ئەڤرۆ نیوز:

ل گۆر دەزگەهێن راگەهاندنا بریتانیا د ٢٤ دەمژمێرێن بۆری دا ٨٨٨ کەسان ل وی وەلاتی ژ بەر ڤایرۆسێ کۆرۆنا جانێ خوە ژ دەست داینە.

ئەو یەک د دەمەکێ دایە کو ل پرانیا وەلاتێن ئێکەتیا ئورۆپا ب تایبەتی ژی ل ئیتالیا و ئیسپانیا رێژا مرن و تووشبوونا ب ڤایرۆسێ کۆرۆنایێ کێمتر لێ هاتیە.

ئەڤرۆ نیوز:

عەبدولقادر سەلڤی نڤیسەرێ ناڤدارێ تورکیا دیار دکەت کو ب هاتنا ڤایرۆسێ کۆرۆنا دێ ئاریشێن مەزن ل هەموو جیهانێ و ل ئورۆپا ژی دروست بن ب تایبەتی ژی ئاریشێن ئابووری و نها ل تورکیا گەلەک ئاریشە د بیاڤێ ئابووری دا دروست بووینە و پشتی تەمامبوونا کۆرۆنایێ دێ رێ بۆ گوهۆرینێن مەزن ل ئورۆپا و تورکیا ڤەبن.

ناڤهاتی دیار ژی دکەت کو ناکۆکیێن گەلەک مەزن د ناڤ پارتا ئەردۆگانی دا هەنە و رەنگە پشتی کۆرۆنا ل تورکیا نەما وی دەمی گەلەک گوهۆرین دروست ببن.

هەمان نڤیسەر دیار دکەت کو ئەردۆگان د بابەتێ شەرێ ل دژی کۆرۆنایێ دا سەرکەفتی بوویە و رەنگە رێژا دەنگێ پارتیا وی د هەلبژارتنان دا زێدەتر لێ بهێت.

ئەڤرۆ نیوز:

بەرپرسێن وەلاتێن ئێکەتیا ئورۆپا دیار دکەن کو هژمارا تووشبوون و مرنا ب کۆرۆنایێ ل ئورۆپا بەر ب کێمبوونێ ڤە دچیت و ئەو یەک ژی جهێ دلخوشیێ یە و هەموو ئاماژێن نها نیشا ددەن پێلا ئێکێ یا کۆرۆنایێ ل هەموو ئورۆپا بەر ب دووماهیێ ڤە دچیت.

ل ئالیێ دی بەرپرسێن ساخلەمیێ ل ئیتالیا و ئیسپانیا هۆشداریا هندێ ژی ددەن کو رەنگە بەری دووماهیا سالێ پێلەکا دی یا کۆرۆنایێ ل ئورۆپا بەلاڤ ببیت و ژ بۆ هندێ ژی دڤێت هەر ژ نها ڤە ئامادەکاریێن تەمام بهێنە کرن و دەست ب پێرابوونێن پێدڤی ژی بهێنە کرن.

ئەڤرۆ نیوز:

کۆچکا سەرۆک کۆماریا روسیا دیار کر کو سەرۆکێ وی وەلاتی ڤیلادەمیر پوتین ل گەل بەرپرسێن سەربازی کۆمبوویە و د کۆمبوونێ دا داخواز ژ وان هاتیە کرن کو خوە ژ بۆ بەرهنگاریا کۆرۆنایێ بەرهەڤ بکەن.

بەری نها ژی سەرۆکێ روسیا دیار کربوو کو رەوشا وەلاتێ وی سەبارەت ب کۆرۆنایێ باش نینە و رەنگە گەلەک کەس ژ بەر ڤایرۆسێ کۆرۆنا جانێ خوە ژ دەست بدەن.

ئەڤرۆ نیوز:

لیژنا ئابووری یا نەتەوێن ئێکگرتی ل دۆر مەترسیا کۆرۆنایێ ل ئەفریقیا دیار دکەت کو کۆرۆنا رۆژ ب رۆژێ پتر ل ئەفریقیا بەلاڤ دبیت و ئەو یەک ژی نیشا ددەت کو مەترسیا کۆرۆنایێ ل ئەفریقیا وەکو دەڤەرێن دی یێن جیهانێ نابیت و رەنگە ٣٠٠ هزار کەس ل ئەفریقیا ژ بەر کۆرۆنایێ جانێ خوە ژ دەست بدەن.

نەتەوێن ئێکگرتی دیار ژی دکەت کو رەوشا خراب یا ئابووریێ ل ئەفریقیا دێ وەسا کەت کو وەکو پێدڤی د بیاڤێ نوشداری دا هاریکاریا خەلکی نەهێتە کرن و دێ نەخوشی پتر ژ دەڤەرێن دی یێن جیهانێ ل ئەفریقیا بەلاڤ بیت.