێ د دەڤێ خوە وەردە.
ئاڤ و داچین تێوەردان د دەڤی دا، چونکو باشترین چارەسەریە بۆ ساخبوونا برینێ.
بکارئینانا گیزا ھندی یان زەیتا گیزا ھندی، بکە سەر برینێ، دا کو ساخ ببیت.
دا کو ساخ ببیت، دشیان دایە کیسەکێ چایا کیسکێن بچووک یا رەش بداینە سەر برینێ.
ھشیاری بکارئینانا فرچێن ددانا یێن نەیێن ساخلەم و رەق ببە.
نيشاندان