ئەڤرۆ نیوز:

بەرپرسەکێ وەزارەتا ئەوقافێ و کاروبارێن ئایینی ل کوردستانێ راگەھاند، ھەتا نوکە بەخشێ رادیوا داعشێ ل بەردەرەشێ و سەنگەرێن پێشمەرگەی یێن نێزیکی مووسلێ ب ساناھی دھێتە وەرگرتن و خویاکر ژی کو گۆتارێن ھندەک خوتبەخین و بانگخوازێن ئیسلامی ل کوردستانێ ژلایێ رادیوا داعشێ ڤە دھێنە بەخشکرن.
مەریوان نەقشبەندی رێڤەبەرێ پەیوەندیێن وەزارەتا ئەوقافێ و کاروبارێن ئاینی بۆ ئەڤرۆ گۆت” پێشتر وەزارەتا ڤەگوھاستن و گەھاندنێ ل ھەرێما کوردستانێ تەشویش دانابوو سەر رادیوا داعشێ، بەلێ دیارە داعشێ شەپۆلێن رادیوا خوە یێن گوھارتین”.
دیارکر ژی” رادیوا داعشێ گوتارێن ھندەک مامۆستایێن ئایینی و خوتبەخینێن کوردستانێ کو مە پێشتر ژ کارێ خوتبەخینیێ لاداین، گوتارێن وان بەلاڤ دکەت، دیسا گوتارێن ھندەک بانگخوازێن ئیسلامی ژی بەخش دکەن، بەلێ ئەو بانگخواز فەرمانبەرێن وەزارەتا ئەوقافێ نینن”.
ل دۆر ھژمارا وان خوتبەخین و بانگخوازێن ئیسلامی یێن رێکخستیا داعش ییا تیرۆرستی گوتارێن وان د رادیوا خوەدا بەخش دکەت، مەریوانی گۆت” 4 کەسن کو دو ژوان بانگخوازن و دو خوتبەخینن کو ئەو ھەردو خوتبەخینە ژلایێ وەزارەتا ئەوقافێ ژبەر ھندەک ئەگەرێن دی پێشتر ھاتبوونە لادان و ھەتاکو رادیوا داعشێ دەنگوباسێ لادانا وان خوتبەخینا ژی بەلاڤکربوو”.
ل دۆر چاوانیا گەھشتن و بەلاڤکرنا وان گوتاران بۆ رادیوا داعشێ، ناڤبری دبێژیت” من پرسیار ژ وان مامۆستایێن ئایینی و بانگخوازێن ئیسلامی کریە کو ئایا ھەوە ئاگەە ژوێ چەندێ ھەیە گوتارێن ھەوە ل رادیوا داعشێ دھێنە پەخشکرن و ئایا داعشێ بۆچوونا ھەوە ل دۆر پەخشکرنا وان گۆتاران وەرگرتیە؟ وان ژی ژلایێ خوەڤە بێ ئاگەھیا خوە دیارکر ژ وێ چەندێ و گۆتنە من ( دێ چاوان داعش بۆچوونا مە وەرگریت و مە چو پەیوەندی ب داعشێ ڤە نینە و بۆمە نەخوەشە گۆتارێن مە د رادیوا خوەدا پەخش دکەن)”.
رێڤەبەرێ پەیوەندیێن وەزارەتا ئەوقافێ خویاکر ژی” پێدڤیە ل سەر مامۆستایێن ئاینی دەمێ گوتارێن خوە دخوینن و تێدا رەخنێ ل حوکمەتێ دگرن و بەحسێ گەندەلیێ دکەن، ھندەک بابەت یێن ھەین کو د شەرعی نە و رەنگە دنیایی ژی بن، ھەکە ب بەرپرسیارانە بەحس نەکەی، داعش دێ مفای ژێ وەرگریت، لەوما پێدڤیە ل سەر مامۆستایێن ئاینی و ئەڤە رێنمایەکا وەزارەتا ئەوقافێ یە کو مە بۆ وان ھنارتی کو کارەکی نەکەن داعش مفای ژ گوتارێن وان وەرگریت، بۆ نموونە دبیت رەخنێ ل نەبوونا مووچەی و شێوازێ ب رێڤەبرنا وەلاتی بگرن، بەلێ دڤێ رەوشێ دا دێ داعش مفای ژ وان گوتاران وەرگریت”.