ئەڤرۆ نیوز، بارزان مزووری:
ژێدەرەکێ نێزیکی روودانێ ل ناحیا کەلەکچی، بۆ ئەڤرۆ نیوز گۆت: ل دەمژمێر ۱۰ شەڤ ۱۰/٤/۲۰۲۰ دناڤ سەنتەرێ ناحیا کەلەکچی یا سەر ب قەزا شێخان ڤه شەرەک دناڤبەرا دو بنەمالا روودا، د ئەنجام دا دو کەس هاتنە کوشتن و کەسەک ژی بریندار دبیت، پشتی هێزێن ئێمناهیێ گەهشتینە جهێ روودانێ شەر هاتە کونترۆل کرن و تەرمێن هەردو کوشتیان بۆ نەخوشخانا شێخان یا گشتی هتینە ڤەگۆهاستن کەسێ بریندار ژی بۆ نەخوشخانێ هاتە ڤەگۆهاستن.
ناڤهاتی خویاکر ژی، ئەڤ کێشە یا بەری سێ سالایە و دڤێ کێشێ دا هەتا نوکە پێنج کەس هاتینە کوشتن ژ هەردو لایان.
ئەڤرۆ نیوز ، مەحمود نهێلی:
رێڤەبەرێ ساخلەمیا قەزا ئامێدیێ بۆ ئەڤرۆ نیوز دیار کر، سوبەهی شەمبیێ ۱۱/٤/۲۰۲۰ چاردە رۆژێن کەرەنتینا کۆمەلگەها قەدشێ دێ ب دووماهی هێن، هەکه د ئەنجامێن پشکنینێن سوبەهی دا چ پوزەتیڤ دەرنەچوون دێ کەرەنتینا کومەلگەهێ ژی ب داوی هێت.
د. شاکر عەبدولعەزیز، رێڤەبەرێ ساخلەمیا قەزا ئامێدیێ ئاشکرا کر، سبەهی ژڤانێ دووماهیێ یێ راکرنا کەرەنتینا کۆمەلگەها قەدشێ یا سەر ب قەزا ئامێدیێ ڤە یە.
گۆت ژی : ئەڤرۆ مە ل کومەلگەها ناڤبری ٤۱ پشکنین د ناڤ خەلکی دا ئەنجامداینە و مە فرێکرینە دهوکێ و هەکە ئەنجام د باش بن و چ پوزەتیڤ دەرنەچوون دێ کەرەنتین ب داوی هێت.
ئاشکرا کر ژی، هەکە خودێ نەکەت و ئەنجام دباش نەبن دێ چاڤەرێ بەرسڤا پارێزگەرێ دهوکێ و رێڤەبەرێ گشتی یێ ساخلەمیێ کەن کا دێ چ رێکارێن نوو گرنە بەر.
ناڤهاتی تەکەز کر، تا نوکە وان پتری ژ ۱٥۰ پشکنینان ل دەڤەرێ ئەنجامداینە پترین ژ وانا ل کومەلگەها قەدشێ بووینە و سوپاس بۆ خودێ ب تنێ ئەنجامێ دو ژ وانا پوزەتیڤ بوونە و نوکە رەوشا وان یا باشە و ل نەخوەشخانەیێ هاتینە دەرێخستن.
رێڤەبەرێ ساخلەمیا ئامێدیێ خویاکر، خەلکێ دەڤەرێ گەلەک هاریکار بووینە ل گەل مە، لەوما ژی پێشبینی دهێتە کرن، رۆژا شەمبیێ قوناغا کەرەنتینا قەدش سەرکەفتیانە ب دوماهی بهێت.
ئەڤرۆ نیوز:
رێڤەبەرێ ساخلەمیا هەولێرێ راگەهاند، 11 تووشبوویێن کۆرۆنا یێ چێبوون و ب ڤێ چەندێ سەرجەمێ گشتی یێن ئەوێن ب کۆرۆنا یێ ل هەولێرێ چێبووین گەهشتنە 40 کەسان.
د. بژار موسا عەلی، پەیڤدارێ رێڤەبەریا گشتی یا ساخلەمیا هەولێرێ گۆت، ل هەولێرێ 11 تووشبوویێن ڤایرۆسێ کۆڕۆنا یێ پشتی وەرگرتنا چارەسەریێن نۆشداری ب تەمامی چێبووینە و بارێ ساخلەمیا وان تەمام جهگیر بوویە و هاتینە رەوانەکرن بۆ مال.
ئەڤرۆ نیوز:
وەزارەتا ساخلەمیا هەرێما کوردستانێ تووشبوویەکا دیتر ب کۆرۆنا یێ ل سلێمانیێ راگەهاند، کو ژنەکا د ژیێ 65 سالیێ دایە.
هەروەسا گۆتیە، د بەردەوامیا پشکنینان و لێگەریانێ لدووڤ گومانلێکریان، تووشبوویەکا نوو ب ڤایرۆسێ کۆرۆنا یێ ل سلێمانیێ هاتیە دەست نیشانکرن، کو ژنەکا د ژیێ 65 سالیێ دایە و خۆجها باژێرێ سلێمانیێ یە.
ئەڤرۆ نیوز:
وه‌زاره‌تا ڤەگوهاستن و گه‌هاندنا حكومه‌تا هه‌رێما كوردستانێ راگه‌هاند، ده‌ستهەلاتا فرۆكه‌ڤانیا مه‌ده‌نی یا عیراقی دەمێ راگرتنا گه‌شتێن ئەسمانی یێن عیراقێ و هه‌رێما كوردستانێ هەتا 18 ڤێ هەیڤێ درێژ كرن.
ده‌قێ راگه‌هاندنا وه‌زاره‌تا ڤەگوهاستن و گه‌هاندنێ:
د نڤیسارەکێ دا ده‌ستهەلاتا فرۆکه‌ڤانیا مەدەنی یا عیراقی بۆ جارا سیێ دەمێ راگرتنا گەشتێن ئەسمانی ل سه‌رجه‌م فرۆکخانێن عیراقێ و هەرێما کوردستانێ هەتا رۆژا ٢٠٢٠/٤/١٨ درێژ کرینە.
ئەڤ بریاره گه‌شتێن هاتنوچوونا فرۆکێن هەیڤا سوور و سەربازى و هاریکاریێن ساخلەمیێ و بارهه‌لگرێن (کارگۆ) ڤەناگریت.
ئەڤرۆ نیوز:
بەرۆڤاژی په‌یاما دۆنالد تره‌مپی، شاره‌زایێن نۆشداری دبێژن: كۆرۆنا ب گه‌رمێ ژناڤ ناچیت و دێ به‌رده‌وام بیت ژ گه‌شه‌كرنێ.
پێشتر دۆنالد تره‌مپێ سەرۆکێ ئەمریکا گۆتبوو، كو ب هاتنا گه‌رمێ كۆرۆنا خوا ناگریت و دێ ژناڤ چیت، به‌لێ ئه‌و گۆتنا سه‌رۆكێ ئه‌مه‌ریكا ژ ئالیێ زانستی ڤە بەرۆڤاژی هاتیە سه‌لماندن.
د. ویلیام شاڤنز، شاره‌زایەکە ل سه‌نته‌رێ نۆشداری ل زانكۆیا ڤاندربیلت، راگه‌هاندیه، نابیت پشت ل سەر هاتنا گه‌رمێ ببه‌ستین، چونكی دبیت ڤێ چەندێ مفا یێ خوە نەبیت و ب تنێ دابرانا جڤاکی و كه‌ره‌نتین چاره‌سه‌رن.
ئەڤرۆ نیوز:
وەزارەتا ساخلەمیا عیراقێ راگەھاند، د دەمێ شەڤ و رۆژەکێ دا ۳٤ حالەتێن نوو یێن توشبوون ب کۆرۆنا یێ و ئێک حالەتێ گیان ژ دەستدانێ و ٤٥ حالەتێن چێبوونێ ھاتنە تۆمار کرن.
ئەڤرۆ وەزارەتا ساخلەمی و ژینگەھا عێراقێ راگەھاند، د دەمێ ۲٤ دەمژمێرێن بوری دا 34 حالەتێن نوو یێن توشبوون ب کۆرۆنایێ ھاتینە تۆمار کرن ، ب جورەکێ ۱۱ ل بەغدا و ۱۰ ل واست، پێنج ل بەسرە ، سێ ل کەربەلا، سێ ل نەجەف، ئێک ل سەلاحەدین و ئێک ژی ل موسەنا.
گۆت ژی، حالەتەکێ گیان ژ دەستدانێ ل بەغدا ھاتیە تۆمار کرن.
ئەڤرۆ نیوز، عەلی حاجی:
سەروکێ لژنا کارگێریا تایفا ئەرمەنان ل زاخۆ بۆ ئەڤرۆ نیوز دیار کر، ب هەلکەفتا هاتنا جەژنا رابوونێ یا حەزرەتێ مەسیح ژ ئەگەرێ ڤایروسێ کورونایێ رێ و رەسمێن ب کوم ناهێنە ئەنجام دان.
زێدەتر داود ماردیروسیان گوت : ل روژا ئێکشەمبیا بهێت جەژنا رابوونێ یا حەزرەتێ مەسیح ل دووف سالناما ئەرمەنان و ژبەر بەلاڤ بونا ڤایروسێ کورونایێ و پێگری کرن ب رێنمایێن حکومەتا هەرێما کوردستانێ و مەترانیا ئەرمەنیێن ئەرپوژوكس بو پاراستنا ئیمانداران ژ وی ڤایروسی بریار هاتیە رێ و رەسمێن ب کوم ب هەلکەڤتا جەژنا رابونێ ل دێرێن ئەرمەنان ل کوردستانێ ناهێنە گێران،لەورا داخازێ ژ هەمی گەلێ خوەیێ ئەرمەن دکەین ل کوردستانێ د مالێن خوە دا ل روژانێن جەژنێ دوعایێن دوور کرنا ڤی ڤایروسی ژ هەمی جیهانێ بکەن دا کو رەوشا جاران ڤەگەریتە دناڤ باوەشا کوردستانێ و جیهانێ دا و هەر دیسان ب رێیا پەیوەندیێن تەلەفونی و تورێن جڤاکی جەژنێ ل ئێک پیروز بکەن ژبو سەرەدانێن مالا دویر بن دا کو د پاراستی بن ژ ڤی ڤایروسی.
و گوت ژی : وەکو گەلێ ئەرمەن ب تایبەتی ئەرمەنێن ل زاخۆ سوپاسیا حکومەتا هەرێما کوردستانێ دکەین ب دەزگایێن ئەمنی و ساخلەمیێ باژێرڤانیێ ژبەر وی رولێ ئەکتیف گێراین د پاراستنا وەلاتیان دا بێ جیاوازی و هیڤی خازین ئەڤ جەژنە ببیتە جەژنا ناڤ چونا ڤایروسێ کورونایێ و ئێدی ئەم ب دیتنا کەس و کار و خوەشتڤیێن خوە شاد ببین و خوەشتڤیێن خوە ژ دەست نەدەین .
نيشاندان