ئەڤرۆ نیوز:
قایمقامێ شنگالێ راگەهاند، ب بڕیارا حكومەتا ھەرێما کوردستانێ، قوتابیێن شنگالێ هه‌ڤشێوێ قوتابیێن ھەرێمێ، دێ ل زانکۆ و پەیمانگه‌هێن ھەرێما کوردستانێ هێنه وه‌رگرتن.
مەحما خەلیل، زێده‌تر گۆتیه، ب بریارا حوكمه‌تا هه‌رێما کوردستانێ، قوتابیێن قەزا شنگالێ وه‌كو قوتابیێن ھەرێما کوردستانێ، ئەوێ نمرا وى یا باش بیت و ژ هه‌ژى وەرگرتنێ بیت، دێ ل زانکۆ و پەیمانگه‌هان هێته وه‌رگرتن، دێ هژمارەكا زۆر یا قوتابیێن شنگالێ ل زانکۆ و پەیمانگه‌هان هێنه وەرگرتن.
ئەڤرۆ نیوز:
عیراق و سعودیه گرنگیێ ب په‌یوه‌ندیێن خوه دده‌ن و چه‌ند لێك تێگه‌هشتن ژى ئیمزا كرینه.
ب رێیا ڤیدیۆ كۆنفرانسى، وه‌زیرێ ده‌رڤه یێ عیراق و سعودیێ كۆمبوون و وه‌زیرێ ده‌رڤه یێ سعوودی راگه‌هاندیه، پێشوازیێ ل هه‌موو جۆره هه‌ڤكاریه‌كێ ل گه‌ل ئیراقێ د‌كه‌ین.
وه‌زیرێ ده‌رڤه یێ عیراقێ گۆتیه، وه‌لاتێ وى پێدڤى ب وزا كاره‌بێ هه‌یه ژ ئالیێ سعودی ڤه هه‌تا پێدڤیێن خوه دابین دكه‌ت و لێك تێگه‌هشتن دناڤبه‌را هه‌ردو ئالیان دا هه‌یه و ئه‌و لێك تێگه‌هشتنه دێ هێنه كارا كرن و دێ كار كه‌ن بۆ جێبه‌جێكرنا رێككه‌فتنا گرێدانا تۆرا كاره‌با ئیراقێ ب سعودیێ ڤه.
فوئاد حسێنى گۆتیه ژى، هژماره‌كا لێك تێگه‌هشتنێن دیتر دناڤبه‌را وه‌زاره‌تێن هه‌ردو ئالیان دا هاتینه پێشنیار كرن و گوتۆبێژ كرن د وارێن جۆدا دا، ب تایبه‌تى ژى د وارێن به‌رهنگاربوونا تیرۆرێ، بۆ هندێ داكو مفاى ژ ئه‌زموونا سعودی وه‌ربگرن.
ئەڤرۆ نیوز:
ئالان حەمە سەعید وەزیرێ پەروەردێ یێ حكومەتا هەرێما كوردستانێ چەند بڕیارەك دەرباره‌ى وان فەرمانبەر و مامۆستایان دەرخستینه، یێن گەشتێن دەرڤەی وەلاتی كرین و ژئەگەرێ رێكارێن بەرهنگاربوونا ڤایرۆسێ كۆرۆنایێ نەشیاین ڤەگەرنە سەر كارێن خوه.
ناڤهاتى دایه دیار كرن، ئەو فەرمانبەرێن ژئەگەرێ ڕێكارێن بەرهنگاربوونا كۆرۆنایێ نەشیایین ژدەرڤەی وەلاتی ڤەگەڕن، ماوه‌یێ مانا وان ژدەرڤە دێ هەتا 31/12/2020 وەكو مۆلەتا ئاسایی لدووڤ سەرجەمێ مۆلەتێ بۆ هێتە هژمارتن، بەلێ ئەگەر مۆلەتا سەرجەم نەبیت، ماوێ مانا وان فەرمانبەر و مامۆستایان ژدەرڤەی وەلاتی دێ وەكو مۆلەتا بێ مووچە بۆ هێتە هژمارتن، بەلێ ئەگەر دیسان ڤەنه‌گەریان، لدووڤ بڕیارا پەرلەمانێ كوردستانێ دێ هێنە فەسلكرن.
دەرباره‌ى ماموستایان ژی گۆتیه، ئەو ماوێ نەشیایین بهێنە سەركاری، دێ هەتا 31/12/2020 وەكو مۆلەتا بێ مووچە بۆ هێتە هژمارتن، هه‌كه هەتا پشتی وێ رێكه‌فتێ ڤەنه‌گەریانە سەر كارێ خوه، دێ هێنە فەسلكرن.
ئەڤرۆ نیوز:
پشتى مارك ئێسپه‌ر وەزیرێ بەرگریا ئەمریکا، ژ ئالیی دۆنالد ترەمپێ سەرۆکێ وى وه‌لاتى ژ پۆستێ وى هاتیه دوورخستن، شیره‌تكارێ سیاسه‌تێن ئەمنی، شیره‌تكارێ هەوالگێریا بەرگریێ ورێڤەبەرێ نڤێسینگەها وەزیران دەست ژ کار کێشا.
هه‌روه‌سا پنتاگۆنێ گۆتیه، ل گەل دوورخستنا مارک ئێسپەرى ژ پۆستێ وى شیره‌تکارێ سیاسەتێن ئەمنی، جێمس ئەندرسۆن دەست ژ کارکێشانا خوه پێشکێش کریە و ئەنتۆنی تاتا ل جهێ وى هاتیه دانان.
پنتاگۆنێ دیاركر یە ژى، هەر ئێك ژ شیره‌تكارێن ئاسایشێ و هەوالگێریا وەزارەتا بەرگریێ، جۆزێف کیرنان و رێڤەبەرێ نڤێسینگەها وەزارەتا بەرگریێ، جین ستیوارت دەست ژ کارکێشایه.
دهێته چاڤه‌رێ كرن، هژمارەكا زێده‌تر یا بەرپرسێن پنتاگۆنێ ژ کارێن وان بهێنه دوورخستن، دهێته گۆتان ژى، كو دۆنالد ترەمپ رێڤەبه‌رێن سی ئای ئەی و ئێف بی ئای ژ پۆستێن وان دوور بێخیت.
ئەڤرۆ نیوز:
بەرپرسێ پەیوەندیێن هەرێما كوردستانێ ل گەل كۆمارا ئیسلامیا ئیرانێ ڕاگەهاند، هەتا نوكە بەغدا و تەهرانێ پێدانا ڤیزێ بۆ وەلاتیێن هەڤدو سنوردار كریە، ڤێ چەندێ كێشە بۆ گەشتیارێن هەرێما كوردستانێ ژی دورستكرینە.
عه‌بدوللا ئاكره‌یى زێده‌تر دبێژیت: هەر چەنده ب بڕیارا وەزارتا ناڤخۆیا هەرێما كوردستانێ، هاتنوچوون دناڤبەرا هەرێمێ و ئیرانێدا هاتییە ئاساییكرن، بەلێ وەكو كارڤەدانەك، حكومەتا تەهرانێ پێدانا ڤیزێ بۆ وەڵاتیێن عیراقێ سنوردار كرییە، ڤی هەلویستێ تەهرانێ ژى ئاستەنگ بۆ گەشتیارێن هەرێمێ و ئیرانێ دورستكرینە.
ناڤهاتى گۆت ژى: گوتۆبێژێن وان ل گەل كۆنسۆلخانا كۆمارا ئیسلامی ل هەولێرێ دبەردەوامن، داخواز ژێ هاتییەكرن بڕیارا سنورداركرنا پێدانا ڤیزی بۆ وەڵاتیێن هەرێمێ هەلوەشینن، كۆنسۆلێ ئیرانێ سوز دایە هەموو جورە ئاسانكاریان بۆ وەڵاتیێن هەرێمێ بكەت، بەلێ دهەمان دەمدا، د رژدن ل سەر وێ چەندێ، ئەگەر بەغدا پێدانا ڤیزێ بۆ وەڵاتیێن ئیرانێ وەكو جاران ڤەنه‌گەڕینیت، حكومەتا تەهرانێ ژی یا ئامادە نینە ژ بڕیارا خوه لێڤه ببیت.
ئەڤرۆ نیوز:
وەزارەتا دەرڤە یا ئەمریکا راگەهاند کو رۆژا ١٤ ڤێ مەهێ مایک پۆمپیۆ وەزیرێ دەرڤە یێ ئەمریکا دێ سەرەدانا هەر ئێک ژ وەلاتێن سعوودیێ، ئیماراتێ، قەتەر، ئیسرائیلێ و تورکیا کەت و دێ ل گەل بەرپرسێن وان وەلاتان ل دۆر پرسێن ل دەڤەرێ دانوستاندنان کەت.
وەزارەتا دەرڤە یا تورکیا ژی سەرەدانا وەزیرێ دەرڤە بۆ تورکیا د ڤێ قۆناغێ دا ب گرنگ ل قەلەم ددەت.
ئەڤرۆ نیوز:
حوکمەتا بەحرێنێ راگەهاند کو شازادە خەلیفە بن سەلمان ئال خەلیفە سەرۆک وەزیرێن بەحرێنێ ژ بەر نەخوشیێ ل وەلاتێ ئەمریکا وەغەر کریە.
شاهێ بەحرێنێ فەرمان دا حوکمەتا وی وەلاتی کو حەفتیەکێ ماتەمەنیا گشتی رابگەهینیت و هەروەسا ژ بەر مرنا سەرۆک وەزیرێن وی وەلاتی سێ رۆژان ژی دەوام ل هەموو دام و دەزگەهێن وی وەلاتی هاتە راگرتن.
ئەڤرۆ نیوز:
بەرپرسێن ساخلەمیا ئیرانێ دیار دکەن کو رێژا مرنا ب کۆرۆنایێ ل وی وەلاتی ل گۆر چەند مەهێن بۆری گەلەک زێدە بوویە و ل تەهرانێ رۆژانە ٣٥٠ کەس ژ بەر کۆرۆنایێ دمرن.
ئەو یەک د دەمەکێ دایە کو گەلەک جاران رێکخراوا ساخلەمیا جیهانی دیار کریە کو بەرپرسێن ئیرانێ ئامارا دروست یا تووشبوون و مرنا ب کۆرۆنایێ بەلاڤ ناکەن.
ئەڤرۆ نیوز:
ڤەکۆلینێن زانستی دیار کرینە، ھەر جۆرە خوارنەکێ تایبەتی و مفایێن خوە بۆ لەشێ مرۆڤی ھەنە، شارەزایێن خوارنان بەحسێ ھندەک خوارنان کریە، بۆ ئارامیا مەژی و دەروونی و چالاکیا سکسی ب مفانە.
مالپەرێ ستاندەرد میدیا، بەحسێ ھندەک جۆرێن خوارنان کریە کو پشتی خوارنا وان دێ ھەست ب ئارامیێ کەی، ھەروەسا ماندوبوونێ کێم دکەن و حەزا سکسی زێدە دکەن.
. شوکولاتا رەش
ژبەر ھەبوونا کومەکا مادەیان د پێکھاتەیا وێ دا خانەیێن دەماران رێک دئێخیت و رۆلەکێ بەرچاڤ د بەرھەمئینانا ھۆرموونا دۆبامین دا ھەیە، کو باندۆرێ ل سەر پەیداکرنا ھەستێ خۆشی و تام ژێ دیتنێ ھەیە.
. ھنگڤین
یێ دەولەمەندە ب ڤیتامین بی، ئاستێ ھۆرمۆنا تێستۆسترۆنی د خوینێ دا زێدە دکەت، ھەروەسا کارێ حەزا سکسی لدەف ژن و زەلامان دا زێدە دکەت.
. ھژیر
مادێ دژە ئۆکسانێ و فلافۆنیدات د پێکھاتێ وێ دا ھەیە، مفای بۆ ئارامکرنا مەژی و زێدەکرنا شیان و حەزا سکسی ھەیە.
. ریحان
د کەڤن دا ھندەک نەتەوەیان بۆ زێدەکرنا حەزا سکسی بکار دئینا، ژبلی خۆشیا بێھنێ، تامەکا خۆش ژی ب خوارنێ ددەت و لێدانا دلی ژی ڕێک دئێخیت و زڤرینا خوینێ ژی باشتر دکەت.
ئەڤرۆ نیوز:
حوکمەتا عیراقێ جەخت ل پابەندبوونا بەغدا و هەولێرێ دکەت ب رێککەفتنا دناڤبەرا وان دا، پەیڤدارێ کازمی دبێژیت، چ نەهاتیە گوهۆرین و دێ مووچێ فەرمانبەرێن هەرێما کوردستانێ هەتا پەسەندکرنا بودجێ 2021 هنێرین.
ئەحمەد مەلا تەلال، پەیڤدارێ سەرۆکوەزیرێن عیراقێ، د کۆنفرانسەکێ رۆژنامەڤانی دا راگەهاند، هەتا نوکە حوکمەتا عیراقێ و هەرێما کوردستانێ پابەندی ب وێ ئ رێککەفتنێ یابۆ قۆناغەکێ دناڤبەرا وان دا هاتیە کرن، دەمێ وێ ژی سێ هەیڤن، سەبارەت ب دابینکرنا پشکەک ژ مووچێ فەرمانبەرێن هەرێما کوردستانێ د بەرامبەر پابەندبوونا حوکمەتا هەرێما کوردستانێ ب بەشە نەفتێ و رادەستکرنا 50٪ یا داهاتێ گومرکان.
هەروەسا گۆتیە، ئەو رێککەفتنە یا بەردەوامە و کار پێ دهێته کرن هەتا پرۆژە قانوونا بودجێ 2021 دهێتە پەسەند کرن، دێ هەیڤانە 320 ملیار دیناران بۆ هەرێمێ رەوانە کەین.
نيشاندان