ئەڤرۆ نیوز:
دەمێ ھەیڤا رەمەزانێ ب سەر مەدا دھێت، حەزدکەین سفرا مەیا خوارنێ یا پری خوارنێن ب تام بیت، کەیفا مە ب خوارنێ دھێت و خێزان کۆمڤەدبن، تشتێ سەرەکی خوە ل سەرێ مە بدەت، دێ چ فتارە ئامادەکەین؟ چونکو پتریا خێزانێ ب تنێ وی دانی خوارنێ دخوون، ھزر دکەن دێ سەنگێ خوە پارێزن و بەژنا خوە زەعیف کەن، ئەرێ تە جارەکێ ئەو ھزر کریە و تە مفا ژێ وەرگرتیە؟
ڤەکولین دیاردکەن، یا باشتر ئەوە تو ھزر بکەی دێ چاوا فتارا تە یا نموونەی بیت، نەکو دانێ ئێکانە بیت، خوارنا ھەڤسەنگ و ساخلەم دێ ھەموو ژێدەرێن سەرەکی یێن خوارنێ بۆ لەشێ تە دابین کەت، بێی کو کالوری و پلێن گەرماتیێ زێدە ببن کو د ئەزەل دا تو پێدڤی ژێرا نینە، بەروڤاژی وێ فتارا کو کەمیەکا مەزن یا خوارنێ تێدا بیت و ببیتە ئەگەرێ زەحمەتکرنا ھەناسێ.
• خوارنێن ساخلەم ھەلبژێرە:راببە ب ھەلبژارتنا خوارنێن ساخلەم ژ ھەموو کۆمێن خوارنێ، ئانکو کۆما دانکا، زەرزەواتی، فێقی، گوشتی و شیری و بەرھەمێن وی، ھەر ئێکی ب جوداھیا رەنگا و ل دووڤ شیانا، خوارنا خوە ل دووڤ کۆما وێ بخوە ھەلبژێرە، بۆ نموونە تو دشێی نانێ رەش و مەعکەروونا و برنجی ب ھەلبژێری، دەما دەلیڤە ژی ھەبیت گەلەک زەرزەواتی بخو و دو جارا فێقی ژی، بەلێ ل کۆما گوشتی، تو دشێی گوشتێ سۆر و کێم روین و ماسیا و مریشکا بێ پیست ب ھەلبژێری، شیرێ پری روین ب شیرەکێ کێم روین ب گۆھوری کو کاکلسیومێ پێدڤی بۆ ساخلەمیت ھەستیا تێدا ھەبیت و کالوری کێم تێدا ھەبن، ھەروەسا کێم زەیتێ و شریناھیا ب کاربینە داکو تامەکا خوشتر بدەتە خوارنێ.
• ئالاڤێن کەلاندنا ساخلەم ب کاربینە: فەتیرە و سمبوسک د تام خوەشن، بەلێ ل شوونا تو ب قەلینی د فرنێ دا چیکە، کەلاندن ل سەر بخارێ باشترە و ڤیتامینان دخوارنێ دا دھێلیت، بەلێ ھەکە ل سەر ئاگری ب قەلینی دێ بھایێ خوە یێ خوارنێ ژدەست دەن، گەلەک زەرزەواتا ل سەر فتارێ بدانە و خوێ و روینا کێم بکە، داکو ساخلەمیا دلێ تە و یا گشتی بھێتە پاراستن، شوربێ ب گرنگی وەربگرە داکو شلەمەنیا دلەشی َ تەدا زێدەبکەت، ھندی رویشال و کانزا و ڤیتامینا ژی پتر وەربگری دێ بەرگریا لەشێ تە بھێزتر کەڤیت.
• چەنداتیا خوارنێ رێک بێخە: ھندی خوارن پتر بیت، ھژمارا سەنگێ تە ژی ل سەر مێزانیێ دێ پتر لێ ھێت، ھەروەسا خوارنا زێدە دێ مەعیدا تە بەرفرەە کەت لەورا باشترە خوارنێ ب ھەڤسەنگی بخوی، ب تایبەت لفتارێ.
• بھێلە دانێن خوارنێ پشکەکا گرنگ بن ژ فتارا تە: ساخلەمیا خوە بکە سێ پشک، پشکا ئێکێ سێ چارێکێن وێ ب خوارنێن سڤک پر بکە و چارێکەکێ بھێلە بۆ گوشتی و نیڤەکێ ژی بھێلە بۆ زەلاتێ، ب ڤێ رێکێ دێ ھەموو پێدڤیێن خو ژ خوارنێ وەرگری و کالوژی زێدە نابن.
• خوارنا ھەمە جور بخو: ھەکە رۆژانە تو جورەکێ خوارنێ بخووی، لەشێ تە پێدڤیا خوە ژ خوارنا پێدڤی وەرناگریت، ھندی فتارە یا ھەمەجور بیت دێ مفایێن وێ یێن ساخلەمیێ پتر بن، لەورا ھەر چ نەبیت حەفتیانە ھەموو جورێن خوارنا ب کاربینە.

ئه‌ڤرۆ نيوز:

ھندەک جهـ و ھندەک رەفتار ئەگەرێ سەرەکی نە کو زیانێ ل ساخلەمیا مە دکەن و ئاریشە ئەوە ئەم وان کاران ئەنجام ددەین و مە چ پێزانین ل سەر نینن و دەمێ ئێک پرسیارێ ژ مە دکەت ئەم نزانین چاوان دێ بەرسڤا وی دەین.

پیسترین و نەباشترین جهـ د فرۆکێ دا پشتا فرۆکێ یە:
ئەگەر ل دەمێ گەشتوگوزارێ دلێ هه‌وە رادبیت و عێلنجی خۆ ل هه‌وە ددەن، پیسترین و نەباشترین جهـ د فرۆکێ دا ئەوە ل دەمێ ل پشتا وێ سوار دبی، ھەلبەت ھندی ھوون ژ نیڤەکا فرۆکێ ببورن دێ پتر ھەست ب لڤینا فرۆکێ کەن، ژ بەر کو پشتا وێ درێژترە ژ پێشیا وێ، ھێدمە و لڤین ل وێرێ پترە و مرۆڤ پتر ھەست پێ دکەت.
ئەگەر ھات و گەشتا ب فرۆکێ بێھنا تە تەنگ کر و تو نەچار بووی ل فرۆکێ سوار ببی، ھندی دشیان دابیت جھەکێ نێزیکی شوفێری دەستنیشان بکە، ژ بەر کو دێ گەلەک سڤکتر کەڤیە رێکێ.

جھێ ژ ھەمیا پیستر بۆ دانانا فرچێن ددانا ل سەر لایێ دەست شوویێ یە:
پێدڤیە ھوون بزانن کو پیسترین جهـ بۆ دانانا فرچێن ددانا ل سەر لایێ دەستشوویێ و بانیویێ و دەستشوو و دەستئاڤا د ناڤ ژوورا نڤستنێ دایە.
پروفیسور (تشوک گیربا) ل زانکویا ئەریزونا دبێژیت: د ناڤ ھەر سەنتیمەترەکا چوارگوشە یا دەستشوویێ و بانیویێ دا ٣,٢ ملیون میکروب دژین، ئەڤ ژمارە گەلەک پترە ژ مارا میکروبێن د ناڤ دەستئاڤێ دا دژین، ھەروەسان ل دەمێ دەستئاڤ دھێتە پاقژکرن، چبکێن وێ ئاڤێ دگەھنە ھەموو سەرشوو و دەستشوویێن نێزیک و ب ڤێ رێکێ ئەو میکروب دھێنە ڤەگوھاستن بۆ ناڤ فرچێن ددانان دا و ئەگەر ھات و تە بانیو و دەستئاڤ د ناڤ ژوورا نڤستنێ دا ھەبن، ھشیاربە فرچێ خۆ یێ ددانا بکە د ناڤ سندوقەکێ دا کو بھێتە دائێخستن.

پیسترین جهـ بۆ ھەلگرتنا بەرمایکان ئاڤ تەزینکە (سەلاجە):
ئەگەر تو گەلەک خوارنا کەل بکەیە دناڤ ئاڤتەزینکێ دا نەدوورە تووشی ژەھراویبوونێ ببی، بیتەر سیندەر، رێڤەبەرێ پەیمانگەھا کارگێری و تەکنولوژیایێ دبێژیت: خوارنا کەل دەمەکێ درێژ دڤێت ھەتا د تەزیت، یا باشتر ئەوە خوارنێ پشتی ل سەر ئاگری رادکەی دەمژمێرەکێ بھێلە ژدەرڤە و پاشی بکە دناڤ ئاڤتەزینکێ دا.

پیسترین جهـ بۆ ئەنجامدانا راھێنانێن وەرزشی ل بەرامبەر قودیکا رووناھیێ یە:
ئەو ڤەکولینا ل زانکویا ماکماستەرز ھاتیە ئەنجام دان دیارکریە کو ھندی مرۆڤ یێ دوور ژبەرچازڤان پتر پالپشتی ھەیە کو راھێنانێن وەرزشی ئینجام بدەت.
ڤەکولینێ تەکەز ل سەر وێ چەندێ کر کو ل بەر قودیکا رووناھیێ مرۆڤ کێماسی و عەیبێن لەشێ خۆ دبینیت و ئەڤە نابیتە پالپشتی کو مرۆڤ بەردەوامیێ ب راھێنانێن وەرزشی بدەت، بەلکو بەروڤاژی دبیتە ئەگەرێ نەئارامی و ئالوزیا مرۆڤی.

پیسترین جهـ بۆ دانانا تێلەفزیونێ ل بەرامبەرمێزا خوارنێ یە:
تێلەفزیون دوژمنەکێ سەرەکی یە کو مرۆڤ بەزن زراڤیا خۆ ژدەست بدەت، ئەو بیردانکا مرۆڤی ژ خوارنێ دوور دکەت و مرۆڤ ھزر ناکەت کا چەند خوارن خواری یە، بۆ نموونە ئەو ڤەکولینا ل سالا ٢٠٠٦ێ ھاتیە ئەنجام دان دیارکریە کو ل دەمێ تێلەفزیون ل ھەمبەر مێزا خوارنێ بیت مرۆڤ زوی ب زوی خوارنێ دخۆت و ئەو کەسێن ل بەرامبەر تێلەفزیونێ خوارنێ دخون ب رێژا ٧١% پتر خوارنێ دخوون.