ئەڤرۆ نیوز:
ڕێکخراوا ئاشتی و ئازادی بۆ کوردستانێ ڕاپرسیەکا مەترسیدار ل دۆر رەوش و ژیارا کرێکاران ل ھەرێما کوردستانێ ئاشکرا دکەت، ل دووڤ وێ ڕاپرسیێ ژی 68% یا کرێکاران گرێبەستا کارکرنێ ل گەل خودان کاران نینە و 2% ژ کرێکاران تووشی دەست درێژیا سێکسی دبن.
ل گۆرەی ڕاپرسیەکێ کو رێکخراوا ئاشتی و ئازادی بۆ کوردستانێ د کۆنفرانسەکی دا ل رۆژا شەمبی 26/11/2016 ل دۆر رەوشا کرێکاران ل ھەرێما کوردستانێ ب پشکداریا سەندیکا کرێکارێن کوردستانێ و نوونەرێ وەزارەتا کار و کاروبارێن جڤاکی و لایەنێن پەیوەندیدار بەلاڤکری، 85% ژ کرێکاران ھەتا نوکە ئەندامێن سەندیکا کرێکاران نینن.
ل دووڤ وێ راپرسیێ کو پشت بەستن ل سەر بەرسڤا 870 کرێکاران ل دەڤەرێن جودا یێن ھەرێما کوردستانێ کریە، ئاشکرا کریە کو ب رێژا 68% یا کرێکاران گرێبەستا کارکرنێ ل گەل خودان کاران ئەنجام نەدایە، دەربارەی رێژا خویندەواریا کرێکاران ژی ب تنێ 2% یا کرێکاران نەخویندەوارن، لێ ب رێژا 23% یا کرێکاران ئاستێ خواندنا وان سەرەتاییە، رێژا 43% ژی یا کرێکاران ھەتا قووناغا ناڤنجی و ئامادەیی خواندیە و رێژا 32% ئاستێ خواندنا کرێکاران دەرچوویێ زانکۆ یان پەیمانگەھێ نە.
دیسا د وێ ڕاپۆرتێ دا خویا ژی کریە کو ب رێژا 2% ژ کرێکاران تووشی دەستدرێژیا سێکسی دبن، ژ وان ژی 5% روو ب رووی لێدانێ و 4% ژی ژ لایێ خودان کاران ڤە روو ب رووی سڤکاتی پێکرنێ بووینە، دیسا بۆ چارەکرنا ئاریشێن وان ژی ل گەل خودان کاران ب رێژا 47% یا کرێکاران پەنایێ بۆ چارەسەریا جڤاکی دبەن، رێژا 25% پەنایێ بۆ حوکمەتێ و رێژا 14% ژی پەنایێ بۆ سەندیکایێ دبەن و 4% ژی پەنایێ بۆ قانوون و دادگەھان دبن.
ل دۆر باوەریا کرێکاران ب سەندیکا کرێکارن ئاماژە ب وێ چەندێ کریە کو 85% ژ کرێکاران ھەتا نوکە ئەندامێن سەندیکا کرێکاران نینن، ئەگەرێ ئەندام نەبوونا کرێکاران د سەندیکایێ دا 53% ژ کرێکاران بۆچونا وان ئەوە کو سەندیکا یا حزبی یە، 22% ژی وەسا دبینن کو سەندیکا خراب دھێتە ب رێڤەبرن، 17% ژ ئەگەرێ رێگریکرن ل ئازادیا کارێ سەندیکایی نەبووینە ئەندام و 8% ژی ژ کرێکاران بۆچوونا وان ئەوە، ئەو کەسێن ل سەندیکا کرێکاران کار دکەن چ شارەزایی د کارێ سەندیکایی دا نینە.